Unimwaane Ronald A. Rasband: Te Tia Kairiiri ae Tarena, te Karo ae Kakaonimaki
Iroun Unimwaane M. Russell Ballard
Man te Kooram n Abotoro n te Tengaun ma Uoman
Anganano n te tamnei ibukin ana utu Rasband, ma tiaki n aron ae taekinaki.
Ron Rasband akea ana nanououa bwa e na bon karaoa ana mwakuri ni mitinare ae bwanin taina. Tii ana titiraki te ataei ae 19 ana ririki ni kaukan ana reta ibukin weteana ibukin ana mitinare bwa ia te tabo ae e na beku iai.
“Tamau e nako ni mitinare i Tiaman. “Tariu are te ikawai e nako ni mitinare i Tiaman. Buun mwaaneu n taai aika a na roko e nako ni mitinare i Tiaman,” e oki ana ururing. “I taku bwa N nang nako Tiaman.”
Ma iai tabeua ana babaire te Uea. E a tia ni weteaki Ron, nako Eastern States Mition, are e tei iai ana etekuata i New York City, USA. N rawawatana, e uota retan weteana nakon ana ruu ni matu, e katorobubua irarikin ana kainiwene, e karaoa ana tataro, e a karina naba ni kauka ana boki aika tabu, ao ni moana ana wareware:
E taku te Uea [ni booki aika tabu] bwa e mwaiti ana aomata n te tabo are a mitinare iai Iotebwa Timiti ao Sidney Rigdon, ni mwakoron te aba ao ni katobibia; ao boutokaakin baika a kainnanoi a na katauraoaki ibukin kakoroan nanon Ana mwakuri ni mwakoron aba ake i mainiku.
E taku naba bwa E a tia n anganiia te kariaiakaki bwa a na nako ni mitinare n te tabo arei ibukin kamaiuakiia aomata (taraaD&C 100:3–4; e kairaki ma katuruturuana).
N te tai ae waekoa, e kamatoa te Tamnei ae Raoiroi nakon Ron bwa weteana nako Eastern States Mition e bon aki kairua.
“I waaki nako n raraoma ni karekean te moan wirikiriki aika mwaiti ake a roko mairoun te Tamnei ae Raoiroi rinanon booki aika tabu bwa aei te tabo are e tangiria te Uea bwa e na nako iai,” e oki ana ururing. “Anne te taneiai n tamnei ibukiu inanon te maiu ae bibitaki.”
Ana mwakuri ni mitinare n Aba ake i Mainiku bon moan weteana ibuakon tabo ake e aki kantaningaia bwa e na nako iai. Ao ni katoa weteana—n tabena ae te tia reirei, bitiobi, te kauntira ae rietata, beretitenti n te mition, kaain te Itingaun, Tiniia Beretitenti n te Itingaun, ana Abotoro te Uea Iesu Kristo—Unimwaane Ronald A. Rasband e a tia ni butimwaea ana kantaninga te Uea ae reitinako ni katan iaan Tamneina ngkai e beku ibukiia natin te Atua.
Bungiaki Irouia Kaaro aika a Tamaroa
N ana moan marooro are e anga n tabena are te Abotoro ibukin Iesu Kristo, Unimwaane Rasband e kaota ana kakaitau ae nako mai kabin nanona ibukiiia ana bakatibu. “I bungiaki irouia kaaro aika a tamaroa n te euangkerio,” e taku, “ao au bakatibu a bungiaki irouia kaaro aika a tamaroa onoua te rooro rikaaki.”1
Tinana, Verda Anderson Rasband, bon te tia kairiiri ae tangiraki are e kateimatoa te roronga ae Ron n tangiran booki aika tabu. Tamana, Rulon Hawkins Rasband, bon kaain te nakoanibonga ae kakaonimnaki are e reirei rinanon ana katooto n raoiroin te mwakuri korakora.
E bungiaki ni Beberuare 6, 1951, i Salt Lake City, Utah, USA, Ronald A. (Anderson) Rasband bon tii ngaia te nati irouia ana karo are a bungia. A tia tamana ma tinana n raure mai imwaaina (imwaain ae a manga kaitibo ao ni mareaki), ao Ron e ikawairake iaan aia tararua uoman tarina ao mwanena are e ikawai.
“E anai teiteia ana karo, ngaia are ti bane n tangiria,” e taku tarina, Nancy Schindler. “E aki kariaia Ron bwa a na kaai n tei Tinana ma Tamana ke ni kaai n tekateka n akea ngaia ni mena imarenaia.”
