Lokol Pej
Hem i Saenem Laet blong Gospel Taem Hem i Gat 78 Yia
Brata John Wiliiam Orth we i gat 78 yia, i saenem laet blong gospel nomata we hem i stap faet wetem wan sik blong Parkinson. John i bin wan fetful memba blong Jos Ia blong Jisas Kraes blong Ol Lata-dei Sent, long ful laef blong hem, i givim seves long ol defdefren koling we i tekem tu koling blong wan bisop. Kolosap faef yia i pas, afta hem i bin faet long taem wetem sik, i nidim blong John i go stap long Lutheran Homes, wan fasiliti we oli stap lukaot long ol olfala we Lutheran Jos nao i lukaotem, long Glynde, Saot Ostrelia.
Nomata long ol problem blong helt blong hem, John i gohed blong stap hapi mo stap tekpat long ol jos seves mo klas we wan fultaem pasta nao i lukaotem, long Lutheran Homes komuniti blong hem. I no longtaem afta we hem i muv i go long fasiliti ia, John i lanem se pasta ia bae i aot blong sam taem mo i askem se olgeta we oli stap long fasiliti ia, bae oli lidim ol klas taem hem i aot—John i hapi blong lidim wan klas hemwan, sapos i nidim. Pasta i letem John blong i lidim klas mo stat long taem ia, John i bin tijim plante klas lelebet, we i tekem tu, wan brodkas evri wik (olsem we helt blong hem i save letem hem) long wan TV janel we i blong fasiliti ia nomo, mo oli soem long handred blong olgeta we oli stap long fasiliti ia mo ol vilej we oli stap raon.
Nomata we hem i stap faet wetem sik we i stopem hem fulap blong i muvmuvum bodi blong hem, John i stap spendem plante aoa long wan wik blong redi long ol lesen blong hem, mo i tingting blong kea long ol narawan taem hem i stap yusum refrens long ol vidio mo narafala materiol blong stap lan we i kamaot long Jos Ia blong Jisas Kraes blong Ol Lata-dei Sent. Fastaem, pasta i stap lukluk tru long wanwan lesen bifo oli presentem, be naoia, hem i nomo wari long ol tijing blong John. Ol mesej blong John i bin mekem se sam long olgeta we oli stap long fasiliti oli gat ol kopi blong Buk blong Momon, mo plante long olgeta oli bin askem hem blong tokbaot sam topik we oli jusum. Hem i stap glad blong tokbaot ol rikwes ia we i mekem se hem i bin tokbaot gladhat blong 5 wik.
John i bin mekem sam narafala jenis tu insaed long fasiliti ia. Hem i redi long ol instraksen kad we oli laminetem, abaot olsem wanem blong prea, blong givim long olgeta we oli stap long fasiliti ia. Naoia oli stap blesem kaekae mo givim toktok long saed blong spirit olsem pat blong nomol manejmen mo miting blong olgeta. Hem i hop se hemia bae i leftemap tingting blong olgeta blong prea moa mo blong stap tingbaot plan ia blong fasin blong sevem man.
John i sua se misin blong hem i blong help blong serem gospel wetem ol neba blong hem long wan fasiliti we oli stap kea long olfala, blong redi long olgeta blong sam moa tijing mo blong givim hop long olgeta we oli stap fraet long wanem i stap kam. Hem i wantem olgeta blong filim gud abaot laef we i gohed long narasaed blong vel blong save lav blong Papa long Heven. Taem wan i lusum laef, John i redi long famli histri blong olgeta mo i givim ol nem blong olgeta blong oli save mekem ol tempol wok blong olgeta taem i posibol.
I no sapraes blong luk se skripja we i hem i laekem tumas hem i Mosaea 2:17: “Mo luk, mi talem ol samting ia long yufala blong yufala i save lanem waes tingting, blong yufala i save lanem se taem we yufala i stap wok blong ol narafala man, yufala i stap mekem wok blong God blong yufala nomo”.
Long Mei blong 2023, John i bin kasem wan visit we hem i no tingting se bae i kasem, we i kam long Elda Paul Whippy blong Pasifik Eria Seventi blong Jos. Elda Whippy i glad tumas long eksampol blong John blong Krisitin lav mo seves mekem se hem i serem eksperiens blong hem wetem Elda Taniela B. Wakolo, prishud lida blong hem long Eria Presidensi.
Taem oli talem long John se Elda Wakolo tu i wantem blong mitim hem, hem i oganaesem blong olgeta we oli stap lukaot long hem blong mekem sua se hem i wekap mo oli jenisim gud hem long klos blong jos blong hem i redi from visit ia. Long tugeta visit ia, John i serem testemoni blong hem wetem ol elda mo sam long ol lesen we hem i bin lanem long plante yia we hem i stap fetful blong givim seves long jos.
Waef blong John i lavem hem tumas, mo ol faef boe blong hem: Benjamin, John William Junior, David, Andy, Sam mo ol famli blong olgeta. Oli glad tumas long fasin blong hem blong givim seves olsem Kraes, mo stap folem eksampol blong hem long ol koling blong olgetawan insaed long ol wod mo stek blong olgeta.
Long 2018 Presiden Russell M. Nelson i bin talemaot, “Lod i stap muvum wok blong Hem blong karem Isrel i kam tugeta. Kam tugeta ia i samting we i moa impoten we i stap tekples long wol tedei. I no gat samting we yu save komperem, we i bigwan tumas olsem, we i impoten tumas olsem, mo i hae mo i tabu tumas olsem.”1
Brata John Orth i bin tingting strong long dikleresen ia blong Presiden Nelson mo i stap mekem evri samting we hem i save mekem blong karem Isrel i kam tugeta long tugeta saed blong vel. Hem i wan naesfala eksampol blong stap letem laet blong yumi i saen blong stanap strong kasem en nomata long ol jalenj mo hadtaem blong laef.