“Luk Mi Mi Laet We Yufala I Mas Leftemap”
Yumi leftemap laet blong Lod taem yumi hang strong long ol kavenan blong yumi mo taem yumi sapotem profet we i laef.
Wetem plante testemoni we yumi harem long konfrens ia, mi ademap testemoni blong mi olsem wan aposol se Jisas Kraes i Pikinini blong God, Lod, Sevya mo Ridima blong evri pikinini blong Papa blong yumi. Tru long Atonmen blong Hem, Jisas Kraes i mekem wei blong yumi gobak stap wetem Papa blong yumi long Heven mo stap wetem ol famli blong yumi blong wan taem we i no save finis sapos yumi klin inaf.
Sevya i stap oltaem long wokbaot blong yumi long wol ia. Long 2 dei ia, yumi bin harem Hem i toktok tru ol lida we Hem i jusum blong yumi save kam kolosap long Hem. Bakegen mo bakegen, wetem klin lav mo sore blong Hem, Hem i sastenem yumi taem yumi fesem ol hadtaem blong laef. Nifae i tokbaot, “God blong mi i sapot blong mi; hem i lidim mi tru long ol hadtaem blong mi. … Hem i fulumap mi wetem lav blong Hem.”
Lav ia i posibol nomo taem yumi sastenem wanwan long yumi long wok blong Hem.
Yumi sastenem profet blong yumi we i laef long jeneral konfrens, mo Fas Presidensi, Kworom blong Olgeta Twelef Aposol, ol nara Jeneral Atoriti mo Jeneral Ofisa blong Jos. Blong sasten i minim blong leftemap wan narafala man, blong lisin long olgeta, blong stap fetful long tras blong olgeta, blong mekem wanem oli talem. Ol lida ia oli tokbaot Lod wetem insperesen; oli andastanem ol problem blong tedei, ol gudfala prinsipol we i stap lus tedei insaed long sosaeti mo wanem Setan i gohed blong mekem blong stopem plan blong Papa. Blong leftemap han blong yumi, yumi mekem komitmen blong soem sapot blong yumi, i no blong taem ia nomo, be blong evri dei laef blong yumi.
Sastening tu i blong leftemap ol stek presiden mo bisop, ol kworom mo oganaesesen lida, ol tija blong yumi, mo tu ol kamp daerekta long ol wod mo stek blong yumi. Long hom, yumi leftemap ol waef mo ol hasban blong yumi, ol pikinini, ol papa mo mama, ol famli longwe, mo ol neba. Taem yumi leftemap wanwan long yumi, yumi stap talem se “Mi stap ia blong yu, i no blong leftemap nomo ol han we oli ‘hang i kamdaon’ be blong stap wan kamfot mo paoa long saed blong yu.”
Fasin ia blong leftemap i kamaot long skripja. Long wota blong Momon, ol niu Jos memba we oli baptaes, oli mekem komitmen “blong karem ol hevi samting blong yufala wanwan, blong mekem se i nomo hevi; … [blong] leftemap tingting blong olgeta we oli nidim kamfot , mo blong stanap olsem ol witnes blong God evri taem mo long evri samting, mo long evri ples.”
Long Ol Man blong Nifae, Jisas i se: “Leftemap laet blong yufala blong mekem se i save saen long wol. Luk mi mi laet we yufala i mas leftemap.” Yumi leftemap laet blong Lod taem yumi hang strong long ol kavenan blong yumi mo taem yumi sapotem profet we i laef taem hem i tokbaot ol toktok blong God.
Presiden Russell M. Nelson i se, taem mi stap givim seves yet long Kworom blong Olgeta Twelef Aposol, “Blong sastenem ol profet i wan komitmen blong mifalawan se bae mifala i mekem evri samting blong sapotem ol fas wok blong olgeta olsem profet.”
Blong leftemap profet i wan tabu wok. Yumi no stap kwaet nomo be stap aktiv blong difendem hem, folem kaonsel blong hem, tijim ol toktok blong hem, mo prea from hem.
King Benjamin, long Buk blong Momon i talem long ol pipol, “mi olsem yufala nomo, bodi mo maen blong mi i save harem nogud; be stil ol pipol ia i jusum mi, … mo Lod i bin letem mi … mo Lod i bin lukaotgud mo holemtaet gud mi i stap wetem paoa, blong wok blong helpem yufala wetem ful paoa blong tingting, maen, mo ful paoa we Lod i bin givim long mi.”
