“Tai Katibanakoa am Tai n Mitinare Ngkana Koa Ikawai,” Riaona, Turai 2024.
Rikirake ni Kara ma te Kakaonimaki
Tai Katibanako am Tai n Mitinare Ngkana Koa Ikawai
Ara berita aika tabu a kaoira bwa tina beku imarenara, n tei bwa taan kakoaua ibukin te Atua, ao ni karau nanoia ake a kainanoa karauan nanoia. Te beku bwa te mitinare aika a ikawai bon te anga teuana ni kakoroan nanon taian kakao aikane, ao ni kakabwaiai oin maiura ao maiuia ake ti beku ibukiia.
Iai 34,000 mitinare aika a ikawai aika a beku bwa mitinare n ae bwanin-taina ke n mwakuri n mition n ibuobuoki n te tai aio aika, n ai aroia mitinare ake a kairake, a karekea te kimwareirei n aia waaki. Aika akea buuia ke bon taanga a kona n beku bwa mitinare aika ikawai n mwakoro aika bati.
Ao kainanoia aika a kakawaki. N te maungatabu ni kabuta n Okitobwa 2023, Unimwaane Ronald A. Rasband man te Kooram n Abotoro n te Tengaun ma Uoman e kaungaia membwa ake a kara bwa ana iangoa te mitinare. E titiraki: “Tera ae kam karaoia ni mwakoron maiumi aio?’ A rang mwaiti kawai ae a kona ni karaoia mitinare aika ikawai ae akea temanna ae kona ni karaoaia. Ko riai ni kaota te banna ae raoiroi, taan beku n ana Ekaretia, ao n riki bwa te tia kaunga nano ao n kamaiuia natin te Atua.”
Ni kabwarabwara aron weteakiia mitinare aika ikawai, Beretitenti Russel M. Nelson e taku: “Tibwanga ibukiia mitinare aika a ikawai e kakaokoro ao a mwaiti. Weteaki bwa ana beku a barongaaki raoi imwiin te tataro mwaaka ae iangoa raoi imwiin taraakin aia mwakuri ngkoa, rabakauia n te taetae, ao oin konabwaia. N taraakim bwa ko tau n beku, te nano ni kan beku bon te bwai ae moan te kakawaki.” E kabwarabwara naba bwa aia mwakuri mitinare aika a ikawai aikai “akea kabotauaia.”
“Tabeman mitinare aika a ikawai a mwakuri n aobitin ke ma te BYU-Pathway ke taian buoka nakoia aomata are a tia n baireaki-raoi aroia,” e taekinna temanna te mitinare ae e ikawai. “Ti a tia n beku n tabeua maibuakon aekaki n mition aikane. Ngaia are iai te raraoma reutana iroura ngke ti weteaki bwa tina beku n te MLS (boutokaia membwa ao taan kairiiri) mition. N te tai are ti moana ara beku, ti rangi n tangira angaraoin birina ma te kakamwakuri are te aekaki n mition anne e karekea ara tai n kawariia ara membwa ao ni kakorakorai mwaanga n te tabo.”
Te titita ae e ikawai are e beku n te tienta ibukiia iruwa e taku, “Ngke e motirawa kainabau, I aki koaua bwa tera ae nna karaoia ma au tai. Ngkai iai bwaai aika nna karaoi, taabo ae nna nako iai, ao aomata ae nna kawariia. Iai aomata aika a katan iaau.”
“Akea kainanoan ae kona raraoma ngkana e aki reke am tai n beku ngke ko kairake,” e taku temanna te titita ae e a ikawai imwiin okina man ana mition. “Te tibwanga ae boou irouia te koraki n bane. Ti bane n reiakinna bwa ngkana tina katan iaan te Uea ao ibon imarenara ao ti kunea bwa ‘a riki bwaai aika korakora man bwaai aika uarereke man aki kaangaanga’[Aramwa 37:6].”
Kakabwaia ibukiia Mitinare
Mition ibukiia ikawai a tatannako n ai aroia mitinare aika a ikawai. Iai rinanina nako—man tatannako ma oin nako aia kangaanga, kakukureia, ao bwaai aika kona n mabiao iai temanna ma temanna. Ma iai tabeua bwaai aika titeboo n taian mition ibukiia ikawai: kamatebwaian koroboki aika tabu ae nanonaki raoi, te tataro ae bati man te nano, te mwakuri n ibuobuoki, kairakiia ae e aki toki mairoun te Tamnei ae Raoiroi, ao te tibwanga ae akea n ai arona n karaoa te bitaki.
