Stap Folem Kraes
Olsem ol man blong folem Kraes, yumi tij mo testifae abaot Jisas Kraes, olsem Stret Eksampol blong yumi. So, letem yumi folem Hem mo stopem fasin blong raorao.
Long yia ia, milian oli bin kasem insperesen tru long stadi plan we yumi save olsem invitesen blong Sevya “Kam Folem Mi.” Blong stap folem Kraes, i no blong tingting nating long hem o we yumi praktisim wanwan taem nomo. Hem i wan komitmen we i gogohed mo i rod blong laef we i mas lidim yumi evri taem mo long evri ples. Ol tijing mo eksampol blong Hem i soem rod long evri disaepol blong Jisas Kraes. Mo oli invaetem evriwan i kam long rod ia, from Hem i invaetem evriwan blong kam long Hem, “blak mo waet, slef mo fri, man mo woman; … evriwan i semmak long God.”
I.
Fas step blong stap folem Kraes i blong obei wanem we hem i eksplenem olsem “tufala bigfala komanmen ia i stamba blong Loa”:
“Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.
“Hemia nao loa ya we i hae moa long ol narafala loa, mo i nambawan blong folem.
“Mo narawan we i kolosap i semmak long hem, i talem se, Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.
“Tufala loa ia i stamba blong Loa we God i givim long Moses, wetem ol tok blong ol profet tu.”
Ol komanmen blong God oli givim daereksen mo paoa we i holemtaet yumi blong stap strong long laef blong yumi. Ol eksperiens blong yumi long laef ia, oli olsem smol boe mo papa blong hem we tufala i stap pulum wan kaet long wan dei we win i strong. Taem we kaet i flae i go moa antap, win i pulum string we smol boe ia fasem long han blong hem. From save blong hem i smol abaot fos blong win, hem i talem sapos oli save katemaot string blong mekem se kaet i save go moa antap. Waes papa blong hem i talem no, i eksplenem se string nao i wanem we i holem kaet blong stap gud agensem ol win. Sapos yumi mestem blong holem string, kaet bae i no save go moa antap. Bae ol win ia i saksakem hem olbaot mo bae i save foldaon long graon mo brokbrok.
String ia we i nid blong stap ia, i ripresentem ol kavenan we i konektem yumi i go long God, Papa blong yumi long Heven mo Pikinini blong Hem, Jisas Kraes. Taem yumi respektem ol kavenan ia, tru long taem we yumi obei ol komanmen blong Tufala, mo stap folem plan ia blong Tufala blong pemaot man, promes blesing blong Tufala i letem yumi flae i go antap long ol hae ples we i selestial.
Oltaem Buk blong Momon i stap talemaot se, Kraes, Hem i “laet ia blong wol.” Taem Hem i kamkamaot long Ol Man blong Nifae, Lod ia we i laef bakegen i eksplenem tijing ia, taem i stap talem long olgeta se: “Mi bin mekem wan eksampol blong yufala.” “Luk mi mi laet we yufala i mas leftemap—ol samting we yufala i bin luk mi mi mekem.” Hem i eksampol blong yumi. Yumi lanem wanem we Hem i bin talem mo mekem taem yumi stap stadi long ol skripja mo folem ol tijing blong profet, olsem we Presiden Russell M. Nelson i bin askem strong long yumi blong mekem. Long odinens blong sakramen, yumi mekem kavenan evri Sabat dei se bae yumi “tingbaot Hem oltaem, mo blong obei ol komanmen blong Hem.”
II.
Insaed long Buk blong Momon, Lod i givim ol stamba tingting blong wanem yumi singaotem “doktrin blong Kraes.” Ol samting ia oli, fet long Lod, Jisas Kraes, fasin blong sakem sin, baptaes, kasem presen ia we i Tabu Spirit, stap strong kasem en, mo kam olsem wan smol pikinini, we i minim blong trastem Lod mo blong stap biaen long evri samting we Hem i askem long yumi blong mekem.
