Ol Boe mo Gel blong God
Yumi bilivim tru se, yumi evriwan i ol stret pikinini blong God, mo from hemia, yumi gat paoa blong save kam olsem Hem.
Tedei mi wantem blong tokbaot wan long ol gospel trutok we God i bin rivilim we i givim bigfala glad, glori mo paoa. Long semmak taem, hem i wan we oli kritisaesem yumi from. Wan eksperiens we mi bin gat sam yia i pas, i bin mekem mi kam blong luksave moa dip gospel trutok ia.
Olsem wan we i ripresentem Jos, wan taem oli bin invaetem mi i go long wan konfrens blong relijin, long ples ia oli anaonsem se, long taem ia i go, bae oli akseptem nomo ol baptaes we ol nara jos oli mekem, sapos oli mekem odinens ia wetem wota mo tru long nem blong Papa, blong Pikinini mo blong Tabu Spirit. Biaen, oli eksplenem se, polisi ia i no aplae long ol baptaes we oli mekem insaed long Jos Ia blong Jisas Kraes blong Ol Lata-dei Sent.
Afta long konfrens ia, mi traem blong andastanem moa dip ol risen blong tingting ia wetem lida we i responsibol long anaonsmen ia. Mitufala i bin gat wan gudfala storian we i gat mining.
Long sot toktok, hem i eksplenem long mi se, tingting ia, stamba tingting blong hem i go wetem ol wanwan bilif blong yumi abaot Godhed, from se, ol nara Kristin Jos, oltaem oli tokbaot olsem Triniti . Mi talem tangkyu long hem blong tekem taem blong eksplenem long mi ol bilif mo ol polisi blong jos blong hem. Long en blong storian blong mitufala, mitufala i hag mo talem tata.
Taem mi stap tingting long storian blong mitufala, wanem we lida ia i talem abaot Lata-dei Sent, se yumi no andastanem wanem hem i singaotem “ol sikret blong Triniti,” i bin stap long maen blong mi. ?Wanem nao hem i minim? Yes, hemia i go wetem andastaning blong yumi abaot fasin blong God. Yumi biliv se God, Papa “Man we oli leftemap” wetem “wan bodi blong mit mo bun [mo i gat glori], we oli save tajem, semmak olsem hemia blong man [mo] Pikinini blong Hem tu.” From hemia, evri taem yumi tokbaot fasin blong God, long sam wei o nara wei, yumi tu, yumi stap tokbaot fasin blong yumiwan.
Mo hemia i tru, i no from we oli mekem yumi folem “pikja blong [Hem], tekem fasin blong [Hem],” be tu, olsem we Man we i raetem Ol Sam i rekodem, God i talem, “Yufala i god, yufala evriwan i pikinini blong mi.” Long yumi, hemia i wan nambawan doktrin we naoia yumi save luksave, stat long taem blong Restoresen. Blong mekem i sot, hemia nao i wanem ol misinari blong yumi oli tijim long fas lesen, fas paragraf, fas laen se: “God i Papa blong Yumi long Heven mo yumi ol pikinini blong Hem.”
Naoia, maet yu save talem se, “Be plante pipol oli biliv se yumi ol pikinini blong God. Yes, hemia i tru, be andastaning blong olgeta i save defren smol long dip mining blong hem we yumi stap talemaot. Blong ol Lata-dei Sent, tijing ia i no wan saen. Be, yumi bilivim tru se yumi evriwan, i ol stret pikinini blong God. Hem i “Papa blong ol spirit blong [yumi],” mo from hemia, i posibol blong kam olsem Hem, we sam oli no bilivim hemia.
Naoia i bin ova 200 yia, taem we Fas Visen i openem ol doa blong Restoresen. Long tetaem ia, yangfala Josef Smit i lukaotem daereksen we i kam long heven blong save wanem jos blong joenem. Tru long revelesen we hem i kasem long dei ia, mo ol nara revelesen we i kam long hem, Profet Josef i kasem save abaot fasin blong God mo rilesensip blong yumi wetem Hem olsem ol pikinini blong Hem.
From hemia, yumi lanem moa klia se Papa blong yumi long Heven i bin tijim ol naesfala doktrin ia, stret long stat. Letem mi kwotem tu stori aot long ol skripja blong tokbaot moa klia doktrin ia.
Maet yu tingbaot instraksen blong God long Moses, we oli raetemdaon long Perel we I Gat Bigfala Praes.
Yumi ridim se “God i bin toktok long Moses, i talem: Luk, mi mi Lod God we I Gat Olgeta Paoa, mo I No Gat En, i nem blong mi.” Long nara toktok, Moses, Yu no save trikim mi, from mi save huia mi. Afta, Hem i Hi ademap, “Mo luk, yu yu boe blong mi”. Biaen hem i talem, “Mo mi gat wan wok blong yu, Moses, boe blong mi; mo yu yu ripresentem Wan Stret Pikinini blong Mi ia Nomo.” Afta, long en, Hem i endem wetem, “Mo naoia, luk, wan samting ia nomo mi soemaot long yu, Moses, boe blong mi.”
I luk olsem se God i tingting strong blong tijim Moses wan lesen: “Yu, yu pikinini blong mi,” we i ripitim tri taem. Hem i no save talem nem blong Moses nomo olsem ia, be stret afta Hem i ademap se hem i pikinini boe blong Hem.
Be, afta we Moses i stap hemwan, hem i kam slak from se hem i nomo stap long ples we God i stap long hem. Taem ia nao Setan i kam blong temtem hem. ?Yu save luk wan paten long ples ia? Fas samting we hem i talem i we, “Moses, pikinini blong man, yu wosipim mi.”
