Kasem Ol Spesel Janis we Yu Gat long Laef
Lanem olsem wanem ol odinens blong prishud mo ol kavenan promes i save mekem se paoa blong God i kam insaed long laef blong yufala.
I no longtaem i pas, hasban blong mi, Greg, i kasem wan sik we i nidim wan bigfala operesen mo sam manis blong tritmen. Olsem plante long yufala we i bin fesem wan semmak situesen, kwiktaem mitufala i stat blong prea from help long heven mo paoa blong God. Wan Sandei afta long operesen blong Greg, oli kam pasem sakramen long hospital rum we mitufala i stap long hem.
Tetaem ia, miwan nomo mi stap tekem sakramen. Wan pis blong bred. Wan kap blong wota. Long jos, oltaem maen blong mi i stap lukluk nomo long sistem blong sakramen—blong stap mekem rere, blesem mo pasem. Be long aftenun ia, mi tingting hevi long presen ia blong paoa blong God we i gat i stap blong mi, tru long tabu odinens hemwan, mo kavenan promes we mi stap mekem taem mi tekem pis blong bred mo kap wota. Hemia i bin wan taem we mi nidim paoa we i kam long heven. Long medel blong hat we i brok, taet, mo tingting we i fasfas, mi tingting long presen ia we i save karem mi kam kolosap long paoa blong Hem we mi nidim tumas. Blong stap tekem sakramen, bae i save mekem Spirit blong Lod i stap oltaem wetem mi, i letem mi blong kam kolosap long presen ia we i paoa blong God, wetem ol enjel blong givhan mo paoa blong Sevya blong save go tru laef.
Mi no ting se bifo mi bin luksave hamas i klia se, i no olgeta nomo we oli stap mekem odinens ia, i impoten—wanem we odinens mo kavenan promes blong yumi we i go wetem i givim, i wanem we mi nid blong lukluk long hem tu. Ol prishud odinens mo ol kavenan promes, i letem God blong mekem yumi kam tabu mo afta, i mekem ol naesfala samting long laef blong yumi i hapen. ?Be olsem wanem nao hemia i hapen?
Faswan, blong wan odinens i soemaot paoa blong God long laef blong yumi, i mas hapen tru long atoriti blong Pikinini blong God. Sistem ia, i impoten. Papa i givim responsabiliti long Jisas Kraes wetem ol ki mo atoriti blong luk olsem wanem ol prishud odinens i stap tekem ples. Anda long daereksen blong Hem, wetem prishud oda blong Hem, oli odenem ol pikinini boe blong God blong stanap long ples blong Pikinini blong God.
Nambatu, yumi no mekem ol kavenan promes nomo—yumi mas kipim olgeta. Long plante odinens blong gospel, yumi mekem ol tabu kavenan wetem God; Hem i promes blong blesem yumi taem yumi kipim ol kavenan ia. ?Yumi stap luksave se, tekpat tugeta long ol prishud odinens wetem kipim ol kavenan promes we yumi mekem, i letem yumi kasem paoa blong God?
Long aftenun ia, mi stap tingting sapos mi, wan kavenan pikinini gel blong God, i andastanem fulwan, olsem wanem blong kasem presen ia we i paoa blong God, tru ol prishud odinens mo sapos i tru se mi luksave, olsem wanem paoa blong God i wok long mi.
Long 2019 wan invitesen blong profet i bin go long ol woman blong Jos, i stap tijim yumi olsem wanem blong kasem paoa blong Sevya long laef blong yumi. Presiden Russell M. Nelson i invaetem yumi blong stadi Doktrin mo Ol Kavenan 25, wan revelesen we i kam long Ema Smit long Hamoni, Pensilvania. Blong akseptem invitesen ia, i bin jenisim laef blong mi.
Las manis mi gat wan janis blong visitim Hamoni we mi no bin tingting long hem. Long ples ia, andanit long ol mapol tri, prishud i kambak bakegen long Josef Smit mo Oliva Kaodri. Kolosap long ol tri ia i doa long fored blong hom blong Josef mo Ema. Oposit long ples blong faea i gat wan windo. Mi stanap long windo ia mo stap tingting se wanem nao Ema i stap tingting long hem taem hem i lukluk i go long ol tri ia.
