Maungatabu ni Kabuta
Teuaei, Ti Tangiria ni Kan Noora Iesu
Okitobwa 2023 maungatabu ni kabuta
10:23

Teuaei, Ti Tangiria ni Kan Noora Iesu

Unimwaane Robert M. Daines

Man te Itingaun

T tangiria n noora Iesu bwa ti na ataia bwa antai raoi Ngaia ao n namakina Ana tangira.

Kaitara ma te Mataki

N te bong teuana n tain te tiburing n 1945, e uti te ataeinimwaane temanna n aia onaoraki tautia. E tekeraoi bwa e maiu—e katiaki rarikin taningana, ma a tia taokita n buokia, ao e a kona ngkai n nakonako ao n taetae raoi.

Ma te bwai ae kananokawaki, bwa e a tia te kanoa ni kati n urua mwakoron kaburorona are e kinaia iai aomata. Ngkai e taraa buuna ao e aki kinaa, e aki kona ni kina are bon tinana. E aki kina naba tamaneina n te tirotaam—e aki kina bwa te mwane ke te aine.1

E a bon mataki are e aki kinaia iai aomata—te kangaanga are e rotiia mirion n aomata.2

Aomata ake a mataki n aki kinaa te ubu a kataia ni kinaia aomata man kamatenanoan tuua—te tua ni kina te nati te aine man mwaake iaon kunna ke raoraona man uaakinan waena iaon tano.

E a Ikawai

Aio te kauoua ni karaki, ae kaineti ibukiu: Ngke te ataeinimwaane ngai, I namakinna ae tinau bon te tia karaoi tuua aika a na iraki. E bairea au tai ae n na takakaro iai ao ae n na nako ni matu iai ke, ae matoana riki, koutan uteute itinanikun ara auti.

E bon rang n tangirai. Ma n taainako ao ae I mamaa iai, I noria bwa te aine ae “E Riai n Ongotaeka te Aba Irouna.”

Bon ririki imwiina ae I a tibwa noria bwa antai raoi ngaia. I mamaa n taekinna ae I tuai man kinaa ana anganano ke ni mimi bwa bukintera inanon ririki aika mwaiti ao e ti bwabwaini ana kamumun aika ti uoua ae a rang ni maan (ngkai ngai I kakarekei au kunnikai n reirei aika boou) ke bukin tera, n tokin te bong anne, e a rang ni kua ao n tangirai bwa n na moantaai n nako ni matu.

Ti Kona ni Mataki-n Aki Kina te Ubu

Tao ko na tia n ataia ae karaki aika uoua aikai bon te karaki ae ti teuana—ibukin ririki aika a rang ni mwaiti, I kaitara ma te mataki ni kikina. I kabwaka n noora tinau ae bon te aomata ni koaua. I noori ana tua ma iaki noora ana tangira.

I taekin nakoimi karaki aika uoua aikai ni kaota teuana te iango: Au kantaninga bwa kam ataa temanna (tao bon ngkoe temanna) are ko rootaki n te mataki ni kina te tamnei.

E na bae n iai am kangaanga n noora te Atua ae te Tama ae tatangira. Ko kona n taraa karawa ao n noora tiaki matan te tangira ao te nanoanga ma tuua aika matenten aika ko riai n irii. Tao ko kakoaua ae te Atua e tautaeka n Ana karawa, n taetae rinanoia Ana burabeti, ao n tangira mwanem, ma n aki koaua raoi ngkana E tangiriko.3 Tao ko a tia n namakina te kai te biti inanon baim ma ko tuai raoi n namakina ana tangira am Tia Kamaiu are e kairia.4

Au kantaninga bwa ko kinaia aomata aika ti tebo ma aei ibukina bwa n te tai ae maan, Ngai bon temanna ae aekan raoi aei—I mataki ni kina te tamnei.

I taku n au iango bwa maiu aei bon ibukin irakin tuua ao ni karaoi kainibaire. I ataia bwa e tangiri ngkami te Atua ma te kororaoi ma I aki namakinna ibon irou. I maaku bwa I rang ni iangoa riki te nako karawa nakon ae te maeka ma Tamau are i Karawa.

