“Rabwatam: Kawakinan Raoi te Bwaintangira ae mai Karawa,” Riaona, Turai 2024.
Rabwatam: Kawakinan Raoi te Bwaintangira ae mai Karawa
Rabwatara bon bwaintangira mairoun te Atua ao bon aia tembora tamneira, ma e kainanoa te rabakau ma te motinnano ibukin kamarurungakina ao tararuaana raoi.
E nang bebete te mwaninganako ngkana ti marurung—ma ti ngkana, taian mooi ake 10 aika karewerewe n tebongina, te maiu n aki kakamwakuri, ao te aki mamatu a oti mwiia. Ke tao e ngae ngkana ti rangi n tararuaa raoi marurungira, rikira a manga uotii kangaanga ao a kaoti kangaanga nakon marurungira.
Ti a tia n bane n anganaki marurungin rabwatara aika kakaokoro ae ti aki kona n tautaekanna n taainako. Ma teuana te bwai ae matoa: Ana kainibaire te Atua e weteira bwa tina katamaroaira iaon are ti a tia n anganaki. Karaoan aio e kainanoa te nano-matoa ao te motinnano ae n ai aron raoi are ti kainanoia naba ibukin tararuaan marurungin tamneira. E nanonaki n anne bwa tina rabakau n taobarai nanora n kan tekateka riki nakon te biribiri, ni kang bwaai aika a karewerewe nakon taian kabaeranti, ao ni kabwakanako tai nakon te motirawa.
Ngkana ti ukora te kairi mai ieta ibukin katamaroaan marurungin rabwatara ao inanon karikirakean te nano–matoa ibukin kateimatoaana, ti na kunea te konabwai ae korakora n beku ibukin te Atua ao ni karekea te kimwareirei.
Rabwatau Bon te Tembora
Te tamnei e rikirake ngkana te tamnei ao te rabwata a tararuaaki raoi. Te tamnei ao te rabwata a karika rabwatan te aomata.” (Reirei ao Berita aika Tabu 88:15). Ngke e marooro iaon te kibu aio, Beretitenti Russel M. Nelson e reiakiniira bwa te rabwata ma te tamnei a rang ni kakawaki. Rabwatam bon ana karikibwai te Atua ae moan te tamaroa. Bon Ana tembora n ai aron naba ma ngkoe ao e riai n tararuaaki ma te karinerine.”
N ana ririki ae 99, Beretitenti Nelson e teimatoa n karaoi tabena Ana Beretitenti te Ekaretia, ma e ataia bwa n tabetai ena kainanoia ni kabongana te bwai ni kabaeranti ngkana e nakonako ao ngkai e a tangiria riki n kanakoa ana marooro n tain te maungatabu ni kabuta ngkana e tekateka. “Man te tai teuana nakon teuana, I aitara ma te kangaanga ae uarereke ma au kakabaeranti,” e koreia iaon ana iteraniba iaon bwaai n reitaki inanon Meei 2023. “ Ngai irou, Nna aki kubanako ngkana a kaoti kangaanga aika a uarereke inanon ae I a uakaan ma rokou n mwaitin ririkin te tienture. Te kakaitau, bwa buroou e marurung, tamneiu e marurung ao ai arona naba ma rangau, ao e bon mwakuri naba kaburorou.”
E nang kinaaki Beretitenti Nelson ibukin ana mwakuri korakora ni kamarurung ao maiuna ae bati te kakamwakuri iai. Bon te aomata ae bakibaki rabwatana, ao e nang mwakuri korakora ni kateimatoaa teina anne. E kakamarurung ni katoa bong, ao tatangiria riki n mena ritinaniku. Inanon ana ka-90, e tiaborana te tinoo man kawain ana auti ao aia auti kain rarikina, e karabinoi kaen ni mange ni kaokii nakon te karaati, ao e mwamwakuri i bukin ana auti. Imwain rikina bwa Ana Beretitenti te Ekaretia, e aki toki n nanako n tikii ngkana e angaraoi ma katabeana.
