Kawakinan Bwanaaia Aomata aika Kaain te Berita ae Tabu n te Roro ae Rikirake
Teuana mai buakon tabera ae moan te tabu ti na buokiia natira bwa a na ataia raoi ae Iesu bon te Kristo.
Teuana te tai ae rangi n riinga te nano n ana Boki Moomon bon rokon te Tia Kamaiu are e a tia n uti nakoia aomata inanon te tembora n te aba ni Mari. I mwiin ana bong n anga reirei, ni katoki aoraki, ao ni katea te onimaki, e kairii nanoia aomata Iesu nakoia te roro ae rikirake: “E tuangiia bwa a na uotiia natiaa aika a uarereke nakoina.”1 E tataro ibukiia ao ni kakabwaiaia temanna i mwiin temanna. E rangi n anainano te taneiai aei n te aro are e a bon tang te Tia Kamaiu n te tai ae bati.
Imwiina, e taetae nakoia aomata ake a uanao, e taku Iesu:
“Nooria Ami Ataei.
“Ao ngke a taraia … ao a noora karawa bwa e uki, ao a nooria anera bwa a ruo mai karawa,” ao a karaoi aia mwakuri n ibuobuoki nakoia natiia.2
I aki toki n iaiangoa te taneiai aei. Tao e rooti nanoia aomata nako! A noora te Tia Kamaiu. A namakinna. A kinaa. E reireiniia. E kakabwaiaia. Ao E tangiriia. Tao ngaia ae i mwiin te tai ae tabu aei, a ikawairake ataei aikai bwa a na ibuobuoki ni katea te bootaki ae rau, kakabwaiaaki, ao ana tangira Kristo ae reitinako ibukiia rooro ma rooro.3
E aki kamiimi ngkana a na kona natira ni karekei aekakin namakin aikai ma Iesu Kristo—te bwai are e na kabaei nanoia Nakoina! E kaoiira, ao E kaoiia kaaro akana inanon ana Boki Moomon, bwa a na uotiia natiia aika a uarereke Nakoina. Ti kona ni buokiia bwa a na kinaa aia Tia Kamaiu ao te Tia Kabooi Maiuia n aron are a rinanona ataei aikai. Ti kona ni kaotia nakoia bwa a na kanga ni kunea te Tia Kamaiu inanon booki aika tabu ao ni katea aan maiuia Irouna.4
N aki maan n nako, e reireinai temanna raoraou te bwai ae I tuai ataia mai i mwaaina ibukin te taetae ni kaikonaki ibukin taekan te mwaane ae wanawana ae katea ana auti i aon te bwaa. Ni kaineti ma te rongorongo n ana boki Ruka, ngke e katea ana auti te mwaane ae wanawana aei, e “kenken ni kananoa.”5 Bon tiaki te mwakuri ae baitii ke ni bebete karaoana—e bon anaa te korakora ae bati!
Ni katea maiura i aon te bwaa are te Tia Kabooi Maiura, Iesu Kristo, ti riai ni mwakuriia ma nanora ao korakorara. Ti na kanakoi bwaai ake aki teimatoa man akea uaaia i nanon maiura. Ti na reitinako ni keniken ni karokoa ti kunea Kristo. Ao ti reireiniia natira bwa a na reitaki ma Ngaia rinanon otenanti aika tabu, bwa ngkana a kaoti kakaitara ae te ieka ma angibuakan te maiu, n aron ae a na kona n roko, a na aki rangi n rootaki “ibukin te bwa are [a] kateaki iaona”6
Tiaki n ae e a bon riki naba te aekaki ni korakora aei. Tiaki te anua ae na kona n reke irouia kanoam te maiu ni bwaibwai n tamnei. A riai aomata nako ni keniken mwaaka ma te korakora bwa aonga ni kunea te bwaa.