Ngkana ngkoe, n arou, ae ti kona n tabetai n tii kakamwakuri riara ma ti aki “anenea kunan te tangira ni kabomwi,”5 tera ae ti kona ni karaoia?

Te kaeka, are e kauringiira iai Beretitenti Russell M. Nelson, bon Iesu n tainako.6 Ao aikanne rongorongo aika rang n tamaroa.

Teuaei, Ti Tangiria ni Kan Noora Iesu

Iai te kibu ae uarereke n Ioane ae I tatangiria. E taekiniia kurubu mai itinaniku aika a karaoi kawaia nakon ana reirei Iesu ma te bubuti ae kakawaki. “Teuaei,” a taku, “ti [kan] noora Iesu.”7

Anne te bwai ae ti bane n tangiria—ti tangiria n noora Iesu bwa ti na ataia bwa antai raoi Ngaia ao n namakina Ana tangira. Aio bon bukin bwaai ni kabane aika ti karaoi n te Ekaretia ao ni bon bootaki nako n toa. Ngkana ko tuai n iangoia bwa tera te reirei ae ko na anga reirei iaona, te aeka ni bootaki raa ae ko na baireia, ao tao ni katikuia kaain te kooram n riikan ao n takakaro n te butibooro, ko kona ni kabongana te kibu aei bwa kairam: e kona te bwai aei ni buokiia aomata n taraa ao n tangira Iesu Kristo? Ngkana ngaia, tao kata te bwai riki teuana.

Ngke I kunea bwa I mataki ni bwain te tamnei, ae I noori tuua ma tiaki ana nanoanga te Tama, I ataia bwa tiaki ana kairua te Ekaretia. Bon tiaki ana kairua te Atua, ao tiaki nanona bwa a bane ni bua bwaai; bon te bwai ae ti na bane n reiakinna. Riki taan kakoaua ngkekei nakon te Mangauti a kaitara n tainako ma te Uea ae mangauti ma aki Kina; man te Ne n Aroka ae iai te Ne ni Mate iai nakon biken Kariraia, naake taan moan Iriria “a noora Iesu n tei, ao aki ataia ngke Iesu.”8 A riai n reiakina aron Kinakina, ao ngaira naba.9

Tangira ae Kororaoi

Ngke I a ataia ae I mataki n noori bwain te tamnei, I a moanna n ira ana reirei Moomon n tataro “ma nanou ni kabane” ni kaonaki n te tangira are e beritanaki irouia Ana reirei—au tangira Ibukina ao Ana tangira ibukiu—ao n “nooria ni bon arona … ao ni karekea te kantaninga aei.”10 I tataro inanon ririki aika mwaiti bwa na kona n ira te moan tua ae korakora n tangira te Atua ao n namakina “te moan ni koaua … bwa te Atua e tangirira ma Nanona marurungina, ana iango, ao korakorana.”11

Te Euangkerio

I wareki naba ao ni manga wareki Euangkerio ake aua—n te tai aei ni wareware n aki kaewei kaetieti ma n noria bwa antai Ngaia ao tera bwaai aika E tangiri. Ao, inanon taina, I namakina ao n ota n Ana tangra Iesu Kristo ae moan te takaburinako.

E katanoataa Iesu mai moana bwa E roko bwa “e na kamarurungiia akana a uruaki nanoia, ni kainaomataia akana taenikai, ao ni kamaiua te mataki bwa e na nooraba.”12

Tiaki aio tii karinanin bwaai aika a na karaoaki ke tarakina ae raoiroi; bon ibukin kaotakin Ana tangira.

Kauki Euangkerio n tatabeua nako; inanon baana nako ti kona n Noria ni buokiia aomata aika rotaki—n aia reitaki ma aomata, ni maiun tamneia ao n rabeataia. E ringiia ake a taraaki bwa a bareka ao n aki itiaki13 ao e kamwarakeia aika baki.14

Tera karakinan Iesu ae mamate nanom iai? Au kantaninga bwa e kaotia nakon Natin te Atua bwa e kawariia aomata ni mwaneiia ke n anga te kantaninga nakon temanna ae aki butimwaeaki—te rebera,15 te Itamaria ae ribaaki,16 te tia riko taekiti,17 ke ana kairiribai te aba.18 Te aeka n nanoanga anne e bon kamiimi.

