I nanon Kawain Tabeia
Ngkami ake kam waaki rake i nanon kawain tabemi n te bong aei bon korakoran te Tia Kamaiu n Ana Ekaretia ae kaokaki.
I tataro mwaaka ibukin ana ibuobuoki te Tamnei ae Raoiroi ngkai I kaota au tangira, karinerine, ao au kakaaitau ibukia kaain Ana Ekaretia Iesu Kristo ibukiia Aika Itiaki ni Boong aika Kaitira ni kabutaa te aonaaba.
Koraki ake Kaain te Kabanea ni Kaa
Te ririki 1947 e mwaakena kauringaan 100 te ririki ni moan rokoia bwaeoniia Aika Itiaki ni Boong aika Kaitira i Salt Lake Vally. A bati bukamaru ni kauring ake a karaoaki n te ririki anne, a taekinaki kakaitau aika bati ibukin namomwaakaia ana reirei Iesu Kristo ake a kaitikii kawai, a katei mweenga, a uniki kain amwarake n te rereua ae mate, ao ni katei maeka.
E taekina te ururing ae riinga te nano, te Moan Kauntira n te Moan Beretitentii J. Reuben Clark nakoia bwaeoniia aika a kakaonimaki aikai n te maungatabu ni kabuta Okitobwa 1947.
N ana rongorongo, e taekiniia taan kairiiri aika a rangi ni kinaaki ake a kaira te mwananga mai maeao, n aroia Brigham Young, Heber C. Kimball, Willford Woodruff, Parley P. Pratt, ao a mwaiti riki. Ma, ana kaantaninga iai bwa e naaki kaoka taekan tokanikaia ake e a tia ni mwaneweia. Ma, e kabotoa ana marooro irouia ake a nanomatoa nanoia ake a aki ataaki ke n tauaki mwiia n rongorongon te Ekaretia. Kairan atuun ana marooro bon, “Koraki ake Kaain te Kabanea ni Kaa.”1
E kabwarabwaraa raoi Beretitenti Clark aroia ao taian kangaanga ake a kaaitaraaki iai taan mwananga n te kabanea ni kaa ake a kookokaki i aon kawaia n te mwananga. E kamoamoaia aomata aika a aki kinaaki man aki kaaitauaki ake, a rootaki ikeikeia man bubun kaa ake a kookaki rimoaia, i nanon boong, wiiki, ao namwakaina—ao n tokanikai man kangaanga ake a kaitaarai ni mwanangaia.
E kaotia Beretitenti Clark “A waaki nako naake n te kabane ni kaa, a mamaara ao ni kua, a maneka waeia, ao ni kuri bwarannnao n tabetai, ma a korakora nanoia man aia onimaki bwa e tangiriia te Atua, e koaua te euangkerio are e kaokaki, ao e kairiia te Uea ao n anga te kairi nakoia Taari ake mai i moa.”2
E kaina ana marooro ma te taeka ae ringa te nano: “Nakoia aika a nanorinano nanoia, a korakora n te onimaki, a korakora ni maiuakinan te raoiroi, a korakora ni katean ara bwaibwai ae akea booia, I anga au tangira ma te nanorinano, au karine, au karinerine ae taabangaki .”3
Akea te Mwakuri Ae Aki Manena
N 1990 e anga ana rongorongo te Beretitenti n te tai anne ae Beretitenti Howard W. Hunter, taekan taian buoka n arona nako aika a bati mairouia kaain te Ekaretia ake a tia ni beku ni kakorakoraia ao n onimaki ao ni karekea te kakaitau ae uarereke ke bon akea.
E kabwarabwara Beretitenti Hunter:
“E taekinaki [ibukin te rorobuaka ao te Kaaben ae ninikoria ae Moronaai]:
“‘Ngke arona bwa aomata ngkai, ao ngkoa, ao n taai aika a na roko a bane ni katotonga Moronaai, nooria, a na bon mamaara mwaakan moone; eng, ao te riaboro e na bon akea korakorana i aoia nanoia natia aomata.’ (Aramwa 48:17).
Te kamoamoa nakon te mwaane ae tanoata man korakora. … Kiibu aika uoua aika i mwiina bon te taeka ibukin Ereman ma tarina, ae kaota ae aki karako nakon taben Moronaai, ae taku:
“‘Ngkai nooria, Ereman ma tarina bon aomata naba aika a rang manena nakoia aomata n aron Moronaai.’ (Aramwa 48:19).”
