Liahona
“Hemia I Gospel blong Mi”—“Hemia I Jos blong Mi”
Novemba 2024
13:49

“Hemia I Gospel blong Mi”—“Hemia I Jos blong Mi”

I Kam long Elda Dale G. Renlund

Blong Kworom blong Olgeta Twelef Aposol

Hemia i gospel blong Sevya, mo hemia i Jos blong Hem (luk tu long 3 Nifae 27:21; Mosaea 26:22; 27:13). Taem tufala i joen tugeta, i gat moa paoa mo i mekem bigfala jenis.

Blong plante handred yia, blak paoda i wan long ol bom we i gat fulap paoa. Hem i save sakem ol kano bom, be oli no save yusum gud long plante wok blong maen mo ol projek blong rod konstraksen. Hem i no gat inaf paoa blong brekem ol ston.

Long 1846, wan man blong wokem kemikol blong Itali we nem blong hem Ascanio Sobrero, i putum tugeta wan niu bom, naetrogliserin. Wota ia we i oel, i gat paoa taosen taem moa bitim blak paoda. Hem i isi nomo blong brebrekem ston. Be nomo se naetrogliserin i no stap semmak oltaem. Sapos yu mekem i foldaon long wan smol ples, bae i faerap. Sapos ples i hot tumas, bae i faerap. Sapos ples i kolkol tumas, bae i faerap. Nomata sapos yu putum long wan dak kolkol rum mo yu no tajem, bae i faerap long en. Plante kantri oli no givim raet blong oli transpotem, mo plante oli no givim raet blong oli mekem.

Long 1860, wan saentis blong Swiden we nem blong hem Alfred Nobel i stat blong traem blong mekem naetrogliserin i stap semmak. Afta long seven yia blong stap mekem ol tes, hem i kasem gol blong hem blong draonem naetrogliserin insaed long wan samting we oli singaotem kiselgor we valiu blong hem i smol nomo. Kiselgor i wan ston we i gat ol hol hol long hem mo oli save brebrekem i kam paoda. Taem oli miksim wetem naetrogliserin, kiselgor i drink naetrogliserin, mo risal blong hem i sopsop olsem laplap mo oli save mekem sep blong hem i kam olsem “ol stik.” Long wei ia, naetrogliserin i save stap semmak. Oli save putum i sef gud i stap, oli save transpotem, mo no daonem paoa blong hem blong bosta. Nobel i putum nem blong naetrogliserin mo kiselgor we oli joenem, se hem i “daenamaet.”

Daenamaet i jenisim wol. Hem i mekem Nobel i kam rij. Sapos i no gat wan samting blong holemtaet i stap semmak, naetrogliserin i denja tumas blong salem, olsem we Ascanio Sobrero i faenemaot. Olsem we mi bin talem, Kiselgor hemwan, i gat smol valiu nomo. Be taem yu joenem tufala, tufala i mekem daenamaet we i mekem wan bigfala mo gudfala jenis.

Long wan semmak wei, gospel blong Jisas Kraes we i joen wetem Jos Ia blong Jisas Kraes blong Ol Lata-dei Sent, i givim ol gudfala jenis we i gat bigfala paoa long yumi. Gospel i stret evriwan, be i nidim wan jos we God i givim raet long hem, blong i prijim gospel, praktisim klin fasin, mo mekem ol tabu odinens wetem atoriti mo paoa blong Sevya.

Tingting long olsem wanem Alma wan profet long Buk blong Momon i stanemap gospel blong Sevya we i joen wetem Jos blong Hem. Jos i responsibol blong “no prijim eni samting be fasin blong sakem sin nomo mo fet long Lod ia we [bae i] pemaot ol pipol blong hem.” Wetem atoriti blong God, Jos i responsibol blong stap mekem ol odinens blong baptaes “long nem blong Lod, olsem wan witnes [we bae i] mekem wan kavenan wetem hem [blong] wok blong hem mo obei ol komanmen blong hem.” Ol pipol we oli baptaes mo oli tekem long olgetawan nem blong Jisas Kraes, oli joenem Jos blong Hem, mo oli promesem olgeta blong kasem bigfala paoa blong Spirit.

