Bigfala Wok We Yumi No Luk blong Jeneral Konfrens: Wok blong Setemap Stej blong Konfrens Senta

Taem yumi pikjarem jeneral konfrens, maet yumi stap pikjarem pulpit mo ol jea blong ol lida blong Jos long fored blong ol paep blong ogan. Be Konfrens Senta i no luk olsem blong ful yia.

Plante iven i stap hapen long Konfrens Senta we i nidim blong oli setemap long wan defren wei, mo i tekem ol aoa blong redi long stej (we oli stap singaotem se “rostrum”) blong jeneral konfrens. Wan tim blong 10 pipol oli spendem samples tri wik blong redi long stej, ol ples blong spel, mo ol nara fasiliti blong Konfrens Senta, blong ol visita oli save gat wan gud taem long jeneral konfrens.

Hemia sam tru intresting samting:

• I gat 18 bigfala pis blong stej we i mekemap ol mein floa blong stej, mo weit blong wanwan pis i samples 1.5–4 tan.

• I gat ol pilo we i fulap long ea we i leftemap ol hevi pis ia aot long graon, mo i mekem se i isi blong muvmuvum ol pis ia.

• I gat samples 500 pis we oli moa smosmol, olsem ol rel mo panel, we oli ademap tu.

• I gat ol doa we oli 24 mita longfala, we i mekem se oli save muvum ol bigfala pis blong stej i go long ples blong olgeta.

• Tim blong stej oli redi tu long ol fasiliti blong sekiuriti, ol misinari, mo blong lukaot long ol pipol we bae oli kam—mo hemia ova long wan total blong 600 wok blong mekem.

Joel Wright, supavaesa blong stej tim, i bin help long 50 jeneral konfrens. Hem i stap talem se tim blong hem oli ol “hiro we oli no luksave olgeta” mo we oli hadwok bigwan. Hem i talem se, “I no wan bigfala samting blong glad from blong setemap wan jea o tebol o putum fasiliti tugeta.” Be sapos i nogat ol samting ia, konfrens bae i no semmak.

Brandon Urry we i lida blong stej tim i talem se, i tekem “plante defren pipol wetem ol defren kaen skil mo ol defren bakgraon” blong mekem wok blong olgeta i hapen—“blong soemaot lav blong Lod mo ol toktok we Hem i gat blong serem wetem evriwan.”

Brandon i talem se oli nidim evriwan wetem ol defren kaen skil ia blong “kam tugeta from wan stamba tingting.” From se stamba tingting ia i abaot Jisas Kraes, stej tim ia i filim se Hem i stap mo oli luk ol merikel blong Hem.

Robert Simpson, we i wan lida tu insaed long stej tim ia i talem se: “Mi … filim olsem Spirit blong Lod i kam insaed long ol miting blong mifala mo i stap blong helpem mifala … blong finisim [wok]. … Samtaem mifala i stap tingting se olsem wanem nao bae mifala i winim evri samting ia. Be mifala i prea mo askem help blong Papa long Heven.”

Mo olsem we Joel i talem tu: “Taem mifala i stanap strong kasem en, gohed strong, mo wok had, [stej] i stap gud long ples blong hem, mo i redi blong oli yusum long moning blong jeneral konfrens.” Joel i singaotem se “hemia i givim insperesen” from se ol merikel oli kam tru long Jisas Kraes.