Fasem Yu long Jisas Kraes: Stap Kam Olsem Sol blong Wol Ia

I Kam long Elda José A. Teixeira

Blong Presidensi blong Olgeta Seventi

Taem yumi gohed blong fasem yumi long Lod, bae laef blong yumi, long nomol wei, bae i ripresentem laet blong Hem, mo bae yumi kam olsem sol blong wol ia.

Sevya i bin tijim se taem oli “singaotem [yumi] long gospel blong [Hem] we i no gat en, mo mekem wan kavenan wetem wan kavenan we i no gat en, oli kaontem [yumi] olsem sol blong wol.” Oli mekem sol wetem tu samting we oli joenem tugeta. Yumiwan yumi no save kam sol; sapos yumi wantem blong stap olsem sol blong wol, yumi mas fasem yumi long Lod, mo hemia i wanem mi luk taem mi joen tugeta wetem ol memba blong Jos raon long wol—mi luk ol fetful memba blong Jos oli joen long Lod, oli wokhad oltaem blong givim seves long ol narawan mo stap olsem sol blong wol.

Strong komitmen blong yufala, i wan eksampol we i stap saen. Mifala i talem tangkyu mo glad long seves blong yufala.

Ol yut blong yumi oli bin soem strong paoa long tingting mo stap fetful, we i gud tumas. Oli akseptem wetem bigfala intres, wok blong famli histri, mo plante visit blong olgeta we i go long haos blong Lod, oli wan pruf blong fasin blong olgeta blong stap fetful. Fasin blong olgeta blong wantem givim ful taem mo paoa blong olgeta blong givim seves long ol misin raon long wol i ripresentem wan fet we i dip mo i no save jenis. Oli no stap tekempat nomo, be oli stap lidim rod ia blong stap kam ol disaepol we oli fasem olgeta long Jisas Kraes. Seves blong olgeta i soemaot laet mo hop, we i stap tajem laef blong plante man mo woman. Long yufala, ol yut blong Jos, mifala i talem bigfala tangkyu, from ol seves blong yufala we i givim insperesen. Yufala i no fiuja blong Jos nomo, be yufala i yut blong taem ia tedei. !Mo i tru, yufala i olsem sol blong wol ia!

Mi lavem Lod, Jisas Kraes mo filim blesing blong gat janis blong wok long saed blong yufala long Jos ia blong Lod. Yuniti blong yumi mo paoa, i stanap strong long bilif blong yumi we yumi serem, we i givim hop long yumi se yumi neva stap yumiwan long wokbaot ia. Tugeta, yumi save gohed blong bildimap kingdom blong God we i stap strong tru long seves, lav mo fet we i no muvmuv.

Taem Jisas Kraes i tij long Lagun blong Galili, plante taem Hem i tij wetem ol samting we oli save gud mo yusum evri dei long olgeta we oli lisin blong givimaot impoten trutok ia long saed blong spirit. Wan long ol samting ia, hem i sol. Jisas i talemaot, “Yufala i olsem sol long ol man long wol,”wan toktok we i rij long mining mo impoten tumas, speseli blong ol pipol long taem blong Hem we oli andastanem valiu blong sol i defren.

Long taem bifo, wok blong karem i kam tugeta sol long Algarve, wan ples long saot blong hom kantri blong mi Portugal, fasin ia i bin stap blong plante taosen yia stat long taem we Rom i rul. Sistem we ol wokman blong sol oli bin yusum we oli singaotem marnotos, i bin jenis smosmol truaot long taem ia, mo hemia i naes tumas. Ol wokman ia we oli wok strong, oli yusum ol teknik we kampani i bin stap yusum blong longtaem, blong wok wetem han nomo, mo kipim wan fasin blong wok we oli bin yusum blong handred yia i pas.

