Neboa Teuare
Ai mwaitira kakabwaiakira ngkai ti atai baika ti atai ibukina bwa iai Iotebwa Timiti, te burabeti ibukin boong aikai.
Tariu ao mwaneu aika kam tangiraki, I kakabwaiaaki ngkai I mena ibuakomi n te moaningabong aei. I tataro bwa E na kakabwaiai te Uea.
E a aikoa raoiroi matau n aron are mai imwaina. I nakon taokitan te mata, ao I taku, “I aikoa kona n nora te mitiin ni wareware.”
Ao e taku, “Eng, e a bon roko te kara ni matam. A na bon aki kona ni bitaki.”
Ngaia are N a karaoa au kabanea ni konaa.
I tangiria n tibwaia ma ngkami tabeua bwaai ake I atia n nori n au iango. E a tia n tiku te Burabeti Iotebwa n au iango tabeua te namwakaina n nako. I tabe ni iangoa mimitongin mwiokoana ngkai te burabeti n taai aikai, taai ibukin te mwioko n tararua ni kororaoin boong.
I iango bwa ti rangi ni kakaitau ngkai membwa n Ana Ekaretia Iesu Kristo ibukiia Aika Itiaki ni Boong aika Kaitira, te ataeinimwaane are e tangiria n ataia bwa tera ae na karaoia bwa a na kabwaraaki ana bure, e karekea te ninikoria n nakon te buakonikai irarikin weengana i Palmyra, New York, ike e a katorobubua n tataro ao—n aron are e taku—bwa ai tibwa te moan tai ni kabaibati n tataro (taraa Iotebwa Timiti—Rongorongo 1:14).
N te tai aei, ngke e katorobubura Iotebwa n te tabo ae ti aranna bwa te Buakonikai ae Tabu, e uki karawa. Uoman aomata, ae a otanako otaia n aron taai n te tawanou, a kaoti nakoina. Temanna ae taetae nakoina ni kangai, “[Iotebwa,] aio Natiu ae Tangiraki. Ongo Irouna!” (Iotebwa Timiti—Rongorongo 1:17). Ao ikai are e a moanaki iai Kaokan bwaninin Ana Euangkerio Iesu Kristo ae akea tokina.
Ibukina bwa Iesu, ara Tia Kamaiu ao te Tia Kabooi Maiura, e taetae ma te ataeinimwaane Iotebwa ao ni kauka te mwioko n tararua ni boong aika tia maiu iai, ti anenea, “Neboa Teuare e taetae ma Iehova!” (“Neboa Teuare,” Anene n taromauri, nambwa 27). Ti kaitaua te Uea ibukin Iotebwa Timiti ao ibukin ninikoriana n nakon te buakonikai n 1820 i rarikin mweengana i Palmyra, New York.
I a tia n iangoa aron ni kabane bwaai aika kamimi ake ti atai ao ake ti karekei. Tariu ao mwaneu aika kam tangiraki, au koaua nakoimi n te ingabong aei bwa ai mwaitira kakabwaiara aika ti atai ibukina bwa iai Iotebwa Timiti, te burabeti ibukn te mwioko n tararua n taai aikai.
Ti a ata ngkai te kantaninga ibukin te maiu, bwa antai ngaira.
Ti ataia bwa antai te Atua; antai te Tia Kamaiu, ibukina bwa iai Iotebwa, are e nakon te buakonikai ngke te ataeinimwaane, n ukora kabwaraan ana bure.
Bon te bwai ae moan te mimitong ao n tamaroa bwa temanna n te aonaaba aei e na ataia—ae Tamara are i Karawa ao te Uea Iesu Kristo a tia ni Kaotiia ni boong aika kaitira ao e a tia Iotebwa ni bukinaki bwa e na kaoka bwaninin ana euangkerio ae akea tokina Iesu Kristo.
Iai iroura Ana Boki Moomon. Bon te bwaintangira ae mimitong ao n tamaroa Ana Boki Moomon nakoia kaain te Ekaretia. Bon manga te kakoaua, n te berita bwa Iesu bon te Kristo. E reke iroura ibukina bwa e tau Iotebwa n nako ni karekea te bwaatua, n anganaki te tamnei mai i karawa n rairia man ana bwaintangira ao mwaakan te Atua ao n anga te boki nakon te aonaaba.
