“Ol Kos Blong Fasin blong Stap Dipen long Yuwan: I Konektem Faenens wetem Trutok blong Gospel,” Liahona, Jenuware 2024.
Ol Kos blong Fasin blong Stap Dipen Long Yuwan: I Konektem Faenens wetem Trutok blong Gospel
Ol kos blong fasin blong stap dipen long yuwan i helpem olgeta we oli tekpat blong karem laet long saed blong spirit i go long ol nid blong olgeta long saed blong faenens.
Sam instraksen blong Lod bifo i go long ol pikinini blong Hem i abaot fasin blong stap dipen long yuwan. Insaed long Olfala Testeman Lod i bin talem long Adam mo Iv, “Oltaem long laef blong yu, bambae yu stap hadwok tumas, yu stap swet, blong mekem graon ya i karem gudfala kakae” (Jenesis 3:19). Mo i go long ol pikinini blong Isrel, Hem i talem, “Yufala i gat sikis dei blong mekem ol wok blong yufala” (Eksodas 20:9).
Tedei, ol sponsa grup blong fasin blong stap dipen long yuwan long jos raon long wol oli stap helpem ol pikinini blong God blong kam antap long saed blong edukesen blong olgeta, Stap dipen moa long paoa blong filing blong yu blong winim hadtaem, faenem gudfala ol wok. statem ol bisnis, mo—olsem we ol eksperiens ia oli soem—mas yusum gud faenens blong olgeta.
Stap Pem Taeting long wan Inkam.
Long taem blong mared blong hem, Deborah, blong Michigan, YSA, i neva gat wan problem. Be afta we hem mo man blong hem i seperet, ol bil blong pem i kam moa had blong pem. Nomata se Deborah i enjoem blong stap go long tempol oltaem, hem i stat blong fesem hadtaem blong pem taeting blong hem mo stop blong stap go long tempol.
Hem i askem help long bisop blong hem, we i talem long hem abaot klas blong fasin blong stap dipen long yuwan, blong stap manejem gud faenens blong yuwan, we i stap tekem ples long stek blong hem. Deborah i agri blong go, be fastaem hem i no luksave risen blong go: “Blong talem tru, mi talem long miwan, mi no save from wanem mi stap ia. Mi save olsem wanem blong bajet gud mane blong mi. Mi bin gat wan bajet long ful laef blong mi.
Deborah i mit wetem grup mo wan we i lukaotem grup ia. Blong tu aoa long wan wik, tugeta, oli lanem abaot ol samting long saed blong bodi we oli had blong faenens (olsem oganaesem wan bajet) mo ol samting we oli had long saed blong spirit blong faenens (olsem stap wan fetful man blong lukaotem gud inkam) “Mi neva konektem tufala ia tugeta long wei we klas ia i konektem tufala” Deborah i talem.
Deborah i filim se kavenan blong hem wetem Papa long Heven i helpem hem blong lanem olsem wanem blong mekem Hem i pat insaed long ol desisen blong faenens blong hem. “Papa blong mi long Heven i bin oltaem stap wetem mi. … Mi mas mekem Hem i tekpat long evri samting.”
Taem Deborah i folem smol voes mo daereksen we hem i kasem long grup blong fasin blong stap dipen long yuwan, hem i save putum long saed mane blong taeting, pem ol bil mo iven sevem mane, yet wetem evri samting oli no leftemap mane blong hem.
Presiden Heber J. Grant (1856–1945) i testifae se i gat moa we i save mekem wetem haf inkam we i stap afta we yu pem taeting mo i save mekem wetem evri amaon bifo blong pem taeting: “Mi talemaot witnes … se man mo woman we i ones stret wetem God we oli pem taeting blong olgeta oli… testifae … se God i givim waes long olgeta blong yusum gud haf mane blong naenti pesen ia we i bin stap, mo i bin gat bigfala valiu long olgeta, mo oli bin mekem moa wetem bitim we sapos oli no bin ones wetem Lod.”1
Deborah i kasem ol blesing tugeta long saed blong bodi mo spirit” (Mosaea 2:41) taem hem i kipim loa blong taeting mo laef folem ol prinsipol blong gospel blong bajet blong hem. Daereksen we i kam long grup blong fasin blong stap dipen long yuwan mo insperesen we i kam long Tabu Spirit i soem wan wei long hem blong kasem wan tempol rekomen mo gobak long tempol. “Evri samting we mi talem se mi no save mekem, Hem i soem long mi se mi save mekem hemia mo moa long hemia” hem i testifae. “Wanem we yu mekem tedei i talemaot fiuja blong yu, mo mi wantem fiuja blong mi blong mi save go insaed long Detroit Tempol mo stat mekem wok blong ol pupu blong mi bakegen.”
Berry mo Light Chu i glad blong serem foto ia.
