E kinako ao e tangiriko te Atua

Iroun Unimwaane Alan T. Phillips

Man te Itingaun

Ana babaire ni kakukurei te Atua bon ibukimi ni kabane. Ngkami bon naatina aika kakawaki ao ni korakora bonganami.

Onoua te ririki n nako, ao a mwananga ara utu n te tairiki itinanikun kaawan Oxford. N aron ae ririki ma ataei aika uarereke, ti na bae n tei, bwa ti aonga ni kunea te tabo ni bobwai ma titoa ao taabo n amwarake aika kakaokoro iai. Ni bon arona, ti kitana te kaa, ao n nakon te tabo ni bobwai, ao n oki n rin inanona, ni moana mwanangara.

Tebwi ma nimaua te miniti i mwiina, e titiraki natira te mwaane ae te kabanea n ikawai te titiraki ae e kakawaki: “Enga Jasper?” E tetekateka Jasper i bon irouna ibukin te ka. Ti kantaningaia bwa e na tia ni matu ke e karaba ke e a manga keweniira.

Ngke e tuoa raoi bukin te ka tarina, ti kunea bwa akea ikekei natira te mwaane ae nimaua ana ririki. E onrake nanora n te raraoma. Ngke ti buti rikaaki nakon te tabo ni bobwai, ti bubutia Tamara are i Karawa bwa e na kawakina Jasper. Ti tareboniia te bureitiman ao ni kaongoa ara kangaanga.

Ngke ti roko ma te ingainga n nano, riaon 40 te miniti imwiina, ti a noorii uawa kaa ni bureitiman n aia tabo n tei kaa, ma kiakian tauraia. I nanon are teuana bon Jasper, n takakaro ma bwatin. N na bon aki kona ni mwaninga te kukurei are ti namakinna ngke ti a manga kaitiboaki ma ngaia.

Angiin ana anga reirei ni kaikonaki te Tia Kamaiu a boboto i aon te ikotaki, kaokan, ke te kekeiaki ni karekea are e a tia ni uamaenako ke ni bua. Ibuakon aikai bon taeka ni kaikonaki iaon te tiibu ae bua, te tiring ae bua, ao te nati te mwaane ae bua.¹

N ururingakin te bwai ae riki nakon Jasper i nanon ririki, I a tia ni kabanea au iango iaon te kinaki mai ieta ao kakawakin natin te Atua, mwaakan Iesu Kristo ni kamaiu, ao kororaoin Ana tangira ae kororaoi Tamara are i Karawa, ae kinako ao e kinaai. I kaantaningaia bwa n na kaota koauan bwaai aikai n te bong aei.

I. Natin te Atua

E kakaewenako te maiu aei. A mwaiti aomata aika a namakina te nanokawaki, te maroa, te kaokoroaki, ke te korakai. Ngkana a kangaanga bwaai, ti kona n namakinna ae kanga ti a tionako man reirein te euangkerio ke ni waeremwe ni waaki. Atakina ae ngaira ni kabane bon natin te Atua ao kaain Ana utu aika akea tokiia ti na karekea te namakin ni bwaibwai ao n te kaantaninga.²

E tibwauaia Beretitenti M. Russell Ballard: “Iai teuana te kinaaki ae kakawaki ae ti bane n tibwauaia ngkai ao n aki toki. … Bwa bon ngkami ao n tia n riki n taainako bwa natin te Atua te mwaane ke te aine. … Ataakin te koaua aei—n rangi ni mataata iai ao ni butimwaia—e bon bita-te-maiu.”³

Tai kakea bonganan ke ni kamemerea aron kakawakim iroun Tamam are i Karawa. Tiaki ngkoe te bwai ae riki n aki akaka, te aomata ae akea ana karo, ke mwiin bwaai ake a manga okiri aroia. Ngkana iai te bwai ae e koreaki ao e na bon iai te tia koreia.

Iai nanon ao te kantaninga maium. Reitinakon kaokakin ana euangkerio Iesu Kristo e uota te oota ao te atatai ni kaineti ma kinaakim mai karawa. Ngkoe bon natin te Atua ae tangiraki. Taeka ni kaikonaki ni kabane ao reirei aikanne bon ibukim. E rangin n tangiri ngkami te Atua ngaia ae E kanakoa Natina bwa e na katoki, kamaiui, ao ni kabooi ngkami.⁴