Inanon au marooro n te ingabong aei e na bon beebete, n uaana, ao n onrake n te tangira ibukin te Burabeti Iotebwa Timiti ao nakoia ni kabane, tariu ao mwaneu, ake a tia ni boutokaia ao ni kukurei n boutokaia ngke e kairake.
I tangiria n anga karinean tinana n te ingabong aei. I aki toki ni iangoia bwa e rangi n tamaroa n te tai are ngke Iotebwa e okira mweengana man te taneiai n te Buakonikai ae Tabu ao n tuanga tinana te bwai ae riki, ao Lucy Mack Smith e kakoauaa.
I kakaitau iroun tamana ao tarina ma mwanena ao ana utu, ake a boutokaia n tabena ae korakora aei are e a tia te Uea ni katokaa iaona bwa e na riki bwa te burabeti ni kaoka bwaninin ana euangkerio Iesu Kristo ae akea tokina teuana riki te tai nako aon te aonaaba.
Ngaia are Au kakoaua n te ingabong aei bwa I ataia ae Iesu Kristo bon te Tia Kamaiu te Tia Kabooi Maiuia kaain te aonaaba. I ataia naba bwa Tamara are i Karawa ao te Uea Iesu Kristo a kaoti ao n taetae nakon Iotebwa ao ni katauraoia bwa e na riki bwa te burabeti.
I mimii, ao I taku bwa a mwaiti naba mai ibuakomi, ae ti kakabwaiaaki n ata te bwai ae ti ataia iaon te kantaninga n te maiu, bwa bukin tera ti roko ikai, tera ae ti riai ni karaoia n kakoroa nanona ni katoaa bongin maiura. Ti rinanon te kekeiaki ni katauraoiira, tebongina ni katoa tai, n nakoraoiki riki teutana, n akoakoi teutana, n tauraoi teutana nakon te bong anne, are e na bon roko, ngkana ti a waaki n oki nako matan Tamara are i Karawa ao te Uea Iesu Kristo.
E a bon rangi ni kaan te tai anne ibukiu. E nang koro 95 au ririki. A taku natiu bwa n taai tabetai ao I taraa n rangi ni kara riki nakon anne, ma e bon Nakoraoi. Ae I kataa te kabanea n tamaroa.
Ma inanon ae kaniia 50 te ririki, tairu ao mwaneu, e a tia n reke au tai ni kabutaa te aonaaba ni karaoan weteakiu ngkai te Mataniwii ni Kabuta n te Ekaretia. Bon taai ni kakabwaia aika a tamaroa. I iangoia bwa tao e bon kani buta te aonaaba. I atia ni kaitibo ma membwa n te Ekaretia ni kabutaa te aonaaba.
O, I rangi n tangiria. Bon te taneiai ae moan te mimitong—tarakin moami, ni bon kawari ngkami, ao n namakina ami tangira ibukin te Uea ao ibukin ana euangkerio ae Kaokaki Iesu Kristo.
E tarataraira Tamara are i Karawa ngkai ao E kakabwaiai ni kabane waaki n tain te maungatabu. Ti na karekea Tamnein te Uea ni korakora i nanora, ao e na riki ara tangira ibukin ana euangkerio Iesu Kristo—ara Tia Kamaiu ae tangiraki, ao ara Uea Iesu Kristo—ni korakora ngkai ti kekeiaki ni beku Ibukina ao ni kawakin Ana tua ao n riki n Aiarona mai imwiin kaeakin te maungatabu ni kabuta. Tao te tabo raa ae ko mena iai n te aonaaba aei, e na kakabwaiako te Atua. E na raoniko Tamnein te Uea. Ti na namakina mwaakan karawa ngkai ti uaia n nebonebo inanon tetere ni maungatabu aikai.
I katuka iroumi au kakoaua ao koaua bwa I ataia ae Iesu bon te Kristo. Bon ara Tia Kamaiu, te Tia Kabooira. Bon ngaia raora ni koaua. N aran Iesu Kristo ae tabu, amen.