Kinaakin Ana Kamwane Tatan
Te tia korokaraki e maeka i Utah, USA.
Ngkana ti kaitara ma te tamnei ni babakanikawai, ana Boki Moomon e kona ni buokiira n ataia bwa tera ae e koaua ao tera ae aki.
I karinii uobaa te teuana n taara n Amerika inanon au bwauti ni mwane n te titoa ngke e a teke matau n are tebaana. I taku bwa karan are e kiriin e maii riki nakon ake tabeua, ngaia are I a karaua n taraia raoi. Ngkanne I a nooria bwa tamnein Beretitenti George Washington e aki rang n tane raoi. Tauan te beebwa naba e kaokoro. Bon te katoto ni kewe! Te tia mwane e kaibibitia ma te teuana n tara are mwanenaki ao imwiina e nikira te mwane ni kewe nakon te manatia n te titoa.
I a iangoa taekan te mwane ni babakanikawai man te tai aei. I titiraki bwa ai maanra raraiina ao ai mwaitira aomata aika a tia ni keweaki inanon ririki. Tao, ngke arona bwa I aki rang n taraiaraoi, N na kona n tia ni mwane naba. Ma man kabotauana ma are e bon koaua ao noorakin te kaokoro n aki boraoi, I a kona ni kina bwa e kewe.
Ana Boki Moomon e kaonaki ma banna ni katooto n tamnei ni kewe, ake a irii ana kawai Tatan ni kewe ao ni kamwaneia tabeman ni karekei rakaia iai. Man kamatebwaian aia kamwane aika a mwaiti kurikuri, ti moanna n nora tibanakoia ao kairuaia n aron naba te kawai are e kataneiaaki maata n noori kaokoro imarenan te mwane raoi ao ae babakanikawai. Korakoran kataneiaan matara ni kina te kaokoro, bon tauraoira riki ni kinai bwaai aika kewe ni boong aikai ao n aki butimwaea keweia.
Karikorikoan Wanawanan Tatan ni bwaai aika Kewe
Tatan e ukoukora angana ni kairiira nako rinanon aekakin ana babakanikawai n tamnei ni kewe, ao ngkana ti aki taratara raoi, ti na keweaki. E kauring Beretitenti Joseph F. Smith (1838–1918): “Tatan bon te tia katoto ae bane arona, ao ni koauan te euangkerio are e anganaki te aonaaba ae e ririkirake rakanakona, ngaia naba e kabunii mwaane ni babakanikawai n te reirei ni kewe. Taratara raoi n ana mwane ni babakanikawai, akea te bwai ae e na kabooa ibukim ma tii te un ao te mate n tamnei.”1
Te kabanea n tamaroa ni katantan nakoira man ana babakanikawai Tatan ni kewe bon taneiaira ni kinai kaoauan te euangkerio. Ataakin riki ae nano n te koaua, beebeten kinaakin te kaokoro ngkana e anganiira Taatan man ana koaua aika kewe. Ngaia are ngkana e karaoa anne, ti riai n tarai kaokoro ao tiaki te kabootau, n aron are I karaoia ma au mwane aika taara, ibukina bwa ikekei are n tainako e na oti iai taian kewe.
Beretitenti Ezra Taft Benson (1899–1994) e anga reirei: “Ana Boki Moomon e kaotiia ana kairiribai Kristo. … Te Atua, n ana atatai mai imwaina ae akea tokina, e karaoa raoi ana Boki Moomon n te aro are e na kona n noora te kairua ao n ata aron kaitaraan reirei ni kewe, n tautaeka, aro, iango ni wanawana n ara tai.”2
N te bong aei ao ti buaka ma Tatan. Ngaira, aroia tanga ni buaka nako, ti riai n ataia tera ae baireia ara kairiribai. N ataia bwa nningai ao ia te tabo are a na buaka iai ara kairiribai, te katotoo, e kona n riki bwa te rongorongo ae moan te kakaawaki. Anne ngkanne bukin te taeka ae ibukin karekean rongorongo akanne e aranaki bwa “karikorikoan taian wanawana.” N ataakiia ara kairiribai bon kabanean riki arora nakoia ara kairiribai. Ana Boki Moomon e kona ni buokiira “n atatai” iaon ana kawai ni kamwane Tatan.
