Ko Tangiria ni Kan Kukurei?
Teimatoa ni kawain te berita ae tabu. E na bebete maium, kukurei, ao n onrake ma te kimwareirei.
Ko tangiria ni kan kukurei? Tera ae e karika aki kukureim? E taku Beretitenti Russell M. Nelson: “Ngkana ko tangiria n aki kan kukurei, ao urui tuua—ao tai raira nanom. Ngkana ko kan kukurei, teimatoa iaon kawain te berita ae tabu.”1 Tiaki ae bon rang bebete aron karekean te kukurei? Tii karaoi berita aika tabu ao kawakin inanon maium. N na kaota tabeua bwaai aika a kona ni buokiira n teimatoa i aon kawain te berita ae tabu ao n anganiira te kukurei.
1. Tera Kawain te Berita ae Tabu?
N ana kabwarabwara Unimwaane Dale G. Relund: “te taeka ae kawain te berita e kaineti nakon rinanin berita are e karokoira nakon Kristo ao ni reitaki ma Ngaia iai. Rinanon te kabaeaki n te berita aei, ti karekea Mwaakana ae akea tokina. E moanaki te kawai ma te onimaki iroun Iesu Kristo ao n rairannano, n rimwiiaki ma te bwabetito ao karekean te Tamnei ae Raoiroii.”2 Ti kabooui berita aikai ni katoa tai ngkana ti kana te toa.
Ti moanna man karaoan ara berita n te bwabetito, ao ni karaoi riki berita aika mwaiti inanon bongin maiura. E a manga, taekinna riki Unimwaane Renlund bwa: “E kairiira kawain te berita nakon otenanti n te tembora, n aron te entaumente n te tembora. Te entaumente bon Ana bwaintangira te Atua n berita aika tabu are e reitiira raoi iai ma Ngaia.”3
2. Ko Mena iaon Kawain te Berita ae Tabu?
N tabetai ngkana ti karaoi berita aika tabu, ti kabwaka n arora ni kawakinii. Ngkana e riki aio, tera arom n oki nakon kawain te berita? N na tibwauai ma ngkami tabeua katooto iaon okiran kawain te berita ae tabu.
Tabeua te namwakaina n nako, I karekea ana rongorongo temanna te mitinare ae e a tia ni bane ana tai ni beku ma ngaira. E taku: “E matoatoa taai aikai. Kaitaraan te maaku ao te nanokawaki ae korakora ni katoa bong e bon n taonai,nako ao n matoatoa irou. I namakina te maroaa ao te aki kukurei. I a tia n tataro ibukin karekean ana kairi Tamara are i Karawa ibukin te rau ao te korakora inanon au tai ni boo ni buaka ma taian kangaanga. … I nanon au tai n tataro, I namakina bwanaan te tamnei n tuangai bwa I riai ni kakabwaka au kabwianibwai ae bwanin. … I namakinna korakoran te Tamnei, ao n namakinna ngkekei naba bwa N na riai ni karaoia. Ma nanou ae korakora ni karaoana, I namakina te wirikiriki bwa ‘ngkana ko kabwakaa am kabwianibwai a na NAKORAOI bwaai ni kabane.’ I bon teimatoa naba n korakai n ukora te rau, ma iai au koaua iroun ara Tia Kamaiu ao n ataia bwa man au ongeaba, I namakinna ao n kunea te rau are I ukoukoria i nanou ao n au iango. I motikia n au iango bwa n na okira te Ekaretia ao n ukoukora ana kairi te tamnei n au waaki ni bane.”
E a nakoraoi maiuna ngkai. Ko na bae n bubutia Tamam are i Karawa te rau, ma e kona n kaokoro te reke ma are ko iangoia. Ti ngkana ko ukoukoura ataakin te Tia Kamaiu ao n tataro nakon Tamra are i Karawa, E na anganiko raoi te reke are ko kaantaningaia.
E reirei Beretittenti Thomas S. Monson:
“Te reirei ae te kabanea ni korakora are ti kona n reiakinna n te maiu aeibwa ti na ongeaba nakon ana taeka te Atua, ti na eitieti n taainako.”4
“Ngkana ti kawakin tuua, e na kakukurei riki maiura, e na bwanin raoi, ao ni karako te kangaanga. Kakaewenakoara ma ara kaangaanga a bon bebete uotakiia, ao ti na karekei Ana berita [te Atua] n taian kakabwaia.”5
Ngke I weteaki bwa te bitiobi, bon te tai ae moan te rawawata inanon maiu. Bon te karo ngai ngke 30 tabun au ririki, ma iai au kangaanga n te mwane ibukin aia kangaanga au utu. E aki reke totokoan au kangaanga aio, ao n taku n au iango bwa e nang aki kona n toki. I a rang korakai n kangaanga n te mwane ao n roota au namakin. E a moanna ni mamaara maiun tamneiu naba. Bon te tai ae rang rawawata irou ike e a weteai au beretitenti n te titeiki bwa nna beku. I butimwaea te wewete anne, e ngae ngke e matoatoa irou.
E intawiu naba kainnabau ma te beretitenti n te titeiki, ma e bon aki kangai eng ke tiaki ma a waanako ranin matana. E tang i nanon te wiiki anne, ao n titirakina Tamara are i Karawa, “Bukin tera ko weteira n taina aei” ao “Ko bon kinaira raoi n tatabemaniira?” E bon aki karekea te kaeka, ma ngaia are I a kamatoaaki bwa te bitiobi n te Taabati are imwiina. E aki manga kan titiraki nakon Tamana are i Kkarawa ma e a boutokaai ni beku inanon te maan ae onoua te ririki.
