Tamneina
Iai Nanon Taian Kaetieti?
Te tia korokaraki, ae maeka i Colorado, USA, e mate n te ririki ae nako.
Te mwananga n te bwatika e anaa nanou ni kainnanoan te teimatoa n ukoukora kawain te Uea inanon maiu.
Tabeua te ririki n nako I ira te mwananga n te bwatika i Buranti ma tariu ae ikawai riki, buun mwaaneu te ikawai, ao natin tariu te aine ae te ikawai. Ni katoa ingabong ti anganaki teniua rongorongon taian kaetieti bwa, ngkana a iraki raoi, ao a na kairiira nakon tokin kawaira n te bong anne. Inanon butira n te bwatika rinanon te nne ni kurebe, a tuangiira kaetieti bwa ti na “nako 165 te buuti (50 miita) i meang, imwiina rairaki nakon te maing ao naako 330 te buuti (100 miita).” N angiin te tai, kaetieti a tuangiira bwa ti na taratarai kanikinaa ao aran taian kawai.
N te ingabong teuana ti bwatika rikaaki n te kawai ae katika te nano ma n te tai ae waekoa ti nooria bwa aikoa bootau ara kaetieti ma te tabo. Ti waekoa ni bua ao ti baireia bwa ti na oki nakon te tabo are ti a ataia iai bwa ti mena n te kawai ae eti n taraia ngkana ti kona ni barongai arora bwa ti na nakea.
N aron ae ti kantaningaia, ngke ti roko ikekei, ti kunea te kanika ibukin te kawai ae uarereke, are e taekinaki inanona ara kaetieti, bwa ti a tia n aki nooria. N te tai ae waekoa ti a manga roko ni kawaira arei, ni karekea ae nakoraoi man irakin kaetieti, are a manga karika riki nanoia aika uaana.
Te taneiai aei e reireinai kawain te reirei ae iai nanona bwa kaekaan au titiraki ae matoatoa are I a karekea: Bukin tera, ngkana temanna ae iai ana koaua n te euangkerio, teuanne ke neienne e na bua ana onimaki? E matata irou bwa ngkana ti toua te kawai ae bure (te bure) ke n aki ira ana tua te Atua, kaetieti (ana taeka te Atua) a taraa n akea nanoia. Te mwabe, e taraa, n aki bootau ma te tabo are ti mena iai. Ngke ti tuai n tionako n ae raroa, ti na kona n nooria bwa bon ara bure ao ti riai n oki (rairannano) ke ni manga motinnanoia ni maiu n aron are e tua te Atua bwa ti aonga n oki nakon te tabo are ti ataia bwa ti irira iai te kawai ae eti.
N angiin te tai ngkana aikoa bootau kaetieti ma te tabo are ti mena iai, ti nanououa n taian kaetieti. Irarikin are te okirikaaki, ti bukini taian kaetieti ao ni bane n totokoi. N tokina, imwiin bwaran nanora ni kataia n roko n tokin kawaira, tia moanna ni bua, n tionako inanon kawai ake a taraa, n aki teimaan, a katika te nano ma aki uotiira nakon te tabo are ti kainnanoia bwa ti na nako iai.
Ni katoa bong e reke ara tai ni kamatebwai booki aika tabu. Ao ni katoa onoua namwakaina, e reke ara tai ni mataku ke ni kakauongo nakon te maungatabu ni kabuta n te Ekaretia. Tiaki aikai raoi taai ake ti kona iai n tuoi mwaben kawaira ao ni kakoaua raoi bwa ti mena n te tabo are ti riai ni mena iai? N te taina, ngkai I kakauongo nakon te maungatabu ni kabuta, I namakinna bwa, e ngkae ngke ti bane n aki kororaoi, ti kona n ataia bwa ti mena n te kawai ae eti ngkana kaetieti aika ti karekei aikai iai nanoia nakoira.
N aron irakin kaetieti aika eti a na karokoira n tokin kawaira n te maiu aei, kamatebwaiakan booki aika tabu ao te kakauongo n aia reirei abotoro aika maiu a na anganiira te konaa ni kakoauai kawaira n te maiu aei ao ni karaoi bitaki ngkana arona bwa, n te kabane, ti roko ni mweengara n te teretio.