Stap Lukaotem Ol Ansa long Ol Kwestin long Saed blong Spirit
Ol dia fren, mi testifae se ol tru kwestin blong gospel i save givim spesel janis ia long Papa long Heven mo Jisas Kraes blong helpem yumi blong gro.
Mi save se bae i wan sapraes, be mi bigwan inaf blong tingbaot taem oli bin tijim mifala long skul se i gat naen planet long sola sistem blong yumi. Wan long ol planet ia hem i Pluto, 11 yia Venetia Burney blong, Oxford, England, i givim nem ia taem oli faenem planet ia long 1930. Mo kasem 1992, Pluto i olsem wan planet we i stap longwe long sola sistem. Long taem ia, i nomol blong luk ol pepa blong ol pikinini we oli raet, mekem defren fom blong soem ol planet long klasrum mo ol projek, we wanwan i soem ples we oli save se planet Pluto i stap long hem. Plante man blong saens oli biliv se afta long Pluto, aotsaed long Sola sistem ia, spes i emti.
Be, wan kwestin we i bin stap longtaem wetem ol man blong saens abaot wan spesel kaen komet we ol astronom (man blong stadi planet) oli stadi long hem. I no bin gat ansa blong kwestin ia blong samples 10 yia bifo oli faenem wan nara ples we i stap longwe long sola sistem blong yumi. Wetem smol save we oli gat, ol man blong saens i bin yusum ol spes blong 10 yia blong mekem ol impoten teknoloji tul blong yusum blong stadi moa mo faenemaot moa. Kwik mo impoten kriesen ia i jenisim planet mo mekem se Pluto i kam niufala ples ia long spes mo sola sistem blong yumi wetem 8 planet insaed.
Wan lida blong saens mo investigeta blong Niu Horaesen spes misin (New Horizons space mission) i bin stadi moa abaot Pluto mo talem abaot eksperiens ia: “Yumi ting se yumi andastanem jeografi blong sola sistem blong yumi. Be yumi no save. Yumi ting se yumi andastanem populesen blong ol planet long sola sistem blong yumi. Mo yumi bin rong.”
Wanem we mi luksave abaot spesel histri taem ia blong lan, i sam long ol sem wei, mo ol defren wei bitwin wanem we saens i gat mo rod we yumi ol pikinini blong God i tekem blong kasem ol ansa long ol kwestin blong yumi long saed blong spirit. Speseli nao long hao yumi save ansa inaf folem andastanding blong yumi long saed blong spirit mo rere from nekis level blong gro—mo ples we yumi save go kasem help.
Tijing folem Tijing
Askem ol kwestin mo lukaotem mining, i wan nomol pat blong eksperiens blong yumi long laef ia. Samtaem, i no blong kasem ful ansa we bae yumi nidim blong andastanem, from wei ia i save mekem yumi harem nogud o no wantem save. I gud tumas we plan blong stap glad blong Papa long Heven blong yumi evriwan i stap blong helpem yumi progres nomata i had mo winim wanem yumi no save winim yumiwan, iven yumi no save gud evri samting. Plan blong God i fulap long sore from ol hadtaem blong yumi ol man long wol; i givim yumi Sevya, Jisas Kraes, blong stap Gudfala Man blong Lukaot Sipsip; mo givim yumi insperesen blong yusum ejensi blong yumi blong jusum Hem.
Mo Elda Dieter F. Uchtdorf i bin talem, “Blong askem ol kwestin i no wan saen blong wiknes; hem i wan saen blong save gro.” Toktok blong Presiden Russell M. Nelson i go stret long yumi taem yumi traehad olsem ol man blong lukaotem trutok, i tijim yumi se yumi mas “wantem tumas” mo “askem wetem wan tru hat [mo] wan tru tingting blong wantem save wetem fet long [Jisas] Kraes.” Hem i gohed blong tijim se “‘tru tingting blong wantem save’ i minim se wan i wantem save blong folem tabu wei ia we oli givim.”
Fasin blong traehad blong yumiwan blong gro long wisdom i save lidim yumi blong luklukgud long ol kwestin, we i had o no, tru long glas blong luk se i wok o no, lukaotem mo luksave ol paten mo afta jusum hao blong tokbaot eksperiens mo eksplenem hamas yumi andastanem mo fulumap ol spes we yumi nidim blong save. Taem yumi tingting blong kasem save long saed blong spirit, be, wei ia i save help samtaem be sapos oli wok olgetawan nomo bae i no save wok fulwan taem yumi wantem save sapos i kam long Papa long Heven mo Sevya, Jisas Kraes, gospel, Jos mo plan blong Tufala blong yumi evriwan.