E reitia Beretitenti Hunter continued, “N taekana teuana, e ngae ngke e aki rang n nooraki aron Ereman n aron Moronaai, e korakora ana mwakuri; n aron, e ibuobuoki ao ni boongana n aron Moronaai”4
E reireiniia ni kabane i mwiina Beretitenti Hunter bwa ti na kakaraoa te mwakuri. E taku: “Ngkana ko namakinna bwa e aki kinaaki mwaitin ae ko karaoia n te ririki aei ke n ririki aika a na roko, kabebetei ngkami. A aki rangi ni kinaaki naba aomata aika a rangi n tamaroa. Beku ao rikirake, ma te kakaonimaki ao n rau.”5
I nanon Kawain Tabeia
I kakaitau nakoia kaain te Ekaretia aika a aki kona ni warekaki mwaitiia ake a nakon te tia Kamaiu ngkai6 ao ni kakorakoraia ni kawain te berita n te kabanea ni kaa kanga kaan ara bong aikai—ao ake a manena nakoia aomata ni koaua. A kaungaa nanou bwa N na riki bwa te reirei ae e tamaroa riki ami onimaki ae matoa iroun Tamara are i Karawa ao te Uea ae Iesu Kristo ao maiumi aika a aki kamoamoa man tabu.
I tangiri ngkami. I mataaiakini ngkami. I karabwai ngkami. Ao I katekeraoi ngkami.
Te taeka n ana Boki Moomon iroun Tamuera te Reimwanaite e kabwarabwara riki au namakin ibukimi.
“Nooria bwa angiia riki a bon nakonako i nanon kawain tabeia, ao a bon nakonako n te aro ni karaurau imatan te Atua, ao a bon kawakina ana tua ma ana kaetieti. …
“Eng, I taku nakoimi, bwa angiia riki a bon karaoa aei, ao a bon kataia ma te botumwaaka ae aki bwarannano bwa a na uotiia tariia nakon ataakin te koaua.”7
I kakoaua te mwakoro n taeka ae “i nanon kawain tabeia” bwa e kabwarabwara tamaroaia tarira ao mwaanera ake a kakaeia ao n tekateka irarikiia aomata aika akea raraoia ni boobotaki ao waaki tabeua n te Ekaretia. A teimatoa ni anga te rau nakoia naake a kainnanoa te karaunano,8 n akean iangoan te kinaaki ao te kamoamoaaki.
Te taeka ae “i nanon kawain tabeia e kabwarabwaraia buu ao ataei ake a boutokaia raoia, kaaro, ke ataei ake a kairiiri n nakoa n ana Ekaretia te Uea ae kaokaki. Teimatoaia, rauia, ao aia mwakuri ae aki nooraki e kakabwaiaia aomata ao utu ni aanga aika a na ti kinaaki n te maiu ae akea tokina.
Te taeka ae “i nanon kawain tabeia” e kabwarabwaraia aomata ake, a tia n tannako mairoun te Atua, n nanorinano a manga‑oki Nakoina riki,9 n rairi nanoia man aia bure, ao n ukora mwaakan Ana Mwakuri ni Kamaiu ni kaitiaki ao ni kamaiu te tia Kamaiu. Rooko nakon Kristo10 n okira kawain te berita man touan kawain te bure nakon “kawai aika a katabuaki”11 e kaakawaki n te maiu n taamnei ao ni mwakuriaki ma te raoiroi. Ngkai a waaki nako ma te onimaki ao n aki kua ni karaoan ae raoiroi, a kawenea aan te mwakuri ae korakora ni maiuia,12 “nakon rooro ni kabane ao ibukin te tai ae akea tokina .”13
Te taeka ae “i nanon kawain tabeia” e kabwarabwaraia ake a raoiroi ake a nakon te tia Kamaiu rinanon berita aika a tabu ni kariaiakaki ao otenanti n Ana euangkerio—ma a totokoaki man karaoana ni bukina aika a riaon aia konaa. I berita bwa a na toki korakaimi ao ongotaekami ao ami kakaonimaki n anga nanomi ma te tataonakinano nakon te Atua a na kaniwanganaki n “ana tai te Uea.”14 “Tao e tang te aba ni kangaina, ma e kakatonga te aba n te ingabong.”15
Te mwakoro n taeka ae “i nanon kawain tabeia” e kabwarabwaraia taan raitaeka aika a kairaki n te tamnei ni katobibia te aonnaba ake a beku ibukin te Uea man buokaia raoraoia ao membwa n “ongo bwanin te euangkerio [n] oin neweia, ao n oin [aia] taetae.”16 Banaaia, te taetae n te bai, ao koroboki ake a rairaki a kaotii koaua aika akea tokiia, ma ti tabeman mai ibuakora aika a atai araia ke n kaota aia kakaitau. Rinanon te bwaintituaraoi n neewe are a tia ni kakabwaiaaki iai, a beku ma te botumwaaka taan raitaeka, n aki karimoaiia, ao n angiin te tai, n aki ataaki ae a buokiia aomata ni karekea te bwaintituraoi n te onimaki n tamnei rinanon warekan ao ongoraean ana taeka te Atua.17
Te mwakoro n taeka ae “i nanon kawain tabeia” e kabwarabwaraia buu mwaane ao aine ake a kakaonimaki n karinea aia berita ae tabu ni kamwaitiia ao ni kaona te aonaaba ao ni kakabwaiaaki ma te korakora ao te konamaki ni ikakorakora ma ataei n tain bootaki n toa. N rikiraken te aki oota ni kangaangan ao kabuanibwain te aonaaba ao mwanuokinakin aika a moanibwai, naano n ninikoria aikai a katinanikui bwanaa aika a aki raraoi ibukiia; a karinea aia onimaki ao kakawakin te maiu n ana babaire ni kukurei te Atua ibukiia natiia.
