Lukaotem Hem wetem Ful Hat blong Yu
Sapos Jisas Kraes i lukaotem kwaet taem blong toktok wetem God mo blong kam strong moa tru long Hem, bae i waes blong yumi mekem semmak samting.
Sam yia i pas, mi mo waef blong mi i bin stap.olsem ol misin lida long Tokio, Japan. Taem presiden Russell M. Nelson i wan aposol yet, hem i visitim misin blong mi, mo wan misinari i askem hem, olsem wanem blong ansarem gud wan we i talem se hemi bisi tumas blong lisin long olgeta. Elda Nelson i no tekem taem tumas mo talem , “bae mi askem sapos oli bisi tumas blong kaekae lanj long dei ia mo afta tijim olgeta se oli gat wan bodi mo wan spirit, mo bodi olsem we oli mas fidim sapos no bae i ded, i semmak tu long spirit blong olgeta sapos oli no fidim wetem gudfala toktok blong God.”
Hem i intres blong tekem not long Japanis toktok ia “bisi,” isogashii, we i gat tu simbol (忙). Hemia long lef i minim “hat” o “spirit,” mo hemia long raet i minim “ded”— we i minim wanem Presiden Nelson i tijim, se blong stap bisi tumas mo no fidim spirit blong yumi i save lidim yumi blong ded long saed blong spirit.
Lod i bin save—long wol ia we ol samting i muv hariapmo muvmuv olbaot , mo i pulum tingting—blong mekem kwaliti taem wetem Hem bae i wan long ol bigfala jalenj long dei blong yumi. Hem i toktok tru long profet Aesea mo i givim ol kaonsel ia mo blong lukaot gud from i save olsem ol bigfala noes blong konfius long ol dei blong yumi tedei.
“Blong kambak long mi, bambae mi sevem yufala. Sipos yufala i stap kwaet mo trastem mi, bambae mi mekem yufala i strong. !Be nogat! !Yufala i no wantem mekem olsem!
“Yufala i wantem jam long ol hos we oli save spid gud, blong ronwe long ol enemi blong yufala. !Mo i tru tumas, bambae yufala i mas ronwe! Mo ol hos ya blong yufala bambae oli save spid gud, be ol hos blong ol enemi blong yufala bambae oli save spid moa.”
Long nara toktok, nomata se fasin blong sevem yumi i dipen long kambak blong yumi long Hem plante taem mo kamaot long ol samting blong wol ia, be yumi no stap mekem. Mo nomata se tras blong yumi bae i kam long wan paoa we yumi developem long ol kwaet taem, taem yumi sidaon long fored blong Lod mo tingting hevi, be yumi no stap mekem. ?From wanem? From se yumi talem, “No, mifala i bisi wetem ol nara samting—ronwe long ol hos blong yumi, olsem blong talem. From samting ia, bae yumi go longwe mo moa longwe long God; bae yumi wantem blong stap spid bitim mak, mo moa yumi spid , moa Setan bae i biaenem yumi.
Ating hemia nao from wanem Presiden Nelson i plis long yumi plante taem mo askem strong long yumi blong putum taem blong givim long Lod long laef blong yumi—“wanwan mo evri dei.” Hem i rimaenem yumi se “kwaet taem i wan tabu taem—wan taem we i mekem se yu save kasem revelesen we i blong yuwan, mo i putum pis i kam.” Hem i givim kaonsel se, blong harem kwaet smol voes blong Lod, yu tu, yu mas stap kwaet.”
Blong stap kwaet, i nidim moa bitim blong mekem taem blong givim long Lod—i nidim blong lego fasin blong gat tu tingting, ol tingting blong fraet blong yumi mo stap putum hat mo maen blong yumi nomo long Hem. Elda David A. Bednar i tijim, “Toktok blong Lod blong ‘stap kwaet’ i minim moa bitim blong no stap toktok nomo o no muvmuv.” Blong stap kwaet, hem i talem , “i wan wei blong rimaenem yumi blong stap lukluk nomo long Sevya olsem ples we i moa hae.”
Blong stap kwaet hem i wan aksen blong fet mo i nidim hadwok. Lectures on Faith i tokbaot, “Taem wan man i wok wetem fet, hem i wokhad.” Presiden Nelson i talem se: “Lukluk blong yumi i mas stap long Sevya mo gospel blong Hem. Long saed blong tingting, hem i wan wok blong traehad blong stap lukluk long Hem long evri tingting we yumi gat. Be taem yumi mekem, ol tu tingting mo ol fraet blong yumi oli ronwe.” Taem yumi stap tokbaot nid ia blong mekem maen blong yumi i lukluk nomo long Hem, Presiden David O. McKay i talem: “mi ting se yumi no tekem fasin ia blong tingting hevi i impoten tumas , olsem wan prinsipol blong stap fetful. … Fasin blong tingting hevi i wan … long ol doa we i moa tabu we yumi pas tru long hem blong go insaed long ples blong Lod.”