Wei we God Papa mo Pikinini blong Hem i givim wisdom blong Tufala long yumi i fas samting blong invaetem paoa blong Tabu Spirit blong stap tija blong yumi taem yumi putum Jisas Kraes long medel blong ol laef blong yumi mo taem yumi stap lukaotem ansa mo mining long Tufala wetem fet. Tufala i invaetem yumi blong lukaotem trutok taem spendem gud taem blong stadi ol skripja mo lukaotem ol trutok blong yumi tedei mo long taem blong yumi, we i kam tru ol profet mo aposol blong yumi tedei. Tufala i askem yumi blong go wosip oltaem long haos blong Lod mo blong nildaon mo prea from “blong kasem infomesen long heven.” Promes blong Jisas long olgeta we oli bin harem toktok blong Hem antap long Hil i tru semmak long taem blong yumi tedei olsem long taem blong ministri blong Hem: “Sipos yufala i wantem samting, yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala.” Sevya i promes se “Papa blong yufala long heven, fasin blong hem i gud moa i winim fasin blong yufala. Mo hem i save givim ol gudgudfala samting long ol man we oli askem samting long hem.”
Fasin blong Lod blong tij hem i “tijing folem tijing, rul folem rul.” Ating bae yumi nidim blong “wet long Lod” long spes ia bitwin hamas we yumi save mo nekis tijing we bae yumi kasem. Tabu spes ia i save kam ol tijing we yumi kasem blong bigfala jenis i save hapen—wan taem we yumi save “stanap strong wetem fasin ia blong save wet longtaem” from wanem we yumi lukaotem mo riniu paoa blong yumi blong gohed blong kipim ol tabu promes we yumi bin mekem long God tru kavenan.
Kavenan rilesensip blong yumi wetem Papa long Heven mo Jisas Kraes i soem se kingdom blong God i blong yumi. Mo blong stap longwe i nidim blong yumi stretem laef blong yumi wetem ol tabu prinsipol mo stap traehad blong gro long saed blong spirit.
Fasin blong Stap Obei
Wan ki prinsipol we oli bin stap tijim truaot long Buk blong Momon i taem we ol pikinini blong God i jusum blong soem fasin blong stap obei mo blong kipim ol kavenan blong olgeta, oli gohed blong kasem givhan mo daereksen long saed blong spirit. Lod i bin talem long yumi se tru long fasin blong stap obei mo gat strong tingting, bae yumi save kasem save mo waes. Ol loa mo komanmen blong God i no stap blong blokem laef blong yumi be wan get we i gat paoa blong mekem yumi kasem revelesen mo edukesen long saed blong spirit blong yumiwan. President Nelson i bin tijim wan impoten trutok se “revelesen we i kam long God i wok oltaem wetem ol loa blong Hem we i no save finis” mo moa long hemia “i neva agensem doktrin blong Hem.” Wiling blong lisin long ol komanmen blong God, nomata se yu no save fulwan from risen blong hem, i putum yu long kampani blong ol profet blong Hem. Moses 5 i tijim yumi abaot wan spesel taem bitwin Adam mo wan enjel blong Lod.
Afta we Lod i givim “ol komanmen long Adam mo Iv, se bae tufala i mas wosipim Lod, God blong tufala, mo tufala i mas givim ol fasbon blong ol grup blong ol animol blong olgeta, blong mekem wan ofring long Lod,” skripja i se Mo “Adam i bin obei long ol komanmen blong Lod.” Mo “afta long plante dei, wan enjel blong Lod i bin kamaot long Adam, i talem se: ?From wanem nao yu yu stap mekem ol sakrifaes i go long Lod? Mo Adam i bin talem long hem: Mi no save,. Mi save nomo se Lod i bin givim komanmen ia long mi.”
Adam i obei fastaem bifo hem i andastanem mo mekem hem i rere blong kasem tabu save ia we hem i bin tekpat long hem tru tabu simbol blong Atonmen blong Jisas Kraes. Fasin blong obei wetem tingting i stap daon, bae i rere long rod blong yumi long saed blong spirit blong save ol wei blong God mo tabu stamba tingting blong Hem long wanwan long yumi. Traehad blong obei i tekem yumi kam klosap long Sevya, Jisas Kraes, from fasin blong obei long ol loa mo komanmen blong Hem i bildim wan gud koneksen wetem Hem.
Moa long hemia, respek blong yumi long save mo waes we yumi gat yumi kasem tru long fasin blong stap fetful long ol gospel prinsipol mo ol tabu kavenan i impoten blong yumi rere from, blong kasem mo stap man blong lukaot gud long ol toktok we i kam long Tabu Spirit.
