Ai Korakorara Riki Kimwareireim
I kaoko ngkai bwa ko nang uota are ko ataa-arona, n raonaki ma ami koaua ae e nene ni maan, ao n nako ni beku n te mition.
Tariu ao mwaneu aika kam tangiraki, au iango ngkai e mena iaon ikoikotakia Iteraera, te bwai are e aranna Beretitenti Russel M. Nelson bwa “te kabanea ni kakawaki ni mwakuri iaon te aba. Akea kabotauan buburana, akea kabotauan kakawakina, akea kabotauana ni mimitongina.”1
Te ikoikoti bon tokin te atatai ni kaotia bwa e “korakoran kakawakia aomata imatan te Atua.”2 E rangi ni bebete n aron anne. Ti ikoikoitia natin te Atua ni boong aikai bwa aonga ni “bwaro kakabwaia aika a mwaiti iaon atuuia”3 ao te kakabwaia n “te kaubwai are akea tokina.”4 Ao n rimwiian ae ti na ikota te bata are Iteraera ti kainanoia mitinare—ae mwaiti riki nakon aika a beku ngkai.5 N te bong aei, N na taetae nakoia ake a ikawai n te Ekaretia ake a kona ni beku bwa mitinare. E kainnanoiko te Uea. Ti tangiria bwa kam na beku i New York ao Chicago, Aotiteria ao i Aberika, Thailand ao Mexico, ao n taabo ni kabane.
N a uotingkami rikaaki nakon te ririki ae 2015. I a bon tibwa weteaki bwa kaain te Kooram n Abotoro n te Tengaun ma Uoman. Teuana mai buakon tabera n Abotoro ae moan te tamaroa bon anganakia mitinare aia tabo are a na mwakuri iai. I a tia n rinanon te mwioko aei ngke I riki bwa te Itingaun,6 ma ngkai I a riki bwa te Abotoro, I a namakina raoi rawawatan te mwioko aei. I moana au mwakuri ma te tataro ibukin mwaitia mitinare mwaane ao aine, temanna imwin temanna, ni katoai mition ni kabuta te aonnaba. Imwiina I a manga taraiia mitinare aika taanga. Bon 10 mwaitia ae oti. E aki rangi ni mwaiti. I miimii, ao I titirakina te aomata are toau man aia Aobiti Mitinare, “Iraman ae ti kainanoia n te wiiki aei ni karekea te mwaiti are e tangiraki?”
E kaeka, “300”
Te tai ae kakawaki anne e titiku n au iango: 10 taanga aika a na kaona 300 ae tangiraki.
E kaungaia taanga beretitenti Russel M. Nelson bwa ana “katorobubua iaon waeia ao n bubuti nakon Tamaia are i Karawa ngkana e koaua bwa e bon angaraoi te tai ibukia bwa na beku n te mition.”7 N taraakim bwa ko tau, e taku, “te nano ni kan beku bon te bwai ae moan te kakawaki.”8
N aron are taekinaki n koroboki aika tabu, “Ngkana iai nanomi ni kan beku iroun te Atua kam a weteaki nakon te mwakuri.”9 Te mwakuri anne e boboto iaon tuan taian te uaa. Ti warekia n ana boki Ioane, “Bwa a na uaia ni kakakatonga ane ununiki ma ane tai.”10
I a tia n noora kakoroan nanon te tua n taian te uaa inanon au utu.
Tabeua ririki n nako I kawaria utu ngke e butiai te bitiobi bwa nna taetae ni kainiin n te taromauri n toa.11 Ngke I ruo rikaaki man te tabo taetae, temanna te aine ae kaaniai ma natina aika itiman ao ni kabwarabwara bwa ngaia Titita Rebecca Guzman.
E titirakinai, “Unimwaane Rasband, ko kinaia Rulon ao Verda Rasband?”
I kaeka ma te moangare, “Bon au karo.”
Kam kona n noora te bwai ae riki. Man ana kariaia Rebecca, are e bon mena rabwatana ikai ma ana utu inanon te tienta ni maungatabu, I tibwa rongorongoia ana utu.12
Au karo aika, Unimwaane Rulon ao Titita Verda Rasbasnd, a beku bwa mitinare taanga n te Florida Fort Lauderdale Mition.13 A karekea te kairi mai ikarawa bwa na karebwerebwe ni mwengan Rebecca ao n reirei ma ngaia taekan te ekaretia. Bon te kairake n te tai anne Rebecca ao mamaten nanona bon te ongongora n aia anene te Osmond, ai moarara riki ni kunan raoraora ae Donny—are mena rabwatana ikai n te bong aei.14 E ongongora nakon aia intawiu ake a karaoia rinanon katanoata aika maiu ao n reiakinna bwa bon kain ana Ekaretia Iesu Kristo Ibukia Aika Itiaki ni Boong aika Kaitira. E namakinna bwa iai te bwai ae kaokoro irouia, ao n iangoia n taku bwa e kaokoroia aia ekaretia, e kabanea uoua te ririki Rebecca ni ukoukouri koaua n te Ekaretia inanon ana raiburari te reirei. Ao, ngke a roko mitinare taanga aika a rang taraa n tikiraoi ao ni karebwerebwe n mataroan aia auti ao ni kabwarabwaraia bwa ngaiia mitinare ni Boong aika Kakaitira, e bon nang mimi n te aro ae eaki nako ana kakarabakau.
