Maungatabu ni Kabuta
Reirei Iaon Tabeia Kaaro Mai Iroun te Atua
Okitobwa 2023 maungatabu ni kabuta
10:17

Reirei Iaon Tabeia Kaaro Mai Iroun te Atua

Iroun Unimwaane Valeri V. Cordón

Man te Itingaun

A karekea te iraorao kaaro ma Tamaia are i Karawa bwa a na ikarekebai ni kairiia natiia aika kakawaki n okirikaaki nako karawa.

Ko a tia n taua te ataei ae tibwa bungiaki i nanon baim? A namakina te tangira aomata ngkana a taraa te ataei ae tibwa bungiaki, are e uota te reitaki n te tangira ae onoti are e na kaona nanoia kaaro ma te kimwareirei.1 E korea aio te tia koro karaki mai Mexico, “I a tia n reiakinna bwa ngkana e koona tabon bain ana karo te ataei ae tibwa bungiaki ni baina ae uarereke, e taua irouna n akea tokina.”2

Te nakoa ni karo bon te taneiai teuana n te maiu ae moan te rianako arona. A karekea te iraorao kaaro ma Tamaia are i Karawa bwa a na ikarekebai ni kairiia natiia aika kakawaki n okirikaaki nako karawa.3 N te bong aei ao I tangiria n tibwauai tabeua reirei i aon taben te karo aika kuneaki i nanon booki aika tabu ao n reiakinaki irouia burabeti aika maiu ni buokiira ni kabebetei tabeia kaaro.

Tamwarake nakon Kawain Katein te Euangkerio ae Rietaata Riki

Ti riai n tamwarake nakon kawain te euangkerio ae rietaata riki ma ara utu. E katanoata Beretitenti Russell M. Nelson: “A kainnanoa te kairi utu mai i karawa. Aki kona kaaro n reireiniia aia ataei n ae tau man oin aia atatai, te maaku, ke te nanoanga.”4

E ngae ngke tao a kakawaki kateira, arora ni karo, ao ara taneiai ibukin te kairiiri ni karo, a aki tau konabwai aikai ibukin buokaia ara ataei n oki nako karawa. Ti kainnanoia n roko i eta riki n“ bwaai aika kakawaki ao … kabonganakiia,”5 katei ibukin te tangira ao te kaantaninga, ike ti reitaki iai ma ara ataei “n te kawai ae rietaata riki, ao n tabu riki.”6 E kabwarabwara katein te euangkerio Beretitenti Dallin H. Oaks bwa kanga ai “aron kawain te maiu ao karinanin bwaai aika kakawaki ao kaantaninga ao mwakuriakiia. … E roko katein te euangkerio aei man te babaire ni kamaiu, man ana tua te Atua, ao aia reirei … burabeti aika maiu. E kairiira n te kawai ae ti kaikawaia iai ara utu ao ni maiuakin maiura n tatabemaniira.”7

Iesu Kristo bon boton katein te euangkerio aei. Karekean katein te euangkerio n ara utu e matoatoa ibukin karekean te tabo ae a maiu aroka iai are a na kona n rikirake iai koraan te onimaki. N tamwarake nakon te tabo ae rietaata riki, e kaoira Beretitenti Oaks bwa “ti na kanakoi kateira ke kateia ara utu ke waaki aika aki boraoi ma ana reirei ana Ekaretia Iesu Kristo.”8 Kaaro, ngkana ti tabwarabwara n uniki katein te euangkerio n ara kairi ao e na reke ana tai te tia kakaitara n unikii uakaana i nanon mweengara ke, ae kananokawaki riki, i nanoia ara ataei.

Ngkana ti rineia ni karaoa katein te euangkerio bwa boton katei ni mweengara, ngkanne man korakoran ana kairoro te Tamnei ae Raoiroi,9 a na bane n rinanoaki arora n tararuaia ara ataei, kateira, ao ara mwawkuri, ni katiteuanaki, ni katamaroaki, ao ni karababaaki.