“Akea riki te tai ae tia n namakinna bwa I kaan ma te Uea irarikin te tai are ti beku bwa mitinare aika ikawai,” e taku temanna te mitinare ae ea ikawai. “I ataia bwa tabeua bwaai a bon riaon au konaa, moarara riki n mweengau ma natiu ao tibuu. Ngaia are I a katikui bwaai inanon bain te Uea. Ao E kakabwaia au utu. E aki rang ni babane ara tai ma tibura irarikin are rereitakira ni katoa wiiki ma ngaiia n te Zoom. Ti marooroakini bwaai ake aki rangi n nano ngkoa iai. E aki ririki irouia te koraki ni kabane, ma iroura, natira temanna te mmwane e okira te ekaretia ngke ti beku, ao natira naba te mmwane temanna e manga mare ao imwiina e manga kabaeaki n te tembora.”
Temanna naba te mitinare ae e ikawai e taekinna, “Ara kamatebwai ni koroboki aika tabu ibon iroura ao ma toara e kona ni korakora nanona riki bwa are ti kakakaei aanga n kamwakuri koroboki aika tabu, ao n aki ti warekii. I aki ti iangoa te raroa, n aron are I kakaraoia ngkoa. N ara mwakuri n ibuobuoki, e taraa n ae I aki toki n kakabonganaa te kibu ae ti warekia n te bong anne ke n te wiiki anne, ngaia are I kateia bwa nna kabongaanai kiibu ake I wareki n te bong koraki. E kerikaaki taningarotiu n kamatei koroboki aika tabu, bwa I a kantaningaia bwa nna kabongana te bwai ae I warekia n te bong anne.”
“Au mwakuri ni mitinare e a tia n anganai te riiti ni maiu ae boou,” e taku temanna te titita ae e ikawai. “E anganai te kaantaninga ae nano, ao tangira te maiu ae boou, ao te bwai ae I kona n karaoia irarikin te takakaro ao tobwaakia tibuu.”
“Te mwakuri n ibuobuoki bon te waaki ae uoua-kawaina,” e taku temanna te mitinare ae e ikawai. “Ngkana ti iangoa—ma te kainikatonga teutana—bwa mwaitira ae ti karaoia ibukiia aomta, ti aki kona n tokanikai. Ma ngkana ti ataia bwa mwaitira ae ti reiakina ao ae ti karikirake ibukira, tiaki ti bitaki ma aomata ana tangiria n ongoraeakina te bwai are ti taekinna ao ni karaoia. Tina tewenakoa ara kariki iaon te ran, ao tina namakinna bwa e na okiriira ao e a tia ni bwatanaki.”
Reitaki aika Kakorakoraaki
Ngkana aomata a beku bwa mitinare aika a ikawai, a na karikirakei reitaki aika korakora aika ana tiku ma ngaiia inanon bongin maiuia. E mwaiti aika a itangitangiri ma ake a beku ibukiia. A kabwebwerakei naba reitaki aika korakora ma mitinare ake tabeman ao taan kairiri n taabo. “Ti kabwebwea te reitaki ma mitinare ake a kairake, taanga ni mitinare ake tabeman, ao aomata ae ti bon aki kona n kaitibooaki ma ngaiia ngke arona bwa ti tiku n mweengara,” e taku temanna te mitinare ae ea ikawai. “Ti teimatoa n rereitaki imarenara. N te taina ao I taku bwa e na bon akea te bitaki inanon bongin maiura, te nako ni mitinare e anganiira te bitaki ae boou ao raoraora aika boou are a tibwaua te mwananga aio ngaira.”
Mition ibukiia aika a ikawai a kona naba n buokiia taanga ni kakorakora tekatekaia n taanga. Ngkana aikoa mwakuri ke ea uarereke aia tai n mwakuri, taanga a kona n noora ae a riai n kakaea te kaantaninga ae a katiteuanaaki iai bwa are aikoa tabetabe n mweengaia bwa a ikawai natiia. A kona n bon ti taneiai n bon oin aia tabo ao ma oin aia tai. Rikirakeia n kara ke motirawaia man te mwakuri e kona n bita anne. Waakinan ae boou, tibwauaan te taneiai ae boou, tao te beku man mweengaia ke mitinare aika a ikawai aika a beku n ae e bwanin taina, a kona n buoka karekean te tibwanga ae boou ibukiia taanga ao ni kakorakora aia ibuobuoki imarenaia.