“E tuangai tinau bwa na kanakoia,” e koreia Rebecca, “ma nanou e, ‘rawa.’ I namakina te tangira ao nanoia ni kan reitaki ngke i taraa moaia. E uota te namakin ae korakora inanou ma te tang ngkana i ururinga.”15
E kariniia Rebecca, ao au karo ake bon mitinare a tibwaa te euangkerio ma ngaia, ma uoman tarina aika uarereke, ao, n aki kantaningaia ae e na kukurei, tinana.
E tuangai Rebecca ae, “Am karo rang bwakuaku ni kabwarabwarai taian titiraki ake ti marooro iaon. I teimatoa ni kona n noora moamoaia n te aro are kangaa otabwaniniaki n te ota. Ti na riai n taainako n inga ma tinam imwain ae e kitaniira, ao e teimatoa n taainako ni buoka tinau bwa e na namakina te mweraoi ao te karinerine. Tamam e rang katitika matan te noo ngkana e anga reirei nakoira taekan Iesu Kristo. E kataia n anaa nanon tamau bwa e na ira buakon te kabwarabwara ao n tokin te tai ao e bon tokanikai n ana iango. Tamau bon te tia kuuka n te kirabu teuana n ara tabo ao n te taina e kuukana aia katairiki am karo, e bon karaoa naba mamaten nanon tamam are, te key lime pie.”16
Ngke Unimwaane ao Titita Rasband a tuanga Rebecca ao ana utu bwa na wareka Ana Boki Moomon, e karaoa nanon aei Rebecca inanon nimaua te bong. E tangiria ni kan bwabetitoaki n te tai ae waekoa,, ma a tuai n tauraoi kain ana utu. Imwiin aua te namwakina, ao e a kamatoa Rebecca bwa e nang bwabetitoaki ao n kaina te Ekaretia ae koaua. Ao e taku, “I ataia ao n namakinna i nanou bwa e bon koaua.”17 Inanon Eberi 5, 1979, e a bwabetitoaki Rebecca n ana ririki ae 19 irouia mitinare, n raonaki ma tinana, ao uoman tarina. E riki bwa te tia kakoaua tamau n tain ara bwabetito.
Ngke i kaitibo ma Rebecca ao ana utu n te taromauri, e reke au tai n rawetamnei ma ngaiia. I okira mwengau ao n uota te tamnei nakon tinau, ao e anaia n rabwatia ma nanona. Ao e taku nakoiu, “Ronnie, aio te bong ae te kabanea ni kakukurei inanon maiu.”
Ana kaeka tinau e katea te titiraki nakoia ara mitinare aika ikawai: “Tera ae ko karaoia inanon bongin maium?” A rang mwaiti kawai ae a kona ni karaoia mitinare aika ikawai ae akea temanna ae kona ni karaoaia. Ko riai ni kaota te banna ae raoiroi, taan beku n ana Ekaretia, ao n riki bwa te tia kaunga nano ao n kamaiuia natin te Atua.
Tabeman mai ibuakomi kam na iangoia ni kangai: “Ai tera aroia tibura ake ti nang kitaniia? Ti na bon rang nanokawaki n uringi arora inanon ara utu, koronririki, raoraora, ao ai bon ara man.” Ngke arona bwa i titirakina tinau bwa e aera ngkai ngaia ao Tamau a nako ni beku n te mition, I ataia bwa e na bon bae ni kangai, “Iai tibuu. I tangiria bwa a na ataia ae Ngai ao Tamam ti beku n te mition, ti tangiria ni kan katea te banna ni katooto nakoia kanoara, ao ti rang kakabwaiaki, iaon te kakabwaiaki.”
N au tai ni kawariia taabo ni mitinare ni katobibia te aonnaba, ao I noora aia beku ara taanga ni mitinare ae rang tamaroa. E mataata ikai bwa a rang kukurei ni karaoa “nanon te Uea” ao ni kan beku “n ana ”mwakuri te Uea.”18
Ibukia tabeman, are ara kantaninga bwa ngaa mai buakomi, aika mitinare ae bwanin ami tai ni beku ni mwakoron nako te aonnaba bwa bon anne te tabo ibukimi.19 Ibukia ake tabeman, te beku n te Ekaretia ni bon mwengam e rang kaungaaki. Ibukin aoraki ao kangaanga riki tabeua irouia tabemwaang, a kona n aki tau bwa ana beku. Ti rang ota n aekaki ni kangaanga aikai, ao au kantaninga bwa kam na kona ni kakaei anga ni boutokaia naake a beku. Iriira aia reirei burabeti ao tataromwaaka bwa ko na ataa nanon te Uea ibukim.