Ti karekea reireiara man te reirei aei man teuana te rongorongo inanon ana Boki Moomon. Ngke e anga ana kabanea ni marooro te Uea ae Beniamina nakoia ana aomata, a bootaki utu nako bwa a na ongo ana taeka.7 E kaota ana koaua ae mwakoroiroi te Uea ae Benimina ibukin Iesu Kristo, ao a rangi n rootaki nanoia aomata man ana koaua. A taekinna:
“Te Tamnei … e a tia ni karika te bitaki ae moan te korakora iroura, ke inanora. …
Ao ti a tauraoi ni karaoa te berita ae tabu ma Atuara bwa ti na karaoa nanona, ni karokoa tokin bongin maiura.”8
E na kona ni kataningaia temanna bwa ataei aika a uarereke ma aia karo aika a rairaki raoi n tokin te tai ao a na bon rairaki ao ni karaoi berita aika tabu i bon ibukiia. Ma, ni bukina tabeua aika aki taekinaki n te rongorongo, berita aika tabu ake a karaoaki irouia karo aki rangi ni mutiakinaki irouia tabeman natiia. Tabeua te ririki imwiina “a mwaiti te roro ae rikirake ake aki oota n ana taeka te uea ae Beniamina, ngkai a bon uarereke n te tai are e taetae iai nakoia ana botanaomata; ao a aki kakoauai aia katei aia karo.
“A aki kakoaua are e a tia n taekinaki ibukin mangautiia maate, ao a aki kakoaua naba taekan rokon Kristo. …
“Ao a aki kan bwabetitoaki; ke ni kan kaaina te ekaretia. Ao a riki bwa aomata aika kaokoro n aron aia onimaki.”9
Bon te iango ae kananokawaki! Ibukiia te roro ae rikirake, e aki tii tau te onimaki iroun Iesu Kristo bwa e na riki bwa “kateia aia bakatibu.” A riai ni karekea oin aia onimaki iroun Kristo i bon ibukiia. Ngkai ngaira aomata inanon te berita ae tabu, ti na kanga ni karini inanoia natira te nano ni kan karaoa ao ni kawakin berita aika tabu ma Ngaia?
Ti na moanna man touan mwiin ana katooto Nibwaai: “Ti tataekina Kristo, ao ti kimwareirei iroun Kristo, ao ti kabwarabwara ibukin Kristo, ao ti taetae ni burabeti ibukin Kristo, ao ti koroi kanoan ara taeka ni burabeti bwa natira a na ataia bwa antai ae a na kawaria ibukin kamaunaan aia bure.”10 Ana taeka Nibwaai e kaota te mwakuri ae teimatoa, ae reitinako bwa ti na reireiniia natira taekan Kristo. Ti na ataia raoi bwa bwanaaia aomata aika kaain te berita ae tabu a riai n tibwauaaki nakoia te roro ae rikirake ao Iesu tiaki tii atuun te maroroo n tain te taromauri n te Tabati.11
Bwanaaia aomata aika kaain te berita ae tabu e kuneaki bon man oin ara kakoaua. E kuneaki inanon aia taeka burabeti aika a maiu. Ao e kawakinaki n rangi ni korakora inanon booki aika tabu. Bon mai ikanne are a na karekea iai natira ataakin Iesu ao ni kunei kaekaan aia titiraki. Bon mai ikanne are a na reiakinna i bon irouia taekan ana reirei Kristo. Bon mai ikanne are a na kunea te kaantaninga. Aei are e na katauraoiia ibukin ukoukoran te koaua ibukin te tai ae maan ao ni maiu i aon kawain te berita.
I tangira ara burabeti ae, Beretitenti Russell M. Nelson:
“Ti na nakea bwa ti aonga n ongo Irouna?
“Ti kona n nakon booki aika tabu. A reireiniira taekan Iesu Kristo ao Ana euangkerio, korakoran ana Mwakuri ni Kamaiu, ao ana baire ni kakukurei ao ni kamaiu ae korakora te Tama. Kamatebwaian ana taeka te Atua ni katoa bong e kakawaki ibukin kamaiuakira n tamnei, ai moara riki ni boong ae rikirake iai te kakumekume. Ngkana ti kanuaira ni katoa bong n ana taeka Kristo, ana taeka Kristo a na tuangiira bwa ti na kanga n tokanikai i aon kangaanga ake ti aki atai bwa ti na kona ni kaitarai.”12
Ngaia are aekakira aron te kanuaaki n ana taeka Kristo ao n ongo Irouna? Eng, bon nakon are ko taku bwa e mwakuri ibukim! E kona n ae ko na bootaki ma am utu ni maroroakini bwaai ake ko reiakinaki iai mairoun te Tamnei ae Raoiroi n am kamatebwai ni booki aika tabu ni kabonganaan Nakomai, Iriirai. E kona n ae ko na bootaki ni katoa bong ma natim ni wareware n tabeua kiibu man booki aika tabu ao i mwiina kakaean taai ni maroroakin bwaai ake ko reiakin ngkai kam bootaki ni kabane. Bon tii kakaea are e mwakuri ibukim ma am utu; ngkanne kataia karaoa ae tamaroa riki ni katoa bong.