N aron ae tabangaki Ron bon te ataeinimwaane ae tamaroa, ma e kariaia bwa iai kabwakana ni kakamangana ao akea angana.
“Riaon riki tabeua te miniti, au tia reirei n te [Buraimwari] e taetae ma tinau, te beretienti n te Buraimwari n te Titeiki, ao e taku, ‘Anne Ronnie Rasband te ataei ae uarereke ae e matoatoa kairana,’” e taku. “Ma au tia reirei n te Buraimwari a aki bwara nanoia irou. A kaota nakoiu aia tangira ae korakora ao n taainako a kaoai bwa N na oki nakon te kiraati.”2
Ataein Ron e boboto iaon te Ekaretia—boowi n te uoote, bootakin te uoote, ana katairiki n te uoote, ao tiim n takakaro n te uoote. Ngkana akea tabetabena n ana autinibootaki te Cottonwood Moan Uoote e karaoi mwakuri aika karina, e karaoi ana waaki ni kakukurei te Tikauti, ao ni kabanea ana tai ma raoraona. Ni mweengana, tain te utu e boboto iaon booki aika tabu, taian takakaro, ao mwakuri n te auti.
“E reireinai tamau aron te mwakuri man ana katooto,” e taku. “E reireinai tinau taekan te mwakuri bwa N na karaoia.”
Taman Ron e kakabuta te kaa ni kariki, e utiuti ni katoa bong man te aoa 4 n te karangaina ao n okira te mweenga n te bwakanako n tai ni katoa tairiki. E titiku tinana n te mweenga ni kaikawaiia ataei, ni kakarekemwane ibukin te utu man karaoan ao kaboonakoan taian taoree aika iai kunnikaia.
Oin ana konabwai Ron ni kairiiri, n anga te mwioko, ao ni karaoan bwaai bwa a na tia—are e na anganna te beku raoi n ana mwakuri ao ni katabeana n te aro—e rangin manena ni maiuna are mai imwaaina.
“E mwiokoaki Ron bwa e na koro uteute,” e oki ana ururing mwaanena. Ma Ron, e tangira Mark Twain Sawyer, bwa e na kona n anai nanoia raoraona bwa a na buokia.
“N na taraa tinaniku, ao e na iai raoraona ae koro uteute ibukina,” e taku Nancy. “Te wiiki are imwiina temanna riki raoraona ae e koro uteute. E tekateka n te bwaranta i moan te auti ao ni ngarengare ao ni manikangare ma ngaiia ngke a karaoa aia mwakuri.”
Ana karo Ron a kainnano ibukin aki taun aia kataumwane, ma te utu a karekea te euangkerio. “E aki bati n tau ara mwane,” e oki ana ururing Ron, “ma e aki roota kukureiu.”
Raao aika Onimakinaki ao Taan Kairiiri
N rikirakena, e kakabwaiaki Ron n karekeaia raoraona aika tamaroa ao taan kairiiri aika onimakinaki, n raonaki ma te mwaane are ngaia ana beretitenti n te titeiki 14 te ririki n nako ngke te ataeinimwaane ngaia—James E. Faust (1920–2007), are e beku imwiina riki n te Kooram n Abotoro n te Tengaun ma Uoman ao n te Moan Beretitentii. Ana utu Ron a kukurei n aia reitaki ma Beretitenti Faust ao ana utu. “E aki toki ni kakaineti nakoiu bwa ngai temanna ana ataeinimwaane ibukina e buokai ni kaikawaai,” e taku.
Akea ana tai Ron n takakaro n te reirei n te tai are e roko iai n te kauarinan ibukina bwa n taainako iai ana mwakuri, ma e karekea naba ana tai ibukiia raoraona aika kakaonimaki inanon maiuna.
“I tangira Ron n taainako n aroarona, ma e aki kororaoi,” e taku raoraona n ataei ae Kraig McCleary. Ma momoangarena, e reitia, “I tuangnga bwa ngkana e roko i karawa, N na roko naba ikekei ibukina bwa titebo baike ti karaoi ngke ti ikawairake.”
E moana ana mwakuri ni mitinare Ron ni moan 1970, ma Kraig e iangoia bwa e na karimwiia ana mwakuri ni mitinare ni karokoa mwiin tain te kamwaitoro. Anne ngke e tarebooniaki iai iroun Ron man ana tai ni mitinare.
“I aki ataia bwa e kanga ni karekea te kariaiakaki n tareboon, ma e takuai ibukin aki kan kukurei ni katauraoi ibukin au mitinare,” e taku te Tari McCleary. “E koaua, I aki taonna ni kamaanna.”
