Han blong Hem I Rere blong Helpem Yumi
Sapos yumi lukaotem Jisas Kraes wetem fet, Hem bae i stap oltaem.
Taem mi bin wan pikinini, olsem wan famli mifala i go holidei long wan solwota long hom kantri blong mi, Jile. Mi bin glad tumas blong spenem sam dei blong gat gudtaem long sama ia wetem famli blong mi. Mi glad tu from se mi ting se bae mi save joenem mo mekem wanem we tufala bigfala brata, tufala stap mekem blong gat gudtaem long wota.
Wan dei, ol brata blong mi oli go pleiplei long ples we ol wef i stap brokbrok long hem, mo mi filim se mi bigwan inaf blong folem olgeta. Taem mi go kolosap long ples ia, mi bin faenemaot se ol wef ia oli moa bigwan bitim hemia we mi bin luk taem mi stap long so. Kwiktaem wan wef i kasem mi, mo karem mi wetem sapraes. Mi filim se paoa blong neja i kontrolem mi, mo i pulum mi go long dip ples blong solwota. Mi no save luk o filim eni samting taem wef ia i stap sakem mi olbaot. Stret long taem we mi ting se bae laef blong mi long wol ia bae i finis, mi filim wan han i stap pulum mi blong kamaot antap long wota. Long en, mi save luk san mo pulum gud win bakegen.
Brata blong mi Claudio i luk ol traehad blong mi blong aktem se mi big-wan mo i kam blong sevem mi. Mi no stap longwe tumas long so. Nomata se solwota i no dip tumas, be mi bin konfius mo mi no bin luksave se mi save helpem miwan. Claudio i talem long mi se mi nidim blong lukaot gud mo sapos mi wantem, bae hem i save i tijim mi. Nomata plante wota we mi bin solemdaon, hae tingting blong wantem soem se mi bigwan inaf i strong tumas, mo mi talem, “Yes.”
Claudio i talem long mi se mi nidim blong atakem ol wef. Mi talem miwan bae mi lusum faet ia blong agensem wanem we i luk olsem wan bigfala wol blong wota.
Taem wan nara bigfala wef i stap kam, kwiktaem, Claudio i talem, “Luk mi; hemia hao bae yu mekem.” Claudio i ron from wef we i stap kam ia mo daeva i go insaed long hem bifo i brok. Mi laekem tumas olsem wanem hem i daeva, mo mi mestem blong luk narafala wef we i stap kam. Mo, bakegen, wef i sendem mi i go long dip solwota mo paoa blong neja i saksakem mi olbaot. Smol taem i pas, wan han i holem strong han blong mi, mo bakegen i pulum mi blong kamaot antap long solwota mo ea. Faea blong hae tingting blong mi i ded.
Naoia, brata blong mi i invaetem mi blong daeva wetem hem. Folem invitesen blong hem, mi folem hem, mo mitufala i daeva tugeta. Mi filim olsem se mi stap winim ol jalenj ia we i had tumas. I tru, i no bin isi tumas, be mi bin mekem, tangkyu long help mo eksampol blong brata blong mi. Han blong hem i sevem mi tu taem; eksampol we hem i soem long mi olsem wanem blong handelem ol jalenj blong mi, mo win long dei ia.
Presiden Russell M. Nelson i bin invaetem yumi blong tingting selestial, mi wantem blong folem toktok blong hem mo yusum long sama stori blong mi.
Paoa blong Sevya ova long Enemi
Taem yumi tingting selestial, bae yumi andastanem se laef blong yumi bae i gat ol jalenj we i moa bigwan bitim paoa blong yumi blong winim olgeta. Long laef blong yumi long wol ia, yumi stap blong eksperiensem ol atak blong enemi. Olsem ol wef ia we oli gat paoa ova long mi long sama dei ia, i posibol se bae yumi wantem givap. Ol “rabis wef” ia oli save saksakem yumi olbaot. Be no fogetem se huia i gat paoa ova long ol wef ia, mo i tru, ova long evri samting. Hem i Sevya blong yumi, Jisas Kraes. Hem i gat paoa blong helpem yumi aot long evri nogud situesen mo ol fasin blong go agens. Nomata yumi filim kolosap long Hem o nogat, Hem i save kasem yumi nomata wanem situesen yumi stap long hem.
Taem yumi go long Hem wetem fet, oltaem bae Hem i stap, mo long taem blong Hem, Hem bae i rere mo wantem blong holem strong han blong yumi mo pulum yumi kamaot antap long sefples.