Kataia koroboki n tainako ngkana E kamoamoaia ke ni kamaiuia ke n amwarake ma te irua, ao e na bane bwaan am kai ni koroboki imwain ae ko kitana Ruka.

Ngke I noora aei, ao e onrake nanou n atakin te tangira, ao I moanna n namakinna ae E bon bae n tangirai. N aron are e reirei Beretitenti Nelson, “Ngkana e mwaiti riki iroum reiakinan te Tia Kamaiu, e na bebete riki iai onimakinan Ana nanoanga, Ana tangira ae akea tokina.”19 Ao e na bati riki onimakinan ao tangiran Tamam are i Karawa.

E atia n reireiniira Unimwaane Jeffrey R. Holland bwa e roko Iesu ni kaotia “nakoira bwa antai ao aekara tarakin te Atua are Tamara ae Akea Tokina, ao e kanga teimatoan Ana tangira nakoia Natina inanon roro nako ao aaba.”20

E taku Bauro bwa te Atua bon “taman [ni kabane] te nanoanga, ao te Atua ae karika kabebetean te nano ni kabanea.”21

Ngkana ko nooria n ae kaokoro, taiaoka teimatoa ni kataia.

Te Berita ae Tabu ao Mwaneakira iroun te Atua

A kaoira burabeti bwa ti na ukora Ubuna.22 I ana aei bwa ti na neboa Tamara, ma tiaki kaetieti aika ti na iri, ao ti tuai n tia ni karokoa ae ti noora Iesu ni kaota ana tangira Tamara;23 ao ni Iriria, tiaki ti Ana tua.24

Ngkana a taetae burabei ma abotoro iaon berita aika tabu, aki riki kanga taan kaira te takakaro n tatakarua man (red velvet) te kaintekateka, n tuangira bwa ti na “kabanea korakorara!” A tangiriira bwa ti na nora ara berita bwa bon oin raoi te reitaki25 ao e kona n riki bwa bwain kamaoan te mataki n tamnei.26 Aki kairiiri n ae a na karekea Ana tangira; E a kaman tangiriko n ae kororaoi. Te kakaewenako ibukira bwa ti na ataia ao ni bita maiura nakon te tangira anne.27

Ti kataia n taratara rinanon ara berita, ae kanga rinanon te wintoo, nakon katukan ana nanoanga te Tama.

Taian berita bon tein aron mwaneakira iroun te Atua.

Karaangan Ana Tangira te Atua

N tokina, ti kona n reiakina aron taraana man karaoan te beku Ibukina. “Bwa e na kangaa te aomata ni kinaa te toka are e tuai ma ni beku irouna?”28

Tabeua te ririki n nako, I karekea au wewete ae boou ae I aki namakinna bwa i tau nako iai. I moantaai n uti, n nako nanou—ma te kibu n taeka ae mena n au iango ae I tuai n ongongo mai imwaina: bwa te beku n te Ekaretia aei bon te tei ni karaangan ana tangira te Atua ibukiia Natina. Te Ekaretia aei bon aia botaki ni mwakuri aomata ma taian biki ao tiabora, ni kataia ni buokia ni kaitiaka te kawai ibukin karaangan ana tangira te Atua ni karokoa irouia ake a kainnanoia.

Bwa antai ngkoe, bwa tera kanoan am tai aika nako, iai te ruu ibukim n te Ekaretia aei.29

Anaa te biki ao te tiabora ao raoniia kaain te tiim. Buokia ni uota Ana tangira nakoia Natina ao tamruruna tabeua a na reke naba iroumi.30

Ti a ukora ubuna n Tangira, Ana berita ae mwaneira, ao ngkanne reitaki n taubai ma Natina, ao ti na bane n anenea “Redeemer of Israel”:

Kaoka, au Tia Kamaiu ae tangiraki,

Otan ubuna;

E a bua kukurein tamneiu;

Ao kariaia te kukurei bwa e na teimaan

Ibukin am tabo ae mimitong

Uota te kaantaninga nakon nanou ae maroa.31

Ti bia ukora Ubuna ae tangira ao n riki bwa mwangkon Ana tangira nakoia Natina.32 N aran Iesu Kristo, amen.