I gat wan toktok long Japanis we hem i mui, we long mi, i minim blong gat moa fet be tru long fasin blong tingting hevi, i minim blong stap kwaet. Hem i gat tu(2) stael blong raeting (無為). Hemia long lef i minim “i nogat” o “i nogat nomo,” mo long raet saed i minim “blong mekem.” Tugeta tufala i minim “no‑mekem.” Blong mekem i sot, toktok ia i save intepretem rong mining ia “blong no mekem samting nating” semmak olsem “blong stap kwaet” i save intepretem rong olsem “no stap toktok o muvmuv” Be, olsem toktok ia “blong stap kwaet,” hem i gat wan mining we i moa hae; blong mi hem i wan rimaenda blong slo daon mo blong laef wetem wan bigfala save long saed blong spirit.
Taem mi stap wok wetem Elda Takashi Wada long ofis blong Eria Presidensi long Asia North, mi lanem se waef blong hem, Sista Naomi Wada, i wan we i finisim art blong han raeting long Japanis. Mi askem Sista Wada sapos hem i save droem toktok ia mui.long stael blong Japanis raeting. Mi wantem blong hangem art blong hanraeting ia long wol blong haos blong mi olsem wan rimaenda blong stap kwaet mo blong lukluk nomo long Sevya. Mi bin sapraes taem kwiktaem hem i no bin agri long simpol rikwes ia.
Long nekis dei, mi kam blong save se mi bin andastanem hem rong, Elda Wada i eksplenem se blong raetem ol stael ia bae i wan hadwok. Bae hem i nidim blong tingting hevi mo tingbaot ol wei mo stael kasem taem we hem i andastanem gud mining blong droing ia insaed long sol blong hem we i save soemaot wetem hat tru insperesen long wanwan drop blong bras blong peint blong hem. Mi bin sem tumas from mi askem hem olsem nomo blong mekem wan samting we i moa bigwan. Mi bin askem hem blong go mo talem sore blong mi from mi no bin save mo blong letem hem i save se mi stap kanselem rikwes blong mi.
Yu save pikjarem long maen sapraes mo fasin blong tangkyu blong mi taem mi rere blong lego Japan, Sista Wada, i givim, long mi presen ia blong naesfala pis blong art blong han raeting blong Japanis stael toktok ia mui. Naoia i hang long wol blong ofis blong mi long ples we mi save luk, blong rimaenem mi blong stap kwaet mo blong lukaotem Lod evri dei wetem ful hat, maen, mo paoa blong mi. Sista Wada i raetem wetem kaen mo bigfala lav, toktok blong mui, o i kwaet, i moa gud bitim eni toktok. Hem i no folem save blong nara man mo folem ol stael blong droing, be, hem i bin kam kolosap wetem art blong han raeting ia wetem ful stamba tingting long hat mo wetem tru tingting.
I semmak, God i wantem se yumi mekem taem blong go kolosap long Hem wetem ful hat blong yumi . Taem yumi mekem olsem, wosip blong yumi i soemaot lav ia we yumi gat long Hem.
Hem i wantem tumas blong yumi toktok wetem Hem. Long wan taem, afta we mi givim fas prea long wan miting wetem Fas Presidensi, Presiden Nelson i tanem hem i kam long mi mo talem, “Taem yu stap prea, mi tingting long hamas God i i glad long taem ia we yumi tekemaot long bisi program blong yumi blong luksave Hem.” Hem i simpol be yet i gat paoa blong rimaenem yumi hamas i minim long Papa long Heven taem yumi stop blong toktok wetem Hem.
Olsem hamas Hem i wantem yumi blong lukluk long Hem, Hem bae i no fosem yumi blong kam long Hem. Long Ol man blong Nifae, Lod we i laef bakegen i talem, “Hamas taem bae mi karem yufala i kam semmak olsem wan faol i karem ol pikinini blong hem, mo, yufala i no wantem.” Hem i folem wetem wan invitesen blong hop tu we i aplae long yumi tedei: “Hamas taem bae mi karem yufala i kam olsem wan faol i karem ol pikinini blong hem andanit long ol wing blong hem, sapos yufala i sakem sin mo kambak long mi wetem ful stamba tingting blong hat.”