Sevya mo Eksampol blong Wok blong Givhan blong Hem
Sapos yumi tingting selestial, bae yumi luksave Jisas Kraes olsem wan stret eksampol blong seves. I gat wan paten blong yumi insaed long ol skripja, taem Hem o ol disaepol blong Hem oli givhan long wan we i nidim help, stap sef o wan blesing, taem oli go givhan wetem ol han blong olgeta. Olsem stori blong mi, mi save se brata blong mi i stap, be blong stap ia from mi, i no inaf. Claudio i save se mi stap long trabol, mo i kam blong leftemap mi aot long wota.
Wanwan taem, yumi ting se, yumi nid blong givhan nomo long man we i stap long nid, mo long plante taem i gat fulap samting yumi save mekem. Blong gat wan lukluk we i no save finis, i save helpem yumi kasem revelesen blong helpem olgeta we oli stap long nid long stret taem. Yumi save dipen long daereksen mo insperesen blong Tabu Spirit blong luksave wanem kaen help i nid blong mekem, nomata sapos hem i kamfot long saed blong bodi olsem kamfotem wan we i harem nogud, help long kaekae, helpem olgeta wetem evri dei wok, o daereksen long saed spirit blong ol narawan long wokbaot blong olgeta blong rere, mekem mo givim ona long ol tabu kavenan.
Sevya I Rere blong Sevem Yumi
Taem Pita, senia Aposol, “i wokbaot antap long wota, i go kolosap long Jisas … hem i fraet; nao i stat draon,” afta “i singaot, se, Masta, plis yu sevem mi.” Jisas i luksave fet we Pita i bin eksasaesem blong kam long Hem antap long wota. Hem i save tu abaot fraet blong Pita. Long stori ia, “wantaem nomo Jisas i stretem han blong hem, i holem hem nao i talem” ol toktok ia: “Man, ?from wanem yu gat tu tingting olsem? !Bilif blong yu i smol tumas!” Ol toktok blong Hem i no blong tok strong long Pita be blong rimaenem se Hem, Mesaea, i bin stap wetem hem mo ol disaepol.
Sapos yumi stap tingting selestial, bae yumi kasem konfemesen insaed long ol hat blong yumi se Jisas Kraes i stret Man blong Sevem yumi, Loya blong yumi long fored blong Papa, mo Ridima blong yumi. Taem yumi eksasaesem fet long Hem, bae Hem i sevem yumi aot long foldaon blong yumi, go bitim ol jalenj mo ol samting we yumi no strong long hem, mo ol samting yumi nidim long wol ia, mo givim yumi presen ia we i bitim evri nara presen we hem i laef we i no save finis.
Sevya I No Save Givap long Yumi
Brata blong mi i no bin givap long mi long dei ia be i gohed blong helpem mi, mekem se mi save hao blong mekem miwan. Hem i gohed, go kasem taem we hem i mas sevem mi tu taem. Hem i gohed, iven sapos mi no save mekem miwan fas taem. Hem i gohed blong mekem se mi save winim ol jalenj ia mo gat sakses. Sapos yumi stap tingting selestial, bae yumi luksave se Sevya bae i stap oltaem blong givim help sapos yumi wantem blong lanem, jenisim, winim, wok wetem, o gat sakses long wanem we bae i givim tru hapines we i no save finis long laef blong yumi.
Han blong Sevya
Ol skripja i kipim i laef ol saen mo mining blong ol han blong Sevya. Long atonmen mo sakrifaes blong Hem, oli nilim tru ol han blong Hem blong Hem i save hang long kros. Afta we Hem i Laef Bakegen long Ded, Hem i kamkamaot long ol disaepol blong Hem long wan bodi we i stret gud evriwan, be ol mak long ol han blong hem i stap, olsem wan rimaenda blong sakrifaes blong Hem we i nogat en. Oltaem han blong Hem i stap ia blong yumi, iven sapos yu no save luk o filim fastaem, from Papa long Heven i bin jusum Hem blong i kam Sevya blong yumi, Ridima ia blong evriwan.
We Yumi Save Kasem,, i kam long Jay Bryant Ward
Han blong God, i kam long Yongsung Kim
Sapos mi stap tingting selestial, mi save se yumi no stap yumiwan long laef ia. Taem yumi stap fesem ol jalenj mo hadtaem, Papa blong yumi long Heven i save paoa we yumi gat blong winim ol hadtaem blong yumi. Yumi mas mekem pat blong yumi mo tanem yumi go long Hem long Fet. Pikinini blong Hem, Jisas Kraes, i Man blong sevem yumi mo oltaem bae i stap. Long tabu nem blong Hem, Jisas Kraes, amen.