Ol pipol oli fulap oli go long Ol Wota blong Momon blong harem Alma i prijim gospel. Nomata se ol wota mo ol ples raon long hem i naes tumas, , Jos ia blong Lod i no wan ples o wan bilding, i semmak long tedei. Jos hem i ol pipol we oli simpol nomo, mo oli ol disaepol blong Jisas Kraes, we oli kam tugeta mo oganaesem olgeta olsem we God i daerektem, blong help blong mekem ol stamba tingting blong Lod i hapen. Jos hem i wan tul we tru long hem, yumi lanem stamba wok blong Jisas Kraes insaed long plan blong Papa long Heven. Jos i givim raet, blong wanwan man o woman blong tekpat long ol odinens mo mekem ol kavenan we oli no save finis, wetem God. Blong stap kipim ol kavenan ia i mekem yumi kam moa kolosap long God, mo i givim akses long paoa blong Hem, mo i jenisim yumi i kam huia Hem i wantem yumi blong kam olsem.

Olsem daenamaet we i nogat naetrogliserin i no spesel tumas, Jos blong Sevya bae i spesel nomo sapos i gat gospel blong Hem long hem. Sapos i nogat gospel blong Sevya mo atoriti blong mekem ol odinens, Jos bae i no jos ia we ol man i save long hem oltaem.

Sapos kiselgor i no holemtaet naetrogliserin i stap semmak, bae oli no save yusum. Olsem we histri i bin soem, sapos i nogat Jos ia blong Lod, andastaning blong man abaot gospel blong Hem bae i no stap semmak—doktrin bae i jenis mo bae ol defdefren relijin, kalja mo skul blong tingting, oli save kontrolem doktrin. Yu save luk risal blong ol paoa ia we i stap kamaot long evri dispensesen we i kasem las wan ia we yumi stap long hem. Nomata we oli bin givim gospel we i klin evriwan, fasin blong andastanem mo olsem wanem oli yusum gospel ia, i i soem smol paoa olsem hemia blong God be i nogat paoa from se i nogat Jos we God i givim raet long hem long wol ia.

Jos Ia blong Jisas Kraes blong Ol Lata-dei Sent i givim akses long paoa blong God from se God nao i givim raet long hem blong i tijim doktrin blong Kraes mo i givim ol odinens blong gospel blong sevem man mo kam olsem wan god. Sevya i wantem tumas blong fogivim ol sin blong yumi, blong helpem yumi aksesem paoa blong Hem, mo jenisim yumi. Hem i safa from ol sin blong yumi mo i wantem tumas blong fogivim yumi aot long panismen we yumi sapos blong kasem. Hem i wantem yumi blong kam tabu mo kam stret evriwan tru long Hem.

Jisas Kraes i gat paoa blong mekem hemia. Hem i no sore nomo long yumi from ol samting we yumi nogud long hem mo from panismen blong yumi we i no save finis olsem risal blong sin. No, hem i go bitim hemia, hem i kasem taem we i no save finis, mo Hem i putumbak Jos blong Hem blong mekem se Jos ia i save gat akses long paoa blong Hem.

Stamba blong gospel we Kraes i tijim i we Jisas Kraes i bin karem “[ol harem nogud mo sobodi blong yumi].” Lod i bin “putum ol sin blong yumi evriwan i go long man ya nomo.” Hem i bin “[safa long kros],” i brekem “ol rop blong ded,” “i go antap finis long heven, mo i sidaon long raet han blong God, blong askem long Papa ol raet blong sore blong Hem.” Sevya i bin mekem evri samting ia from se Hem i lavem Papa blong Hem mo Hem i lavem yumi. Hem i bin pem finis praes ia we i no gat en blong Hem i save “[winim] evriwan we i gat fet long hem [mo kam loya]” blong olgeta—blong yumi. Jisas Kraes i wantem tumas blong yumi sakem sin mo kam long Hem mekem se Hem i save stretem yumi mo mekem yumi kam tabu. From tingting ia, Hem i no save stop mo no jenis.

