Raora n Taainako
Ngkoe ao Ngai iai ara tai ni karekea te Tamnei ae Raoiroi bwa raoraora ni taainako.
Tariu ao mwaaneu aika a tangiraki, ti kakabwaiaaki n te maungatabu aei ma bwaron taian kaotioti nako aora. A tia n taekinna ao a na manga taetae ni koauan taeka, kaunganano, ao kaetieti ana toro te Uea ae Iesu Kristo.
I a tia n ringaki n taian kakoaua ake a taekinaki n te maungatabu aei bwa e taetae te Uea nakoira rinanon te Tamnei ae Raoiroi. Ngkai ti tataro ao n ongo ana wirikiriki te Tamnei, ti karekea te nonori ae raka ao te kakabwaia ni kairiraki rinanon taain ni kangaanga aika imwaira.
Ti a tia ni manga kaongoaki ana kauring Beretitenti Russell M. Nelson bwa, “i nanon boong aika i mwaaira, e na bon aki kona ni kamaiuaki te tamnei n akean te kairi, te kaetieti, karaunano ao ana kairoro n tainako te Tamnei ae Raoiroi.”1
Te taeka ni kauring ni burabeti anne e kairai n iangoia bwa tera ae n a reireiniia natiu, tibu, ao tibutoru aron karekean te kairi ae kakawaki anne i nanon boong aika kangaanga aika i mwaiia.
Ngaia are te rongorongo ae kimototo nakoia kanoau are e na ibuobuoki nakoia ngkana I aki mena irarikiia i nanon taai aika a kakukurei aika i mwaiia. I tangiria bwa a na ataia bwa I ataa te bwai ae na kona ni buokiia.
I a mataata riki bwa a na kanga ni karekea ana kairoro te Tamnei ae Raoiroi ni bongin maiuiia. Ao I namakina te kukurei n taetae n te bong aei n au taneiai ae onoti ibukin kaoan te Tamnei ae Raoiroi, nakon au kabanea ni konaa, bwa e na riki bwa raoraou n taainako. Au tataro bwa N na kona ni kaungaia.
N na moana kairakiia bwa a na iangoia ao n tataro ibukiia natin Ereman mwaane, aika Nibwaai ao Riaai, ao tabeman riki ana toro te Uea ngke a mwakuri ma ngaiia. A bon taonaki n te kakaitara ae moan te korakora. A beku n te tabo ae buakaka ao a kataia ni keiakin nakobuakan mwakuri ni mwamwanaaki. I karekea te korakora, ao ko konaa, man te kibu ae teuana aei man ana rongorongo Ereman:
“Ao n te kaitibwi ma ruaiwa n ririki ao e a korakora te mangaongao. Ma e a koro bukina bwa Nibwaai ma Riaai, ao tariia aika a mwaiti ake a atai kanoan raoi taian reirei, bwa a tia ni karekei taian kaotioti ni katoa bong, ngaia are a bon kabwarabwara nakoia, n te aro are a bon katoka te mangaongao n te ririki naba anne.”2
E kakorakoraai te rongorongo aei, ao e kona naba ni kakorakorai ngkami. A reireinaki ao ni kairaki natin Ereman mwaane man rinanin nako aia taneiai ma te Tamnei ae Raoiroi. E kakoaua ae nakoiu bwa ti ko na n reirei ao n reiakinaki mairoun te Tamnei teutana i mwiin teutana, ni karekean baike ti kainnanoi, ao ngkana ti a tauraoi, e mwaiti riki ae ti na karekea.
I a tia ni kaungaaki n te kawai naba aei man rongorongon Nibwaai ngke e tuangaki bwa e na oki nako Ierutarem ibukin ana bwaatua Raban. Kam uringa te rinerine are e karaoia. E kangai, “N na nako ni karaoi baike e a tia n tua te Uea.”3
Ana taneiai Nibwaai ma te Tamnei ae Raoiroi i aon te mwiokoaki anne e anganai te ninikoria n te tai ae mwaiti ngke I a moana karaoan au beku ake I ataia bwa mwiokoau mairoun te Uea ma taraan are e riaon baike I rinanona mai i mwaaina ao riaon naba are I nooria n au konabwai.
