Lokol Pej
Stap Glad long Sabat Tru long Sakrifaes
Oleni mo Ana Ngungutau tufala i jes mared long Sidni, Ostrelia, mo tufala i statem laef blong tufala blong stap prea blong save wanem Lod i wantem tufala blong lanem. I no longtaem afta, oli bin givim wan 2 yia kontrak long Oleni blong plei ragbi blong wan lokol klab long Griffith, wan smol taon we i tekem sikis aoa blong kasem. Afta we tufala i bin toktok mo prea plante, tufala i disaed blong tekem kontrak ia mo klab ia i bin givim sam salari mo ekstra mane blong helpem famli blong tufala blong muv mo stap gud long niu komuniti blong tufala.
Kapol ia i sek se taem ol gem oli stat, plante long ol gem ia oli stap long ol Sandei. Fas tingting blong tufala hem i help blong mane we klab i bin givim long tufala taem tufala i jes kam. Jeaman i mekem i klia long Oleni se hem i nidim blong plei blong pemaot ol kaon blong hem taem hem i stap plei ol gem we oli putum taem blong hem i stap finis.
Oleni i talem, “Bifo taem mi stap plei long Sidni . . . evri ragbi gem blong mifala i stap long ol Satedei. Hemia i niu long mi, mo mi no filim gud tumas blong stap plei long ol Sandei . . . Mi filim se mi nidim blong tokbaot wari ia wetem klab blong mi.”
I no longtaem afta long storian ia, KOVID-19 i kam, mo oli kanselem ol gem blong ful yia ia. Oleni i filim se hemia i wan ansa long prea blong hem, be oli muvum kontrak blong hem i kasem tu moa yia mekem se hem i save plei long wan ful sisen mo pemaot kaon blong hem long klab.
Oleni i tingbaot se, “Taem niufala sisen i stap kam kolosap long 2021, mi bin talem [long jeaman blong klab] se bae mi no save plei long ol Sandei mo bae mi faenem wan wei blong pembak wanem we mi kaon long hem. Hem i talem long mi se mi save jus aot long tu samting: ‘Plei blong stretem kaon’ o ‘Pemaot kaon’. Mi save mo no tingting tu se stret samting blong mekem i blong obei komanmen blong Lod mo bae Hem i mekem wan wei.”
Hem i kontaktem bisop blong hem blong kasem kamfot mo sam kaonsel mo hem i tingting bakegen se desisen blong hem i stret. “Mi ringim bak jeaman blong mi mo talem long hem se bae mi [nomo plei] long klab mo bae mi pemaot kaon blong mi. Oli bin givim ten manis long mi blong mekem hemia.”
Kapol ia i agri se bae tufala i wok had blong pemaot kaon blong tufala mo givim moa seves long koling blong tufala olsem ol tija blong seminari. Tufala i trastem se sapos tufala i mekem pat blong tufala, Lod bae i mekem wan wei.
“Afta long desisen blong mi blong kipim Sabat Dei i tabu . . . Papa long Heven i blesem mi long plante wei. Ol doa oli bin open mo oli bin leftemap salari blong mi long wok blong mi,” Oleni i talem. Sam manis afta, Oleni i statem bisnis blong hemwan mo i bin save pemaot kaon blong hem long klab moa kwik. Long en, kapol ia i save muv i gobak nao long Sidni.
Be long taem ia, Oleni i kasem wan kol blong mit wetem stek presiden blong hem, we i bin invaetem hem blong givim seves olsem wan bisop long Griffith Wod, Riverina Stek. “Mi bin sek,” hem i talem. “Mi draev i gobak long hom be mi bin kwaet mo fulap long ol wota blong ae.” Taem oli kasem haos, Oleni mo Ana i nildaon long prea mo askem Papa long Heven blong i givim kamfot long tufala.
Oleni i tingbaot se: “Hem i long taem ia we Spirit i talem long mi bakegen se mi no muv i kam long ples ia blong plei ragbi. Papa long Heven i karem mi i kam long ples ia blong givim seves long ol pikinini blong Hem mo stap olsem wan tul blong bildimap kingdom blong Hem long pat blong plantesen blong Hem long ples ia. Naoia, mitufala i nomo gat plan blong muv i gobak long Sidni be, plan i blong givim seves wetem ful hat, paoa, mo maen blong mitufala long koling ia. Mi bin luk han blong Lod long taem blong seves blong mi mo mi gat fulap lav long wod blong mi mo bigfala wok ia.”
“Mi save se Sevya blong mi i bin sakrifaesem laef blong Hem from mi, mo wanem mi save mekem i blong talem tangkyu, i blong stap traehad blong stap obei ol komanmen blong Hem. Taem mi sot, mi save se mi save tanem mi i go long Atonmen blong Hem blong leftemap mi mo mekem mi kam moa strong blong stap gohed blong go fored. Blong stap kipim Sabat Dei i Tabu i wan blesing. Mi save se taem yumi stap folem komanmen ia, laef blong yumi bae i fulap wetem laet mo waes blong blesem ol narawan long taem blong wik.”