Titiraki & Kaekaaia
“I kakaenaenaaki n te reirei ngkai I riki bwa kaain te LDS. I ataia bwa I riai n tei ibukin te bwai ae I kakoaua, ma e boni kangaanga! N na kanga n rangin n ninikoria?”
E eti anne ko kainnanoa te ninikoria ni kaaitarai kanganga aikai. Imwiin anne, e a tia Iesu Kristo n tuangiira bwa ti na teirake ao ni kaotaira nako bwa aonga ara taura n riki bwa te kainibaire ibukin te aonaaba (taraa DC 115:5). Ma karekean te ninikoria bwa e aonga n otanako am taura e kona ke e aki kona n nanonaki n taetae ni kaaitaraia naake a kaenaenako.
N angai riki tabeua, ko kona ni kariaia te tia kakaitara n ana nanom n riki bwa te aomata ae tamaroa riki. Ngkana ko mwakuri korakora n am koaua, ko kona ni karikirakea te aeka n ninikoria ae rau are e na buokiko ni kona n taetae ke n teimatoa ni karaoa te bwai ae eti, e ngae ngke a kaenaenako tabeman.
Te kamamaeaki e kona ni kaun, ma uringa bwa ko kona n tataro bwa kam na kaonaki n te tangira bwa aonga tabeman n namakina ana tangira Kristo rinanom (taraa Moronaai 7:48). Ibukina bwa a kakaokoro kanganga, ukoukora ana kairi te Tamnei are ko kona iai ni kaitarai kanganga aikai n ana kawai Kristo.
Ni kaineti ma aron te kanganga, e na bae n raoiroi riki ni maroro ma naake a tia ni bwainingareiko n te tabo ae onoti ke n aki tabe ma taeka ni manikangare aika aki raoiroi ma ni kataia ni maiuakin am koaua. Ngkana akea nanoia ni kan kakauonga tabeman nakon te bwai ae ko na taekinna, am banna ni katooto n te tangira, te kakabwarabure, ao n te aki manikangare tao anne te kabanea n tamaroa n rongorongo ae ko kona n anga.
Kaota te Ninikoria ae Koaua
Naake a kakaraoa te waaningare a kona ni katokia ibukina bwa ko ninikoria n tuangia bwa ana katokia, ma ana kona n toki man kaotan am ninikoria bwa antai ngkoe—aomata Aika itiaki ni boong aika kaitira. Imwain ae ko ataia, ko na kakabwaiakaki ngkana e kariaia Tamam are i Karawa n te bwai ae ko na karaoia, te kantaninga bwa ko na kauki mataia nakon te euangkerio ae kaokaki ni maium.
Bright U., ririki 17, Imo State, Nigeria
Kakaea te Korakora ni Bwaai Aika Ko Kainnanoi
Te tataro ao te akimamatam a kakawaki ibukina bwa ana buokiko ni kona ni kaitarai manikangare ao te waningare, n ai aron Iesu Kristo ngke e wanikangareaki inanon kawai ao ni kona naba ni kaitarai kaenaena aika mwaiti ngke E mena iaon te aba. A na buokiko ni karikirakea riki te tangira ao te taotaonaki n nano nakoia aomata.
Walter C., ririki 15, Jaén, Peru
Kairaki rinanon te Tataro
Inanon te tai ae maan ti ngai kaain te ekaretia n au reirei. Raoraou aika i kaan ma ngaia a tara n ae ata arou, ma raoraou n te reirei riki tabeman a bwainingareai. N te bong teuana I tataro ao n namakina kainnanoan te maroro ma temanna mai ibuakoia are e kaungaia tabeman bwa ana bwainingareai. I kabwarabwara bwa I aki un nakoia, ma I tuangia bwa ana anganai te karineaki ae I tangiria ni karekea. Imwiin ongoraeakin ara maroro, temanna mai irouia au tia reirei e aki toki ni kamanoai ngkana e nora te bwai ae aki raoiroi nakoiu. I ataia ae e na mena irarikim te Uea ngkana ko taetae ma aomata aikai.
Shanela S., age 14, Pangasinan, Philippines
Karikirakea Am Koaua
Te moan, karikirakean raoi koauan te koaua ae ko tangiria n tibwauaia ma tabeman. Ngkanne kareka tangiraia aoamta aika a bwainingareiko ao tai karekea te kauntaeka, ibukina bwa te kakaitara e aki boutokaaki iroun te Atua (taraa 3 Nibwaai 11:29). Ae kakawaki riki, kataia ni karekea te Tamnei bwa e na memena iroum n tainako. E na buokiko te Tamnei ni karekea te tangira ae mwaiti ao te ninikoria ae bati, ao E na kona ni karaoai am taeka bwa ana mwaaka.
Julia F., ana ririki 19, Hesse, Germany
Tangiriia Am Kairiribai
I a tia ni mena n te aekaki ni kanganga anne. Ngkana iai am onimaki ao n nanorinano, ko na kakabwaiaaki ma te korakora ao te onimaki ae ko kainnanoi n “tangiriia ami kairiribai, kakabwaiaia akana bwainikiriningkami, … ao tataro ibukiia” (Mataio 5:44). N na kaungako bwa ko na ukoukori kiibu man booki aika tabu ibukin kaekaan titiraki bwa ko na kanga ni karekea te korakora. Tataro ngkana ko namakinna ae ko tiku ni maroa n am onimaki. I-Rom 8:31 e taku, “Tera ngkanne ae ti na taekin ibukin bwaai aikai? Ngkana E tei ibukira te Atua, antai ae kona n ekiira nako?” E mena te atua n am itera! Bwaai ni kabane a kona ni karaoaki.
Reagan T., ana ririki 15, Utah, USA
Tai Maaku
Tataekina taekan am aro n angiin te tai ke karaoi bwaai ma bukina ae riai bwa ana uotiia rake. I mena naba n te aeka ni kanganga anne ao I koroia, “I Tangiria n Riki Bwa Kaain te LDS” iaon au baekibaeki. Man karaoan aei, I katauraoa te kawai nakoia mitinare ao ni kaotia nakoia aomata bwa I aki maaku ni kaotia nakoia bwa Ngai kaain te LDS. Bwa tera ae ko karaoia, tai kariaia bwa ana kaniiko. Tataro ibukiia ao bon ibukim. N te tai ae waekoa ko na kunea bwa ngkana ko iangoia bwa ko na kamaiuia tamneia tabeman, ko na bon aki maaku n tuangiia te koaua ana euangkerio Tamara.
Savanna P, ana ririki 14, Texas, USA