Ol komanmen blong Lod i gat tu kaen: hemia we i stap oltaem olsem doktrin blong Kraes, mo hemia we i stap blong sot taem. Jos blong Lod mo olgeta we oli fetful oli nidim ol komanmen we oli blong sot taem long ol situesen we i blong sot taem, be bae oli nomo yusum afta we oli nomo nidim. Wan eksampol blong ol komanmen we i blong sot taem nomo i, ol daereksen blong Lod we i go long ol lida blong Jos blong bifo blong muvum Ol Sent aot long Niu Yok i go long Misuri, i go long Ilinoa mo laswan, blong lidim ol paeonia blong oli go aot long ol eria blong ol maonten long Wes. Ol komanmen ia, oli givim blong yumi mas obei long olgeta long taem we i nidim blong yusum nomata we i blong sot taem nomo.
Sam long ol komanmen we i blong oltaem, i tekem longfala taem bifo oli save folem. Eksampol, prijing blong Presiden Lorenzo Snow we i popula long loa blong taeting we i tokbaot plante wan komanmen we oli bin givim bifo, be ol memba blong Jos oli no folem yet. Hem i nid blong oli tokbaot bakegen mo bakegen long ol situesen, afta we Jos mo ol memba blong hem oli bin fesem. Jos o Lata-dei Sent i bin fesem ol situesen blong tedei from nid ia blong tokbaot bakegen mo bakegen from ol eksampol ia we i jes pas i no longtaem. Long ol eksampol ia, i gat famli ofisol toktok we Presiden Gordon B. Hinckley i bin pablisim 30 yia i pas, mo toktok blong Presiden Russell M. Nelson blong naoia blong oli save abaot stret nem blong Jos we i ,Jos Ia blong Jos blong Jisas Kraes blong Ol Lata-dei Sent.
III.
Wan long ol narafala tijing blong Sevya i luk olsem i nid blong oli tokbaot bakegen mo bakegen folem ol situesen blong dei blong yumi.
Taem ia i taem blong plante strong mo rabis toktok long pablik komunikesen mo iven, samtaem insaed long ol famli blong yumi. Ol problem blong brekem loa long pablik, oltaem i isi blong luksave we i risal blong ol aksen blong fasin nogud—iven blong no laekem wan narawan—long pablik mo ol rilesensip blong wanwan man o woman. Fasin ia blong agens, samtaem i mekem se yumi no gat inaf paoa blong mekem loa long ol impoten samting we plante sitisen oli luk se i wan impoten nid blong oli tekem aksen long hem folem intres blong pablik.
?Wanem nao ol man blong folem Kraes, oli tijim mo mekem long taem blong ol komunikesen ia we oli denja? ?Wanem nao i ol tijing mo eksampol blong Hem?
Hem i impoten se, long medel blong ol fas prinsipol we Jisas i bin tijim taem Hem i kamkamaot long Ol Man blong Nifae, hem i blong stopem fasin blong raorao. Taem Hem i stap tijim hemia folem ol situesen blong no agri long doktrin blong relijin, ol risen we Hem i givim, i klia se i go stret wetem komunikesen mo ol rilesensip insaed long politik, pablik loa, mo ol famli rilesensip. Jisas i tijim:
“Hem we i gat spirit blong raorao i no blong mi, be hem i blong devel, we i papa blong raorao, mo hem i tantanem hat blong ol man blong raorao wetem kros, wan wetem narawan.
“Luk, hemia i no doktrin blong mi, blong tantanem hat blong ol man wetem kros, wan agensem narawan; be hemia i doktrin blong mi, se ol samting olsem oli mas stop.”
Long las wok blong ministri blong Hem long medel blong Ol Man blong Nifae, Jisas i tijim ol narafala komanmen we i semmak smol long fasin ia blong stopem raorao. Yumi save long Baebol se Hem i bin tijim wanwan long hemia bifo long Toktok blong Hem Antap long Hil, long semmak lanwis we afta, Hem i yusum wetem Ol Man blong Nifae. Bae mi kwotem wan skripja long Baebol we yumi save gud:
“Yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala.”