A mwaiti taanga naba aika a onimaki iroun te Atua ngkana aki atai nanoia aika a raraoi bwa a na kangaa ke ningai ae a tia ni karekea te kaantaninga ao ni miiakinna. A “tataninga te Uea”18 ao a aki kairoroia bwa E na karaoi ake nanoia. “Bwa man moan rikin te aonaba aomata a tuai n ongo ke n teke iai taningaia, ke e a ti n nooria te mata, O te Atua, irarikim, ai korakorara bwaai aika ko tia ni katauroi [ibukiia] are a kantaningaiko.”19
Te mwakaoro n taeka ae “i nanon kawain tabeia” e kabwarabwaraia ngaa taan kairiiri n te netiuri ao taan reirei n te Moanrinan ake a tangira ao n kaetiia ataein te Ekaretia ni katoa Tabati.
Iangoa mwiin te beku ae akea tokina mairouia reirei aika a kakaonimaki—ao kakabwaia aika a kakukureia ake a beritanaki nakoia ake buokiia ataei.
Ao [Iesu] e anaa te teei, ao e kateia i buakoia: ao ngke E bwabwakoia, E taku nako ia,
“Ane e mwanea te tei ae karako ae ai aron te tei aei n akoia, i nanon arau, ao e mwaneai n akoai naba: ao ane mwaneai n akoai, ao e aki mwaneai, ma e mwanea n akoa Teuare kanakomaiai.”20
Te mwakoro n taeka ae “i nanon kawain tabeua” e kabwarabwaraia ataei ake a tararuaia aia karo aika a kara, te tina ae aki mamatu n anga te rau nakon natina ae maaku ngke e tei bwa ai aron “te raian aine n mataroan” mweengana,21 membwa n te Ekaretia ake a moantaai n roko ao n tikunako ni katauraoi ao ni booti kaintekateka, ao ake a kaungaia aomata ni kaoiia aia utu, raraoia ao rekerekeia n roko ao n nooria, n roko ni ibuobuoki, ao n roko ao n tiku.22
I a tia ni kabwarabwarai tabeua katooto ni kaawakinan berita aika a tabu ao ana reirei Iesu ae kakaonimaki n ai arom ke ko waaki nako “i nanon kawain tabem [ngkoe].” Mirion riki katooto irouia aika itiaki ni boong aika kaitira ake a aanga “tamneia”23 nakon te Atua a kuneaki ni mweenga aika a kabotoa mweengaia iroun Kristo ao n unite n te Ekaretia ni kabutaa te aonaaba.
Ko tangira ao ko beku, kakauongo ao n reiakini, tararua ao ni karaunano, ao n anga reirei ao ni kakoaua man mwaakan te Tamnei ae Raoiroi. Ko aki toki n aki mamatam ma n tataro, ao a rikirake ni matoatoa ma ni matoatoa riki n aia nanorinano, ma n nene ao n nene riki n onimakinan Kristo, n onrake [tamneim] n te kimwareirei ma te raunnano, eng, n te aro are a itiaki ma ni katabuaki [nanom], ao katabuan nanoia e reke ibukin … anganakin te Atua [nanom].24
Te berita ao te Kakoaua
Ake kaain te kabenea ni kaa, ni kabane ake a manena aia mwakuri, ao ngkoe are ko waaki nako n te bong aei i nanon kawain tabem ngkami bon korakoran te tia Kamaiu n ana Ekaretia ae kaokaki. N aron are E a tia ni beritanna te Uea, “Ni kabane kaintokanuea ao tautaeka, taabo aika tautaekanaki iroun te nati n uea te mwaane ao mwaaka, a na kaotaki ao ni kaakaki i aoia ni kabane ake a teimatoa ma te ninikoria ibukin ana euangkerio Iesu Kristo.”25
I kakoaua ma te kimwareirei bwa a maiu Tamara are i Karawa ao Natina ae Tangiraki ao a koaua Aia berita, n aran te Uea ae Iesu Kristo ae tabu, amen.