Iesu Kristo e kinai rikira mairoun te Atua ao te kororaoi ae akea tokina irouia aomata n tatabemaniia nako.⁵ E kabwarabwara aron tuua aika uoua n tangira te Atua ao n tangiriia kaain rarikira bwa aan ana tua ni kabane te Atua.⁶ Teuana tabera mairoun te Atua bwa ti na tabeakiniia naake a kainnano.⁷ Anne bukina ngkai ngaira ana reirei Iesu Kristo ti “katoka i aora rawawataia raora, … n tang ma ake a tang … , ao ni karau nanoia ake a kainnanoa karauan nanoia.”⁸

Te aro tiaki ti ibukin ara reitaki ma te Atua; bon ibukin naba ara reitaki bon imarenara. E kabwarabwara Unimwaane Jeffrey R. Holland ae te taetae n Imatang ae religion e nako man te taeka n Ratine religare, are nanona “ni kabaea” ke, “ni manga-kabaea.” Ngaia ae, “te aro ni koaua [bon] te kabae are e kabaeira nakon te Atua ao nakoira n tatabemaniira.”⁹

E kakawaki ni koaua arora n tabeakiniira i marenara. E reirei Beretitenti Russell M. Nelson, “E rangi ni mataata ana rongorongo te Tia Kamaiu: Ana reiei ni koaua a katea, a tabekii rake, kaungaaki, kairoroia, ao ni kairaki mai ieta.”¹⁰ E kakawaki riki aei ngkana taan mwananga n te maiu aei a namakina te bua, te maroa, te mwaninga te aba taekaia, ke te kanakoaki.

Ti aki riai n ukeuke nako ni kakaiiaa aomata aika iai aia kangaanga. Ti kona ni moanna man buokan temanna n ara utu, n ara bootaki n taromauri, ke n ara komiuniti. Ti kona naba n ukora kamaiuakiia aomata aika 700 te mirion aika a maeka ma te kainnano ae korakora¹¹ ke aomata aika 100 te mirion aika a kairoroaki ni kanakoaki ibukin te bwainikirinaki, te itabarara, ao te un.¹² Iesu Kristo bon te banna ni katooto ibukin buokaia aika iai kainnanoia—a baki, a irua, aoraki, a rarikin, ao a kabureaki. Ana mwakuri bon ara mwakuri.

E reirei Unimwaane Gerrit W. Gong ae “ti karekei kawaira nakon te Atua rinanon ara reitaki.”¹³ Ibukin aei, ao a riai ara uoote n riki bwa taabo ni kamanoia natin te Atua ni kabane. Ti tauii nanora ni kaean te taromauri ke ti mwakuri mwaaka ni katei komiuniti ma te kaantaninga ibukiia bwa a na taromauri, uringa Kristo, ao n ibuobuoki imarenaia?¹⁴ Ti kona ni karaoa nanon ana reirei Beretitenti Nelson n aki rang ni momotikitaeka, kabatia riki te tangira, ao n karababa ana tangira ae itiaki Iesu Kristo rinanon ara taeka ao ara mwakuri.¹⁵

II. Mwakan Iesu Kristo ni Kamaiu

Ana Mwakuri ni Kamaiu Iesu Kristo bon kaotan ana tangira Iesu Kristo ae moan te tamaroa ibukiia Natina.¹⁶ Te taeka mwakuri ni kamaiu e kabwarabwara ikotakiia aika akea reitakiia ke ni maenako.

Ana mition ara Tia Kamaiu bon katauraoan te kawai n oki nakon Tamara are i Karawa ao ni buoka te kainnano n tain te mwananga. E ataia te Tia Kamaiu rinanon baike E a tia n rinanoi n ataa aron buokara n rinanon kangaanga n te maiu.¹⁷ Tai karaoa te kaairua: Kristo bon te tia buokiira ao te tia kamaiua tamneira.

N ara tai ni kammwakura te onimaki, E buokira ni kakorakoraira rinanon te kangaanga. E teimatoa ni kanakoa ana kakao ibukin Ana tangira ao ana akoi:

“Bane mai nako Iu, ngkami akana kam kua ao kam rawawata, ao N na motiki rawami.

“Amoa amou iaomi, ao reirei i Rou; … ao e na reke iroumi iai motikan rawan tamneimi.”¹⁸

Te kabotau iaon te amo e korakora nanona. N aron are e kabwarabwara Berertitenti Howard W. Hunter: “Te amo bon te bwai ni mwakuri … are e na kona ni kariaia ‘korakoran’ te man are te kauoman bwa e na reitaki ao n raonaki ma ana kekeiaki te man are temanna, n tibwaua ao ni kauarerekea rawawatan te [mwakuri ae a karaoia]. Te rawawata ae rang riao korakorana ke ni kangaanga iroun temanna bwa e na karaoia e kona ni bebete ao ni kamwengaraoi karaoana irouia uoman aika a amoa amoia ae tibwauaaki.”¹⁹