Bwaai aika a na taraaki

  1. See Hadyn D. Ellis and Melanie Florence, “Bodamer’s (1947) Paper on Prosopagnosia,” Cognitive Neuropsychology, vol. 7, no. 2 (1990), 84–91; Joshua Davis, “Face Blind,” Wired, Nov. 1, 2006, wired.com.

  2. Dennis Nealon, “How Common Is Face Blindness?,” Harvard Medical SchoolBebuare. 24, 2023, hms.harvard.edu; Oliver Sacks, “Face-Blind,” New YorkerAokati. 23, 2010, newyorker.com.

  3. Tabeman kaain te Ekaretia a kakoauaa te reirei, tuua, ao kakoaua aika a kaokiokaki man te tabo n taetae aei n te Tienta ni Maungatabu ao n taabo ni bootaki ni kabuta te aonaaba—ma a bae ni korakai ni kakoauai koaua mai karawa aikai ni maiuakinna ao n aroia nako” (David A. Bednar, “Abide in Me, and I in You; Therefore Walk with Me,” RiaonaMeei 2023, 125).

  4. Taraa 1 Nibwaai 8:19; 15:23. “E kangaanga kawakinan ana tua te Uea n akean te onimaki ao te koaua Irouna” (Henry B. Eyring, “The Faith to Ask and Then to Act,” Riaona, Nob. 2021, 75).

  5. Aramwa 5:26.

  6. Taraa Russell M. Nelson, “Te Tabati Bon te Bong ni Kakukurei,” Riaona, Meei 2023, 127–28.

  7. Ioane 12:21.

  8. Ioane 20:14. A noria ma aki Kina iaon te kawai nako Emauti (taraa Ruka 24:16), inanon te ru ae roka (taraa Ruka 24:37), iaon biken Kariraia (taraa Ioane 21:4), ao n te Onaroka n te Ruanimate (taraa Ioane 20:14).

  9. Ngkana ti bon ukoukoria ma nanora ni kabane ao ni waaki nako ma te onimaki, ao E na bon reke.

    “Ba I bon atai naano nako aika I kariki nako imi, bon ana taeka Iehova, aika naano ni kariki raau, ao tiaki naano ni kareke kai. …

    “Ao ane kam na ukoukorai, ao N na bon reke iroumi, ngkana kam bon ukoukorai n nanomi ni kabane” (Ieremia 29:11, 13).

    “E na roko te bong are kam na ata naba te Atua, are kam kamaiuaki rinanona ao mai irouna.

    Ngkanne kam na ataia bwa kam a tia n norai, bwa bon iai Ngai” (Reirei ao Berita aika Tabu 88:49–50).

    “E na koro bukina bwa aomata nako ake a kitani aia bure ao n roko nakoiu, ao ni wetea arau, ao n ongeaba nakon bwanaau, ao ni kawakini au tua, a na nora ubu ao n ataia bwa bon iai Ngai” (Reirei ao Berita aika Tabu 93:1).

  10. Moronaai 7:48. Bauro e reita naba te tangira ae kororaoi ma ara konabwai n taraia n ae itiaki. N tokin ana kabwarabwara ae moan te tamaroa iaon te tangira ae kororaoi, e koreia bwa “ngkai n te tirotam ao kaanga ti mwaninga,” ao rimwi ti na noraba “ni kaitara: … ao rimwi N na bon atatai raoi n ai arou ngkai I bon ataki raoi” (1 I-Korinto 13:12).