Gospel blong Jisas Kraes i givim yumi ol janis blong gobak long Hem oltaem. Ol Janis ia i tekem tu, prea evri dei, skripja stadi, odinens blong sakramen, sabat dei mo tempol wosip. ?Bae i olsem wanem sapos yumi tekemaot ol tabu janis ia blong mekem ol lis mo putum olgeta long “blong no mekem” lis—we i minim blong tekem i kam kolosap olgeta wetem semmak tingting mo lukluk we Sista Wada i bin mekem wetem art blong han raeting blong hem?
Maet bae yu ting se, “mi no gat taem blong hemia.” Plante taem mi bin filim olsem. Be letem mi givim wan tingting se wanem we i impoten i no nidim moa taem be moa aweanes blong lukluk nomo long God truaot ol taem we yumi putum finis i stap blong Hem.
Eksampol, long taem blong prea, ?bae i olsem wanem sapos yumi spendem smol taem blong toktok mo moa taem blong stap nomo wetem God; mo taem we bae yumi toktok blong givim ful hat mo talemaot stret tangkyu mo lav blong yumi?
Presiden Nelson i givim kaonsel se yumi no ridim ol skripja nomo be givim filing blong glad from olgeta. ?Wanem nao bae i defren sapos yumi mekem i smol blong ridim mo moa blong filim glad?
?Bae i olsem wanem sapos yumi mekem moa blong rere long ol maen blong yumi blong tekpat long sakramen mo wetem glad, tingting hevi long ol blesing blong Atonmen blong Jisas Kraes long taem blong odinens blong sakramen?
Long Sabat, Hibrus lanwis i minim “spel,” ?bae i olsem wanem sapos yumi spel aot long ol nara samting we yumi kea long hem mo tekem taem blong sidaon kwaet wetem Lod blong givim taem blong yumi fulwan long Hem?
Long taem blong tempol wosip blong yumi, ?bae i olsem wanem sapos yumi traehad moa blong stapgivim moa taem o stap smol moa long selestial rum blong stap kwaet mo lukluk bak?
Taem yumi lukluk smol nomo long wanem blong mekem mo moa blong stap mekem kavenan we i joenem mo mekem yumi kam strong moa wetem Papa long Heven mo Jisas Kraes, mi testifae se wanwan long ol tabu taem ia bae oli kam antap, mo bae yumi kasem insperesen we yumi nidim long laef blong yumiwan. Yumi olsem Mata long stori blong Luk, we plante taem yumi “kea mo trabol long tingting from plante samting.” Be, taem yumi toktok wetem Lod evri dei, Hem bae i helpem yumi blong save wanem nao yumi nidim moa.
Iven Sevya i tekem taem long ministri blong Hem blong stap kwaet. Ol skripja oli fulap wetem ol eksampol blong Lod we i kamaot nomo i go long wan ples—wan hil, ples we i no gat man long hem, wan drae ples o i stap go “longwe lelebet aot”—blong prea long Papa. Sapos Jisas Kraes i lukaotem kwaet taem blong i stap toktok wetem God mo blong kam strong moa tru long Hem, bae i waes blong yumi mekem semmak samting.
Taem yumi mekem hat mo maen blong yumi i lukluk nomo long Papa long Heven mo Jisas Kraes mo lisin long kwaet smol voes blong Tabu Spirit, bae yumi gat wan moa klia tingting long wanem yumi nidim moa, developem moa lav mo sore, mo faenem spel mo paoa long Hem. Long wan wei, blong helpem God blong muvum wok blong Hem blong fasin blong sevem man i go hariap mo kam olsem wan god, bae i nidim blong yumi slo daon. Blong oltaem stap muvmuv i save ademap noes mo konfius long laef blong yumi mo stilim aot pis blong yumi we yumi lukaotem.
Mi testifae se taem yumi gobak oltaem long Lod wetem ful stamba tingting blong hat, wetem kwaet fasin mo tras bae yumi kam blong save Hem mo filim lav blong promes blong Hem we i no gat en long yumi.
Lod i promes se:
“Kam kolosap long mi mo bambae mi kam kolosap long yufala; lukaotem mi wetem strong tingting mo bambae yufala i faenem mi.”
“Sipos yufala i lukaot mi long olgeta tingting blong yufala, bambae yufala i save faenem mi.”
Mi testifae se promes ia i tru. Long nem blong Jisas Kraes, amen.