Boni Ngaia te Bitiobi?
E maeka te tia korokaraki i Illinois, USA.
Ibukina bwa I a tia n aki kakaonimaki n ririki aika nako, kaain te aro ae e kinaai e aki kakoaua ae I a weteaki bwa N na riki bwa te bitiobi.
Tamnei ao kamataata iroun Mark Smith © 2016
N tain ana komete ni kakoroi moti te nakoanibonga, ara mitinare aika bwanin aia tai a ribootina kaitibooia ma kaain te aro ae akea mwiin araia n te uoote. I kinaa te ara n te tai ae waekoa ao n taekinna bwa Ngai ma neienne ti a tia ni mena n teuana te uoote n ririki aika nako.
Temanna te mitinare e taku, “Eng, bitiobi, e taekinna bwa e taraa ni miimi ngkai ko a riki bwa te bitiobi.”
I titirakiniia, “Tera ae taku neienne?”
A taku bwa e rangin miimi ao n taku, “Boni Ngaia te Bitiobi?”
I ngare ao ni kamataata bwa te aine aei e kinaai bwa te aomata ngai ae rangin kaokoro ma are 30 te ririki n nako.
Ngke I iangoa taekan te bwai ae riki aei imwiina, I iangoia bwa mwaitira aron maiu n tia ni bitaki inanon 30 te ririki ngke ti kaaina te aro Ngai ma au utu. I a tia ni kinaia angiia kaain te uoote inanon 20 te ririki ao n tia ni beku bwa te beretitenti n te mwaanga ao n aron te bitiobi, ma akea ibuakoia kaain te aro aikai ae a kinaai 30 te ririki n nako. E ngae ngke I tibwai bwaai aika riki imarenantai man au tai ake ngkoa n reiakina taekan te rairannano ao ana Mwakuri ni Kamaiu Iesu Kristo, angiina kaain te uoote a aki ataia bwa kamiimira aron mwanangau ni maiu aei ae e a tia n riki inanon te Ekaretia.
Ngai ma au utu ti roko n te Ekaretia ni Meei 1979, ao I ataia n te tai ae waekoa bwa aei te tabo ae ti na kaainna. Ti bwabetitoaki n Tuun, ao n te moan ti bane ni kakaonimaki, ma e aki rang maan imwaaina I a katoka nanakou ao n okira arou ake mai imwaaina. I bon aki nanouoa ibukin koauan te euangkerio ao Kaokan Bwaai, ma I aki iangoia bwa a na terana taraakin kaainakin te Ekaretia.
N 1982, ibukin reitinakon au kakeru n te momoi manging, kainnabau, ae aki bwaka n ana onimaki, e a nikiri ana beeba n te bowii, ibukin ara buuraure. N te tai anne a maeka au utu i Oklahoma, USA, ma I a tia n oki nako Illinois, USA, ike I ikawairake iai. I a roko n te kantaninga are N nang kabua te bwai ae rang moan baan te kakawaki irou: au utu.
I a moana au tataro iaon bubuan waeu n te ingabong ao te tairiki nakon te Atua are I aki kakoaua bwa e maiu, ngkana E bon maiu, I iangoia bwa E a tia ni mwaninga taekau n te tai ae maan. Irarikina inanon teniua namwakaina I tataro ma te kakaonimaki. N te karangaina teuana, inanon au tai n tataro, iai namakinan te rau ae roko irou ao I ataia bwa e maiu te Atua, bwa E ataai, ao E tangirai. I ataia naba N nang katoka te mooi manging.
N te tairiki naba anne I karekea au tareboon mairoun kainnabau are e tuangai bwa e na meerina nakoiu te beeba ni buuraure bwa N na tiaainaia. N tain te marooro anne e waekoa n taetae, “Iai te bwai ae rangin bitaki iroum. I aki kakoaua ae ko na manga kona riki ni manging, ao N nang raeuai beeba aikai.” Ti a manga ikotaki, ao uoua te ririki imwiina e a bungia ara kateniman n nati.
Temanna ae I ataia bwa e na kona ni kaokai nakon te Ekaretia, ma bon te imanono ni mwaane Ngai. I oki n te taina ao n anganaki nakoau bwa te tia kairiiri n te kooram n te nakoanibonga. Ma I moanna n namakina aki tau n angareirei ao ni manga moanna n aki kakaonimaki.
N te 1991 ti mwaing nakon te mwaanga ae uarereke. Tabeua namwakaina imwaain ana ka waniua n ririki ara bina ni mwaane, kainnabau, te beretitenti n te Buraimwari, e titirakinna bwa antai ae e na bwabetitoia. Ni koauana e tangira tamana bwa e na karaoa te otenanti. Kainnabau e tuangnga bwa e na aki kona n riki aei. E aki butimwaea te kaeka ma e moana ana mwakuri ni kamarurung ibukin tamana. E taraa n aki momotirawa, ao n te tai ae waekoa I a kunea bwa I beku bwa te Tikautimwaatita, ao I a bwabetito ao imwiina ao ni kamatoa natiu te mwaane.
Waniua namwakaina imwiin au kakaonimaki a bati bwaai aika riki. Ti kabaeaki bwa te utu n Temboran Chicago Illinois, ao I a manga moan weteaki naba bwa N na beku bwa te tia kairiiri n te kooram n unimwaane, ma n te tai aei I aki kitanna. I weteaki ngkanne bwa te kauntira n te beretitentii n te mwaanga, ao nimaua namwakaina imwiina I weteaki bwa N na beku bwa te beretitenti n te mwaanga. Te namwakaina ke imwiin weteau, I uringnga ngke I tabe n iango, “Ngai te beretitenti n te mwaanga?”
I a tia n tuangiia angiina Aomata aika Itiaki ake a karawawataaki inanon ririki bwa ngkana I kona n rikirake n te euangkerio, aomata nako a kona. Ma n tii ataakin mwaakan te Tia Kamaiu ae koaua ao Ana Mwakuri ni Kamaiu ao ake a karaoa ae riai n oki Nakoina.
I rangin kakaitau n aki toki nakon kainnabau ao natiu ao nakoia ni kabane taan reirei n te mweenga aika kakaonimaki, taan kairiiri n te kooram, bitiobi, ao tabeman Aomata aika Itiaki ake a katea te banna ni katooto ae kakateke ibukiu. Aei e riki bwa te tai ni beku ibukin te Uea ao Aomata aika Itiaki aikai 20 te ririki n nako. E a tia ni kakabwaiaaki maiu iaon bwaai ake I kona n iangoi.