Iangoa te atatai aei man Reirei n ana kawai te Tia Kamaiu: “Karaoakina ni kaokoroaki, teuana te tairiki n te mweenga, te tai ni kamatebwaian koroboki aika tabu, ke maroroakinan te euangkerio kanga e taraa n akea te bwai ae riki mai iai. Ma bobotakin baika a uarereke, te kekeiaki ae bebete, ae okioki karaoakina n te tai ae maan, e kona n rangi ni mwaaka ao n anga te kakorakora n tabetai nakon te tai ae mwaitike katiaakin reirei aika onoti ma ni kakawaki.… Ngaia are tai bwarannano, ao tai raraoma ni katiaan te bwai ae e rangi ni bubura ni katoa tai. Tii teimatoa inanon ami kekeiaki.”13
Teuana mai buakon tabera ae moan te tabu ti na buokiia natira bwa a na ataia raoi ae Iesu bon te Kristo, Natin te Atua ae maiu, aia Tia Kamaiu ae onoti ao te Tia Kabooi Maiura, are e riki bwa atuun Ana Ekaretia! Ti na bon aki kariaia bwanaara n te berita n aki kaotaki ke n aki taekinaki ngkana ti taetae bukina.
Kam na bae n namakinna ae kam aki tau n te beku aei, ma kam riai n aki maroaa. N aron te katooto, a anganaki te kariaiakaki kauntira ni uoote bwa a na barongaa te bootaki ni kauntira n tia reirei ibukiia kaaro. Inanon boowi aikai ni katoa teniua namwakaina, a kona ni bootaki kaaro ao n reirei i marenaia ni bon oin aia taneiai, ni maroroakinna bwa a na kanga ni kakorakoraiia aia utu, ao n reiakin moan tua n aron ana angareirei Kristo. E riai ni karaoaki te boowi aei n te kauoua n aoa n taromauri.14 E kairaki iroun temanna kaain te uoote ae rineaki iroun te bitiobi ao n ira aron tein are n te bootaki ni kauntira ibukiia taan reirei, ni kabongana Reirei n ana Kawai te Tia Kamaiu bwa oin te bwai n reirei.15 Bitiobi, ngkana e tuai kakaraoaki te boowi ni kauntira ibukiia tia reirei n ami uoote ibukiia kaaro, mwakuri ma te beretitenti n te Reirei n Tabati ao kauntira n te uoote bwa a na barongai ngkami.16
Raoraou aika a tangiraki inanon Kristo, e mwaiti te tamaroa ae kam a tia ni karaoia n aron are kam iangoia. Teimatoa mwakuriia. A taratarai ngkami naitmi, a kakauongo, ao a reirei. Ngkai kam reireiniia, kam na karekea ataakin oin rikiia ni koaua bwa natin te Atua mwaane ao aine aika a tangiraki. A na kona ni mwaninga taekan te Tia Kamaiu n te tai teuana ma teuana, ma I berita nakoimi E bon aki kona ni mwaninga taekaia! Taai akanne are ngke e taetae te Tamnei ae Raoiroi nakoia e na teimatoa inanoia ao n aia iango. Ao n te bong teuana natim a na kaokioka ana koaua Enoti: “I ataia bwa tamau bon te aomata ae motiraoi,“bwa [a] tia n reireinai … n aron ana taeka— ao n aron ana kauring te Uea—ao e na kakabwaiaki aran te Atua ibukin aio.”17
Ti na butimwaea ana kakao te Tia Kamaiu ao n uotiia natira Nakoina. Ngkana ti karaoia, a na kona n Nooria. A na kona n namakinna. A na Kinaa. E na reireiniia. E na kakabwaiaia. Ao, o, E na bon tangiriia. Ao, o, I bon Tangiria. N arana ae E tabu, Iesu Kristo, amen.