Long situesen ia, rikwes ia blong Setan we i askem Moses blong wosipim hem, i bin wan samting blong pulumaot tingting blong hem nomo. Wan impoten samting abaot temtesen blong Moses long tetaem ia we hem i kam slak, i blong mekem hem i konfius mo bilivim se hem i wan “pikinini blong man nomo,” be i no wan pikinini blong God.
“Mo i bin hapen se Moses i bin lukluk Setan mo i bin talem: ?Huia yu? From luk, mi mi wan pikinini blong God, we mi ripresentem Wan Stret Pikinini Ia Nomo blong hem.” Laki nomo se, Moses i no konfius mo i no letem Setan i pulum tingting blong hem. Hem i bin lanem lesen se huia hem tru.
Nara stori i stap long Matiu 4. Ol man we oli stadi gud, oli putum taetol blong hemia se “trifala temtesen blong Jisas”, olsem se Setan i temtem Lod tri taem nomo, we i tru se, hemia i no tru.
Plante pipol oli bin yusum plante handred ink blong pen blong eksplenem mining mo risen blong ol temtesen ia. Olsem we yumi save, japta i stat blong eksplenem se Jisas i bin go long draeples, “nao Jisas i livim kakae, blong i prea, mo i no kakae gogo kasem foti dei mo foti naet, mo biaen hem i hanggri tumas.”
Fas temtesen blong Setan i blong testem Lod nomo long ol nid blong Hem long saed blong bodi. Hem i jalenjem Lod mo talem, “Yu talem long ol ston ya blong oli kam bred.
Nambatu trik, maet i blong temtem God: “Yu jam i godaon long graon, from we Baebol i tokbaot God, i talem se, ‘Hem bambae i talem long ol enjel blong hem, blong oli stap lukaot long yu.”
Laswan, nambatri temtesen blong Setan i abaot ol samting mo glori blong wol. Afta we Jisas i luk “olgeta kantri long wol ya, … [Setan] i talem long hem, Sipos yu bodaon long mi, yu mekem wosip long mi, bambae mi mi givim olgeta samting ya i go long yu.”
Wanem i tru i we, las temtesen blong Setan ia i no blong mekem Jisas Kraes i kros be, i moa blong temtem Hem blong kwestinim Hem abaot tabu fasin blong Hem. Blong tu taem, ol trik ia i blong jalenjem Jisas abaot tabu fasin blong Hem se: “Sipos yu yu Pikinini blong God”—sapos yu bilivim se i tru, yu mekem olsem.
Plis luklukgud wanem we i hapen kwiktaem bifo Jisas i go long draeples blong livim kakae mo prea: yumi luk long stori we Kraes i baptaes. Mo taem Hem i bin kamaot long wota, wan voes i kam long heven mo stap talem, Hemia pikinini blong mi we mi lavem hem tumasMi mi glad tumas long hem.”
?Yumi luk koneksen ia? ?Yumi save luksave wan paten long ples ia?
I no wan sapraes se, evritaem we oli tijim yumi abaot tabu fasin mo ples blong yumi, enemi blong evri stret mo gud fasin bae i temtem yumi from.
Hamas bae ol desisen yumi mekem i defren sapos yumi bin save huia yumi tru.
Yumi laef long wan wol we i gat jalenj, wan wol we i no stop blong muvmuv olbaot, ples we ol pipol we oli gat respek, oli traehad mo luksave hamas yumi impoten, be yumi we yumi stap long jos mo gat gospel we i leftemap visen blong yumi mo invaetem yumi i go long God.
Komanmen blong Jisas blong “kam stret gud, olsem Papa blong [yumi] long heven ” i soem klia wanem Hem i wantem tumas long yumi mo wanem i stap we yumi save mekem we i no save finis. I no gat wan samting olsem naoia i save hapen long wan naet nomo. Long toktok blong Presiden Jeffrey R. Holland we i talem, “long en” bae i hapen. Be promes hem i we sapos yumi “kam long Kraes,” bae yumi kam stret evriwan tru long hem.” Hemia i nidim plante wok—i no wan wok olbaot nomo, be wan tabu wok. !Wok blong Hem!
Naoia, gud nius i we, Hem i Papa blong yumi long Heven we i talem stret, “From luk, hemia i wok mo glori blong mi—blong mekem man i nomo save ded mo i kasem laef we i no save finis.”
Invitesen blong Presiden Russell M.Nelson i blong “tingting selestial” we i givimaot wan naesfala rimaenda abaot tabu fasin, ples we yumi kam long hem, mo glori we yumi nidim blong wok from blong yumi kasem. Yumi save kasem selestial nomo tru long atonmen mo sakrifaes blong Jisas Kraes.
Ating hemia nao from wanem Setan i pulum tingting blong Jisas wetem semmak temtesen stat long stat kasem long en blong ministri blong Hem long wol ia. Matiu i rekodem se taem we Jisas i hang yet long kros olgeta we oli “stap wokbaot long rod oli stap tok nogud long hem, … mo talem, … Sipos yu yu Pikinini blong God tru, yu aot long kros ya, yu kamdaon.” Presem God se Hem i no lisin gud nomo be, i mekem wan rod blong yumi kasem evri selestial blesing.
Bae yumi oltaem tingbaot, i bin gat wan bigfala praes blong pem blong mekem yumi stap glad.
Mi testifae olsem Aposol Pol se “Spirit ya blong God i kam joen long tingting blong yumi, blong talemaot we yumi pikinini blong God. Nao from we yumi pikinini blong hem, yumi save joen long Kraes blong harem nogud olsem we hem i harem nogud, be bambae yumi save joen long hem bakegen, blong kasem gudfala laef blong hem long heven.” Long nem blong Jisas Kraes, amen.