Karaoa te Mweenga Bwa te Tabo ae Kakawaki Ibukin Reiakinan te Euangkerio

E a tia Beretitenti Russell M. Nelson n reireiniira bwa ti na karika te mweenga bwa “te tabo ae kakawaki ibukin reiakinan te euangkerio.”10 Te kaantaninga ibukin reiakinan te euangkerio bon ibukin “kakorakoraan rairakira nakon Tamara are i Karawa ao Iesu Kristo ao ni buokiira n riki n ai Aroia.”11 Ti a iangoi teniua taben te karo aika kakawaki aika a kabwarabwaraaki irouia burabeti ao abotoro aika maiu ake a kona ni buokiira ni katea katein te euangkerio ae rietaata riki i nanon mweengara.

Te Moan: Reirei Bwaai Aikai n Aki Tiatianna

E anga te kaetieti Tamara are i Karawa nakon Atam ni kaineti ma Ana reirei Iesu Kristo. E reireinna bwa “e na reirei bwaai aikai n aki tiatianna [nakoia] natina.”12 N taekana riki tabeua, E reireina Atam Tamara are i Karawa bwa e na anga reirei i aon bwaai aikai ma te inaomata, ma te tangira, ao n aki tiatianna.13 Ti tuangaki ni booki aika tabu bwa “Atam ao Ewa a neboa aran te Atua, ao a kaotii bwaai ni kabane nakoia natiia mwaane ao aine.”14

Ti reiakiniia raoi natira ngkana ti kabanea ara tai ae uaana ma ngaia. Ti anga reirei n akea te kairoro ngkana ti maroroakin atuun reirei aika kakawaki n aron tain te tamnei, ni kabonganai bwai n ibuobuoki ake e a tia ni katauraoia te Ekaretia.15 Ti anga reirei raoi riki ngkana ti reirei taekan booki aika tabu ma ara ataei ni kabongana Nakomai, Iriirai ao ni kariaia te Tamnei bwa e na riki bwa te tia reirei.

Te Kauoua: Bannan te Aro n Riki bwa te Reirei

I nanon ana boki Ioane, ti warekia bwa ngke a titiraki Iutaia ibukin katein te Tia Kamaiu, e kairii aia iango Iesu nakon Ana banna ni katooto, Tamana. E reirei, “B’a E aki kona te mwakuri teuana te Nati i bon Irouna, ma ti are E noria ba E karaoia te Tama, ao E karaoia te Nati n te aro naba anne.”16 Kaaro, tera ae ti riai ni kateia bwa ara katoto ibukiia ara ataei? Te Aro n Riki bwa te Reirei.

Ngkai ngaira kaaro, ti kona n anga reirei kakawakin karimoaan moa te Atua ngkana ti maroroakina te moan tua, ma ti karaoia ngkana ti kararoai kamangaongaon bwain te aonaaba aei ao n katabua te bong ae te Tabati ni katoa wiiki. Ti kona n reirei aron kakawakin berita aika tabu n te tembora ngkana ti taekina taekan te mare n te tiretio, ma ti kamatoa ngkana ti karinei ara berita, ao ni kairiia kaainabara ma te karinerine.

Te Kateniua: Kaoia Bwa a na Karaoia

E riai te onimaki iroun Iesu Kristo n riki bwa te bwai ae kakawaki n aia kakoaua ara ataei, ao a riai kakoaua aikai n roko nakoia ataei rinanon aia kaotioti i bon irouia.17 Ni buokiia ara ataei ma karekean aia kakoaua, ti kaungaia bwa a na kabongana aia rinerine n rinea ae eti18 ao ni katauraoia ibukin maiuia ni kawain ana berita te Atua.19

E na nakoraoi riki ngkana ko kaungaia am ataei n tatabemaniia bwa a na kariaia ana kakao Beretitenti Nelson bwa a na bon tabeakin oin aia kakoaua iroun Iesu Kristo ao Ana euangkerio—ni mwakuriia, n nabeia bwa e aonga n rikirake, ni kanuaiia n koauana, ao n aki kabareka ma iango aika kairua irouia mwaane ao aine aika akea aia onimaki.20