Blong gat akses long kavenan paoa mo lav blong God, hem i tru long Jos blong Hem. Gospel blong Sevya we i joen wetem Jos ia blong Hem i jenisim laef blong yumi. Hem i bin jenisim laef blong tufala apu blong mi long saed blong mama. Apu man blong mi Oskar Andersson, i bin wok long wan ples blong mekem sip long Högmarsö, wan aelan long Stockholm. Waef blong hem Albertina, mo ol pikinini blong tufala oli stap long mein aelan blong Swiden. Wan taem evri tu wik, long Satedei, Oskar bae i pul long bot blong hem i go hom blong wiken, afta bae i kambak long Högmarsö long Sandei naet. Wan dei, taem hem i stap long Högmarsö , hem i harem tu misinari blong Amerika oli prijim gospel blong Jisas Kraes we i kambak. Oskar i filim se wanem we hem i bin harem i klin trutok, mo hem i fulap long glad we hem i no save olsem wanem blong tokbaot.

Long nekis taem we hem i gobak hom, Oskar i hapi tumas mo i tokbaot ol misinari long Albertina. Hem i eksplenem se hem i bilivim wanem we oli bin tijim. Hem i askem Albertina blong ridim ol smol buk we oli bin givim long hem; hem i talem se hem i ting se sapos tufala i gat ol pikinini long fiuja, bae oli no mas baptaes taem oli bebi. Albertina i kros tumas mo i sakem ol smol buk ia long toti. Tufala i nomo toktok gud kasem taem Oskar i gobak blong wok long Sandei naet.

Taem hem i aot nomo, Albertina i gobak from ol smol buk ia. Hem i komperem gud doktrin blong hem wetem ol tijing long Baebol blong hem we hem i stap ridim oltaem. Hem i sapraes tumas blong filim se wanem we hem i ridim i bin tru. Long nekis taem we Oskar i gobak hom, oli hapi blong welkamem hem, semmak long kopi blong Buk blong Momon we hem i bin karem wetem hem i go. Albertina i rid gud bakegen, mo stap komperem doktrin wetem hemia long Baebol blong hem. Olsem Oskar, hem i luksave klin trutok mo hem i fulap long glad we hem i no save tokbaot.

Oskar, Albertina, mo ol pikinini blong tufala oli muv i go long Högmarsö blong stap kolosap long ol smol namba blong Jos memba we oli stap longwe. Afta long wan wik we Oskar mo Albertina i kasem baptaes long 1916, oli singaotem Oskar olsem grup lida long Högmarsö. Semmak olsem plante konvet, Oskar mo Albertina i bin fesem fulap tok agens from niu fet blong tufala. Ol lokol fama oli no wantem salem melek long olgeta, mekem se Oskar i mas pul long ol pasis evri dei blong pem melek long ol fama we oli wantem salem long hem.

Nomata hemia, membasip blong Jos long Högmarsö i gohed blong gro long ol yia afta, mo pat blong hemia i from testemoni blong Albertina we i gat paoa mo strong wok blong ol misinari. Taem grup ia i kam wan branj, oli singaotem Oskar olsem branj presiden.

Ol memba blong branj ia long Högmarsö oli respektem aelan ia. Hemia i bin Ol Wota blong Momon blong olgeta. Hemia i bin ples we oli kam blong save Ridima blong olgeta.

Ova long ol yia, Oskar mo Albertina i bin kipim kavenan blong baptaes blong tufala mo tufala i jenis tru long paoa blong Jisas Kraes. Tufala i wantem tumas blong mekem moa kavenan mo kasem ol tempol blesing blong tufala. Blong kasem ol blesing ia, oli mas muvaot long hom blong tufala long Swiden i go long Sol Lek Siti long 1949. Oskar i bin givim seves olsem lida blong ol memba long Högmarsö blong 33 yia.

Naetrogliserin we i joen wetem kiselgor, i mekem daenamaet i wok moa gud, gospel blong Jisas Kraes we i joen wetem Jos blong Hem, mane i no save pem. Oskar wetem Albertina i bin harem abaot gospel we i kambak from wan profet blong God i bin singaotem mo sendem ol misinari i go long Swiden. Tru long atoriti blong God, ol misinari oli bin tijim doktrin blong Kraes mo tru long atoriti blong prishud, oli bin baptaesem Oskar mo Albertina. Olsem ol memba, Oskar mo Albertina i gohed blong lanem, developem, mo givim seves long ol narawan. Oli bin kam Ol Lata-dei Sent from oli bin kipim ol kavenan we oli bin mekem.

