Reireiniia bwa A na Wareka Ana Boki Moomon

Emilien Rioux, Quebec, Canada

N ara tai ni beku n te Geneva Switzerland Mition, I weteaki bwa N na katabuaki n riki bwa te beretitenti n te mwaanga, ao kainnabau e weteaki bwa te beretitenti n te Bootaki n Aine. Ti uaia ni mwakuri ni kabanei korakorara ni manga kamarurunga te mwaanga ae kekeiaki. E ngae ngke e kateaki inanon te 1960, akea te bwabetito ae e a tia ni karaoaki n te mwaanga inanon ririki aika mwaiti ao n tuai naba ni kamwanangaia mitinare nakon te tabo ni mitinare inanon 15 te ririki.

E kakoauaaki bwa ti kainnanoa ana buoka te Uea ni kakaea katokan kangaanga aika mwaiti are e kaitara ma ngaia te mwaanga. Imwiina ngke I a tia n tataroakina ana kangaanga te mwaanga, Tamnein te Uea e taku nakoiu, “Reireiniia membwa ni wareka Ana Boki Moomon, ao ko na tokanikai.”

N te tai ae waekoa, ti karaoa ara baire bwa ti na katabeia ni kabane kaain te aro ni moana warekan Ana Boki Moomon.

Uaana ake a kaoti a rang kamimi. Te rau ao te Tamnei a oki nakon te mwaanga. Utu aika a boou a kaaina te Ekaretia. E kaungaaki man kukureina ni beku, te ataeinimwane e mwananga ni mitinare. Tabeman taanga aika iai nakobuakaia a kanakoraoaki, ao a moanna n ikoikotaki utu. Te mwaanga aio e reitinako n rikirake n te bong aei.

Ngaira ao kaain te mwaanga ti kakoaua i bon iroura kakain mwaakan Ana Boki Moomon. Bon ngaia ni koaua kingin ara ekaretia ao ara kakoaua n ana euangkerio Iesu Kristo. Ti bon tangiria ma nanora ni kabane. Bon ngaia oin te ataibwai ae akea tokina ae aki bibitaki.

Rinanoan aei e reireiniira bwa Ana Boki Moomon bon ngaia te ibuobuoki ni koaua ni buokaia tarira ao mwanera n otinako man rotongitongin tamnei are e rabuna te aonaaba. Te boki aei e uota te rau, kimwareirei, kukurei, ao te nano ae korakora n iriira te Tia Kamaiu Iesu Kristo.