N te Taabati are I a kamotirawaaki iai, ngke e nang anaa te toa kainnabau e ongo te bwanaa. Te bwanaa ae wirikiriki ni kangai, “Ibukina bwa e a rang kanganga iroum bwa ko na rianna, ao I a weteia bwa te bitiobi bwa e aonga n baimatoaiko ao n rianna ibukim.” Ni kaoka ana taratara onoua te ririki n nako, e kunea bwa kangaanga ni kabane ake a taraa n aki kona n toki a bon buokaki ni katokaki inanon kawaia.
Ti reiakinna bwa ngkana ti taku n ara iango bwa aio bon tiaki te tai ae angaraoi ibukin karekean te wewete, tao bon ngaia aio te tai ae ti rang kainanoa iai te wewete anne. N aki taraia bwa tera te wewete ae na anganiira te Uea, e bebete ke e rawawata, E ti kakawaki bwa ti na ataia ae E noori kainnanora. E katauraoa te korakora are ti kainanoia ao n tauraoi ni kabwaroi kakabwaia nako aora ngkana ti kakaonimaki nakon ara beku.
A mwaiti riki bwaai aika a kona ni kaririira nako man kawain te berita ae tabu. N aki taraia bwa tera ae riki, e bon aki oimwi nanora ni kan rairaki nakon Tamara are ki Krawa ni butiia ana ibuobuoki. E reireiniira Unimwaane Paul V. Johnson: “Ngkana ti iriira Tatan, ti anganna korakorana. Ngkana ti iriira te Atua, E anganiira te korakorara.”6
E taetae te Uea ae Beniamina n Ana Boki Moomon: “ I tangiria bwa kam na iangoa te kakabwaia ma te aro ni kukurei irouia ake a kaawakin ana tua te Atua. Bwa taraia, a kakabwaiaki ni bwaai ni kabane, n te maiu n rabwata ao n tamnei; ao ngkana a teimatoa ni kakaonimaki ni karokoa te toki ao a na butimwaeaki mai karawa, ao a na maeka ma te Atua n te aro ni kukurei ae aki totoki.”7
3. E na Kanga Kawakinan Berita aika Tabu ma te Atuaki ni Kakukureiko?
E tuangai kainnabau bwa ara mare e karika matoan ara reitaki imarenara, ao man anne ao e a kona ni karaoi bwaai aika e bon tuai kakaraoi mai imwaina. Te katooto, ngke te kairake n ataeinaine ngaia, ao bon iai ana kangaanga n nakonako iaan te rootongitong, ma ngkai ai akea ibukina bwa I mwanaga ma ngaia. E bon katuarereke n te aro are e aki kona n roota ae rietaata n te kai ni bwai ma e tii kona ngkana e kabongana te kaintekateka ke te kaintamwarake, ma I kona n rootii bwaai ake a rietaata man te kai ni bwai ibukina bwa I abwaabwaki riki nakoina. Katokaan amon ara Tia Kamaiu iaora ai bon titebo ma anne. Ngkai ti amoa amora ma Ngaia, ti a kona ngkanne ni karaoi bwaai aika ti bon aki kona ni karaoia i bon iroura ibukina bwa E kona ni karaoi bwaai aikai ibukira.
E taekinna Unimwaane David A. Bednar bwa: “Karaoan ao kawakinan berita aika tabu e ikotiira ao n katiteuanaira ma Iesu Kristo. Ni koauana, e kaoira te Tia Kamaiu bwa ti na katan ao n ikatikitiki n Raonna, e ngae ngke e aki boraoi ara kekeiaki ni kabotauaki ma Ana kekeiaki. Ngkana ti onimakinna ao n keiakina tinebura ma Ngaia inanon kawaira, e koaua bwa E aoraoi amona ao E bebete uotana.”8
E reirei naba Beretitenti Nelson:
“Bwa kabaeam ma te Tia Kamaiu e anganiko te kawai nakon Ana korakora ao mwaakana ni kamaiu.”9
“Te kaniwanga ibukin kawakinan berita ma te Atua bon te mwaaka mai karawa—te mwaaka are e kakorakoraira ni kaitarai kataakira, kariiri, ao ni kanakoraoi kainnanon nanora. Te mwaaka aio e kabebetei kawaira. “Naake a maiuakina ana tua Iesu Kristo aika a rietaata riki a na bon karekea Mwaakana ae korakora riki.”10
“Kawakinan berita aika tabu e bon kabebetea aron te maiu! Te aomata are e karaoa ana berita aika tabu n te tabo ni bwabetito ao n te tembora—ao ni kawakinii—e karikirakea karekean mwaakan Iesu Kristo.”11
Tariu ao mwaneu aika kam tangiraki, kam tangiria ni kan kukurei? Teimatoa ni kawain te berita ae tabu. E na bebete maium, kukurei, ao n onrake ma te kimwareirei. E kaoira te Tia Kamaiu, “Bane mai nako Iu, ngkami akana kam kua ao kam rawawata, ao N na motiki rawami.”12 Bon ngaia te Kristo ae maiu. E uotii rawawatara ao n kabebetea maiura. N aran Iesu Kristo, amen.