Presiden Nelson I Selebretem 100 Yia Betdei blong Hem

Ol lida blong Jos Ia blong Jisas Kraes blong Ol Lata-dei Sent oli joenem famli mo ol fren long 9 Septemba, 2024, blong luksave profet mo Presiden blong Jos, Russell M. Nelson, long 100 yia betdei blong hem.

Oli bin mekem spesel taem long Sol Lek Siti mo oli brodkastem raon long wol. Long taem ia i bin gat laef miusik, ol vidio we i soem respek long Presiden we i kam long ol lida blong ol defren relijin, ol toktok we i kam long ol lida blong Jos mo long ol memba blong famli blong Presiden Nelson, mo ol vidio we i kam long memba blong Jos we i soem olsem wanem oli bin givhan wan afta long wan.

Presiden Nelson i talem tangkyu long ol famli, ol fren, mo Ol Lata-dei Sent from kaen fasin blong olgeta mo sapot. Hem i serem tangkyu blong hem from ol betdei mesej we i fulap tumas blong kaontem, mo long wol we i bin ansa long invitesen blong hem blong “99+1”, we hem i bin leftemap tingting blong ol pipol blong “go aot long ‘wan ia’ long laef blong yumi we maet hem i stap filim se hem i lus o i stap hemwan” (Facebook, June 1, 2024, facebook.com/russell.m.nelson).

Profet i tokbaot moa hamas fet i impoten, blong lukluk laef wetem wan lukluk blong laef we i no save finis, mo long sakrifaes blong Atonmen blong Jisas Kraes. “Ol dia brata mo ol sista blong mi, hamas laef blong yu i longwan, i no impoten semmak long kaen laef we yu yu laef folem,” Presiden Nelson i talem. “Long wanwan long yumi, iven wan man we i gat 100 yia, laef i pas hariap. Prea blong mi i we bae yu letem God i win insaed long laef blong yu. Mekem ol kavenan wetem Hem. Stap long kavenan rod. Redi blong gobak stap wetem Hem bakegen.”

Presiden Dallin H. Oaks mo Henry B. Eyring, ol kaonsela blong Presiden Nelson insaed long Fas Presidensi, tufala i bin serem ol tingting blong tufala we tufala i stap wok long saed blong profet blong sikis mo haf yia finis. Tufala i tokbaot plante kaen fasin blong Presiden Nelson, respek we hem i gat long ol narawan, mo fasin we hem i stap soem olsem hemia blong Kraes.

“Blong stap long wan rum o long wan miting o blong storian wetem Presiden Nelson, i givim yu janis ia blong eksperiensem se bae i filim olsem wanem taem bae yu stap wetem Sevya,” Presiden Oaks i talem. “Hem i ripresentem Sevya. Mo hem i man we yumi save folem eksampol blong hem.”