Taetae ni Kababa bon taian Kewe
Eng riaon iteran taian kewe n ana Boki Moomon a kabonganai kababa ao anainano ni kakoroa nanon aia kouru. Te katooto, Tierem “Iai te rabakau irouna, ao e ataa aron aia taetae te botanaomata; mangaia ae e kona ni kabongana te kababa, ma korakoran te kabwarabwara, ni mwaakan te riaboro” (Iakobwa 7:4). Ana ibonga te Uea Noa e taetae “ni kababa nakoia” (Motiaea 11:7), are e karikiia aomata bwa a na kabaeaki n taromauriia anti ao mwakuri aika a buakaka riki tabeua. Korioa e karekea naba aio n ana bong, “e kairanako nanoia aika a mwaiti” (Aramwa 30:18). Amarikaia ao Korianton a uaia ni kairanako nanoia aika a mwaiti bwa a na karaoa ae buakaka (tara Aramwa 46:10; Ereman 2:4).
Aio e aki manennanti. Kababa akea nanona, aki karinerine, akea koauana, ao e betanaki. Nibwaai e kauringiia naakekei “Eng, ao a mwaiti akana a na reirei n te aro aio, tuua aika a kewe man aki bongana ao ni burababa, ao a na onrake n te kamoamoa, ao a na kakorakoraia ni karabai mairoun te Uea aia taeka; ao aia mwakuri bon bwain te roo” (2 Nibwaai 28:9).
Kababa n tabetai e kamwane; n tabetai iai iango aika karaba ke baire aika karabaaki. Kababa kaanga aron taekinan te bwai teuana nakon are bon taekana, ao e katikitiki nakon ana kamoamoa te aro n aomata. Ana burabeti te Uea, e tuangiira bebetena ma riki kakawakin koaua ake ti riai n ongo.
Kababa bon taetaen Tatan. Beretitenti James E. Faust (1920–2007), Kauoman ni Kauntira n te Moan Beretitentii, e kabwarabwara: Ana kariirii [Tatan] e taraa n iai bukina ao ana rongorongo a rang kakai ataaki. E rang anainano, ma bwanaana ae tangiraoi. E aki matoa, ke n tang buaka. Akea temanna ae e na ongo ni bwanaan Tatan ngkana e matoa ke e iowawa.”3
Ngkana e kaotii nakoira te aonaaba, iango, rabakau, ke iango ake a na taraa ni kamwaita ara namakin n te kainikatonga ke te kamoamoa ke tangiraoin koauana, a na riki bwa kauring nakoira. Iangoia bwa iango akanne bon iango ni babakanikawai. Kabotaua ma koaua ake a reirei iaona ana burabeti te Uea. Tarai kaokoroia; tiaki boraoia; ao te iango ni babakanikawai e na ota raoi.
Neooa—Te tia babakanikawai ae kinaaki
Neooa e kabongana ana kawai Tatan n te kababa. Ti na taraia raoi ni kamatebwaia babakanikawaina n tamnei. Neooa, are ana reirei e taraa ni mwanea te iango ni kamaiuaki, e a tatangiraki irouia aomata ao te tia kabwarabwara ae anainano ibuakoia Nibwaite. Neooa e a katikiia aomata aika mwaiti man ana reirei are “a na kamaiuaki aomata ni kabane n te kabanea ni bong” ao ni karekea te maiu are akea tokina” (Aramwa 1:4).
