Te Rongorongo man te Moan Beretitentii
Taetae ni Burabeti ao te KAOTIOTI NAKOIM
Iroun Beretitenti Henry B. Eyring
Moan Kauntira n te Moan Beretitentii
Ana Ekaretia Iesu Kristo ae koaua e a tia ni kaokaki ao e a mena iaon te aba n te bong aei. E a tia Ana Ekaretia Iesu Kristo ibukiia Aika itiaki ni Boong aika Kaitira ni kairaki n tainako irouia burabeti ao abotoro aika a maiu, aika a karekea te kairi mairoun te Atua.
Te aeka ni banna anne ae mairoun te Atua e boni koaua naba n taai akekei. Ti reirei inanon te Baibara: “E na bon aki karaoa te bwai teuana te Uea ae Iehova, ngkana e aki kaota moa nanona ae raba nakoia ana toro aika burabeti” (Amota 3:7).
E a tia te Atua ni manga taetae riki n ara tai, rinanon te Burabeti Iotebwa Timiti. E kaokia rinanon te Burabeti Iotebwa bwaninin ana euangkerio Iesu Kristo. E kaoka Ana nakoanibonga ae tabu ao e kaoki naba kiingina ao e kaoki inaomatan ao mwaakan te nakoanibonga, ao ana mwakuri mwaakan te nakoanibonga ae tabu.
N ara tai, burabeti ao abotoro aika maiu a anganaki te kariaiakaki bwa ana taetae, reirei, ao ni kaetieti ma te kariaiakaki mairoun te Atua te Tama ao te Uea Iesu Kristo. E taetae te Uea nakon te Burabeti bwa e aki karekea angana ibukin te bwai ae E a tia n taekinna, ao e ngae ngke tao e bua karawa ma te aonaaba, ma a na bon aki maunanako Ana taeka, ma ana kakoroaki bukiia, tao ngkana e koro bukina man Oin bwanaana ke man bwanaaia Ana toro, bon ti tebo (taraa D&C 1:38).
N te maungatabu ni kabuta uoua te tai n te ririki, ti kakabwaiaki n reken ara tai n ongora ana taeka te Uea are E anganiira rinanoia Ana toro. Ongoraeakin Ana taeka te Uea rinanoiia Ana burabeti n te maungatabu ni kabuta bon te kakabwaia ae korakora. Ma kakawakin reken te tai anne n ongora ana taeka te Uea rinanoia Ana burabeti n te maungatabu ni kabuta e nakon ae ti karekei taeka iaan ana kairoro te Tamnei naba anne ike taeka aikanne anganaki tooro aikanne (taraa D&C 50:19–22). N aroia ana toro te Uea (ake, burabeti ao abotoro) a karekei kairi mairoun te Atua (ae maeka i karawa), ti riai ni karaoa naba aekan anne. Ao anne ae kainnanoaki bwa ti na karaoa te mwakuri n tamnei anne.
“Kabanea Korakoram Bwa e Na Reke Iroum”
N ririki aika nako temanna kaain te Kooram n Abotoro n te Tengaun ma Uoman e tuangai bwa n na wareka te taetae man te maungatabu ni kabuta are e koroia n ana katauraoi ibukin te maungatabu ni kabuta. I boou n te tai anne ni kaina te kooram. I karineaki bwa iai ana onimaki irou bwa n na buokia ni kakaai taeka are e tangira te Uea bwa e na taekin. E taetae nakoiu ma te moangare, “O, aio au ka 22 n tai ni korea au taetae.”
I uringa te reirei are e a tia n anganai Beretitenti Harold B. Lee (1899–1973) ngkekei ni maiu ma te kamatata ae korakora: “Hal, ngkana ko tangiria ni karekea te kaotioti, kabanea korakoram bwa e na reke iroum.”
I wareka te ka 22 ni koroboki, iangoia raoi, ao n tataro ibukina. I kamatebwai nakon au kabanea ni kona iaan ana kairoro te Tamnei ae Raoiroi. N te tai are e anga iai ana taetae kaain te kooram anne, I a tia ni kabanea korakorau bwa I aonga n ota raoi n ana maroro. I aki koaua raoi iai bwa I buokia ni katauraoa ana reirei, ma I a taia bwa I bitaki ngke I ongora nakon te reirei are e taekinaki. I karekei rongorongo (rinanon te kairi mai ieta ngke e anga ana taetae) ake a boboto iaon ae raka riki nakon taeka ake I a tia ni wareki nakon ake e taekin. Iai nanon taeka aika nano riki nakon ake I wareki n te moan ni koroboki. Ao rongorongo a taraa n nanonaki ibukiu, a kaineti ma ake I kainnanoi.
Ana toro te Atua aki mamatam ao a tataro bwa aonga ni karekea te rongorongo are E a tia ni katauraoia ibukiia n anganiia naake a kainnanoa te kaotioti ao te kairi mai ieta. Tera ae I reiakinna man te atatai anne, ao katotongana aika mwaiti riki, e kangai bwa karekean kakabwaia aika mwaiti mairouia burabeti ao abotoro aika maiu, ti riai ni karaoa oin ara mwakuri ni karekea te kaotioti.
Te Uea e tangiriia aomata ni kabane aika a ongo nakon Ana taeka, ao E atai aia namakin ao aia kanganga n tatabemaniia nako. E ataia bwa tera kaetakina, tera te boutoka, ao tera te koaua n te euangkerio ae na buokia aomata n tatabemaniia nako ni karaoi rinerine ao ni karaoa te rikirake teuanne ke neienne nakon te maiu are akea tokina.
Ngaira aika ti ongora nakon ao ni mataku n rongorongon te maungatabu ni kabuta n tabetai ti iangoia imwiina, “Tera ae I uringa raoi?” Ana kantaninga te Uea bwa te kaeka ibukira n tatabemanira nako e na kangai: “N na bon aki mwaninga te tai are I namakina te reitaki iai ma te Tamnei n au iango ao n au namakin n tuangai te bwai ae n na karaoia ni kakukureia Tamara are i Karawa ao te Tia Kamaiu.”
Ti kona ni karekea te kaotioti ae onoti ngkana ti ongora nakoia burabeti ao abotoro ao ngkana ti mwakuri n te onimaki ni karekea ara kaotioti, kanga n aron are e taekinna Beretitenti Lee bwa ti kona. I ataia bwa e kaoia man te taneiai ao man ana kakoaua te Tamnei.