Beku n te Ekaretia
Ko Rabwa ibukiN Am Mwakuri n Ibuobuoki
Bon ngkoe te katooto raoi ae kororaoi ibukiia aine akanne ake, n tain bongin Nauvoo, a tia ni kaai ni beku rinanon te kakawari n reirei ae tangira man kairaki.
I aki ataa aram, iraua am ririki, ke rongorongom riki tabeua. Ae I bon tii ataia ngkoe ana tia reirei ni kakawari Joann, ao I butimwaea am mwakuri n ibuobuoki ae akoi ma nanou ni koaua.
I ataia bwa kawaran tarira ae aki bati ni kakaonimaki n aron (e bitaki te ara), kainnaban natiu te mwaane, e aki bebete, ai moarara riki riki ngke e aki rang butimwaea. I raraoma e aki tangiriko bwa ko na kawaria n te moan tai. Ma e a tia n tuangai Joann bwa ko a tia n riki bwa te rao raoi ni koaua ibukina, ni kakawarana n nooria bwa e uara ao ni butimwaia n arona arei.
Inanon 19 te ririki ngke e mare Joann ma natiu te mwaane, aei te moantai n taekina reken ana tia reirei ni kakawari. N te tai ae aki maan n nako e tuangai aron rorokom ni katoabong aron am tituaraoi ma am akoi n taainako. E taku bwa ko a tia ni buokia n taai aika bati ngkana e aoraki ao n anganano ni kaira tibu te aine mairoun natiu te mwaane nakon te Bootaki n Ataeinaine.
Inanon 10 te ririki, neienne, natiu te mwaane, ao aia utu a tia ni maeka tebubua te kiromiita raroana mairoura. I tataro bwa tabeman a na tangiriia ao n tabe ma ngaiia n aron ae I karaoia, ao I a tia n tang ni bubuti nakon Tamau are i Karawa bwa a na kona ni kawaraki irouia tabeman n aron ae I kona ngkana a maeka ni kaan nakoiu. Man te bwai are e taekinna Joann, boni ngkoe kaekaan au tataro.
E ngae ngkana Joann ao natiu te mwaane a aki ongotaeka n Tuan te Mauri ao a aki roroko n taromauri, a teimatoa n riki bwa aomata aika raraoi ao a tangiriia natiia. Irarikina am iango ibukin Joann e aki rootaki n te koaua are e moko n te tikareti. Ko aki motika taekana ngkana tao ke e aki roko n taromauri. Ko a kinaa ao n ataia bwa bon te tina ae tangira are e tangira natina te aine bwa e na roroko n taromauri ao ni karekea ana koaua. Ao ngke e a karaoaki te korokoro ibukin Joann, ko nikira ana katairiki n oneamwiin ae ko na miimi ngkana e a tia ni uota te kangaanga ni bon nakon maurin rabwatana.
Ai kakaitaura Ngai bwa boni ngkoe te katooto ibukin tibu te aine. E kona n taraiko bwa temanna ae tabeakiniia aomata ae e korakora ana kekeiaki n ana tabeaianga n tatangira. E tuangai bwa n te bong teuana ngkana akea am kaa, ko rianna n te raroa ae raka nakon teuana ma te iterana te maaire nakon ana auti ma natim aika uarereke ni uoti taian kuuki.
“I tabe n iangoiko ao tinam ao n tangiria ni karaoa te bwai ae tamaroa ibukim—tii ibukina,” ae ko tuangnga.
Au kantaninga I kona n tuangko bwa mwaitira Irou butimwaean am anganano nakon weteam ae te tia reirei ni kakawari. Bon ngkoe te katooto raoi ae kororaoi ibukiia aine akanne ake, n tain bongin Nauvoo, a tia ni kaai ni beku rinanon te kakawari n reirei ae tangira man kairaki. Ko a tia ni kaota te mwakuri n ibuobuoki anne ao te tangira rinanon te kawai are ko kakawara iai kainnaban natiu ae aki bati ni kakaonimaki ma te tangira.
Ko rabwa.