Bwanaaia Aika Itiaki ni Boong Aika Kaitira
Tai Katii!
Te Ara e tauaki
Ngai ma Bob ti tekateka inanon ara kaa ni bureitiman, n taninga te kanikina ni mwaing ruo nakon te kawai. Ti a tia n tuoa raoi te tabo anne uoua te aoa mai imwaina ni kina te kaa are e taekinaki n te kauring n aia rerio bureitiman.
“Ai te iraa ae riki ngkai,” e taku te kauring. “Uoman mwane, iai aia katii. A nooraki n te kaa ae e aoranti karana. Taan kakoaua a taekinna bwa mwaane aika a iowawa ao a tauraoi ni katii.”
N te rongonongo aei e a tibwa roko e kaota aroia taan kimoa nakoia aomata ake a tauiia ma te katii are e riki n te tabo anne, e ngae n anne n ara kabanea n tamaroa, taan kimoa a manga birinako naba. I aki manga iangoa anne n te tai are I nooriia uoman aomata aika otinako man te kawai ae roo ni kiba nakon te kaa ae aoranti karana. Ngkai a buti ni kainetiira.
“I bubuti tewaana te kaa ni buokai,” I taku. “Taan kimoa ake a kanamakinanki a buti nako meang.”
Uoman taan ibuobuoki ake a kawariira, uoman bureitiman ake aki kabooraoi, ao aki uota te kaa ni bureitiman, a rimoan te kaa are I rimwiia ngai ma Bob. Imwiin ara kateniwa ni kaa a roko n te buriiti, taan buokiira a tei ni bangaki iaon te buriiti imatan te kaa ae aoranti ao tia tei i akuuna, ni kamwaneia taan kimoa ake ti kanamakiniia. N te tai ae tawe, e tei te kaa ao aomata ni kauoman a waekoa ni bua ao ti aki noriia.
“Otinako man te kaa ma baimi iaon atumi!” I anga te kaetieti ngke I otinako man au kaa. Akea ae e kaeka.
Ngke I a tauraoi ni katii, I manga tuatua riki, “Otinako man te kaa ma baimi iaon atumi. Karaoia ngkai!”
N te tai ae e waekoa e otinako te turaiwa ao e kaitaraai. I a kona n noora te bwai ae kaanga taraan te biti inanon baina.
N au kataneiai ni bureitiman ao e roko n au iango bwa I riai ni katiia bwa N na kamaiuai. Ma riaon riki te iango are I tauraoi ni karaoia n te tai anne, I ongo te bwana. E bon rau ma e anga te kaetieti ae korakora: “Tai Katii!”
I kantaningaia bwa N na katiiaki n te tai ae tawe, ma I taninga temanna man te kaa bwa e na katii moa. N onean mwiina, te turaiwa e tabeki baina, i etan atuna te bwai ae kanga taraan te kati, ao ni kabwakai baina iaon waena.
“Tai Kammwakuri!” I taetae ngke I kawaekoa nakon te kaa. “Tai Mwaing!”
Te tai anne kaanga ai aron te tamnei n te TV—ni karokoa I a ataia bwa aomata ake I taku bwa buure inanon te kaa ngaia bon ataeinnaine uoman aika a maaku. Te bwai are I taku bwa te katii bon tii bitin roon te kaintekateka.
Ataeinnaine aikai, ti a ataia bwa a anga aia kaa bwa a na tangoia raoia aika mwaane. Bon akea n aia iango bwa aekaki n aomata raa naakai.
“I taku bwa ko a ti a ni mate, Cal!!” E tuangai imwiina Bob. “I a kuri ni katii. I aki ataia bwa bukin tera I aki karaoia.”
Bureitiman ake uoman n te kaa ake tiaki aia kaa bureitiman a taekina naba anne, bon akea ma tii ngai ae I ongo te bwanaa. I ataia bwa bon tii te mwaaka mai karawa ae e kona ni kamaiuia ataeinnaine ake uoman man te mate ao aman bureitiman man karaoan te kairua ae kananokawaki. Te namakin aei e anganai te atatai ae koaua raoi bwa Tamara are i Karawa e kona ni karin ibukin kamaiuara.