Motinnanoia ni Katokia
Te tia korokaraki e maeka i New York, USA.
Rabakauu n te biano e aki rikirake, riki imwiin tabeua te ririki ni kataneiai. Au karo a tuangai bwa I kona n toki iaon teuana te iango are tii ngkana: Ia tia n reiakin 50 taian n anene.
I rinnako inanon au auti ma te un n nano, matau a onrake n rannimata riki imwiin te reirei iaon te biano. Ai bon au kaua n ririki n reirei te biano, ao I tii kona ni katanga kunaia ataei “Rube, Rube, Te Itoi.” Au tia reirei e a tia ni kataia ni kakaai bwaai aika tamaroa ae e na taekinna ibukin tangibuakan au katangitang, ma are I namakinna e a buakaka riki. Au karo a kabooa reireiu ni katang biano are I aki tangiria ao akea au kantaninga ibukina.
I tangiriia au karo bwa a na kariaia bwa N na toki ma iai. “Taiaoka,” I bubuti. “N na karaoi bwaai ni kabane. N na kanga ni bita ami iango?”
Imwiin maroroakinana imarenaia, a taku, “Ngkana ko kona n reiakin 50 taian anene, ti na kona ni kariaia bwa ko na toki.”
I waaki n te tai ae waekoa. I rang n tangiria n toki n te aro are I kabanea au tai ae mwaiti iaon te biano. Te moan anene, “Ti Karabwako, te Atua, ibukin am Burabeti” (Anene, nambwa 19), e kuri n reke te namwakaina katangana ae tangiraoi. I teimatoa ni kataia n toki, ngaia are I reitinako ni kataneiai.
Te bwai ae e kamimi bwa: taian anene e a moanna ni beebete reiakinana. I a rang kukurei inanon te wiiki anne. I a kunea bwa I kaina wiiu n anene ao n te ngaina ao i anene n takarua n tain te bootaki n toa.
N tokina, I a toki ni warewareki mwaitin kuuna ake I atai. Ngkai Ia rang mwaatai iaon te biano, I a taia bwa I kona n reiakina te anene ni kanakoraoia ae boou kee iaan 30 te miniti.
N tokina ngke I a ikotii ni kabane, I nooria bwa e a riaoon 50 taian anene. Ao akea riki te kawaiae N na katoka iai katangan te biano. I a rang mweengaraoi riki n au kona ni katangitang ao I a tia n namakina mwaakan te anene inanon maiu.
Anene n taromauri kaanga ai aron koroboki aika a tabu; a taekina te koaua. Ngkana I katanga te kuna, I namakinna bwa kaanga I tebonako inanon booki aika a tabu. Reiakinan katangan anene e a tia ni buokai ni karekea au koaua ao n reiakina te koaua. I kunea bwa I rinanon taeka aika kakaokoro n taekan taian anene ake a buokai rinanon au bong. Katangan te biano e a tia ni kakorakora au koaua ao e karekei tibwangau n tabo nako ake I nako iai.