Hemia i wan long ol nambawan komanmen we yumi save—we i strong mo had tumas blong folem. Be yet, wan stamba pat blong invitesen blong Hem we i go long evriwan, blong folem Hem. Olsem we Presiden David O. McKay i bin tijim, “I nomo gat wan moa wei blong soem lav long God, bitim blong soem se yu kea mo lavem wan narawan.”
Hemia i wan nara stamba tijing blong Hem we i stret eksampol blong yumi: “Olgeta we oli man blong mekem pis oli save harem gud, from we God bambae i talem se, ‘Yufala i pikinini blong mi.”
!Man blong mekem pis! Bae i jenisim bigwan ol rilesensip blong wanwan man o woman, sapos ol man blong folem Kraes, oli stopem ol strong mo rabis toktok long evri komunikesen blong olgeta.
Long jeneral konfrens blong las yia, Presiden Russell M. Nelson i bin givim ol jalenj ia long yumi:
“Wan long ol isi wei blong faenemaot wan tru man blong folem Jisas Kraes, hem i olsem wanem wan man i mekem gud long wan nara man wetem lav mo sore.
“Ol tru disaepol blong Jisas Kraes oli man blong mekem pis.
“Wan long ol wei blong save givim ona long Sevya i blong kam wan man blong mekem pis.”
Blong endem ol tijing blong hem: “Fasin blong raorao i wan joes. Blong putum pis i wan joes. Yu gat ejensi blong jusum fasin blong raorao o fasin blong stretem ol samting. Mi askem yu blong jusum blong stap wan man blong mekem pis, naoia mo oltaem.”
Tugeta grup i mas statem ol toktok raon blong olgeta taem oli talemaot ol raorao blong olgeta blong mekem se, evriwan i save agri.
Blong folem Stret Eksampol blong yumi mo profet blong Hem, yumi nid blong praktisim wanem we yumi save gud olsem Golden Rul: “Yufala i mas mekem i gud long ol narafala man, olsem we yufala i wantem blong olgeta oli mekem long yufala. Hemia mining blong Loa mo ol tok blong ol profet tu.” Yumi nid blong lavem mo mekem i gud long evriwan. Yumi nid blong stopem fasin blong raorao mo stap ol man blong mekem pis long evri komunikesen blong yumi. Hemia i no minim blong andastanem nomo ol prinsipol blong yumi mo ol samting we yumi putum i kam antap faswan, be blong stop blong atakem ol prinsipol blong ol narafala man. Hemia nao wanem we Stret Eksampol blong yumi i bin mekem long ministri blong Hem. Hemia nao eksampol we Hem i soem long yumi taem Hem i invaetem yumi blong folem Hem.
Long konfrens ia, fo yia i pas, Presiden Nelson i bin givim wan jalenj blong dei blong yumi:
“ ?Yu yu wantem letem God i stap win insaed long laef blong yu? ?Yu yu wantem letem God i paoa ia we i moa strong insaed long laef blong yu? ?Bae yu yu letem ol toktok blong Hem, ol komanmen blong Hem, mo ol kavenan blong Hem oli lidim tingting blong yu long wanem yu stap mekem evri dei? ?Bae yu letem voes blong Hem i kam faswan bitim eni nara samting?”
Olsem ol man blong folem Kraes, yumi tij mo testifae abaot Jisas Kraes, Stret Eksampol blong yumi. So, letem yumi folem Hem mo stopem ol raorao. Taem yumi folem ol rul we yumi laekem long pablik tru ol aksen, letem yumi kwalifae from ol blesing blong Hem, taem yumi yusum lanwis mo ol wei blong stap ol man blong mekem pis. Insaed long ol famli blong yumi mo ol narafala rilesensip blong yumiwan, letem yumi stopem ol samting we i strong mo denja blong spolem wan narawan. Letem yumi lukaotem blong stap tabu, olsem Sevya blong yumi, we tru long tabu nem blong Hem, mi testifae mo karem i kam blesing blong Hem blong helpem yumi stap Ol Sent. Long nem blong Jisas Kraes, amen.