Papa long Heven mo Jisas Kraes oli stamba blong evri trutok mo serem waes blong Tufala long wan gud wei. Mo tu, wetem save ia se yumi no gat save blong yumiwan we i defren long God i save helpem yumi save huia blong go long hem mo wea blong putum tras blong yumi long hem.
Gat Moa Tras
OlTesteman stori blong Neman, lida blong ol ami we i bin kasem hiling aot long Leprosi tru long profet Elisa, i wan we mi laekem tumas. Stori ia i soem hao strong fet blong wan “smol haos gel” i jenisim rod blong laef blong wan man mo, blong olgeta we oli biliv, i soem hao sori blong God i kasem olgeta we oli putum tras blong olgeta long Hem mo ol profet blong Hem. Nomata se oli no talem nem blong hem, yang gel ia i bin helpem blong leftemap save blong yumi. Mo bilif blong Neman long testemoni blong gel ia i bin givim insperesen blong hem i kasem hiling tru long wokman we God i bin jusum.
Ansa blong Neman long wanem we profet Elisa i talem blong wasem hem long reva Jodan i no bin isi blong akseptem blong fas taem. Be wan invitesen blong hem blong obei long kaonsel blong profet i mekem se hem i save kam oraet mo kam blong save se God i tru.
Yumi save faenem se sam long ol nid ia long saed blong spirit i gat ol gudfala ansa we i stap mo i no save mekem yumi harem nogud tumas. O, olsem Neman, yumi save faenem se sam nara nid i moa had mo i save mekem ol filing blong yumi i had mo fasfas insaed long yumi. O, semmak olsem ol man blong stadi planet i givim abaot sola sistem, taem yumi stap lukaotem trutok long saed blong spirit, ating bae yumi no kasem stret intepretesen sapos yumi dipen long hamas nomo we yumi save, mo wan en risal we i no stap long plan mo i mekem yumi sori, i save lidim yumi aot long rod blong kavenan. Mo bae i gohed blong gat kwestin i kam kasem we God, we, “i gat evri paoa” mo “evri waes tingting, mo evri save,” we “i harem evri samting” mo i gat sori, i sevem yumi spos yumi sakem sin mo biliv long nem blong hem.
Wan impoten woning long stori blong Neman hem i sapos yumi no folem ol loa mo komanmen blong God i save pulum o pusum taem blong yumi blong gro. Yumi kasem blesing blong gat Jisas Kraes olsem Masta blong Hilim yumi. Blong obei long ol loa mo komanmen blong God i save openem rod blong Sevya blong givim save mo hiling we Hem i save se yumi nidim, folem plan we Hem i gat blong mekem yumi oraet.
Elda Richard G. Scott i bin tijim se “laef ia i wan eksperiens wetem moa tras—gat tras long Jisas Kraes, trastem ol tijing blong Hem, trastem hamas yumi save mekem tru long Tabu Spirit blong obei long ol tijing ia blong stap hapi long hem naoia mo from wan hapi laef we i hae mo i no save finis. Blong trastem i minim wiling blong obei nomata yu no save en long stat (luk long Prov. 3:5–7). Blong gat moa ansa, tras blong yu long Lod i mas strong gud mo i strong moa bitim we yu trastem ol filing mo eksperiens blong yuwan.”
Elda Scott i gohed: “Blong gat fet i blong trastem se Lod i save wanem Hem i stap mekem wetem yu mo we Hem i save finisim hemia blong gud blong yu we i no save finis nomata se yu no save andastanem hao hem i save mekem hemia.”
Endem wetem Testemoni
Ol dia fren, mi testifae se ol tru kwestin blong gospel i save givim spesel janis ia long Papa long Heven mo Jisas Kraes blong helpem yumi blong gro. Taem mi traehad miwan blong lukaotem ol ansa long Lod long ol kwestin long saed blong spirit—bifo mo tedei—i givim mi spes bitwin hamas mi save mo wanem we God i save, blong mi save lanem blong obei Hem mo respekem save ia long saed blong spirit we mi gat naoia.
Mi testifae se putum tras long Papa long Heven mo long ol profet blong Hem we Hem i sendem, bae i helpem yu gro mo go fored long saed blong spirit mo kasem save mo eksperiens blong God we i moa bigwan. Save blong yu bae i jenis from bae yu jenis. God i save se taem yu stap antap moa, bae yu save luk longwe moa. Sevya i invaetem yu blong kasem moa save. Long nem blong Jisas Kraes, amen.