Stap Kamaot long Kaon
Berry Chu blong Medel Taipei Stek long Taiwan i nidim waes we i go moa long andastaning blong hem afta we hem i mekem wan invesmen we i no bin go gud, we i mekem hem i gat wan bigfala kaon. Situesen i stopem Berry blong stap muv i go fored Be Berry i putum tingting blong hem i stap daon mo tanem hem i go long Papa long Heven tru long prea. From prea ia, hem i kasem strong tingting blong talem long hasban blong hem wanem i bin hapen. Wetem bigfala sore mo mo tingting i stap daon, hasban blong Berry, Light Tsai, i leftemap tingting blong hem se bae oli faenem wei mo winim kaon ia. Tugeta, Light mo Berry i prea blong lukaotem gaed long Lod.
Berry mo Light i filim se oli save kasem blesing long lesen blong fasin blong stap dipen long yuwan blong Jos blong ol faenens blong tufalawan. Nomata long bigfala kaon, tufala i developem wan plan blong pembak. Wetem help blong lesen, tufala i lanem blong “putum taeting i kam faswan mo … blong manejem ol faenens long wan wei blong god,” Berry i talem. “Yumi lanem tu se blong bajet mo putum ol mane we yumi yusum blong yumi i kam faswan nomo long ol samting we yumi nidim”
Berry mo Light i no lanem nomo blong bajet gud inkam blong tufala, be grup blong faenens blong tufalawan i givim insperesen tu long Berry blong jenisim ol wok. Jenis ia i lidim i go long wan salari we i moa bigwan, we hem i save putum blong stap pemaot kaon blong hem.
Kam wan long gol blong tufala, Berry mo Light i yusum evri bonas blong tufala, invesmen mo sam nara inkam blong tufala blong ol fultaem mo haf taem wok blong tufala blong pemaot kaon blong Berry. Wetem help blong Lod, tufala i bin save pem evri samting we tufala i nidim blong pem, mo moa impoten tufala i stap pem taeting mo givim ol nara fas ofring.
“Lod i talem se: ‘Hem i stamba tingting blong mi blong mi lukluk long ol sent blong mi. … Be i nid blong i hapen long wei blong mi” (Doktrin mo Ol Kavenan 104:15–16). Wanwan mo ol famli raon long wol i luksave olsem wanem Hem i givim long olgeta taem oli putum long praktis ol prinsipol blong spirit mo faenens blong fasin blong stap dipen long yuwan.
Stap tijim “Olsem Wanem,” Be I No “Wanem”
Curtis mo Pshaunda Scott, blong Teksas, YSA, tugeta i wantem blong kam waes long faenens, be tufala i no save agri long olsem wanem. Pshaunda i save se oli nidim medikol insurens, be Curtis i save se bae oli no save pem. Nomata se tufala i lavem wanwan long tufala, ol lukluk long saed blong faenens i no givim janis mo putum wan stop long mared blong tufala. “Taem i kam long saed blong faenens,” “Pshaunda i tingbaot, mi no ting se yumi stap long semmak tingting, lego pej ia i stap semmak.”
Curtis i agri. “Oltaem mane i wan topik blong harem nogud, mo i gat ol impoten stori we mitufala i no bin.gat.”
Bisop blong olgeta i talem long Pshaunda mo Curtis blong stat go long faenens blong miwan blong lesen blong fasin blong stap indipenden we stek i stap givimaot.
Curtis i bin sapraes long olsem wanem toktok raon we i bin open long klas blong olgeta i wok blong hem. Hem i bin save eksplenem tingting blong hem mo kasem niu tingting long ol narawan we oli andastanem situesen blong famli blong hem. Ol toktok raon blong grup i helpem Curtis blong no faenem ol prinsipol blong gospel nomo be tu ol praktikel wei blong oli save yusum.olgeta. Long sikis yia i pas stat long taem blong baptaes blong hem, oli bin tijim Curtis blong mekem fet blong hem i kam antap, mekem gud ol prea blong hem, mo kam kolosap long Sevya be hem i filim se lesen blong fasin blong stap dipen long yuwan i tijim hem olsem wanem blong mekem olgeta samting ia oli kam gud.
Taem Curtis i lanem olsem wanem blong laef folem ol gospel prinsipol blong faenens blong hem insaed long hom mo long bisnis blong hem, gem i faenemaot moa lav blong Lod long hem. “I mekem biliv blong mi i kam strong mo andastaning blong mi abaot kea mo tingting we Papa long Heven i gat long yumi,” hem i talem.
Pshaunda i filim se spirit blong lesen blong fasin blong stap dipen long yuwan i helpem hem blong andastanem olsem wanem impoten blong faenens i save go stret wetem plan blong God. “I mekem testemoni blong mi i kam strong … sloslo, laen folem laen.”
I tekem tu ol tijing blong Lod insaed long desisen blong faenens blong tufala i kam blong karem Curtis mo Pshaunda i kam tugeta long semmak pej. “Mitufala i kam wan tim,” Pshaunda i talem. “Bae mi no talem se mifala i rij o se mifala i gat moa mane, be mitufala i bin go folem stret rod.”