Ron e arana ana mition bwa te taneiai ae “koro tamaroana” “E kakabwaiai te Uea ma kakai aika mwaiti, taneiai n rikiraken te onimaki,” e taku. “E korakora uaan au mwakuri ni mitinare ibukin maiun tamneiu.”
E kabanea nikiran ana mwakuri ni mitinare Ron n Abamakoron Bermuda. Ana beretitenti n te mition, Harold Nephi Wilkinson, e tii kanakoia ikekei mitinare ake a kororaoi aia ongotaeka ibukina bwa e tii kona ni kawaria n te tai teuana ma teuana.
Ti rang tionako, ma e aki raraoma te beretitenti iroura,” e oki ana ururing Ron. “Ti katia ara mwakuri ni mitinare.”
Te “Ataeinaine ae Tau” mai Delta Phi
Imwiin banen ana mwakuri ni mitinre n 1972, e reke ana mwakuri Ron, e rin n te Iuniwetiri i Utah n tain te Kamwaitoro, ao e rin n te Delta Phi Kappa, te kirabu n te kuura ibukiia mitinare ake a bane aia tai. N ana waaki ni kakukurei te kurubu n te kuura, e a bon aki kona n tautaua nanona ngke e a noora naba te ataeinaine ae koro botonainena ae arana Melanie Twitchell. Melanie temanna mai ibuakoia ataeinaine ake a aranaki bwa “ataeinaine aika tau,” ake a ibuobuoki n ana waaki ni kakukurei te kurubu n te kuura.
N aron Ron, Melanie e roko man te utu ae Itiaki ni Boong Aika Kaitira ae kakaonimaki. Tamana, te aobitia n ana mwakuri n te tanganibuaka, ao tinana e aki kona ni kariaia te koaua are e mwamwainging aia utu n angiin te tai (are e riki man te kamwaing n te mwakuri n te tanganibuka.
E kukurei Melanie man ana akoi Ron, anganano, ao rabakauna n te euangkerio. “I bon taku nakoiu, ‘Bon te mwaane ae kakateke are e aki kakawaki ngkana I aki te roko ni mamarooro ma ngaia. I kan riki bwa raoraona ae tamaroa.’”
Ngke e rikirake aia reitaki, te Tamnei e kamatoa nakoina ana namakin ibukin Ron ma ana motinnano nakon te Uea. N te tai ae waekoa ao e a rikirake aia iraorao are e a aranna Melanie bwa “te reitaki n tangira ae tau”, n aroia naake iai rongorongoia ni booki ni karaki.
E taku Unimwaane Rasband bwa toana ae rang bootau ma ngaia. “E botau ma ngai Melanie n ana anganano n te euangkerio ao n rikina. Ti a riki bwa raao aika tamaroa, ao anne ngke I a tuangnga ngkana e kona ni mare ma ngai.”
A mareaki n Tebetembwa 4, 1973, n te Tembora i Salt Lake City. Man te tai anne, e taku, “raona n aki toki ae momoanibwaiia moa tabeman … e buokai ni karikai bwa ana reirei Iesu Kristo ae nakoraoi. Ana tangira ma ana boutoka, ao bwa natira aika niiman, ao tibura aika 24, aika kateimatoaai.”3
“Ti a Nako”
Inanon te tai ni beku bwa te beretitenti n te kooram n unimwaane n te uoote ibukiia ataein te reirei ake a tia ni mare, Ron e a kinaa riki Jon Huntsman Sr., te aetuwaitia ibukin te kauntira ae rietata n te uoote. E waekoa ni kukurei Jon ma aron kairan te kooram iroun Ron.
“E kakukurei ana kairiiri ao ana konabwai ni kairiiri,” e oki ana ururing Unimwaane Huntsman, are e beku bwa te Itingaun n te Aono man 1996 nakon 2011. “I taku bwa tiaki te bwai ae taneiai te aba iai bwa te ataeinimwaane are e mena n te kuura e na kona ni kaira te kooram n te aro anne.”
Ibukin tabeua namwakaina, Jon e mamatakuakina Ron ni bitii ana iango ni kamwakuri ngke e katiai ana beku n te nakoanibonga. Ngke e nang kaukaki te tabo n iokinbwai n ana kambwana Jon—are e a riki bwa te Huntsman Chemical Corporation—n ana kainiin e taku bwa iai ana konabwai Ron are e tangiriia ao e karekea ana mwakuri. Te mwakuri e waakinaki n te wiiki are imwiina i Ohio, USA.
