Te Rau I Nanou

Iroun Carol F. McConkie

Te Moan ni Kauntira n aia Beretitentii ni Kabuta Ataeinaine

Ngke waniua au ririki, I noora te burabeti, Beretitenti David O. McKay (1873–1970). E roko bwa e na katabua te Umwantabu ae boou i Palmyra, New York, USA. A nako au utu nakon te mwakuri ni katabu. A mwaiti aomata tabeman aika roko naba. Ti bane ni miimi n noora te burabeti.

I rangin ni katuauarereke, ngaia ae e kanganga irou bwa N na noriia aomata ni kabane (ake a tei irarikiu ao n tuka matau). Ma I teimatoa ni kona n namakina ana tangira Beretitenti McKay. Ti inanon teuana te miniti, I noora irana ae mainaina ao matana n akoi. I iango, “Aio aron tarakin ana burabeti te Atua.” I a tia ni wareki taekaia burabeti inanon booki aika tabu, ma aio au moan n tai n noora te burabeti ke Mataniwi ni Kabuta. I kakoaua bwa burabeti bon aomata ni koaua. Ao a tangiriira! N na teimatoa n namakina te tangira ao te rau ake I namakin n te bong arei.

Ngke te 11, I karekea te atatai teuana are e buokai n namakina te rau inanou. Te maungatabu ni kabuta ae iaon kawaina, ao N na anene n ana kuaea te titeiki. I rangin ni kukurei! I bwaina te kunikai ae tamaroa ae mainaina, ao I namakinna ae I rangin n onoti. Te anene ae ti aneneia a reke taekana man Ioane 14:27, “I katuka te rau i roumi, I anganingkami au rau, I aki anganingkami n: ai aron te aba, ngkana e anga. A na tai rawawata nanomi, ao a na tai maaku.”

Taeka aikanne a rota nanou ma te nanokawaki. Ngke I anenei taeka aikai, I ataia bwa a koaua. I namakina te Tamnei ae Raoiroi n tuangai bwa iriirakin Iesu Kristo e na buokira n namakina te rau. Man te tai anne, ngke I kaitara ma kakaewenako, e roko te kibu aei n au iango ao e anganai te rau. Te koaua ae I reiakinna ngke te kairake ngai e kakabwaia maiu ni kabane.