Te Tararua ni Karo, ae Raoiroi

Nanon Tamara are i Karawa ni karo a kona n noraki n te kaotioti are e anganaki Mote: “Bwa nooria, bon aio au mwakuri ao mimitongiu—ni karekea te aki mamate ao te maiu are akea tokina ibukin te aomata.”21 E a manga reitia Beretitenti Nelson, “E na karaoi bwaai te Atua aika E kona ni karaoi, ae e na aki kamangaoa am rinerine, ni buokiko bwa ko na aki kabuai kakabwaia aika korakora n te maiu ae akea tokina.”22

Ngkai ngaira kaaro, ngaira bon ana tabonibai te Atua ibukin tararuaia natira.23 Ti riai ni karaoi bwaai ni kabane aika ti kona ni karaoa te enwaeromenta are a na kona iai ara ataei n namakina Ana kairiiri mai ieta.

Tiaki ana kaantaninga Tamara are i Karawa ibukira ngaira kaaro bwa ti na tekateka bwa taan mataku, ni matakuakina buan maiuia n tamnei natira. Kariaia bwa N na kamatata te iango aei ni karaoa te babaire ae tamaroa man au taneiai. Ngke I ira te Moanrinan n te mwaanga ae uarereke i Guatemala, a moana reiakinau au karo aron kakawakin ana kakabwaia te tamanuea. E tibwaua ana atatai ni karekean ana kakabwaia te tamanuea ae kakawaki tinau. E reiakinna nakoiu te reirei ae irekereke ma kakabwaia n tamanuea, ao e kakoaua ni kakabwaia aika a beritanaki. E kaungaa nanou nanona n tibwanga ni karo bwa n na karekea au kakabwaia n te tamanuea.

Ngke 12 au ririki, a buokai au karo n ukora aron karekan te tamanuea. E riai aei bukina bwa akea te tamnanuea n te tabo are ti maeka iai. I mwananga nakon te tamanuea are e mena n te titeiki ae 156 te kiromiita (97) raroana. I uringnga raoi ngke e katokai baina te tamanuea iaon atu bwa e na kakabwaiaai. I ataia man te kamatoa n tamnei ae moan te mwaaka, n akea te nanououa, bwa e kinaai Tamau are i Karawa.

Iroun te ataeinimwaane ae 12 ana ririki man te kaawa ae uarereke, anne e rang ni kakawaki irou. N te bong anne ao nanou e a nimta Tamau are i Karawa man aia tararua tinau ao tamau , ao e na bon aki toki au kakaitau ibukiia.

Titita Joy D. Jones, te Beretitenti ni Kabuta ngkoa n te Moanrinan, e reirei: “Ti aki kona n tataninga te rairaki bwa e na bon riki nakoia natira. Te rairaki ae manennanti bon tiaki reirein ana euangkerio Iesu Kristo.”24 A kona ara kakao n tangira ao ni kaunganano ni kanakoraoia riki ara ataei n aron kabonganakin inaomataia n rinerine. E katuruturua Beretitenti Nelson, “Akea te mwakuri ae korakora riki nakon te raoiroi, te tararua ni karo ae baireaki raoi!”25

Kabaneana

Kaaro, te aonaaba aei e onrake n taian rabakau n aomata, katei, ao iango aika a tangiria ara ataei ni kabanei aia iango nako iai. E kakatanoataa kaainakina ni katoabong te auti are e bubura man mwawawa man kabonganaan taabo ni kanako rongorongo aika a bati ngkai. “Ma n ana bwaintituaraoi Natina,” e reirei te burabeti Moronaai, “ma e a tia te Atua ni katauraoa te kawai ae moan te tikiraoi riki.”26

Ngkai ti a tia n itoman ma te Atua rinanon berita aika tabu ao n riki bwa Ana tia tararua n tabeakiniia ara ataei, E na katabui nanora, ni kaungai ara reirei, ao ni kanakoraoa ara kakao bwa aonga “natira n ata te tabo are a na kawaria ibukin kamaunaan aia bure.”27 N aran Iesu Kristo, amen.

