Kairake n Ikawai Rongorongoia
Uakorai Taian Kakabwaia i Madagascar
E ngae ngke iai kauntaba n tautaeka ao kanganga ni kaubwain abana, Solofo e katan iaon kakabwaia ake a roko man maiuakinan te euangkerio.
Tamnei: mai eta e katauraoaki iroun Solofo Ravelojaona; mai nano © iStock/Thinkstock
Imwiin uruakin nanona ni bwakan ana moan nati ni bikoukouna, Solofo Ravelojaona e namakinna bwa aia tataro a kaekaaki te ririki are imwiina n te kauatai e a manga anganaki te bikoukou. Ngaia ma buuna, Hary Martine, a iangoia bwa bungiakin natiia te aine bon teuana man aia kakabwaia ae korakora. E kabwarabwara Solofo, “Ibukina bwa ti butiia te Atua ao E anganiira natira, ti katoka arana are e nanonaki n taetaen Malagasy, ‘ana kaeka te Atua.’”
Solofo, te kairake mai Madagascar, e kateimatoa ana onimaki are te Atua e kaekai tataro n te tai are e kakabwaiaia iai aika kakaonimaki. “E matoatoa te maiu,” e taku Solofo, “ao ngkana aomata aki karekea are a tangiria, tabeman a titiraki, ‘Bukin tera e riki aei nakoiu?’ A kona ni kiitana te Ekaretia ke a nanououa n aia koaua iroun te Atua. Ma ngkana ti maiuakina te euangkerio ao ni wareki booki aika a tabu, e na bebete. Ngkana ko bon maiuakina te euangkerio, ko na kona ni bon noori kakabwaia.”
Te maeka n te aba ae korakora ana kanganga, n aron te maiu ni kainnano ae korakora, te nanotiotio n te tautaeka, aan botaki a mamaara, e matata ae e taekinna Solofo ae e matoatoa te maiu aei. Ma irouna, kakabwaia ni maiuakinan te euangkerio e uota te korakora riki iaon taian kanganga. “I aki naba kona ni wareki kakabwaia ake I karekei, tii ngkana I maiuakina te euangkerio,” e taku.
Ibukina bwa te Ekaretia e bon boou i Madagascar (te moan mwaanga e kateaki inanon 1990), e taku Solofo te kabanea ni kanganga ni kainakin te aro bon te aki ota irouia aomata n aron kabuakakan te aro. E taekinna Solofo bwa, ai aron miin Riaai n te kai ni kamaiu, “aomata a kona n aki butimwaea te euangkerio ibukina bwa a maama imataia raraoia ao a maaku bwa a na kona ni kanakoaki irouia aia utu.” Tera ae e okoro iai Solofo, e taekinna, bwa, “I bon aki kona ni mama. I maiuakina te euangkerio, ao I tangiria n tainako n tibwaia ma raou ni mwakuri, e ngae ngke tabeman mai ibuakoia a bon aki nano iai.” N tabetai e tibwa ana koaua ae beebete, n angiin te tai n te aro are raona ni mwakuri a aranna bwa “bwatita.”
I nuukana te kanganga ni kaubwain te aba ao nakobuakan te tautaeka, Solofo ao Hary Martine a katan iaon kakabwaia n aia berita n te tembora (a mareaki n te tembora i Johannesburg Aberika Meang teuana te ririki imwiin okiia ni mitinare—ngaia i Uganda, ao neiei i Madagascar), n aron naba aia onimaki iroun te Uea. “Iai irou te euangkerio, ao I tii katuka maiu inanon bain e Atua,” e kabwarabwara Solofo. E kona ni katan iaon ana koaua ae matoatoa ibukina bwa iai ana onimaki n “ana kaeka te Atua.”