Ana Koaua Ethan
E maeka te tia korokaraki i Utah, USA.
E tara n ae ni kabane ma ti Ethan ae iai ana koaua.
“Kakauongo, kakauongo. Te Tamnei ae raoiroi e na wirikiriki. Kakauongo, kakauongo nakon te bwana ae maraara n rau” (Aia Boki n Anene Ataei, 106)
E tekateka Ethan n tain tibwakin te tai ao n taratara raoraona, Sam, ngke e kaota ana koaua. Raoraona ae Sarah e tei iaon te tabo n taetae, n tataninga ana tai. Sam e taekina rongorongon te mwakuri n ibuobuoki are e karaoia. E taekinna bwa iai ana koaua n te mwakuri n ibuobuoki. Sarah e kaota ana koaua iaon taian utu. Ana tia reirei Ethan e kaota naba ana koaua. E taekina taekan te mwakuri n te tembora. Ngaia ni kabane a taekinna ae e koaua te Ekaretia. E taraa n ae ni kabane ma ti Ethan ae iai ana koaua.
“Tera te koaua ae I a tia ni karekea?” E mimi Ethan.
E ururing rikaaki tabeua te ririki n te tai are ngaia ao raoraona a bwabetitoaki. Ana tia reirei n te Moanrinan, Titita Calder, e a tia n anga ana taetae iaon te Tamnei ae Raoiroi.
“E kona te Tamnei ae Raoiroi n anganiko te namakin ae aabue inanom. E kona ni buokiko n ata te bwai ae eti,” e taku. “Ao anne aron karekean am koaua n aron te bwai ae ko kakoaua.”
E kataia Ethan ni karaoa te bwai ae eti bwa e aonga n namakina te Tamnei ae Raoiroi. I wareki koroboki aika a tabu ao I tataro. Ma e tuai man karekea te nano ae aabue anne ae a taekinna aomata. Are nanona bwa akea ana koaua?
Te titiraki aei e aki toki n iangoia Ethan ni karokoa te bong are imwiina. E bon tiku naba n iangoia ngke ngaia ma Sam a takakaro ni buti iaon ana baba ini kabubuti imwiin te reirei. E aki ataia bwa e na kanga n tuanga Sam.
“Eei, Sam,” n tokina e titiraki Ethan, “ko maaku ngke ko kaota am koaua ngkoananoa?”
E kibanako Sam man ana baba ni kabubuti ao n nakonako nakon te uteute. “Tiaki ngaia anne,” e taku, n tekateka i nano “I a tia n tibwaua au koaua n aia tairiki kain te utu n te bong are mai imwaina.”
E raonna Ethan ao ni katokaa ana baba ni kabubuti iaon rangana “Ma ko kanga n ataia ae iai am koaua?”
“Eng, I tataro ao n namakina te nakoraoi iai.”
Ethan e karaurau ni katoutoua atuna ao ni kaminoa ana wiira ni baina. N tabetai e tangiria ni kan riki n aekan naba anne.
N te tairiki anne, ngke e roo ao n rau, e katorobubua Ethan irarikin ana kainiwene ao n tataro.
“Te Tama are i Karawa,” e taku, “taiaoka buokai ni karekea au koaua. Buokai bwa N na ataia ae e koaua te Ekaretia. Bwa Iotebwa Timiti bon te burabeti. Ao ana Boki Moomon e boni koaua.
I nuukan ana tataro, e toki Ethan. E iango tabeua te miniti. E titirakinna i bon irouna, “E uara, iai te bwai ae I ataia?”
Ao imwiina te namakin ae aki karongoa, man rau e roko irouna. Bon tiaki te namakin ae korakora ae kakamaku. Ma e ataia Ethan, bwa te Tamnei ae Raoiroi.
E roko te bwai teuana n ana iango Ethan: “I ataa anne I ataia.” Ao ngke e iangoa taekana, e kunea bwa e a tia n namakina te aeka n namakin ae rau aei mai imwaina.
N tainako ngkana e wareka ana Boki Moomon, e namakina ae raoiroi ao ae e eti. Ngkai e ataia bwa te namakin anne bon te Tamnei ae Raoiroi ni kakoaua raoi nakoina. Ngke e nakon te taromauri ao e namakinna te nakoraoi ao te eti menana ikekei, anne are bon te Tamnei ae Raoiroi naba. E a tia ni kaman karekea ana koaua!
E aki kainnanoia n atai bwaai ni kabane n te tai aei. Ma e aki ataia ae e koaua te Tamnei ae Raoiroi e kona ni buokia ni kateimatoa ni karikirakea ana koaua.
E moanna ni manga tataro Ethan. Ma n te tai aei bon taekan atongan ko rabwa.