“Ol Bigfala Presen blong Mi,” Liahona, Jenuware 2024.
Ol Voes blong Ol Lata–dei Sent
Ol Bigfala Presen blong Mi
Stap mekem olsem wan Lata-dei Sent i lidim wan man blong kasem baptaes mo wan niu laef long gospel blong Jisas Kraes.
Ol droing oli kam long Ben Simonsen
Wok blong mi olsem Man blong Kuk i laef blong mi. Mi travel long wol, mi stap kuk long ol ekspensiv hotel mo ol kru sip. Mi joenem wan gudfala tim blong kuk we i winim plante kompetisen blong kuk long plante kantri.
Wantaem mi stap longwe long hom blong tri yia. Mama blong mi plante taem bae i ringim mi wetem wota blong ae mo talem mi blong kam hom.
Wan dei long Milan, Itali, ples we mi gat kontrak blong kuk long wan hotel, mi mitim ol fultaem misinari long wan bigfala kros rod blong stesen. Oli talem long mi abaot Jos Ia blong Jisas Kraes blong Ol Lata-dei Sent, mo serem sam gospel prinsipol. Mi enjoem speseli wanem we oli tijim long mi abaot famli.
Ol misinari oli givim long mi wan kopi blong Buk blong Momon, mo askem mi blong prea from. Oli givim mi wan pamflet tu wetem ol instraksen blong olsem wanem blong prea.
Mi glad blong gobak long hotel blong mi, mi go insaed long rum blong mi, mi prea mo stat blong rid. Moa mi ridim Buk blong Momon, moa mi wantem blong rid. Sore tumas, wok i holem taet mi blong stap luk ol misinari bakegen. Taem we kontrak blong mi long hotel i finis, mi gobak long hom long Bari, ples we mi stat blong stap kuk long wan nara hotel.
Wan dei long hotel restoron, wan nara man blong kuk, folem risen we i no stret i traem blong deit wetem sam long ol woman we oli stap givim seves blong kakae, long ples ia. Hem i kros from ol woman we oli stap givim seves blong kakae, we oli Ol Lata-dei Sent, oli no wantem go aot wetem hem.
Mi tingbaot ol misinari we mi bin mitim long Milan, mi talem long man blong kuk se ol woman we oli stap givim seves blong kakae oli gat raet blong no folem hem.
“?Yu tu yu wan Momon ?” hem i askem.
From mi laekem ol prinsipol we ol misinari oli bin tijim mi mo from mi filim gud blong stanap long saed blong ol woman we oli stap givim seves blong kakae mi ansa bak “Yes.”
Nekis taem man blong kuk i luk ol woman we oli stap givim seves blong kakae, hem i talem long olgeta se mi mi wan Lata-dei Sent. Oli bin glad tumas. Taem mifala i kam tugeta blong lanj, oli stat blong askem mi ol kwestin abaot Jos long Milan. Mi talem long olgeta abaot siti mo se mi bin mitim ol misinari long ples ia. Taem lanj blong mifala i kam, mi pusum han from wan klas blong waen antap long tebol.
“?Wanem ia yu stap mekem, bae yu dring waen?” wan woman we oli stap givim seves blong kakae i askem.
?Wan samting i rong wetem hemia? Mi talem.
“?Yu yu aktiv?” narawan i askem.
“?Long wanem wei?” Mi talem.
“Yu bin luk olsem wanem taem yu kasem baptaes?” oli askem.
“Mi no tingbaot,” mi talem long olgeta. “Mi gat wan manis nomo”
Oli kros tumas from oli ting se mi stap mekem fani long olgeta. Mi talem gud long olgeta se mi no stap jok. Mi talemaot long olgeta se mi no wan memba blong Jos, be mi talem long olgeta se mi laekem Buk blong Momon mo ol gospel prinsipol we mi bin lanem. Afta mi askem olsem wanem mi save lanem moa abaot jos blong olgeta.
I no longtaem ol woman we oli stap givim seves blong kakae oli introdiusum mi long ol misinari. Ol no save bilivim taem mi finisim ol lesen mo kasem baptaes.
Man blong raet i glad blong givim famli foto ia
Wetem baptaes blong mi, laef blong mi i jenis. Mi lanem se yu no save gat wan leg long wol mo wan leg insaed long gospel. Mi lanem se wok i no wan moa impoten samting long laef. Mi lanem se Lod mo famli blong mi oli kam faswan. Long en, mi andastanem sore we mama blong mi i filim taem mi no stap, mo mi askem hem blong fogivim mi.
Mi stop blong stap travel long nara kantri, mi mared long Bern Switselan Tempol, statem wan famli, mo kasem wan wok blong stap kuk long wan lokol hospital, long ples ia mi yusum ol talen blong mi blong helpem ol sik pipol blong oli kam gud. Noa ia mi lukluk long ol man risos long hospital. Blong stap wok long lokol i givim mi taem blong spenem wetem famli blong mi mo ol Jos koling.
Long dei ia we mi go long tempol mo kasem endaomen blong mi tu yia afta long baptaes blong mi, mi bin lavem wok mo tabu fasin blong tempol we i stap. Taem papa blong mi i ded fo yia afta, mi bin harem nogud. Hem i bin hiro blong mi. Tangkyu long gospel blong Jisas Kraes, mi save se hem i stap laef yet.
Taem mi go insaed long selestial rum afta we mi mekem wok blong bihaf papa blong mi, mi filim han blong hem raon long mi. Long taem ia, mi save se papa blong mi i akseptem gospel mo lav we Lod i gat long ol pikinini blong Hem.
Yumi Ol Lata-dei Sent i gat blesing blong save tru gospel. Mi glad long olsem wanem i jenisim laef blong mi. Gospel i ples we mi faenem tru hapines long hem. Gospel mo famli blong mi i ol bigfala presen blong mi.