  11. Jeffrey R. Holland, “Tomorrow the Lord Will Do Wonders among You,” Liahona, Meei 2016, 127. “Kabwaraan raoi riki nanon ‘ana tangira Kristo ae itiaki’… bon tiaki ae ti kataia ngaira Kiritian ma ti kabwaka ni karaoia nakoia tabeman ma bon te bwai ae tokanikai iaona Kristo ni kaotia nakoira. E Koaua te tangira ae kororaoi ni koaua e a tia n ataaki n ti te taina. E kaotaki n ae kororaoi ao n itiaki n ana tangira Kristo ae aki kona ni bwaka, e kakawaki, ao ana tangira ni kamaiu ibukira” (Jeffrey R. Holland, Kristo ao te Berita ae Boou: The Messianic Message of the Book of Mormon [1997], 336).

  12. Ruka 4:18, New King James Version.

  13. Taraa Mataio 8–3; 9:25.

  14. Taraa Mataio 14:13–21.

  15. Taraa Mataio 8:1–3.

  16. Taraa Ioane 4:7–10; E kamoamoaa te Itamaria (taraa Ruka 10:25–37).

  17. Taraa Mataio 21:31; Ruka 7:27–50; 15:1–10; Ioane 8:2–12.

  18. Taraa Mataio 8:5–13.

  19. Russell M. Nelson, “E A Uti Kristo; Onimakinana E na Kamwaingi Maunga,” Riaona, Meei 2021, 103.

  20. Jeffrey R. Holland, “The Grandeur of God,” Liahona, Nob. 2003, 70. N ana tai n tataekina te euangkerio “Ane e a tia n norai ao e a tia n nora naba te Tama” (Ioane 14:9).

  21. 2 I-Korinto 1:3.

  22. Taraa Taian Areru 27:8; Reirei ao Berita aika Tabu 88:68.

  23. See 2 Corinthians 4:6; Pope Francis, “Misericordiae Vultus: Bull of Indiction of the Extraordinary Jubilee of Mercy,” Apostolic Letters, vatican.va.

  24. Aio te boto ni iango ae kakawaki. Tiaki ti te mwakuri ni kamaiu ao ni karietataaki ma Ana mwakuri ni kamaiu ao ni karietata (taraa Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong aika Kaitira, 1.2, Gospel Library). I aki ti nakon te tembora ma nakon ana auti te Uea; tiaki ana Ekaretia te Moomon ma Ana Ekaretia Iesu Kristo (taraa Russell M. Nelson, “The Correct Name of the Church,” Liahona, Nob. 2018, 87–89). Ara taan kairiiri a kairiira Nakoina ao a kauringiira bwa bon “akea raoi te rabwata ae atongaki bwa te ‘Mwakuri ni Kamaiu’ are ti kona iai ni weteaki ibukin te ibuobuoki, te kamaiu, te kabwarabure, ke te mwaaka. Iesu Kristo boni ngaia ae nako mai iai” (Russell M. Nelson, “Drawing the Power of Jesus Christ into Our Lives,” Riaona, Meei 2017, 40).

  25. “Kawain te berita ae tabu bon ibukin ara reitaki ma te Atua”; bon “kawain te tangira … te tabeaianga ibukin ao te nakoia n tatabemaniia nako” (Russell M. Nelson, “Te Berita ae Tabu ae Akea Tokina,” Riaona, Okitobwa 2022, 11).

    Taraa David A. Bednar, “The Blessed and Happy State” (te marooro are e kanakoaki n te tiemina ibukiia taan kairiiri n te mition aika boou, Tuun 24, 2022); Scott Taylor, “Elder Bednar Shares 7 Lessons on ‘the Blessed and Happy State’ of Obedience,” Church News, June 27, 2022, thechurchnews.com.

    “Te rin n te berita ae tabu ao n tau ni karekei otenanti n te nakoanibonga e reitiira ao e kabaeira nakon te Uea Iesu Kristo ao Tamara are i Karawa. Aio are nanona bwa tina onimakina te Tia Kamaiu bwa ara Tia Tei Ibukira ao ara Tia Raoi ao n onimakina Ana mwakuri aika raoiroi, ana nanoanga, ao ana akoi n tain te mwananga n te maiu. …

    Maiuakinan ao tangiran berita aika tabu ake ti kabaeaki iai e karekea te reitaki ma te Uea ae nano inanora ao te kakorakoraaki ni maiura n tamnei. … Ngkanne Iesu e na raka riki arona nakon ae ti te boto n rongorongo ni koroboki aika a tabu: Ana banna ni katooto ao ana reirei a kakorakorai nanora, ara iango, ao ara mwakuri” (David A. Bednar, “Ma Tiaki Mutiakiniia,” Liahona, Meei 2022, 15).