Long Julae 1830, Ema i gat 26 yia; hem i yang tumas. Taem ia hem i mared blong tri mo haf yia finis. Hem i bin lusum wan bebi boe—faswan blong hem. Smol gref blong hem i stap kolosap long hom blong hem. Taem mi stanap mo lukluk tru long windo ia, i no had blong pikjarem wanem ol filing we maet i bin fulumap tingting blong hem. I tru, hem i bin wari abaot faenens blong olgeta, abaot ol faet we oli stap kam antap we i mekem oli no sef, mo abaot fiuja blong olgeta. Be yet, wok blong God i gohed blong gro raon long hem. ?Hem i tingting tu abaot ples blong hem long plan ia, stamba tingting blong hem long kingdom blong God, mo wanem hem i save mekem long ae blong God?
Mi ting se, hem i mas gat tingting ia.
Narasaed nomo long rod kolosap long haos, presen blong prishud atoriti blong God mo ol ki i bin kam bakegen long wol. Hemia stret taem we Ema i nidim tumas paoa blong heven. Long medel blong hat we i brok, taet, mo tingting we i fasfas, mi pikjarem Ema we i stap tingbaot presen blong prishud blong God, we i save kasem paoa long Hem we Ema i nidim tumas.
Be Ema i no stap lukluk tru nomo long windo ia mo stap tingting.
Taem we oli stap tijim Profet Josef abaot ol ki, ol ofis, mo ol odinens, mo olsem wanem blong help long seves blong prishud, Lod Hemwan, tru long profet blong Hem, i givim wan revelesen long Ema. I no olsem Ema we i Rilif Sosaeti presiden blong Nauvu—revelesen ia i kam long Ema ia we i gat 26 yia long Hamoni. Tru revelesen ia, Ema bae i lanem abaot, kam tabu insaed mo kavenan koneksen we bae i mekem i kam antap paoa blong ol odinens blong prishud blong i wok long laef blong hem.
Faswan, Lod i rimaenem Ema abaot ples blong hem insaed long plan blong Hem, we i tekem tu, huia hem mo hem blong huia—wan gel insaed long kingdom blong Hem. Lod i invaetem hem blong “wokbaot long ol rod blong klin fasin,” wan rod we i tekem tu, ol odinens ia we bae i save kasem paoa long God sapos Ema i hang strong long ol kavenan blong hem.
Nambatu, long taem we hem i stap harem nogud bigwan, Lod i givim stamba tingting long hem. Ema i no bin stap nomo long taem blong Restoresen; be oli nidim hem blong tekpat long wok we i stap tekem ples. Bae oli setem apat hem “blong eksplenem ol skripja, mo blong askem strong long jos folem spirit.” Bae taem blong hem i “blong stap raet, mo blong lanem plante samting.” Ema i kasem wan tabu wok blong help mekem rere Ol Sent blong wosip; ol singsing blong olgeta i go long Lod, bae i olsem ol prea mo “i ansa wetem wan blesing long hed blong [olgeta].”
Laswan, Lod i givim wan fasin blong yumi kam tabu insaed we bae i mekem Ema i rere from fasin blong kam olsem wan god. “Mo sapos yu no mekem hemia,” Lod i talem long hem, “ples ia we mi stap long hem, bambae yu no save kam long hem.”