“I tuanga Melanie, ‘N na aki katoka nanakou n te reirei ao ni waaki nako,’” e oki ana ururing Ron. “I mwakuri korakora inanon maiu ni karekea au beeba man te kuura, ao I a kan roko n tokin au kouru.”
Melanie e kauringa Ron bwa karekean te mwakuri ae raoiroi bwa anne bukina menana n te reirei.
“Tera ae ko raraomaeakinna?” e titiraki. “I ataia bwa ti na kanga ni booti ara bwai ao ni mwaing. I a kaman karaoia inanon maiu ni karokoa ngkai. I kariaia bwa ko na tareboonia tinam ni katoa tairiki. Ti a nako.”
Onimakinan Ron iroun Jon e nakoraoi. Iaan ana kairiiri Jon, e rikirake Ron n te tai ae waekoa n te kambwana ae rikirake, n riki bwa te beretitenti iai ao te mataniwi n aobitia ni kairiiri n 1986. E korakora mwamwanangau ibukin te kambwana—bon iaon USA ao i tinanikuna. N aki ongea tabetaben ana tai, e kataia Ron n okira mweengana n tain te wiikente. Ao ngkana e mwananga, e na bae ni kairiia kaain ana utu ma ngaiia.
“Ngkana e tiku n te mweenga, e karaoa are a na namakinna ataei bwa a rangin kakawaki ao n tangiraki,” e taku Melanie. E iriira aia waaki ni kakukurei taai n takakaro ngkana e riai. Jenessa MacPherson, temanna mai irouia natiia aika aman, e taku bwa ana beku tamana n te aro angiin te tai e kakatabetabea n aki rereke ana tai n tekateka irarikia ana utu n tain te taromauri.
“Ti na bae n un bwa antai ae e na tekateka irarikina n te taromauri ibukina bwa e kuri kaangaanga menana ikekei,” e taku. “I uringa katokaan baiu iaon baina ao n iango i bon irou, ‘ngkana I kona n riki n ai arona, N na tiku iaon te kawai ae eti ao ni kona n riki kanga ai aron te Tia Kamaiu.’ Bon au boto ae ninikoria.”
Natiia te mwaane te taanga aei, Christian, e oki ana ururing n “ana tai ma tamana.” A roko raoraoia ao a nako ibukin mwamwaingin aia utu n angiin te tai, e taku, “ma tamau bon raoraou ae tamaroa n taainako”—e ngae ngke temanna ae aki kan taotaonaki.
Ngkana I bwatiketibooro ma Christian, n takakaro iaon bwai n takakaro n te kairababa ma natina aine, ke n akawa ma te utu ao raoraora, e tangiria bwa e na moanna Ron.
“Inanon rikirakera, e na bon aki kariaia temanna bwa e na konaa aona,” e taku Christian. “Ti riai n tokanikai, bwa e na kanakoraoa arora. Ao waakin te katei e reitinako ma tibuna aika tangiraki.”
Rinanon ririki, ana utu Ron a aki kona n nooria bwa e kanga mwakurian te aro ni kairiiri n te Ekaretia ni karababa ana konabwai ni kaota ana tangira ao ana nanoanga, ni kaota ana namakin ibukin te Tamnei, ao n anainanoia tabeman ni karaoa aia kabanea ni konaa. Imwiin bungiakin te tibu te mwaane ae Paxton irouia Ron ao Melanie, te utu a katan iaan korakoran maiun tamnein Ron ao ana boutoka.
Paxton, e bungiaki ma aki toamaun bwain rabwatana, e kainnano ma tabeua kaangaangan marurungina are e a kataiia ana utu n te rabwata, te iango, ao n te tamnei. Unimwaane Rasband e arana te mwananga are e rimwin bungiakin Paxton bwa “kakatai ae kaangaanga ibukin reiakinan reirei aika kakawaki ibukin taai aika akea tokiia.”4
Inanon ana teniua n ririki Paxton ni maiu iaon te aba ae kimototo—ngke a rangin mwaiti titiraki ao tabeua kaekakiia—e tei Unimwaane Rasband bwa bouan te tamnei, ni kaira ana utu ni kaniia ma mwaakan ana Mwakuri ni Kamaiu Iesu Kristo.
Ma katanoataan nakoana ae boou, tabeman kaain ana utu ao raoraona a aki miimi. “Naakanne mai buakora ake a rang kinaa,” e taku Christian, “ti katei baira ni karietai ngke e kamatoaki bwa te Abotoro.”