Semmak, long 100 yia blong hem, Lod i bin lukaotgud mo holemtaet gud Presiden Nelson i stap. Presiden Harold B. Lee, long taem we hem i bin memba blong Fas Presidensi, i bin givim eksampol blong Moses we i stanap antap long hil Refidim. Hem i talem “Ol han blong [Presiden blong Jos] bae i save kam taed.” “Samtaem oli save taed from ol hevi responsabiliti; be taem yumi helpem mo sapotem wok blong profet, mo lid folem daereksen blong hem, mo stap long saed blong hem, ol get blong hel bae i no save kam agensem yu mo Isrel. Sefti blong yu mo hemia blong mifala bae i dipen sapos yumi folem o no folem olgeta we Lod i putum olgeta blong prisaed ova long Jos blong Hem. Hem i save huia Hem i wantem blong prisaed ova long Jos blong Hem, mo bae Hem i no mekem wan mistek.”
Presiden Nelson i tokbaot ol yia we hem i stap givim seves long Lod. Gro blong hem, plante kaen eksperiens, waes, mo semmak fasin we hem i stap kasem revelesen i stret gud long dei blong yumi tedei. Hem i talem: “Jos Ia blong Jisas Kraes blong Ol Lata-dei Sent i stap mekem wol ia i rere from dei ia taem ‘bambae wol ia i fulap gud long ol man we oli savegud Hae God’ (Aesea 11:9. Wok ia, paoa blong hem i kam tru long wan anaonsmen we i kam long heven, we i bin hapen 200 yia i pas finis. Hem i tekem seven toktok nomo: ‘Hemia, Hem i Stret Pikinini blong Mi. !Lisin gud long Hem!’ (luk long Josef Smit—Histri 1:17).”
Presiden Nelson i se: “I neva bin gat wan taem long histri blong wol we taem save abaot Sevya blong yumi i moa impoten long wanwan man o woman, mo i stret long evri sol blong man blong wol. Traem tingting. ol nogud raorao oli go kwik raon long wol—mo olgeta long wanwan laef blong yumi—bae oli stretem olgeta sapos yumi evriwan i jusum blong folem Jisas Kraes mo mekem folem ol tijing blong Hem.”
Ol brata mo sista, yumi nidim blong givim moa sapot mo help, mo no komplen mo agens tumas, leftemap toktok blong Lod, ol wei blong Hem, mo profet blong Hem we i se: “Wan long ol bigfala jalenj tedei, i blong luksave wanem i ol trutok blong God mo ol giaman blong Setan. From hemia nao Lod i givim woning long yumi blong “prea oltaem, blong [yumi] save winim Setan, mo … blong yu save ronwe long ol han blong ol wokman blong Setan we oli stap sapotem wok blong [hem]’ [Doktrin mo Ol Kavenan 10:5; emphasis added].”
Las Epril, mi mo Sista Rasband i bin gat hona blong joenem profet we yumi lavem mo Sista Nelson blong dediketem bakegen Manti Utah Tempol.
Presiden Nelson i mekem sapraes long evriwan taem hem i go insaed long rum. Mifala hamas nomo i save se hem i stap kam. Taem mi stap wetem hem, kwiktaem mi filim wan laet mo paoa we hem i gat olsem profet. Glad ia we i stap long ol fes blong ol pipol we wanwan long olgeta i luk profet, bae i stap wetem mi blong oltaem.
Long prea blong dedikesen ia bakegen, Presiden Nelson i askem Lod se tabu haos blong Hem bae i nid blong leftemap evriwan we oli go insaed long tempol ia “se bae oli save kasem ol tabu blesing mo stap klin inaf mo fetful long ol kavenan blong olgeta … blong i stap wan haos blong pis, wan haos blong kamfot, mo wan haos blong revelesen blong evriwan we i klin inaf i go insaed ol doa ia.”
Yumi evriwan i nidim Lod blong leftemap yumi wetem pis, kamfot, mo moa nao wetem revelesen blong wanwan man o woman blong winim fraet, tudak, mo raorao we i stap gohed raon long wol.
Bifo seves, mifala i stanap aotsaed long san wetem Presiden mo Sista Nelson blong luk naesfala ples ia. Presiden Nelson i gat plante bubu blong bifo long eria blong Manti. Evri 8 bigfala apu man mo woman blong hem oli bin stap long ol eria raon long tempol, semmak long mi tu. Bigfala Apu man blong mi Andrew Anderson i bin wan wokman blong bildim tempol wetem ol fas paeonia we oli bin wok blong 11 yia blong finisim Manti tempol, olsem nambatri tempol long Rocky Mountains.