Spos yumi ridim gud seksen seksen 25 bae yumi luk se wan impoten samting i stap tekem ples. Ema bae i gro olsem wan pikinini gel insaed long kingdom i kam “woman we Lod i jusum” mo kam kwin. Ol odinens blong Aronik mo Melkesedek Prishud i joen wetem fasin blong hem blong kipim ol kavenan promes, we bae i mekem hem i gat moa kampani blong Spirit mo ol enjel, mo givim hem paoa blong laef wetem help we i kam antap. Tru long tabu paoa blong God, Hem i save hilim hat blong Ema, givim hem moa paoa, mo jenisim hem i kam huia God i bin save we bae hem i kam olsem. Mo tru long ol odinens blong Melkesedek Prishud, “paoa olsem hemia blong God, [bae God i save] soemaot” long laef blong hem mo Lod bae i openem vel, blong hem i save kasem andastaning long Hem. Hemia i olsem wanem paoa blong God i wok long yumi.
Presiden Russell M. Nelson i tijim:
“Evri samting we i bin hapen long Hamoni, i gat bigfala dip mining blong laef blong yufala ol sista. Kambak blong prishud ia, wetem kaonsel blong Lod long Ema, i save soem rod mo blesem wanwan long yufala.
Blong kasem paoa blong God long laef i nidim ol semmak samting we Lod i tijim long Ema mo wanwan long [yumi] blong mekem.”
I gat ol impoten samting we oli stap hapen long tugeta saed blong windo long Hamoni, wetem revelesen we i kam long woman we Lod i jusum—wan revelesen we i save givim paoa, leftemap tingting mo tijim Ema Smit, pikinini gel blong God.
Taem we oli givim wan nem mo wan blesing long apugel blong mitufala Isabelle, papa blong hem i blesem hem blong gat wan save abaot prishud; we bae i gohed blong gro long mo lanem abaot blesing we save ia bae i givim long laef blong hem; mo we fet blong hem long prishud bae i gro taem hem i gohed blong gro blong andastanem.
I no oltaem we wan smol gel i kasem blesing blong andastanem prishud mo blong lanem olsem wanem ol odinens mo ol kavenan promes ia, bae i helpem hem blong kasem paoa blong God. Be, mi tingbaot Ema mo stap tingting miwan se, ?From wanem bae i no save olsem? Smol pikinini gel ia i gat paoa blong kam wan we Lod i jusum insaed long kingdom blong Hem mo long en, kam wan kwin. Tru ol odinens blong prishud blong Hem mo blong kipim ol kavenan promes blong hem, bae paoa blong God i wok insaed long laef blong hem blong helpem hem blong winim wanem we laef i givim mo kam woman we God i save we hem i save kam olsem. Samting ia nao mi wantem wanwan gel insaed long kingdom blong andastanem.
“Kasem Ol Spesel Janis we Yu Gat long Laef.”
Lanem olsem wanem ol odinens blong prishud mo ol kavenan promes bae oli save mekem se paoa blong God bae i go insaed long laef blong yufala,mo stap wok long yufala mo tru long yufala, mo givim paoa mo mekem yufala rere blong kasem ful stamba tingting mo hamas we yufala save mekem.
Stadi gud mo tingting hevi long ol odinens blong Aronik mo Melkesedek Prishud, ol kavenan promes, we yumi mekem wetem wanwan long odinens ia, mo paoa blong God we yumi kasem tru ol odinens ia.
Tingbaot, se i no olgeta nomo we oli stap mekem odinens ia oli impoten; be wanem we odinens mo kavenan promes ia blong yu i givim, i wanem we yu nid blong lukluk long hem tu.
Blong stap tekem bred mo wota i wan rimaenda blong evri wik abaot paoa blong Hem we i stap wok long yu blong helpem yu blong win. Blong stap werem gamen blong tabu prishud, i wan evri dei rimaenda long presen blong paoa blong Hem we i stap wok long yu blong helpem yu kam olsem.
Yumi evriwan i save kasem presen ia we i paoa blong God.
Evri taem we yumi tekem sakramen.
Evri taem yumi wokbaot pasem doa blong wan tempol.
Hemia ol impoten samting blong mi long Sabat. Hemia i from wanem mi lukaot gud long tempol rekomen blong mi.
“Insaed long ol odinens blong hem, i gat paoa we i olsem hemia blong God, i kamaot.”
From presen ia, mi talemaot witnes abaot hemia, long nem blong Jisas Kraes, amen.