Aia Tai Mitinare aika Kaara
Teuana te kabanea n tamaroa ibukiia mitinare aika a kara ni karaoa te ururing ae moan te tamaroa bon te uaia ni beku ni mitinare.
Ngkana raraora ake a 60 ke 70 aia ririki a mwaninga te bwai teuana, n tabetai ti manikangare n taekinna are a mwamwaninga bwa “aia tai kaara.” Ma I tangiria ni maroroakin tabeua aia tai kaara—te tai ae tamaroa are e na uringaki n aki toki. Bon te tai are mitinare aika a kara ae taanga a ataia ae a karaoa raoi te bwai are e na katabeia iai te Uea. N tain te ururing anne a kona n ataia.
-
Iai te bwai ae a rinanona inanon maiuia are a kona n tibwaia, ao tarena, konabwai, ao otaia n te euangkerio are a kona ni kakabwaiaiia iai tabeman.
-
Aia banna ni katooto bon te kakabwaia nakoia natiia ao tibuia.
-
Ngkai a beku ao a karekea riki te iraorao ae akea tokina.
-
Aia mare e rikirake ni matoatoa ni katoa bong.
-
Te beku inanon Arana bon te bwai ae kakukurei.
Te Ririki inanon Karaoakina
Raraou taanga aika kaara, ibuakomi aika a mwaiti kam riai ni kataia n rinanon taai akanne. Iangoa te karaki are e karakinaki iroun Unimwane Jeffrey R. Holland man te Kooram n Abotoro are Tengaun ma Uoman n rongorongoia taanga ni kara aika a beku i Chile are a kona ni karaoia. Ana karo te mitinare are te kairake e mate. Te beretitenti n te mition e bon rang raroanako n te aro are e aki kona ni waekoa n roko irouia mitinare.
“Ma iai aika akoi [tau] taanga ni mitinare aika a beku n te aono anne,” e taku Unimwaane Holland. “A roko n tekateka ma te mitinare ni karaua nanona ma te tangira ni karokoa e kona n itaramata ma te beretitenti n te mition. Iai ara mitinare aika kairake aika a rang tamaroa aika a karaoa aia mition, ma akea temanna te kairake ni mitinare ae e kona ni karaoa are a karaoia taanga aika kaara ikai.”1
Aia konabwai n te tai anne bon tii karekean te karaunano nakon te mitinare n te tai are e kainnanoaki iai. Aki tabe ma te taetae teuana irarikin ana taetae n tangira Kristo. Aki tabe ma aki irakin ana koronririki tibuia ke kakabwaiaan te merimeri, inanon taai aika a kakawaki akanne. A bon tabe ma aia kona ni mena n te tabo are e kona iai ni kabonganaia te Uea ni kakabwaia maiun temanna Natina. Ao ibukina ngkai iai nanoia iai, E a kona ni kariaia bwa a na tei ibukIna.
Te Beku n Tabetai ae Angaraoii.
E koaua bwa, akea mitinare aika kaara a nooria bwa e angaraoi ni kiitana te mweenga. Aroia naba Iotebwa Timiti, Brigham Young, John Taylor, or Wilford Woodruff. Iai natiia ao tibuia naba, ao a tangiriia aia utu n ai arona naba. Ma a tangira naba te Uea ao a tangiria ni beku Ibukina. N tabetai tina kaitibo ma aomata aika a matoa inanon aia onimaki ake a buoka katean koron boong n aron aei. Ngkana e reke anne, ti na kimwareirei bwa ti aki karabaira ngkana ti riai n nako ni beku.
Tabeman a tangiria riki ni beku ngkai a maeka ni mweengaia. Imwiin boon Aase Schumacher Nelson (tiaki ana utu) are e a katikua iaon te aia kaintekateka mwauku, e a raraoma bwa nanona ni kan nako ni mitinare inanon maiuna ma buuna Don e nang aki koro bukina. Ngkanne kain rarikina e maroro ma ngaiia n ana ibuobuoki n te Ekaretia n ana mition n ana autinibwai te bitiobi. Ungan nanoia aei, a maroro ma te tia tararua n te batiritii, kanoa aia booma, ao a weteaki bwa a na beku uabong n te wiiki n te autinibwai ae uaakan ma mweengaia.
“E beebete riki nakon are ko rau n iango, o I aki manga kainnanoaki,’” Aase Nelson e taku. “Ma ngkai I a namakinna bwa I kainnanoaki. Ao anne e a riki bwa au koaua.”
Kam Bon Rang Kainnanoaki
Ngkana kam kaririaki n iangoia bwa kam aki kainnanoaki, N na kakoaua nakoimi bwa kam bon kainnanoaki. Bon akea te beretitenti n te mition n te Ekaretia ae aki tangiriia riki taanga ni beku n ana mition. Kaara a kakorakoraia kairake mitinare mwaane ao aine n tamnei. A karekea te boutoka are e buokiia tabeman ni kanakoraoa riki aia beku n oin tabeia. Ao ko kona n iangoia bwa tera aron te tia kairiiri ae a tibwa membwa inanon tabeua te ririki ni kona ni boutoka nakoia membwa ake a tia n rinanon taneiai aika mwaiti? Taanga ni mitinare aika a kaara n tabetai bon kaeka nakon aia tataro bitiobi ao beretitenti ni mwaanga.
Ti kaungaia beretitenti n te mition bwa a na kakaiia taanga bwa a na bonoti taabo ake a kainnanoaki. Bitiobi a na kakaaia taanga aika a kona ni beku. LDS.org rinan n iteraniba a karekei mwakuri aika a mwaiti ibukiia mitinare aika taanga. Ma ae kakawaki riki, taanga a kona ni katorobubua ni butiia Tamara are i Karawa ngkana e bootau te tai ibukiia ni uaia ni beku. Man anua ni kabane aika a riai n reke, te nano ni kan beku e kona n riki bwa te kabanea ni kakaawaki (tara D&C 4:3).
Ngkai I kamoamoa aia mwakuri mitinare taanga aika kaara, I ataia bwa a mwaiti aika a tangiria ni beku ma a aki kona. Tiatianaki are totoko n te ririki ke te aki marurung a bon riai raoi n rinanoaki, n aron kakaawakin kainnanoaia kain te utu. Ngkana iai te nano ae korakora ni kan beku ma iai totoko, tabeman aomata a kona ni karaoa te beku ibukim ma ko kona ni boutoka ni mwaneniia aomata akanne.
Taanga aika kaara, n aki taraia bwa antai ngkoe, ko mena ia, taiaoka tataro ibukin te tai ni karekea ami tai ni mitinare aika kaara. Tamam are i Karawa e kona ni buokiko n ata te bwai ae ko kona ni karaoia.