Kam uringa te bwai are e taekinna Niwaai ibukin te bwai are e rinanona:: “Ao e a bong; ao I tuangiia bwa a na karabaia [tariu] i tinanikun te oo. Ao ngke a tia ni karabaia, Ngai, Nibwaai, I waerikiriki nako nanon te kaawa ao ni waaki nakon ana auti Raban.”
E reitia n taku, “Ao I kairaki iroun te Tamnei, n aki atai moa baika N na karaoi.”4
I kaungaaki man atakina ae e teimatoa ni kairaki Nibwaai iroun te Tamnei n te tairiki n ana mwakuri te Uea.
Ti kainnanoa, ao kam na kainnanoa, teimatoan ana iraorao te Tamnei are Raoiroi. Ti tangiria, ngkai, ma ti ataia man are ti rinanona bwa e aki beebete karekeana. Ti iango ao ti taetae ao ni karaoi bwaai i nanon maiura are e konaa n rawawata iai te Tamnei.
Ngkana e riki anne, ngkai e na bon riki, ti kona n namakina aki kukurein nanon te Uea. Ao ni kariiriaki bwa ti a namakina te maroaa. E rangi ni kakawaki uringan koauan te berita are ti karekea ni katoa wiiki ngkai ti rairinanora ao ni butimwaea te toa: “Bwa e aonga ni memena Tamneina irouia n taai nako.”5
Ngkana ko a tia n namakina ana kairoro te Tamnei ae Raoiroi n te bong aei, ko kona n taua bwa te kakoaua ae tikiraoi bwa e mwakuri Ana mwakuri ni kamaiu ni maium.
N aron are e taku Jeffrey R. Holland: “Ngkana iai taai ni kakatai i nanon maiura, ti riai n aki kariaia bwa ti na maaku bwa e mwanuokiniira te Atua ke E aki ongo ara tataro. E bon ongo bwanaara. E bon noorira. E bon tangiriira.”6
E buokai te kakoaua anne. Ngkana I namakinna bwa I raroa mairoun te Uea, ngkana a baenikai kaekaan au tataro, I reiakinaki bwa N na iriira ana reirei Beretitenti Nelson ni manga taraa maiu ibukin te n rairannano. E kauringiira, “Te rairannano ni katoabong bon te kawai nakon te itiaki, ao te itiaki e uota te mwaaka.”7
Ngkana ko kunea bwa e kangaanga namakinan te Tamnei ae Raoiroi iroum, ko konaa n iango i nanom ngkana iai te bwai ae ko riai n raira nanom iai ao ni karekea kabwaraan am bure.8 Ko kona n tataro ma te onimaki n ataia bwa tera ae ko na karaoia bwa ko na itiaki ao n tau riki ibukin teimatoan ana iraorao te Tamnei ae Raoiroi.
Ngkana ko tangiria ni karekea ana iraorao te Tamnei ae Raoiroi, ko tangiria bwa iai bukina ae raoiroi. Am kantaninga bon ana kantaninga naba te Uea. Ngkana ko rangi ni bangaomata, ko na kunea bwa e rangi n kangaanga karekean ana wirikiriki te Tamnei.
Oin te iango ikai ibukiu ao ibukim bwa ti na tangira are e tangiria te Tia Kamaiu. A riai ara mwakuri ni kaungaaki man ana tangira Kristo ae itiaki. A riai n riki n aron “Bwaai ni kabane ake I tangiria ko tangiria naba. E na tauaki am taeka.”
I kataia n uringa ana anga karea te Tia Kamaiu ao Ana tangira ibukiu. Ngkanne, ngkana I tataro n anga au kakaitau nakon Tamau are i Karawa, I namakina tangirakiu ao te kakoaua bwa a ongoraeaki au tataro ao bwa N na karekea te bwai ae tamaroa ibukiu ao ake I tangiriia. E kakorakoraa au kakoaua.
Mai buakon bwaai are e kakoaua iai te Tamnei ae Raoiroi, ae rangi ni kakawaki ibukira bwa Iesu bon te Kristo, natin te Atua ae maiu. E berita te Tia Kamaiu, “E roko te tia Buobuoki, are N na kanakomaia nako imi mairoun te Tama, are Tamnein te koaua, are nako mairoun te Tama, ao E na kaotioti i bukiu.”9
Ririki aika a nako I tarebooniaki mairoun te tina ae raraoma. E tuangai bwa natina te aine e a mwaing ni kararoaa man te mweenga. Iai ana namakin n ana reitaki ae uarereke ma natina te aine bwa iai te kangaanga ae riki. E bubutiai bwa N na buokia.