Fasin blong wok ia blong karem sol i kam tugeta, long taem bifo oli singaotem “flaoa blong sol.” Blong luksave fulwan, hamas proses blong karem i kam tugeta flaoa blong sol, hem i nid blong save olsem wanem blong mekem sol. Long eria we i gat smol gras mo solwota i stap kavremap Algarve, i mekem wan gudfala ples blong stap mekem sol. Oli mekem rod blong solwota i ron i go blong mekem ol pul we i no dip, we oli singaotem, sol pans, we oli lego blong strong san i bonem blong i drae. Taem wota i drae, flaoa blong sol i krietem smol skwea pis blong sol antap long ol pul ia. Ol smol skwea pis blong sol ia oli klin mo naes tumas, mo gat wan spesel tes. Marnotos [we i fasin blong wokem sol], wetem kea, i karemaot gud ol smol skwea pis blong sol wetem ol spesel tul, wan proses we i nidim bigfala wok mo i mas stret gud. Long Portugal, hae kwaliti blong sol, oli singaotem “krim sol” from oli save karemaot gud olsem krim we sloslo i kam antap long melek. Hae kwaliti blong sol ia, oli laekem tumas from i klin gud mo gat spesel tes, we i impoten tumas long ol popula kijin blong kuk.

Semmak olsem marnotos we hem i fasin blong wok had blong]karem sol i kam tugeta wetem gud kwaliti, yumi tu olsem ol kavenan pipol blong Lod, yumi oltaem wokhad blong mekem se lav mo eksampol blong yumi i mas soem gud stret fasin ia blong Sevya Jisas Kraes.

Long wol blong bifo, sol i moa bitim blong putum long kaekae nomo—hem i wan impoten samting blong mekem kaekae i no roten mo wan saen blong klin fasin mo kavenan. Ol pipol oli save se sol i impoten blong protektem kaekae mo givim gud tes long kaekae. Mo tu, oli andastanem ol rabis samting we i save hapen long sol blong i stap lusum tes mo kwaliti blong sol taem i no klin mo i wik.

Olsem we sol i save lusum kwaliti blong hem, yumi tu, yumi save lusum paoa blong yumi long saed blong spirit, sapos fet blong yumi long Jisas Kraes i nomo strong. Yumi save stap semmak nomo aotsaed long yumi be, sapos yumi nogat wan strong fet insaed long yumi, yumi no save mekem wan jenis long wol mo leftemap tingting blong olgeta raon long yumi blong save kam moa gud.

?Wanem nao yumi save mekem blong putumaot hadwok blong yumi blong stap difren mo stap wan jenis long wol ia we yumi nidim tedei? ?Olsem wanem nao yumi save protektem fasin blong stap wan disaepol mo gohed blong stap wan gudfala eksampol?

Mi tingbaot yet ol toktok blong profet se: “God i wantem yumi blong wok tugeta mo helpem wanwan long yumi. From hemia nao, Hem i sendem yumi long wol ia, insaed long ol famli, mo i oganaesem yumi long ol wod mo ol stek. From hemia nao, Hem i askem yumi blong givim seves mo givhan long wanwan long yumi. From hemia nao, Hem i askem yumi blong laef insaed long wol ia, be i no folem fasin blong wol ia.”

Taem laef blong yumi i bisi long fulap wok, yumi stop blong mekem ol wok blong God; long nara toktok, taem we laef blong yumi i i no folem stamba tingting blong God, mo ol seves we i gat mining we yumi stap givim long ol narafala man mo ol tabu janis blong stap tingting hevi mo stap luklukbak long hem, sloslo i save mekem yumi lus long ol aktiviti mo ol intres blong yumiwan, mo save lusum intres long wok blong God. Meresin blong hemia i blong gohed blong tekpat long seves—stap wok wetem strong tingting long ol gud wok, mo mekem yumiwan kam moa gud mo insaed long sosaeti we yumi stap long hem.

Ol dia brata mo sista blong mi, hem i wan blesing we yumi evriwan i gat tedei blong stap long Jos Ia blong Jisas Kraes mo gat janis blong givim seves insaed long Jos Ia blong Hem. Ol situesen blong yumi oli save stap jenis, be yumi evriwan i save mekem wan jenis.

