Eria Lidasip Mesej
Gospel mo Atonmen blong Jisas Kraes I blong Evri Pipol
Tedei, yumi laef long wan wol we i lusum fulap mak blong hem. Ol skripja oli rimaenem gud yumi se:
“Mo dei ia i stap kam we olgeta we oli no wantem harem voes blong Lod, mo voes blong ol wokman blong hem, mo oli no folem ol toktok blong ol profet mo ol aposol, bae Lod i katemaot olgeta aot long medel blong ol pipol; From se oli bin aot long ol odinens blong mi, mo oli bin brekem kavenan blong mi we i no gat en; Oli no stap lukaotem Lod blong stanemap stret mo gud fasin blong hem, be evri man i wokbaot folem rod blong hemwan, mo folem fasin blong god blong hemwan, we fasin blong god ia i semmak long hemia blong wol” (Doktrin mo Ol Kavenan 1:14–16).
Gospel i lidim yumi i go long trutok, pis mo glad we i no save finis. Gospel i tijim yumi se yumi evriwan i ol pikinini blong Papa long Heven we Hem i lavem tumas, mo Hem i krietem yumi semmak long Hem. Taem yumi andastanem tabu aedentiti blong yumi, yumi kam blong faenem wan lav we i no save finis, i bigwan bitim ol mistek blong yumi mo ol samting we yumi no strong long hem.
Olsem ol memba blong Jos Ia blong Jisas Kraes blong Ol Lata-dei Sent, yumi gat blesing blong gat save blong gospel we i fulwan mo Atonmen blong Sevya blong yumi Jisas Kraes, we i save hilim wol blong yumi. Hemia i from wanem Lod i stap askem strong long wanwan long yumi—we yumi bin agri blong tekem nem blong Hem long yumiwan taem yumi baptaes—blong talemaot gospel blong Hem. Yumi mas ripresentem gospel blong Hem long wol, mo hemia i from wanem yumi mas laef folem gospel blong Hem. Gospel blong Jisas Kraes i wan mesej blong lav mo fasin blong pemaot man, blong evri man.
Dedikesen blong yumi long misinari wok, i wan impoten saen we i soemaot bilif blong yumi long “hamas gospel i impoten long ful wol.” Ol misinari blong yumi oli ripresentem spirit ia blong mekem evriwan i pat long ministri blong Kraes, taem oli stap go aot long olgeta we oli filim se oli no impoten, mo welkamem evriwan we oli redi blong lisin. Oli karem toj ia blong mesej blong gospel raon long wol, we i stap soem pruf se lav blong God mo Atonmen blong Jisas Kraes i stap blong evriwan.
2 Nifae 26:33 i tokbaot naesfala trutok ia:
“. . . Hem [Lod] i askem olgeta evriwan blong kam long hem mo tekem pat blong gud fasin blong hem; mo hem i no tanem baksaed blong hem long eniwan we i kam long hem, blak mo waet, slef mo fri, man mo woman; mo hem i tingbaot olgeta we oli no gat respek long tru God; mo evriwan i semmak long God, Ol Jiu tugeta wetem Ol Jentael.”
Yumi mas tingbaot se evri man o woman we yumi mitim olgeta, oli wan pikinini blong God, we oli inaf blong kasem lav, respek, mo janis ia blong harem mesej blong gospel. Long Alma 16:16, hem i rimaenem yumi se Lod bae i kapsaetem “Spirit blong hem long ful fes blong graon blong mekem rere ol tingting blong ol pikinini blong ol man, o blong mekem rere hat blong olgeta blong kasem toktok we Lod bae i tijim olgeta, long taem we bae hem i kam.”
Wan narafala impoten lukluk blong doktrin blong yumi, hem i bilif long fasin ia se ol famli oli blong taem we i no save finis mo janis ia blong sevem evri jeneresen. Long ol tempol blong yumi, yumi mekem ol odinens long bihaf blong ol bubu blong yumi we oli ded finis. Tabu praktis ia i konfemem bilif blong yumi se fasin blong sevem man i stap blong evriwan, iven olgeta we oli neva bin gat janis blong harem gospel long ful laef blong olgeta.
Komitmen blong yumi long wok blong tempol, i soem bilif ia se lav blong God i go bitim ol samting we i fasem yumi long laef ia. Hem i minim se yumi andastanem se Atonmen blong Jisas Kraes i givim hop mo fasin blong pemaot man, we i no blong olgeta nomo we oli laef, be tu, blong olgeta we oli stap long narasaed vel.
Atonmen blong Jisas Kraes i fandesen blong fet blong yumi. Tru long sakrifaes blong Atonmen blong Hem, Hem i tekem long Hemwan ol sin, soa long bodi, mo trabol blong yumi, mo i givim yumi janis ia blong sakem sin mo kasem tabu fogivnes. Hemia i wan presen blong ful wol, we i stap blong evriwan we oli putum olgeta daon mo akseptem Lod insaed long laef blong olgeta.
Bae yumi stanap strong long trutok ia se i tru, gospel mo Atonmen blong Jisas Kraes, i blong evriwan. Hem i wan mesej blong hop, fasin blong pemaot man mo ol blesing we i no save finis, we oli givim fri long evri sol we i wantem tumas blong save moa. Bae yumi go aot wetem lav, sore, mo andastaning long evri brata mo sista blong yumi, mo save se yumi ol tul insaed long tabu plan blong Hem, we i save sevem wanwan man mo woman.
Blong endem, mi testifae long trutok blong gospel blong Jisas Kraes mo paoa blong Atonmen blong Hem. Bae yumi prea blong yumi stap wan long komitmen blong yumi blong folem Kraes mo serem gud nius ia long evri pikinini blong God, nomata long weaples oli kamaot long hem o situesen blong olgeta. Wol i rili nidim gospel mo Atonmen blong Jisas long laef blong olgeta. Letem yumi sevem olgeta tugeta. Long tabu nem blong Jisas Kraes, amen.