Te mwane ibukin te Tama are i Karawa
Te tia korokaraki e maeka i North Carolina, USA.
“Kawakin tuua. In this there is safety and peace” (Children’s Songbook, 146).
Ana e tena kabanean kanana ae te tortiilla. E bon maraurau ao ni kangkang. Ana e tangira ana tortillas tibuna te unaine mairoun tinana. Bon mwakoron ana kaingabong ae nakoraoi.
Ana e matakuakina tibuna te unaine, Abuela, n irebwainamwarake.
Ai aron naba ingabong ake tabeua. Ma teuana te bwai ae kaokoro.
Abuela e nanako n te mwakete ni kaboa te amwarake. Ma tiaki n te bong aei. N te bong aei akea te mwane ni kaboan te amwarake.
“Tera ae ti na kanna ningabong?” E miimi Ana.
Ngkanne e a uringnga Ana. E ataia bwa e mena iara te mwane! Ngke e tairiki e noora Abuela ni katuka tabeua te mwane inanon te kunnikai ae mainaina.
“Abuela, ko mwaninga? Iai am mwane ni kaboa te amwarake.”
“Te mwane terana?” E titiraki Abuela.
E birinako Ana n anaa te mwane. E ioioa te baeki ni koin. Clink! Clink!
E moangare Abuela. “Anne ara kabwianibwai, Ana. Bon anne Ana mwane.”
“Tera ae ti na kanna ningabong?” E titiraki Ana.
“Tai raraoma,” e taku Abuela. “Iai au onimaki bwa te Tama are i Karawa e na buokiira.”
Te ingabong are imwiina Abuela e angan Ana te kabanea n tortilla ae karaoaki n te koon. Ngkanne e a tekateka iaon ana kaintekateka. E itua te kunnikai ma ueena aika uraura n ituaki ni kanimwaki iaona ao ni karakina rongorongona ngke e ataeinaine. E aki taraa n raraoma.
Ngkanne Ana e a ongo te karebwrebe iaon te mataroa. E biri bwa e na kauka te mataroa.
“Ai Tamau Pedro!”
“Iai au namakin bwa I riai ni kawari ngkami aika uoman,” e taku Ai Tamau Pedro. E katikui teniua baeki iaon te taibora. Teuana kanoana te burawa ae karaoaki man te koon ibukin te tortillas. Are teuana kanoana te irikomaiu. Are teuana taian kainamwarake man te mwaakete.
“O, natiu te mwaane ae tangiraki,” e taku Abuela. “N nang karaoa kanam te tuubu n irikomaiu ae booro!”
“Am tuubu te kabanea n nakoraoi n te aonaaba,” e taku Ai Tamau Pedro.
E ngare Ana ao e uboi baina.
Ngkanne e a tei. Iai te bwai teuana ae kan ataia. “Abuela, ko ataa Ai Tamau Pedro ae e na roko n te bong aei? Anne bukina ngkai ko aki raraoma?”
“Tiaki,” e taku Abuela. “Ngkana I kabwaka au kabwaianibwai, Iai au onimaki bwa e na kakabwaiai te Tama are i Karawa. Ao E karaoia!”.
E koona Abuela Ana. E namakina kanga te ataeinaine ae rang kukurei iaon Mexico. Iai ana onimaki ngaia ma Abuela iroun te Tama are i Karawa. Ngkai e aki kona ni kan tataninga ni kana ana tuubu Abuela ae kangkang!