“N na Nako ni Beku”
N 1996, n ana ririki ae 45, menan Ron bon inanon tokanikain ana mwakuri ngke e roko weteana bwa e na beku bwa te beretitenti n te mition ibukin New York New York North Mition. N aroia Abotoro ake ngkoa, e “waekoa ni kitana [ana] karaun” (Mataio 4:20).
“E anaa au tai ae uoua te teekan ni butimwaea te wewete (n riki bwa te beretitenti n te mition),” e taku Unimwaane Rasband. E taku nakon te Uea, “Ko tangiria bwa N na nako ni beku, N na nako ni beku.”
Inanon ana tai ni beku Ron e kamanena te reirei ae kakawaki are e karekea n ana tai ni mwakuri: “A kakawaki riki aomata nakon bwaai riki tabeua.”5 Ma te rabakau anne ma ana konabwai ni kairiiri ae rikirake, e tauraoi ni moana ana mwakuri ni mitinare n abanuean te Uea.
Ron ao Melanie a kunea te mwakuri ni mitinare i New York City bwa e kakaewenako ao e kakukurei. E waekoa Ron n anga te mwioko nakoia mitinare—n anaakin nanoia bwa a na kakaonimaki, ao aia angareirei, ni kakorakorakiia, ao ni kaungakiia inanon te waaki.
N 2000, waniua te namwakaina ae kimototo imwiin banen aia mwakuri ni mitinare Ron ao Melanie, Ron e weteaki nakon te Itingaun, ike ana katauraoi, ana taneiai, ao ana tarena aika bati a kakabwaia te Ekaretia. Ngkai kaain te Itingaun, e beku bwa te kauntira n te Beretitentii n Aono n te Europe Central, ni buoka n tararua te mwakuri n 39 te aba. E ngae ngke e kitana te kuura riaon 40 te ririki n nako, e teimatoa n riki bwa ataein te reirei, ni butimwaean ana kairiiri ana Mataniwii ae mwatai riki nakoina ngkana e tararua te North America West, Northwest, ao teniua Aonon Utah; e beku bwa te Tarekita ni Kakoroi Moti ibukin Tararuan te Tembora; ao ni beku n te Beretitentii ibukin te Itingaun, ni mwakuri ni kaan riki ma kaain te Tengaun ma Uoman.
N te tai ae nako, e taekinna Unimwaane Rasband, “Bon te karineaki nakoiu n riki ni mangori ibuakoia te Tengaun ma Uoman ao n reiakinaki mairouia n anga nako ao ni bwaai nako.”6
“Baike A Atai, I Atai”
Angamaing ieta: tamnei iroun Wendy Keeler; angatai: Taan tataekina te Moomon, Moan Mitinare i Denmark, iroun Arnold Friberg (e boboto iaon te banna n tamnei iroun Christen Dalsgaard, 1856); Dan Jones Awakens Wales, iroun Clark Kelley Price
Uoua banna n tamnei ake a tine iaon oon ana aobiti Unimwaane Rasband. Temanna te mitinare n te Moomon n reireina te utu i Denmark n 1850. Te kauoman bon te mitinare n taai ake ngkoa Dan Jones n taetaekina te euangkerio ietan te mwaniba i Aban Buritan. Taian banna n tamnei (ieta n te angatai) e kauringa Unimwaane Rasband ibukin ana bakatibu.
“Aikai bwaeoniia ake ngkoa a anga aia bwai ni kabane nakon ana euangkerio Iesu Kristo ao ni katauraoa aia onimaki ibukin kanoaia ake imwiina,” e kaotia ae koaua7 Te bwai are e kaumakiia iai ana bakatibu Unimwaane Rasband bwa a na waaki nako ribuakaon te kaangaanga ao te bwanikirinaki are bon anne are e katauaki iai ibukin weteana ae boou: ao te rabakau ao te kakoaua ae matoa ibukin te Uea ao Ana mwakuri.
“E mwaiti te bwai ae N na reiakinna ni weteau ae boou,” e taekinna. “I namakina te nanorinano n taekan anne. Ma iai taraakin weteau ae I kona ni karaoia. I kona ni kaota koauan aran Kristo n te aonaaba ni kabane’ (taraa D&C 107:23). E maiu!”8
N riki bwa kanoaia moomon bwaeoniia, e reitia: “Baike a namakin, I namakin. “Baike A Atai, I Atai”9
Ao are a kantaningaia ibukiia kanoaia e kaotaki ni maiuna, ana angareirei, ao ana mwakuri n ibuobuoki Unimwaane Ronald A. Rasband, are e iriiri aia katooto ao ni karinei aia onimaki ngkai e waaki nako bwa temanna te tia kakoaua ae onoti ibukin te Uea.