    Taraa naba D. Todd Christofferson, “Ara Reitaki ma te Atua,” Riaona, Meei 2022, 78–80.

  26. “Ao n akean taian otenanti mai iai, ao te kariaiakaki n te nakoanibonga, te mwaaka n te aro n Atua e aki kaotaki nakoia aomata n te iriko;

    “Bwa n akean aei akea te aomata ae e kona n noora ubun te Atua, ao e maiu” (Reirei ao Berita aika Tabu 84:21–22).

  27. Jeffrey R. Holland, “A Future Filled with Hope” (worldwide devotional for young adults, Tianuare 8, 2023), Gospel Library:

    “Ko na aki biriaitua n aki akaka ni kakioa [te kantaninga are E na buokiko]; ko na bon aki ao ko aki kona ni karaoia. N aron taraakin tamaroana, ko na bon aki konaa ni karekea man oin korakoram ke man korakoran temanna. Bon akea kawain karekeana ae tao e karabaaki ke aanga aika mwaaka ae a na kabonganaaki. …

    “Ni koauana, ao ara mwakuri ae ti karaoia e rangi ni kakawaki ma e rangi ni uarereke; Iai ana mwakuri te Atua ae bubura riki. Tabera bwa ti na Nakoina inanon te nanorinano ao ae bebete, ao imwiina ti na aki raraoma ao n aki maaku.”

  28. Mataio 5:13; taraa naba Ioane 17:3.

  29. E a tia Beretitenti Nelson ni kaokiokia ni weteira bwa ti na “karababa ara mronmron n tangiria ni mwaneia utu ni kabane” (“Blessed Are the Peacemakers,” Liahona, Nob. 2002, 41). N Meei 2022 e tuangiia kairake n ikawai ae “a kona kanikina ni kairiiri nakon te motikitaeka ao namakinan te aoraki. Ngakna iai aroaro n aki ako ke ni babakanikawai nakon temanna ibukin abana, ana reeti, rikina n aine ke ni mwaane, rabakau n te reirei, katei, ke bwaai riki aika kaokoro e bon aki raoiroi imatan te Tia Karikiira” (“Choices for Eternity” [worldwide devotional for young adults, Meei 15, 2022], Gospel Library). Ao e kakawaki riki, e taku: “I nanokawaki bwa tarira ma mwaanera aika Bwatabwata n te aonaaba a tia n rinanon kamarakin te bwainikirinaki ao te riribaaki. N te bong aei I weteia ara membwa n taabo nako bwa a na katoki anua ao mwakuri ni karaoa te kakaokoroaki. I bubuti ngkami bwa kam na karikirakea te karinerine ibukiia natin te Atua ni kabane” (“Let God Prevail,” Liahona, Nob. 2020, 94).

    Te kaokoroaki e aki booraoi ma ana taeka te Atua ae kaokaki. Nanonaki ke n aki nanonaki iroun te Atua e bon kaineti nakon te kakaonimaki Nakoina ao Ana tua, tiaki iaon karan kunin te aomata ke anua riki tabeua.

    “… Aio e raonaki ma te kaokoroaki are e aanaki iaon te reeti, katei, te aba, baronga, rikim bwa te mwaane ke te aine, ririki, aki toamau, te aomata ae kaubwai, kakoaua n te aro ke n aki kakoaua, ao te kaitataan ae reitinako” (Aeniboki ni Kabuta, 38.6.14, Gospel Library).

  30. Taraa 1 Nibwaai 11:25.

  31. “Redeemer of Israel,” Hymns, no. 6.

  32. Taraa I-Rom 9:23.