Sevya i tokbaot Jos Ia blong Jisas Kraes blong Ol Lata-dei Sent olsem “jos blong Mi” from se Hem i bin givim raet long Jos blong mekem ol stamba tingting blong Hem—blong stap prijim gospel blong Hem, givim ol odinens mo kavenan, mo hemia, i mekem i posibol blong paoa blong Hem i stretem mo mekem yumi kam tabu. Sapos i no gat Jos, bae i no gat atoriti, no gat prijing blong trutok we oli givim tru long revelesen long nem blong Hem, no gat ol odinens o kavenan, i no gat paoa olsem hemia blong God , yumi no jenis i go long huia God i wantem yumi blong kam olsem, mo plan blong God blong ol pikinini blong Hem i blong nating nomo. I nidim blong gat Jos long dispensesen ia blong i stap long plan blong Hem.

Mi invaetem yu blong givim yu fulwan moa long Sevya, gospel blong Hem, mo Jos blong Hem. Taem yu mekem olsem, bae yu faenem se gospel blong Sevya we i joen wetem Jos blong Hem, i karem paoa i kam insaed long laef blong yu. Paoa ia i bigwan bitim daenamaet. Bae i brebrekem ol ston long rod blong yu mo jenisim yu i kam long wan we i gat raet long kingdom blong God. Mo bae yu “fulap wetem glad we toktok i no naf blong talem mo i fulap long glori.” Long nem blong Jisas Kraes, amen.

Ol Not

  1. Blak paoda i wan miks blong potasiom naitret (soltpita), solfo, mo jakol. Oli putum hem long grup blong smol bom o wan smol paoa bom from hem i slo blong nogud, mo i stap bon sloslo. Bigfala bom o bigfala paoa bom i stap faerap be i no bon, mo i mekem ples i seksek.

  2. Daenamaet i bin mekem se blong krietem ol rod blong tren andanit long graon, ol septik sistem, ol rod blong man i wokbaot we i pas andanit graon—ol bigbigfala enjinia projek we bae i no posibol blong mekem sapos i nogat ol bom we oli save kontrolem taem i bosta, olsem daenamaet. Kolosap evri bigfala win blong enjinia [we oli makem histri long ol las las yia blong 1900 mo ol fas fas yia blong 2000]—London Underground, Brooklyn Bridge, Transcontinental Railroad, [mo] Panama Canal—oli bin dipen bigwan long niu bom ia” (Steven Johnson, The Infernal Machine: A True Story of Dynamite, Terror, and the Rise of the Modern Detective [2024], 24).

  3. From se naetrogliserin hemwan nomo i no gud inaf blong salem, Ascanio Sobrero i no bin rij from wanem we hem i krietem. Be taem Alfred Nobel i bin bildim wan faktri long Avigliana, Itali long 1873, oli bin jusum Sobrero olsem wan advaesa we oli pem gud hem from hem i bin faenem naetrogliserin. Sobrero i bin holem posisen ia kasem taem hem i ded long 1888. (Luk long G. I. Brown, The Big Bang: A History of Explosives [1998], 106.)

  4. Blong save abaot histri blong blak paoda, naetrogliserin, mo daenamaet, luk long Brown, The Big Bang, 1–121.

  5. Gospel blong Jisas Kraes i kolosap semmak long doktrin blong Kraes.

  6. Luk long Mosaea 18:7, 20; 25:15, 22.

  7. Mosaea 18:10.

  8. Luk long 2 Nifae 31:13.

  9. Luk long Mosaea 18:17; 25:18, 23; Alma 4:4–5; Hileman 3:24–26; 3 Nifae 28:18, 23.

  10. Luk long 2 Nifae 31:12–14; Mosaea 18:10.

  11. Jos hem i stamba blong stap givim ol tabu kavenan long ol pikinini blong Papa long Heven. Hemia i from wanem ol memba oli mekem kavenan blong kipim loa blong konsekresen, taem oli endao insaed long ol tempol. Hemia i minim se “oli dediketem o givim fulwan, taem, ol talen, mo evri samting we Lod i blesem olgeta wetem, blong bildimap Jos blong Jisas Kraes long wol ia” (Jeneral Hanbuk: Stap Givim Seves insaed long Jos Ia blong Jisas Kraes blong Ol Lata-dei Sent, 27.2, Gospel Laebri).