Taem mifala i stanap wetem Presiden Nelson, mifala i gat janis ia blong leftemap mo sapotem profet blong God long taem blong selebresen ia blong dediketem bakegen tabu haos blong Lod. Hem i wan dei we bae mi neva fogetem.
“Yumi bildim ol tempol blong givim ona long Lod,” Presiden Nelson i talem long tabu dei ia. “Oli bildim blong wosip be i no blong stap flasflas. Yumi mekem ol tabu kavenan from impoten samting we i no save finis insaed long ol tabu wol blong bilding ia.” Yumi stap karem Isrel i kambak.
Presiden Nelson mo ol profet fastaem long hem, oli bin holemgud mo protektem ol tabu haos ia long ol han blong olgeta. Tedei, raon long wol, yumi gat 350 tabu haos blong Lod we oli stap wok, sam oli anaonsem, o oli stap bildim yet. Olsem wan profet, stat long 2018, Presiden Nelson i bin anaonsem 168 tempol.
“Long taem blong yumi naoia,” hem i talem, “i mas gat wan ful, komplit mo stret yunion blong evri ki mo paoa blong evri dispensesen we bae oli mas weldem tugeta (luk long Doktrin mo Ol Kavenan 128:18). From ol tabu stamba tingting ia, naoia ol tempol oli fulmap wol. Mi talemaot bakegen se, taem oli bildim ol tempol ia, maet bae i no jenisim laef blong yufala, be seves blong yufala insaed long tempol, yes.”
Presiden i talem, “Sevya mo doktrin blong hem oli stap long hat blong tempol. “Evri samting we oli tijim insaed long tempol, tru long instraksen mo tru long Spirit, i mekem andastaning blong yumi abaot Jisas Kraes i kam antap moa. Ol Impoten odinens blong Hem oli fasem yumi wetem Hem tru long ol tabu prishud kavenan. Afta, taem yumi stap kipim ol kavenan blong yumi, Hem i kavremap yumi wetem paoa blong Hem we i save stap hilim mo stap mekem yumi kam strong moa wetem paoa.”
“Evriwan we oli wosip long tempol,” Presiden Nelson i talem, “oli aot wetem paoa blong God mo wetem ol enjel we oli ‘lukaot long olgeta.’ [Doktrin mo Ol Kavenan 109:22]. ?Hamas nao tras blong yu i kam antap blong save se, olsem wan endao woman o man o [wan yut we i stap atendem tempol] we i fulap wetem paoa blong God, yu no save fesem laef yuwan? ?Wanem strong tingting i kam long yu blong save se ol enjel bae i rili helpem yu?”
Ol enjel oli kamaot blong leftemap yumi oli tokbaot long ol skripja taem Jisas Kraes i nildaon wetem tingting i stap daon long Garen blong Getsemani. Tru long safaring blong Hem, Hem i givim wan Atonmen we i no gat en. “Longwe,” Presiden Nelson i se, “bigfala aksen blong lav we i bigwan aot long evri histri blong wol we oli bin rekodem i bin hapen. … Longwe long Getsemani, Lod ‘i bin safa long sobodi blong evri man, blong mekem se evri man … i save sakem sin mo kam long hem.’ [Doktrin mo Ol Kavenan 18:11].”
Jisas Kraes i askem, “Karemaot kap ia long mi, be yu no mekem olsem we mi wantem, yu mekem olsem we yu nomo yu wantem.
“Nao wan enjel i aot long heven i kam, nao i kamtru long Jisas, i mekem hem i strong bakegen.”
Yumi gat ol enjel raon long yumi tedei. Presiden Nelson i talem, “[Insaed long tempol,] bae yu lanem hao blong muvumaot vel bitwin heven mo wol, hao blong askem ol enjel blong God blong givhan long yu.”
Ol enjel oli karem laet i kam. Laet blong God. Jisas i talem long ol Aposol blong Ol Man blong Nifae, “Luk mi mi laet we yufala i mas leftemap” Taem yumi sastenem profet blong yumi, yumi testifae se Sevya i singaotem hem, we hem i “laet … blong wol.”
Dia Presiden Nelson, long bihaf blong ol memba mo ol fren blong Jos raon long wol, mifala i kasem blesing blong leftemap ol tijing blong yu, blong leftemap eksampol blong yu olsem hemia blong Kraes we i stap laef, mo blong leftemap strong testemoni blong yu abaot Lod mo Sevya blong yumi, Ridima blong yumi evriwan.
Mi serem witnes blong mi olsem wan aposol se Jisas Kraes hem i “laet … blong wol.” Bae yumi evriwan, olsem ol disaepol blong Hem, i “leftemap” laet blong Hem. Long nem blong Jisas Kraes, amen.