Ti kona n noria bwa bukin tera e rang anainano? E reirei naba bwa te Atua akea ana kanganga ao e kariaia bwaai bwa a na riki—te Atua are, ibukina bwa e tangiriia aomata nikabane, e na kamaiuiia n aki tabe ma tera. E reirei bwa ko kona ni karaoa are ko tangiria, ibukina bwa titebo bwaai ni kabane bwa a raraoi. Bon te koaua ae a kataua reiakinan bwaai n te aro ae a mwaiti ae a kakoauai aomata n ana bong Neooa (taraa Aramwa 1:5) n aroia naba ni bong aikai. Te inaomata n rin i karawa bon te bwai ae a tangiria aomata.
Ao tera te kanganga n ana rongorongo Neooa? Ti na tarai iango aika kabotoaki riki n ana kauntaeka:
-
Te Atua e karikiia aomata ni kabane—e koaua.
-
Te Atua e tangiriia aomata ni kabane—e koaua.
-
Ti riai n aki maaka te Atua—e koaua.
-
Ti riai ni kakatonga n te kamaiuaki—e koaua.
Taraana, a rang mwaiti bwaai aika bootau are e reirei iai Neooa ma koauan te euangkerio. Ma uringnga—n aron te mwane ni babakanikawai, ti riai n tarai kakaokoro, ti aki bootauna. Ngaia are ti na taraa ana kabanea n iango Neooa:
-
Te Atua e na anganiia aomata ni kabane te maiu are akea tokina—e kairua!
Aikai kaokoro aika kakaawaki are e taekinna Neooa n te maiu n tamnei ae kewe. Kamaiuaki man te mate n rabwata e beritanaki nakoia ni kabane, ma te kamaiuaki man te mate n tamnei e nakon nanora ni kan rairi nanora. Ngkana ti rairi nanora, ngkanne ti kona ni karekea te maiu are akea tokina (taraa Iakobwa 6:11). Akea ae e anganaki te maiu ae akea tokina ae akea boona.
Kiteoon ao Aramwa a Kina te Tia Babakanikawai
E oti buakakan Neooa ngke e kaitibo ma Kiteon, te tia reirei ae raoiroi n ana Ekaretia te Atua. Kiteon e tia n tei ibukin te Uea Noa ririki ake mai imwaina ao e kakeweaki n te maiu n tamnei (taraa Motiaea 19:4–8). Neooa “e waaki ni kauntaeka ma ngaia n te aro ae matoatoa, ma ni kataia ni kairiia nako kain ana ekaretia; ma [Kiteon] e tei ni kaitaraa, ni kaetia man ana taeka te Atua” (Aramwa 1:7). Kiteoon e kina Neooa bwa te tia Babakanikawai. Ngke e kaotaki, Neooa e manga kabongana ana kawai teuana Tatan—tiritiri. Ma e aki matebuaka maten Kiteoon. Aomata a uota te tia kewe Neooa nako matan Aramwa bwa e na motikaki taekana.
Aramwa e ataia bwa e aki tii bure Neooa ni kewe n te nakoanibonga ao n tiritiri ma ngkana e kairoroaki nakon te nakoanibonga ae kewe ibuakoia aomata “e na bon riki bwa kamaunakiia ni kabane” (Aramwa 1:12). Ao Neooa e motikaki taekana bwa e na tiringaki, ao e rinanon “te mate ae kamama” (Aramwa 1:15).
Kiteon ao Aramwa bon banna ni katoto nakoira. Ngkana iai iroura te Tamnei, ti na noori ao n ongo “ni kamatataaki bwaai aikai nakoira” (Iakobwa 4:13). Ti na kinai ana baire Tatan ao ana kainibaire aika kewe “ma te ataibwai ae kororaoi, n ai aekan te ngaina ma n te bong” (Moronai 7:15).
Ara kairiribai “babakanikawai” e niniwana, ma n aron Kiteon ao Aramwa, ma ti kona n niniwana riki. N aron are I a tabe ni kina te kaokoro imarenan au teuana n taara aika uouaa, ti kona n tabe ni kataneiai matara naba ao ara iango ao tamneira ni kina te kaokoro imarenan te koaua ao te kewe. Ngkai ti karaoa anne, ti na kinaia taan babakanikawai ao n totokoi aia kewe.