  12. Luk long Russell M. Nelson, “Ol Rij Samting long Saed blong Spirit,” Liahona, Novemba 2019, 77.

  13. Luk long Mosaea 18:22; Moses 6:68; Gaed long Ol Skripja, “Ol Boe mo Gel blong God,” Gospel Laebri.

  14. Luk long 3 Nifae 27:13–21.

  15. Luk long Ol Toktok blong Bilif 1:5.

  16. Luk long Russell M. Nelson, “Stap Glad long Presen Ia blong Ol Ki blong Prishud,” Liahona, Mei 2024, 121; 3 Nifae 27:9–11.

  17. Sevya “i givim paoa blong oli aposol; sam narafala man, oli profet; sam narafala man, oli ivanjelis; sam narafala man, oli pasta mo tija” mekem se “yumi evriwan i save kam wan nomo, we yumi bilif long Pikinini blong God, mo yumi savegud Hem, … long fasin ya, bambae yumi no moa stap olsem pikinini. Ol giaman tijing blong ol man ya we oli save wokem ol trik, mo oli save lidim ol man oli go krangke, bambae i no save tantanem yumi i go olbaot olsem wan kenu we solwota i stap sakem i go olbaot, mo win i stap karem i go” (Efesas 4:11, 13–14).

  18. Syncretism i toktok we oli yusum blong ol risal blong ol defdefren relijin, kalja, o skul blong ol tingting.

  19. Luk long Josef Smit—Histri 1:19.

  20. Luk long “Restoresen blong Gospel blong Jisas Kraes we I Fulwan: Tu Handred Yia Ofisol Toktok I Go long Wol,” Gospel Laebri. Presiden Russell M. Nelson i bin ridim ofisol toktok ia olsem pat blong mesej blong hem long Namba 190 Yia Jeneral Konfrens, long namba 5 Epril 2020 long Sol Lek Siti, Yuta (luk long “Lisin Gud long Hem,” Liahona, May 2020, 91–92).

  21. Yumi save aksesem paoa blong God taem yumi praktisim fet long Jisas Kraes, stap sakem ol sin blong yumi, mo stap kipim ol kavenan we yumi mekem wetem Papa long Heven mo Jisas Kraes long ol odinens olsem baptaes, endaomen, mo sakramen.

  22. Luk long Gaed long ol Skripja, “Rong, Fasin blong Talemaot se Man I No Gat,” Gospel Laebri.

  23. Luk long Gaed long ol Skripja, “Tabu, Fasin blong Mekem I Kam,” Gospel Laebri.

  24. Luk long Moronae 10:32–33.

  25. Luk long Hibrus 4:15; luk tu long futnot a.

  26. Luk long Doktrin mo Ol Kavenan 19:15–18.

  27. Luk long Aesea 53:4–12.

  28. Hibrus 12:2.

  29. Mosaea 15:23.

  30. Moronae 7:27–28; luk tu long Doktrin mo Ol Kavenan 45:3–5.

  31. Luk long Mosaea 18:30.

  32. Luk long Inger Höglund and Caj-Aage Johansson, Steg i Tro: Jesu Kristi Kyrka av Sista Dagars Heliga i Sverige 1850–2000 (2000), 66–67.

  33. Doktrin mo Ol Kavenan 115:4.

  34. Luk long Doktrin mo Ol Kavenan 84:19–21

  35. Sapos yu kasem wanem we Jos blong Lod i givim, yu save kam stret gud evriwan long Kraes long bifo Jos blong Hem i kam stret gud evriwan, sapos i hapen. Gol blong Hem i blong mekem yu stret gud, be no Jos blong Hem. Gol blong hem i no blong, tanem kiselgor i go long daemon; be gol blong hem i blong mekem gud yu i kam klin gud olsem gol, blong sevem mo mekem yu kam olsem wan god mo joenem Papa long Heven long kingdom blong Hem. Be ol nid ia i blong kam gol blong yu tu. !Hemia nao i joes blong yufala!

  36. Hileman 5:44.