E Ngae Ngkana Ko Maama

Iroun Unimwaane José A. Teixeira

Man te Itingaun

Onimakina te Uea, ao E na kakabwaiako n am mwakuri n tibwa te euangkerio.

Ngke I riki bwa te beretitenti irouia mitinare ae boou i Brazil, I intawiu ma tabeman mitinare. I titirakina temanna te mitinare bwa e na kabwarabwara arona nakoiu.

“I rangi ni maama,” e taku. E raraoma ni mamaana bwa e na kona n tuka kawaina n aki kona ni mwakuri.

I titiraki, “N am i iango te Uea e kona ni buokiko ni kona n riki bwa te mitinare ae nakoraoi ngkana ko maama?”

“I kakoaua bwa te Uea e kona ni karaoi bwaai ni kabane.”

“Ngkanne kariaia bwa E na buokiko. Ko kona ni karaoa anne?”

“I kona,” e taku.

N na kaotinano bwa ngke e rianna nako, I iango, “Eng, au kantaninga bwa e mwakuri.”

A bwakanako wiiki ake imwiina ao n te taina te mitinare naba arei e roko nakon te intawiu. N te tai aei toan te mitinare are maama e taku, “Beretitenti, I aki ataia bwa tera ae ko tuangnga, ma e bon bitaki. E a rang tamaroa ana maroro ma aomata.” Ai ngaia are I a ingainga ni kan manga kaitibo riki ma ngaia.

Ngke e rinnako n au aobiti, e baraaki n tara aontano.

“Iai te rongorongo ae tamaroa ae N na kaongoko,” e taku. “I bon maama naba, ma I butiia te Uea bwa e na buokai. Ngkanne Ia kaurea wiiu n taetae. Ao ko ataia bwa tera? I a kakaraoia ni katoa tai ni karokoa ngkai. I aki kona n uringnga bwa tera are I taekinna. Te bwai ae kamimi bwa aomata a tatangiria. A namakina te Tamnei. A ota ao a booraoi ma ngai ni bwai are I tuangiia.”

I mimi n noora aron te mitinare aei ni kona ni bitaki ngke e katuka ana onimaki iroun te Uea. E riki bwa tabonibain te Atua ae korakora ni uotakin te kukurei nakoia aomata aika mwaiti.

Tokanikai iaon te Maaku

Ngkana ti tibwa te euangkerio, n tabetai ti namakina te maaku. Ma n aron ae e kaotia te mitinare ae maama aei, te Uea e na kairiira ngkana ti Onimakina. Te Tamnei ae Raoiroi e na buokiira n ata te bwai are ti na taekinna (tara 2 Nibwaai 32:2–3), ao ngkana iai te tamnei ae Raoiroi, a kaeka n te kawai ae raoiroi. A mwaiti aika a anaaki nanoia n te bwai are ti kakoaua ao a tangiria ni kan atatai riki.

Te Kimwareirei ae Bati

Iai au koaua bwa Tamara are i Karawa e na kairiira n ara mwakuri n tibwa te euangkerio, ao n te aro anne ti na kona n namakina te kimwareirei ae bati. Te koaua, te kimwareirei anne e na aki ti memena iroura ngkai ma n te maiu ae e na roko. (Tara D&C 18:16.) Anne bukina ae tamaroa ni karaoa te bwai teuana ae ko aki rang mwengaraoi iai, riki ngkana ko maama.

TENUA AEKAKI NI Maaku Aika Ko na Tokanikai Iai

Irarikin te mamaama, I atai tenaekaki riki maaku ake a karikiia tabeman mai iroura bwa a na taekina, “I maaku bwa ngkana I taetaekina te euangkerio, a na kiitanai raraou.” Ti a kakaitau riki, bwa n raonaki n te onimaki, maaku akanne a kona ni bua.

1. E aki tau au atatai.

   Ngkana e karako am atatai n te euangkerio, mitinare aika bwanin aia tai a kona ni buokiko. A kona n reireiniira rongorongon Manga Kaokan Bwaai, ni buokiira ni kakorakorai ara onimaki iroun te Uea Iesu Kristo, ao ni buokiira n ota n te rairannano ao arora ni karaoi inanon maiura ao n ataia bwa bukin tera a kakaawaki te bwabetito ao bon anne ana bwaintangira te Tamnei ae Raoiroi. Teuana riki te boki n atatai bon Tataekina Au Euangkerio. N na kaungaia ni kabane kairake n ataeinimwane ao ataeinnanine bwa a na karekea te boki aei bwa mwakoron aia kamatebwai ni katoabong ma aia booki aika tabu.

2. I tuai man kakaraoa aei mai imwaina.

   Ngkana ko tuai mwaatai, kataneiai ma mitinare! A kona ni buokiko n ata te bwai ae ko na taekinna n aroia aika kakaokoro. Ngkai ko kabanea am tai ma mitinare, ko na namakina te tangira are a karekea man te euangkerio ao ibukiia raoia. A tia ni karekea te ninikoria n tibwa te euangkerio; a kona ni buokiko ni karaoa naba anne.

3. I maaku n taekinna.

   Ngkana ti taekina ara koaua, ti buokiia raraora n noori bwaai aika nano riki, ao a na karineira ao n tangiriira inanon te ota ae okoro. Aio e riki e kuri ni katoa tai. A mwaiti kairake aika a taekinna, “I aki mamaaku, ma ngkana I taekina raoi te koaua, raraou a na kona n onimakina ao n titiraki riki aika mwaiti.” Ti riai n aki maaku n tibwai bwa tera bwaai ake iroura. E bon rang kakaawaki ibukina bwa e roko mai iroun te Atua. Ao tera kawai aika tamaroa riki ni kaota te tangira nakoia raraora nakon tibwauana ma ngaia n aron te bwai are ti ataia ae koaua?