Nako Buoka Neierei

Thomas Robbins, California, USA

I tei n te rain n te tabo ni bwaa. I matau, te tina ma natina uoman e tuatua ibukin te bwa ae $3 boona ao uoua te koun n aitikuriim.

Ni moan noorakiia ao I kona n ataia bwa akea aroia. Akea aia kauniwae ataei ao aia kunnikai a mane.

I ongo te aine are e kabwaka te koin ae taraa ni mwaiti aon te kaunta ni kabwaki boon ana bwai.

Imwiina ngke I tia ni kabooa au bwaa, I otinako n taraa ana kaa te tina arei. Bon te kaa ae bwai ni kawai are e taraa n rang uarereke kawaina ni mwaitin bwaana ae $3.

Iai au namakin n nanoanga te tina ma natina aika uoman, ma I kamaiua au rebwerebwe ao n touanako ma kanoan au bong.

E aki reke te miniti inanon butiu iaon te kawai ae abwabwaki, e a roko te bwanaa nakoiu: “Naako Buoka Neierei” Uatai rokon te wirikiriki.

I ioioa atu, n iangoa are e a bae n tia n nako. Tera ae N na taekinna nakoina?

E roko te bwana ae mataata te katentai: “Naako Buoka Neierei!”

I rairaki ni kaineta te tabo ni bwaa, ni kataia n iangoia bwa tera are N na taekinna ngkana e mena naba ikekei.

Ngke I roko, I noora matan ana mataroa n uki n tangaina. E tekateka n ana tabo te turaiwa, ao natina ake uoman aika a uarereke a kukurei ni kana aia aitikuriim n te kaintekateka mai buki.

I karaoa au tataro ae uarereke, ni butiia Tamau are i Karawa bwa tera ae N na taekinna. Te bwanaa naba arei e taku nakoiu, “Kabwarabwarako ao titiraki ngkana e kainnanoa buokana.” I nakoina n ana kaa ao I kabwarabwaraai nakoina. I tuangnga are e riingaki nanou ni kan titirakinna ngkana e kainnanoa te ibuobuoki.

E a tang man taku, “I a tibwa tia n tataro nakon Iesu, ni butiia bwa E na kanakomaia temanna bwa e na buokai.”

Te Tama are i Karawa e a tia ni kaeka ana tataro neiei. I kabwaka boon kaonan ana tangke ao I anganna nambwan ana tareboon temanna man aia kooram n unimwane are e kona ni karaoa te aea n te tai anne. I aki ataia bwa tera ae e riki nakon te kairake n tina aei imwiina, ma I kakaitau bwa I karaoa nanon te wirikiriki ni buokia.