Bwaai aika a na taraaki

  1. Taraa Taian Areru 127:3.

  2. Johnny Welch, “The Puppet,” reproduced at inspire21.com/thepuppet; taraa naba Johnny Welch, Lo que me ha enseñado la vida (1996).

  3. E kona n ae kanga te katabeaki ae matoatoa, ma e taekinna Unimwaane Jeffrey R. Holland, “Ma n ana ibuobuoki Tamara are i Karawa ti kona ni kabebetei riki tabeia kaaro nakon are ti iangoi” (“The Hands of the Fathers,” Riaona, Turai 1999, 18).

  4. Russell M. Nelson, “Thou Shalt Have No Other Gods,” Ensign, Meei 1996, 15.

  5. Dallin H. Oaks, “The Gospel Culture,” Riaona, Maati. 2012, 22.

  6. Russell M. Nelson, “A Kainnanoaki Taan Raoi,” Riaona, Meei 2023, 99.

  7. Dallin H. Oaks, “The Gospel Culture,” 22.

  8. Dallin H. Oaks, “The Gospel Culture,” 22.

  9. Taraa Moronaai 10:5.

  10. Russell M. Nelson, “Becoming Exemplary Latter-day Saints,” Liahona, Nov. 2018, 113.

  11. Te Rairaki Bon Ara Kouru,” Nakomai, Iriirai—Ibukiia Aomata n Tatabemaniia ao Utu: Te Nu Tetemanti 2023,v.

  12. Mote 6:58.

  13. Taraa American Dictionary of the English Language, “freely,” webstersdictionary1828.com/Dictionary/freely.

  14. Mote 5:12.

  15. Taraa “Taking Charge of Technology” ao Ibukin Kakorakoraia Kairake: te Kairi ibukin Karaoan Rinerine. (2022), Gospel Library.

  16. Ioane 5:19.

  17. See “Mataio 16:17–18. Individual Revelation Needed for a Testimony of Jesus Christ,” in New Testament Student Manual (2018), 52.

  18. Taraa Dale G. Renlund, “N te Bong aei Kam na Rinea,” Riaona,Nob. 2018, 104: Ana kouru Tamara arei i Karawa n nakoana ni karo tiaki anganakiia Natina bwa a na karaoa ae eti, ma bon kairaiakaia Natina bwa a na karaoa ae eti; n kairiia Natina n rineia ni karaoa ae eeti ao n riki n ai Arona.”

  19. Taraa “Appendix: Preparing Your Children for a Lifetime on God’s Covenant Path,” n Nakomai Iriirai—Ibukiia Aomata n Tatabemaniia ao Utu: Nu Tetemanti 2023, Gospel Library.

  20. Taraa Russell M. Nelson, “Tokanikai man Kangaangan te Aonaaba ao Karekean te Rau,” Riaona,Nob. 2022, 97.

  21. Mote 1:39. N te kibu aei, ao e taetae Iesu Kristo ibukin Tamara are i Karawa.

  22. Russell M. Nelson, “Choices for Eternity” (worldwide devotional for young adults), May 15, 2022, Gospel Library.

  23. Taraa Russell M. Nelson, “Salvation and Exaltation,” Riaona, Meei 2008, 10: “Tai kataia n taumatoaia am ataei. Ma, ongora irouia, buokiia n reiakina te euangkerio, kaungaia, ao kairiia nakon te maiu ae akea tokina. Ngkoe bon ana tia tei te Atua ae E a tia n onimakiniko ibukin tararuakiia ataei. Kariaia Ana kairoro te Atua bwa ena tiku inanom ngkai ko anga reirei ao ni kaungaunga.”

  24. Joy D. Jones, “Essential Conversations,” Riaona, Meei 2021, 12.

  25. Russell M. Nelson, “Te Tabati Bon t eBong ni Kakukurei,” Riaona, Meei 2015, 131.

  26. Ita 12:11.

  27. 2 Nibwaai 25:26.