I a kunea bwa antai ngkoa te tia reirei ni mweengan te nati te aine aei. Ko kona n ataia man te ara anne bwa man te tai ae maan. I a tareboonia teuanne. Bon te ataeinimwaane. Ma e tuangai bwa ngaia ma toana a kaai n uti n te tairiki anne bwa aki tii tabeaianga ibukin te nati te aine ma man ana kairi te tamnei bwa e nang karaoi ana rinerine aika aki kakukurei man karawawata. A nako n nooria, ti man ana kairiiri te Tamnei.
N te moan tai e aki kan kaota ana kangaanga nakoia. Man karekean te kairi mai ieta, a butiia bwa e na raira nanona ao n rinea te kawai are e katauraoia te Uea ibukina. E ataia i mwiina, I kakoaua mairoun te Tamnei, bwa ti te kawai ae a riai ni kaman ataia bon ataakin maiuna mairoun te Atua. Nanon te tina anne n tabeaianga e uotia nakon Tamara are i Karawa ao te Tia Kamaiu. E a tia ni kanakoaki te Tamnei ae Raoiroi nakoia taan reirei n te mweenga akanne ibukina bwa a kukurei n beku ibukin te Uea. A tia n iriira te reirei ao te berita ae kuneaki n Reirei ao Berita aika Tabu:
“E riai nanom naba n onrake n te tangira ae kororaoi nakoia aomata ni kabane, ao nakon te mwenga ae onimaki, ao e riai te raoiroi ni katamaroaa am iango n aki toki; ngkanne matoan nanom e na korakora i matan te Atua; ao reirein te nakoanibonga e na timtim i aon tamneim n aron te aoi mai karawa.
“Te Tamnei ae Raoiroi e na riki bwa raom n taai nako, ao am kainuea te kainuea ae aki bibitaki n te raoiroi ao te koaua; ao am tautaeka e na riki bwa te tautaeka ae akea tokina, ao n akean aanga ni kairoro e na raanga nakoim n aki tootoki.”10
I kakoaua bwa e a tia te Uea ni kawakina Ana berita. E kanakoaki te Tamnei ae Raoiroi nakoia membwa aika a kakaonimaki n aia berita n ana Ekaretia Iesu Kristo. Am taneiai e na onoti, ngkai, ao e na kairiko te Tamnei i nanon kawai ake a kaineti nakon am onimaki ao am konabwai ni karekea te kaotioti ibukim ao ibukiia naake ko tangiriia ao ni beku ibukiia. I tatarobwa ma nanou ni kabanea bwa e na rikirake nanomatoam.
I kakoaua nakoim bwa te Atua te Tama e maiu. E Tangiriko. E ongo am tataro nako. E tataro Iesu Kristo nakon te Tama bwa e na kanakomaia Tamneina bwa e na kairiira, karaunanora, ao ni kaotii koaua nakoira. Te Atua te Tama ao Natina ae Tangiraki a kaoti nakon Iotebwa Timiti n te buakonikai. E raira ana Boki Moomon Iotebwa Timiti man ana bwaintangira ao mwaakan te Atua.
Taan uarongorongo mai karawa a kaoka kiingin te nakoanibonga. Beretitenti Russell M. Nelson bon ana burabeti te Atua ae maiu ibukin te aonaaba ni kabane.
Ngkai ana tia kakoaua Iesu Kristo, I ataia bwa E maiu ao E kaira Ana Ekaretia. Iai tibwangara Ngai ma Ngkami bwa ti na karekea te Tamnei ae Raoiroi bwa raoraora ae teimatoa n tainako ao ni kamatoai koaua akanne ngkai ti uringa ao n tangira te Tia Kamaiu, n rairinanora, ao ni butiaa bwa a na kaonaki nanora n Ana tangira. I tataro bwa ti na karekea te kakabwaia ao ana iraorao te Tamnei ae Tabu n te bong aei ao ni katoaa bongin maiura. I tangiri ngkami. N aran Iesu Kristo ae tabu, amen.