Te Ninikoria n Tibwaa te Bwai ae Rangi ni Kakawaki Irou

Iroun Tannie M. Flammer

Man nooran aia banna ni kakairi au bitiobi ma kainabana, I a katea au kouru bwa N na tibwaa Ana Boki Moomon ni katoa mwamwanangau ma au tiim ni kaungaunga.

te kairake n ataeinnaine ae kotea iteranibaan te boki ae tauaki iroun te kairake n ataeinimwane

Inanon rikirakeu, ao I rangi n tatangiria ni matakuakina te moaine ngke e kataia n ikoikotiia natina iaan baina bwa e na kamanoiia inanon tain te buaka. E rikirake ni bongana te banna ni kakairi aei nakoiu i mwiin warekan taekana inanon ana Boki Moomon (taraa 3 Nibwaai 10:4-6). Ngke te kairake ngai, ao au bitiobi ma kainabana, e bati aia tai ni mwamwananga ibukin aia bitineti, a tuangai bwa a tibwaa ana Boki Moomon ma tabeman aomata ni katoa aia tai ni mwananga.

Anne te bwai ae e katika nanou. I rangi ni mataaiakiniia, ao e bon riingaki nanou ni bannaia ae a tia ni karaoia. I a baireia ngkanne bwa ngkana arona bwa e reke au tai ni mwamwananga nako tinanikun Utah, USA, ao N na toua mwiin aia mwakuri n tibwaakin ana Boki Moomon ni katoa tai.

Ngkai bon te tia kaungaunga ngai man te Kuura n reirei ae rietaata ae te Bringham Young, ao e kuri katoa tai mwamwanangau ma kain au tiim ni kaungaunga. I mwain moan mwanangau, I kabooa ana Boki Moomon ao ni korei au koaua inanona. I tangiria ni karikirakea te nano ni kan tibwaa te bwai ae rangi n kakawaki irou aei ma temwaangina: au kakoaua n ana Boki Moomon. I tangiria n riki n ai aron au bitiobi ma kainabana. I tangiria ni kan katotoonga Iesu Kristo. I tangiria ni kan ibuobuoki n ikoikoitiia aomata ao ni buokiia bwa a na roko n Nakoina.

I reiakinna bwa ngkana I tataro i mwain mwanangau bwa N na kairaki nakon temanna are e kainanoia, e a bon kaoti naba te aomata temanna n taai ao n te tabo ae riai are e a kona ni kabebetea au mwakuri ibukin tibwaakin ana Boki Moomon. Mwaitin au tai ni kataneiaai, bon bebeten naba au tibwatibwa. E a moanna ni manena kawaiu n te maiu aei. E rangi n ingainga nanou ni kan ukora natin Tamara are i Karawa are e na kakabwaiaki maiuna man kakoauaan Kristo ae tabu aei.

Ngkana I mwananga, ao I karaurau n iangoia, “Bwa e na reke iaa ana aomata Tamau are i Karawa are e a tia ni katauraoia ibukiu n te tai aei? Tera arou ni kabwarabwara au namakin nakoina ae ana Boki Moomon e bon rangi ni kakawaki irou?” Au iango ma au mwakuri e a bon riaon au kaantaninga, ao I namakinna bwa e a tabe n rikirake au tangira nakoia ake I a tia ni kaitibo ma ngaiia. I kataia n taraiia n ana taratara te Tia Kamaiu. I tataro ibukiia bwa N na butimwaea ana bwai tangira Tamara are i Karawa are e mwiokoai bwa N na anganiia.

I bon nanokawaki ngke e a bane au tai man te reirei. Te riki bwa te tia mwaie ni kaungaunga i BYU bon kanoan miiu mangkekei. Tao N na bon rang ni mwanuokini baike i a tia n rinanona inanon au tai n riki bwa te tia mwaie ni kaungaunga, ma tibwaakin katootoon ana Boki Moomon ni katoa au tai ni mwamwananga bwa te tia mwaie ni kaungaunga e bon kaonrakea maiu n te tamaroa, n aanga aika I aki kaantaningai.

Tibwaakin ana Boki Moomon bon teuana te kawai ae rangi ni bebete ao ni bongana ni karakaan riki au atatai n au taneiai n te kuura n reirei ae rietaata. I ataia ni koaua bwa aomata ake I tibwai nakoia ana Boki Moomon a bon kairaki mai i Karawa bwa a na butimwaia. I ataia naba bwa inanon rongorongon maiu ae kamimi aei, E teimatoa ana tangira ao ana nanoanga Tamara are I Karawa: E anganai te kariaiakaki bwa N na namakina Ana tangira ibukiia natina n te anga ae onoti ni katoa au tai ni mwamwananga.

I mwiin au angabeeba, I bareia bwa N na reitinako n ukora temanna are N na kona n tibwaua au koaua nakoina. Inanon te tai, I karikirakea inanou te nano ni kan tibwaakin au kakoaua. I reiakinna bwa N na riai n aki maaku n tibwaakina. I kakoaua bwa ngaira ni kabane e na kona n reke iroura te nano ni kan tibwaua ara koaua ti man mwakuriana ao man am bubuti te ibuobuoki mai i karawa.

Au rinerine n iriira bannan au bitiobi ma kainabana e bon karekea te bitaki inanon maiu n aanga aika bati. I reiakinna bwa te Uea e bon bane ni kinaia Natina n tatabemaniia nako. E tangiriira bwa ti na bane n ikoikotaki iaan Baina. Bon te kakabwaia ngkai I kona ni mataata n ana kaantaninga are E kabongana ngke E kabwarabwara Arona n bobotiira. E ikotiira ai aron te moaine are e kamanoiia bunna.

E maeka te tia korokaraki i Utah, USA.