A bubuti ami ibuobuoki Taabo ni mitinare ni katobibia te aonnaba. E taku Beretitenti Nelson ni kaineti ibukia ara mitinare aika ikawai, “A kairake n tamneia, wanawana, ao ni kan karaoa te mwakuri.”20
N te marae are kam beku iai, e korakora reken ami tai ni waaki aika mwaiti: kam kona ni beku inanon aobitin te mition ke n tembora, kakorakoraia kairake ni mitinare, boutokai mwaanga aika uarereke, ni mwakuri n tabo ibukin rongorongon te utu ke n taabo ni kauring n rongorongon rimoa, tia reirei n te intitute, mwakuri n ibuobuoki nakoia kainano, mwakuri ma kairake aika ikawai, ibuobuoki ni mwakuri n te tienta ke n ana onaroka te Ekaretia. Kawai ibukin te kan beku, tera ae ko mwengaraoi iai, taabo ake ko kainanoaki iai, ao arom ni katauraoiko bwa ko na mwananga a bane n reke iaon te webutiaite ae “Senior Missionary.”21 Ko kona naba ni marooro ma am bitiobi ke beretitenti n te mwaanga iaon aei.
I a tia ni weteia taanga ni mitinare aika mwaiti bwa na beku ao n tararua ngkai e kaonaki nanoia n Otan Kristo.22 Ngke a oki, ao a taekinna bwa a tabe n rikirake ni kaan riki ma te Uea ao ma aomata, n namakina Tamnein te Uea ae bwaro nako aoia, ao n ataa te bitaki are a tia ni karaoia.23 Antai ae nang aki kan reke irouna aei?
Te mition bon te kabanea kakukurei ni mwakoro mai ibuakon karakinan maiuia taanga. E raoiroi n atuunaki bwa “E Kainanoai Au Uea.”24 Ko na roko n te tabo ae tiaki oin am tabo; ma e ngae n anne, ao mwaakan te tamnei ae e raoiroi e na bon anganiko te namakin bwa ko bon mena ni mwengam.
Au karo ma taanga ni mitinare ake a bane aia tai aika tebwina te ngaa mwiaitia a tia ni kaotii aia koaua n te kimwareirei are a karekea inanon aia tai ni mitinare. E taetae te Uea n koroboki aika tabu n boong aika kaitira, “Ao ngkana ngaia bwa ko riai n mwakuri ni bongin maium n tatakaruaea te rairannao nakoia aomata aikai, ao uotiia, kamaeua temanna te tamnei nakoiu, ai batira korakoran kukureim ma ngaia n abanuean Tamau!”25
E anganiira te kabwarabwara Itaia bwa tera ae nanonaki n te beku ni “maraen te mition.” Ti tuangaki n koroboki aika tabu bwa “te marae bon te aonnaba.”26 E koreia te burabeti n rimoa aei bwa, “Bwa kam na nako ma te kimwareirei, ma ni kairaki inanon te rau: a na karebwe maunga ma tabuki imatami n anene, ao a na bane aroka ake inanon te tawaana n uboi baia.”27 Te maunga, tabuki, marae, ao aroka a kona ni kabootauaki ma beretitenti n te mition, bitiobi, mataniwiin mwakoro, membwa, ao ai naake a ukora te koaua ma “a tuai n ataa nnena are na reke iai,”28 A na kakoaua bwa mitinare ake a ikawai a tia ni bita tein te aba n aia kakoaua iroun te Tia Kamaiu ao te tia Kabooira ae, Iesu Kristo.
Ngkai ana Abotoro ngai Iesu Kristo, I tuangko bwa ko na beku bwa te mitinare ngkoe ibukin ikoikoitakiia te bata are Iteraera ao ngkana e bane am tai ao manga moan beku riki kaua. Ti kainanoiko—ti kainanoiko. Ti karabwarabwa nakoimi mitinare ake a ikawai ibukin te bitaki inanoia aomata ao ami banna are kam a tia ni kateia ni mwengami, uoote, ao n ami titeiki. I kaoko ngkai bwa ko nang uota are ko ataa-arona, n raonaki ma ami koaua ae e nene ni maan, ao n nako ni beku n te mition. I tataro bwa ngkana i tekateka n are imwiina ni karaoa tabeu ni kanakoia taanga ni mitinare, nakon aia tabo ni beku ao a na kaoti bubua aika a tauraoi ao n ingainga n tataninga weteaia.
I berita naba bwa ngkana ko beku ao ko na namakina ana tangira te Uea inanon maium, ko na rang kina raoi, ao e na bon rang n kinako naba, ao “korakorara kukureim.”29 Nanom ni kan beku ibukin Iesu Kristo e na bon kakabwaiaia am utu, tibum, ao ai tibutorum. “E [na] bati namakinan te, rau ao te tangira”30 inanon maiuia ao n ririki aika ana roko. I berita. N aran Iesu Kristo, amen.