Beretitenti Nelson e reirei: “Ko nakon Kristo bwa kona amoa amom ma Ngaia ao ma Mwaakana, bwa e aonga n ae ko aki katika rawawatan te maiu n ti ngkoe. Ko katika rawawatan te maiu ma te Tia Kamaiu ao te Tia Kabooa te aonaaba.”²⁰

Ti kanga n amoa ke ni kabaeira nakon te Tia Kamaiu? Unimwaane David A. Bednar e reirei:

“Karaoan ao kawakinan berita aika tabu e amoira nakon ao ma te Uea Iesu Kristo. Ae kakawaki riki, e butiira te Tia Kamaiu bwa ti na onimakinna ao n katikitiki ma Ngaia. …

“Ti bon aki kona n tiku n ti ngaira.”²¹

Nakon temanna ae karawawataaki, e bua, e mangaongao: ko aki kona ni karaoa aei n ti ngkoe.²² Rinanon Ana Mwakuri ni Kamaiu Kristo ao Ana otenanti, ko kona ni buokaki ke ni kabaeaki Nakoina. E na kukurei ni katauraoa te korakora ao te kamaiu ae ko kainnanoia ni kaitarai kangaanga aika a na teimatoa n riki n te maiu. Ngaia bon te ne ni kamaiu man te ang ae baibati.²³

III. Ana Tangira Tamara are i Karawa

E na ataaki bwa, e rangi n niniwana Jasper, e tatangira, e wanawana, ao ni kangaanga naba aron tararuakina. Ma te bwai ae kakawaki n te karaki aei bwa te teei aei bon au bwai. Bon natiu, ao I tangiria n aron ae e na bon aki kona n ataia. Ngkana te karo ae aki kororaoi, n te aonaaba aei e namakina aekan aei ibukin natina, ko kona n iangoia bwa e na kanga aron ana namakin Tamara are i Karawa ae kororaoi, ao e mimitong ibukim?

Nakoia raoraou ae roro ae rikirake aika kam tangiraki, kaain te Roro Z ao te Roro Alpha: taiaoka n ataia bwa te onimaki e kainnanoa te mwakuri.²⁴ Ti maeka n te tai ae, aika mwaiti, a ti “kakoaua te bwai ae a namakinna ke n noria.” E kona te onimaki ni kangaanga arona ao e kainnanoi rinerine. Ma a kaekaaki tataro.²⁵ Ao kaeka a kona n namakinaki.²⁶ Tabeua bwaai aika a koaua n te maiu aki nooraki; a namakinaki, a ataaki, ao e tataneiai iai te aba. A bon koaua naba.

Iesu Kristo e tangiriko bwa ko na ataia ao n iai am reitaki ma Tamam are i Karawa.²⁷ E reirei, “Ai antai te aomata i buakomi, ae iai natina, ao e tei i tinaniku ao e na kangai, Tamau, kauka batam bwa I aonga ni kona n rin ao n amwarake ma ngkoe, ao e na aki kangai, Rin, natiu, bwa au bwai bon am bwai, ao am bwai bon au bwai?”²⁸ Ko kona n iangoa temanna, ae tatangira, ae ai aron te Atua ae Tamara ae Akea tokina?

Ngkoe bon Natina. Ngkana ko namakina te bua, ngkana iai am titiraki ke aki taun wanawanam, ngkana ko korakai ma am kangaanga ke ko korakai ma maium n tamnei, rairaki nako Ina. Tataro Nakoina ibukin te rau, te tangira, kaeka, ao kaetieti. Tao tera te bwai ae ko kainnanoia ao n te tabo raa ae ko mena iai, kaota nanom nakon Tamam are i Karawa ma te tangira. Ibukiia tabeman, kam kan ira ana kakao Beretitenti Nelson ao n titiraki “ngkana E bon mena ikekei—ngkana E kinako. Bubuti Nakoina tera Ana namakin ibukim. Ao imwiina kakauongo.”²⁹

Tariu ao Mwaneu aika kam tangiraki:

Kina Tamam are i Karawa. E kororaoi ao E tatangira.
Ataia bwa antai raoi Iesu Kristo.³⁰ Bon ara Tia Kamaiu ao te Tia Kabooira. Kabaei ngkami ao naake ko tangiriia nako Ina.
Ao ataia bwa antai ngkami. Ataa rikim mairoun te Atua. Ana babaire ni kakukurei te Atua bon ibukimi ni kabane. Ngkami bon naatina aika kakawaki ao ni korakora bonganami. E kinako ao e tangiriko.

Man koaua aika bebete man uaana aikai ao I kakoauai n aran Iesu Kristo, amen.