Lokol Pej
Mesej blong Sevya long Mi
Mi stap traehad wetem sik blong stap wari blong seven yia nao mi bin filim Sevya blong mi i stap wetem mi evri step blong wokbaot blong mi. Hem i bin pusum mi wetem glad taem mi stap kam oraet, mo i gohed blong sapotem mi long ol dei blong mi we oli nogud. Hem i no stap lego mi we mi nogat kamfot, mo i gat sam eksperiens we mi save serem abaot olsem wanem mi bin kam moa kolosap long Hem.
Wan impoten eksperiens blong mi i bin hapen long fas yia blong mi blong seminari. Mifala i stap stadi long Buk blong Momon mo yia ia i bin had lelebet long helt blong mi long saed blong tingting. Be mi stil strong blong mekem gol we tija blong mi i bin givim long mi blong ridim Buk blong Momon stat long stat kasem en (blong fas taem). Taem mi stap rid, hem i olsem wan laet long medel blong wan laod tudak, mo wan naet mi rid long 3 Nifae 13:31–34 Jisas i stap toktok long Ol Man blong Nifae mo i stap talem se:
“From hemia, no tingting tumas, mo stap talem se: ‘?Bae yumi kakae wanem?’ o, ‘?Bae yumi dring wanem?’ o, ‘?Wetem wanem klos bae yumi dresap long hem?
“From Papa blong yufala long heven i save se yufala i nidim evri samting ia.
“Be lukaotem fastaem kingdom blong God mo stret mo gud fasin blong hem, mo evri samting ia bae hem i ademap long yufala.
“From hemia, no tingting tumas long tumoro, from tumoro bae i tingting long ol samting blong hemwan.”
Spirit i bin kam long mi taem mi stap ridim ol ves ia, i mekem teks long fon blong mi i saen moa—i mekem i kamaot moa, i anda laenem, i stap talem long mi se, hemia i blong yu blong yu harem—mo mi filim wom, olsem se oli bin givim wan blangket long mi, blong harem ol toktok ia olsem se Sevya Hemwan i stap toktok stret long mi. Skin blong mi i stap kolkol yet evri taem mi ridim ol ves ia from se oli gat tumas paoa taem mi harem.
From ol skripja ia, mi save se Papa long Heven i save evri wari blong mi. Hem i save evri taem we mi stap traehad evri dei, mo Hem i save stret wanem mi nidim blong harem blong filim kamfot. Hem i olsem oli joenem las pis blong wan pasel, mo stat long taem ia, mi jusum blong lukaotem kingdom blong Heven moa, olsem we Jisas Kraes i askem, blong fulumap ful pikja ia. Mi bin mekem wanem mi save mekem blong oltaem tingbaot Hem, mo testemoni blong mi i bin gro smol afta smol, stat long taem ia.
Blong yu andastanem gud, sik blong mi blong stap wari i no lus, Mi no kasem hiling olsem wan merikel—be mi stap kam oraet mo i moa isi, be i stap gohed yet. Be taem mi joenem mi long Sevya, Hem i karemaot hevi samting we mi stap karem. Mi stap laef yet. Evri samting mi gat hem i blong Jisas Kraes, mo mi gohed blong go mo traehad from kingdom blong God. Blong ridim ol ves ia i bin wan bigfala jenis long laef blong mi—mi bin tanem mi i go long Hem mo lukaotem Hem, mo save se evri samting we mi stap wari long hem, wan dei bae oli kam gud olgetawan.