“Iai te taetae ibukiia ake a tia n motirawa man te mwakuri bwa e reke iroum iteran am karekemwane ao uoua okin kainnabam nakon are mai mwaina,” e manikangare temanna te titita. Te mwakuri ni mitinare n te tabo ae raroa ma mweengam e buokiira n marooro iaon taian bitaki aikai n angaa aika ti bon aki kakaraoi imwain ara mition. Ngke e aki mwakuri kainnabau, ti a bon aorioriira naba ngkana iai nakobuakara. Ngkai, ai tiaki arora are ti bon uotii oin kawaira ao n aki kan kakataetaeira, ti aki tangiria bwa e na roota ana mwakuri te Uea, ngaia are tia marooro ngkana iai te bwai ae ti tabetabe iai.”
“Ngai ma kainabau ti moana ara mamarooro ni katoa tairiki iaon taian aakoi ake ti karekei inanon mwakuri ni mitinare n e bong anne” e taku temanna te mitinare. “E aki ti buokiira ni kabotoi ara iango iaon bwaai aika a riki ao ai tiaki iaora, ma e karekea ara tai ni kona n noori waaki aika a tamaroa ake a riki irarikira e ngae ngkana e aki nakoraoi ara bong.”
“Ao bukina bwa anne te kabanea ni bwai ae ti karaoia ni katoa tairiki, e taku buuna, “ti matu ma te nano ae bebete ao ae bwanin nakon ririki ake a tia n nako. E buokai n kamatuuraoai riki!”
Kakabwaia ibukiia Naake A Beku
Te maiu aio iai taai iai n nakoraoi ao manga nakobuaka—iai boong aika nakoraoi ao iai boong aika nakobuaka. Ai aron naba taian mition. Ma te beku ibukin te Uea e mwaiti kaniwangana aika kakawaki, tiaki ti ngkana ea bane am mition ma inanon naba am tai n mitinare. N aron ana taeka ai mwanen Etita are Moretekai nakoina, “E katanoata, “Antai ae ataia ngkana e na roko nakon ana tabo te uea n aron te tai ae ai aron aio?” (Etita 4:14; e kairaki katuruturuana). Ngkana a tanrikaaki nakon aia tai n mwakuri n ibuobuoki, a mwaiti mitinare ake a ikawai ae a tia n namakinna bwa tibwangaia are a anganaki ke te aono are a beku iai a bon tau raoi ibukina ao a kakoroi nanon kainanon te tabo raoi anne.
I a tia n noora korakoran raoiroin aia mwakuri taanga aika a mitinare ngke I maeka i Louisiana, USA. Tabeua te tai imwiin weteakiu bwa nna beku n te New Orleans Louisiana Titeiki kauntira ae e rietata, I katabeaki bwa nna boutokaa te Port Sulphur Mwaanga. E karako mwaitiia taan taua te nakoanibonga aika a kakaonimaki n te mwaanga aio. Angiin taian nakoa ibukin te reirei ma te kairiiri e tauaki irouia aine aika kainabaia tiaki taian membwa. Tabetai, taian mitinare ake a ikawai ke taan kairiiri man te titeiki a katabeaki bwa ana taraa te mwaanga aio, ma aki naba tokanikai n kaoaia utu ake tiaki ni kabane taian membwa ma iai ae membwa ibuakoia.
Ngkane te taanga teuana aika a ikawai aika a mitinare mai Wyoming, USA, a weteaki bwa ana mwakuri n boutokaa te mwaanga aio. A mwakuri ngkoa n te tabo ni man inanon ririki aika bati ao a tia naba n mwakuri n te tabo ni karaoa tiiti ae e uakaan ma mweengaia. Man rongorongon maiuia ao aia taneiai, a kona riki n reitaki raoi ma aika a mwaiti i Port Sulfur ake a mwakuri n te tabo n karao oera. Te taanga aio a kabanea aia tai ae korakora n karikirakea reitakiia ae tamaroa ao ni mwakuri ma utu ake tiaki kain te aro ma iai ibuakoia ae te membwa n te mwaanga aio. Man aia mwakuri n ibuobuoki ao aia tangira, inanon aia tai i Port Sulfur e kakorakoraaki te mwaanga aio n te aro ae akea n ai arona ao e kakabwaiaaki rinanon aia mwakuri n ibuobuoki ma te onimaki. Tabeman mai ibuakoia mmwaane man utu aikai a kaina te Ekaretia, ao ni kakorakoraa aia kooram unimwaane ao te mwaanga.
Mitinare aika a ikawai aikai a kakabwaiai maiu—oin maiuia ao maiuia naba aomata’. Tai katibanakoa te tibwanga ae moan te tamaroa ni beku ao n rikirake!