Tingbaot marnotos,[we i fasin blong wokem sol] ol wokman blong sol; oli yusum ol simpol tul blong karemaot !ol smol skwea pis blong sol we i moa gud! Mo tu, yumi save mekem ol simpol samting we taem yumi mekem evri taem, long wan wei we i smol mo i gat mining, i save mekem fasin blong yumi blong stap wan disaepol mo blong stap komitim yumi long Jisas Kraes, i kam moa strong. Hemia ol fo simpol be yet ol waes wei we yumi save traehad blong stap “olsem sol ia long ol man long wol”:

Kipim haos blong Lod wan pat we i moa impoten taem yumi wosip. Naoia, we ol tempol oli kam moa kolosap bitim bifo, blong stap putum i kam faswan, evri dei wosip insaed long haos blong Lod bae i helpem yumi blong lukluk nomo long ol samting we oli moa impoten mo mekem Kraes i stap long medel blong laef blong yumi. Insaed long tempol, yumi faenem pat we i moa impoten tumas blong fet blong yumi long Jisas Kraes mo tru fasin blong stap wosipim Hem.
Blong stap mekem gud wok blong yumi blong mekem ol narawan oli kam strong moa, hem i blong stap laef folem gospel tugeta. Yumi save mekem ol famli blong yumi oli kam strong moa tru long ol hadwok we yumi mekem evri taem blong karem ol gospel prinsipol i kam long ol laef mo long ol hom blong yumi.
Stap akseptem wan koling mo stap givim seves insaed long Jos. Seves insaed long lokol branj o wod blong yumi, i letem yumi blong sapotem wanwan long yumi mo gro tugeta. Blong stap givim seves, oltaem i no isi, be oltaem i gat blesing.
Mo laswan, blong stap yusum ol dijitol tul blong komunikesen wetem stamba tingting. Tedei, dijitol komunikesen tul i letem yumi blong konek bitim taem blong bifo. Olsem plante long yufala, mi yusum ol tul ia blong konek wetem ol brata mo sista insaed long Jos mo wetem famli blong mi mo ol fren. Taem mi konek wetem olgeta, mi filim se mi stap kolosap moa long olgeta; yumi save givhan long wanwan long yumi long ol taem we i gat nid, taem yumi no save stap fes tu fes. Ol tul ia oli wan blesing, be yet, oli save dragem, yumi longwe aot long ol fasin blong wok tugeta we i gat mining, mo long en, i save pulum yumi i go insaed long ol evri dei fasin blong westem taem blong yumi long ol aktiviti we i no gat stamba tingting. Blong stap traehad blong stap olsem sol long ol man long wol, i tekem tu, plante samting blong mekem bitim blong skrol long ol sot vidio long sosol media long wan fiftin sentimita skrin.

Taem yumi mekem haos blong Lod i impoten long laef blong yumi, i minim se blong mekem ol narawan oli kam strong moa taem oli laef folem gospel, akseptem ol koling blong givim seves, mo yusum ol dijitol tul wetem stamba tingting, yumi save protektem paoa blong yumi long saed blong spirit. Olsem sol, long wei we i klin tumas, i gat paoa blong mekem i kam bigwan mo protektem, semmak tu long fet blong yumi long Jisas Kraes taem we yumi lukaotem gud mo protektem, taem yumi stap fetful blong givim seves mo lav olsem hemia blong Kraes.

Taem yumi gohed blong stap konek wetem Lod, bae laef blong yumi, long nomol wei, bae i ripresentem laet blong Hem, mo bae yumi kam olsem sol long ol man long wol. Long wok ia, yumi no mekem laef blong yumi nomo i kam moa gud, be, mekem tu ol famli mo ol komuniti blong yumi i kam strong moa. Bae yumi traehad blong stap gohed blong fasem yumi wetem Lod, neva lusum tes blong yumi, mo stap smol klia pis blong sol we Lod i wantem yumi blong stap olsem. Long nem blong Jisas Kraes, amen.