Karikirakean te Nano–Matoa
Ti atai taian moan bwai aika kakawaki n karekean te marurung:
-
Kakamwakuri n taainako.
-
Karekea te motirawa ae tau.
-
Amwarake n te amwarake ae baeranti.
-
Kateimatoa rawawatam ae raoiroi.
-
Tararua kainanon am iango.
Angan aio bon karaoan are tamneira e ataia bwa riai ni karaoaki nakon rabwatara. Ni kaineti ma are e taku Beretitenti Nelson, teuana mai ibuakon kataakira n te maiu ae mamate aio bon rabwakaura n taubangiia rabwatara man bwaai ake tangiri rinanon te tamnei are e maeka inanona:
“Tatan e ataa korakoran nanora n tangirii bwaai. Ngaia are, e kairoroira bwa ti na kang baike ti riai n aki kanii, n nimii mooi ake ti riai n aki nimii. …
“Ngkana ti kinaa ni koaua raoi rikira mai karawa, ti na tangiri n taubangiia nanora n tangiri bwaai. … N ara tataro ni katoa bong, ti kakaitau ni kinaa te [Atua] bwa ara Tia Karikibwai ao ni Karabwa ibukin tamaroan rabwatara ae te tembora. Ti na tabeakinna ao man mwaneia raoi bwa are bon ara bwaintangira mairoun te Atua.”
Kabwebwerakean te Karabwarabwa ao Karekean te Kimwareirei n te Rabwata are e Anganiira te Atua
N au ririki ae 27 ao ngkai te tina ngai nakoia teniman natiu, e reke irou te aoraki ae te rheumatoid arthritis, te aoraki ae akea tokina ao e urui taian toma nte rabwata. Maiu e biriaitua ao akea ana konabwai n katokia rabwatau ao au iango. I tanrikaaki nakon te Atua ibukin buokan kaokan marurungin au iango ao marurungin rabwatau are I a tia ngkoa n bakataeia.
I kakaea nako buokau iroun te taokita ibukin marurungin te iango ibukin aorakiu are te aki kona n rau. I mwakuri ma te taokita ibukin aorakin te rii iaon bwainaoraki ake I kona n anai ao ni kabonganai naba bwainaoraki ake aki renganaki. E aki bwara nanou. Imwiin ririki aika bati ao te rawawata ae korakora, e rikirake tamaroan maruurngin rabwatau ao au iango.
I uringa te bwakantaai teuana ngke I rianna rirarikin taian uee n te marenaua nakon te nei n te maunga. Ma ranin matau aika a waanako, I karabwa te Atua ibukin kakabwaiakiu ma rabwatau ao konabwaiu ni karaoa te bwai ae I a tia n taku bwa I aki kona n manga karaoia. Bon akea katokan te aoraki ae irou, ao te aoraki aio e tia n kakorakaia rabwatau. Ma rianna ma te kakamarurung a riki bwa bwaai aika I tatangiri, ao I aki manga kan bakataea marurungiu.
E ngae ngkai e memere kakamwakurin rabwatau, I mwakuri n mitinare ma kainnabau i Washington, USA(te tabo raoi n rianna!). I karabwarabwa kai e reke au tai ni beku inanon bongin maiu n angiin taian nakoa ake a tauraoi n te Ekaretia.
N aron are taekinna Beretitenti Nelson: “Ti riai n karabwarabwa n taainako ibukin te kakabwaia ae rianako arona ae rabwatara ae tamaroa, ana karikibwai ae te kabanea n tamaroa Tamara are i Karawa ae tatangira. Ma tamaroan rabwatara aio, bon tiaki te toki. Bon mwakoron ana kainibaire te Atua ae kakawaki ae te kainibaire ni kakukurei ae korakora ibukin rikirakera ae akea tokina.”