Ngaohikoviá
ʻE Lava Nai Ke Fakamoʻui Au mei he Meʻá Ni?

ʻE Lava Nai Ke Fakamoʻui Au mei he Meʻá Ni? Tokoni Maʻanautolu ne Ngaohikoviá (2018).

ʻE Lava Nai Ke Fakamoʻui Au mei he Meʻá Ni? Tokoni Maʻanautolu ne Ngaohikoviá

ʻE lava nai ke fakamoʻui au mei he meʻá ni?

ʻOku malava ʻa e fakaakeaké. ʻE lava ke ke fakaakeake mei ha faʻahinga ngaohikovia ʻi he tokoni ʻa e Fakamoʻuí ʻo fakafou ʻi Heʻene Fakaleleí.

ʻI he taimi ʻokú ke mamahi aí, ʻe ngali taʻemalava ke ke tui ki he fakakaukau ko e mamahi ʻokú ke fouá ʻe lava pē ke fetongi ʻaki ia e nongá. Mahalo ʻe ʻikai fakatokangaʻi mo ʻiloʻi ho ngaahi kafó ʻo lauitaʻu. Mahalo ʻe ʻikai ʻiloʻi ʻe ha niʻihi ho mamahí he ʻokú ke fūfuuʻi e mamahí ʻaki hoʻo malimali mo moʻui pē ʻo hangē ʻoku ʻikai ha meʻa ʻe fehalaākí.

Lolotonga hono tuku pōpula ʻo e Palōfita ko Siosefa Sāmitá ʻi he fale Fakapōpula ko Lipetií, naʻá ne fai ha tohi ki he Siasí, ʻa ia naʻe kau ki ai e “fatongia ʻo e Kāingalotú ʻo kau ki honau kau fakatangá” (vakai, Tokāteline mo e Ngaahi Fuakava 123, ‘uluʻi vahé). ʻI he tohí, naʻe ʻikai ke ne tala ki he Kāingalotu ne tofanga ʻi he fakatangá mo e ngaahi kafo fakatuʻasinó ke nau ʻūkuma pē honau ngaahi mamahí pea fakangalingali ʻo hangē naʻe ʻikai hoko ha meʻá. Ka naʻá ne fakahinohinoʻi kinautolu ke tānaki fakataha e ngaahi fakamatala ʻo ʻenau faingataʻaʻiá pea ʻoatu ia ki he kau maʻu mafaí.

ʻOku pehē pē ʻa e ʻikai fie maʻu ke ke fūfuuʻi pe fakangalingali ʻo hangē naʻe ʻikai ha meʻa ʻe hokó. Mahalo te ke ongoʻi tuenoa, vaivai, puputuʻu, taʻelata, pe liʻekina. Ko e hā pē hoʻo fakakaukaú pe ngaahi ongó, ʻiloʻi muʻa ʻoku taʻe-fakangatangata ho mahuʻingá pea ʻoku ʻofeina koe (vakai, Tokāteline mo e Ngaahi Fuakava 18:10).

Ko e Founga ʻo e Fakaakeaké

ʻE tokoni atu ʻa e fakaakeaké ke fakasiʻisiʻi ho mamahí. Ko ha founga ia ʻoku fie maʻu ki ai ha taimi, ka ʻe malava pē ʻi he tokoni ʻa e Fakamoʻui ko Sīsū Kalaisí koeʻuhi ko ʻEne feilaulau fakalelei maʻatautolú.

ʻOku kau ki he founga fakaakeaké ʻa e ngaahi meʻá ni:

  • Tali mo tengihia e molé

  • Vahevahe hoʻo kavenga mafasiá mo e niʻihi kehé

  • ʻIloʻi e nunuʻa ʻo e ngaohikoviá ʻi hoʻo moʻuí pea fekumi ki ha faleʻi fakapalōfesinale ʻo ka fiemaʻu

  • Mahino ʻoku ʻikai ke fakamatalaʻi koe ʻe he ngaohikovia naʻá ke aʻusiá

  • Falala ki he malava ʻa e ʻOtuá ʻo faifakamoʻuí

Fehuʻi pē kiate koe ʻa e ngaahi meʻá ni ʻi hoʻo ngāue ʻi he foungá ni:

  • Kuo uesia fēfē ʻeku moʻuí ʻe he ngaohikoviá?

  • ʻOku ou ʻifē nai ʻi he tuʻunga ʻo e fakaakeaké?

  • Ko e hā ʻe tokoni mai ke u lava ai ʻo laka ki muʻá?

Fakakaukau ke fakafehoanaki e ngaahi founga fakaakeake fakaelotó ki hono tokangaʻi mo faitoʻo ha lavea fakaesino. Tau pehē naʻe fasi ho vaʻé ʻi hoʻo kei siʻí. Ne ʻikai ke ke ʻalu ki he toketaá ke simaʻi, ka ke tohopo takai pē ʻo aʻu ki he mole atu ʻa e felangaakí, ka ʻoku ʻi ai maʻu pē ha kiʻi mamahi ʻi hoʻo foʻi laka kotoa. Hili ha ngaahi taʻu mei ai kuó ke loto ke toʻo atu e mamahí peá ke ʻalu leva ki ha toketā. Kuo pau ke toe fakafoki ʻe he toketaá ʻa e huí, fakamaʻa ha tunga pē naʻe ʻi ai, simaʻi, pea fakakau koe ki he fakamālohisino fakafaitoʻó ke fakamālohia ho vaʻé.

ʻI he fekumi ko ia ki he founga fakaakeake mei he ngaohikoviá, kuo pau ke ke ʻuluaki ʻiloʻi ʻoku moʻoni ʻa e mamahí pea ʻe lava ke fai ha meʻa ki ai. ʻOku kau heni ʻa hono tali ʻo e meʻa naʻe hokó pea fakaʻatā ke fakatokangaʻi e ngaahi ongoʻi kafó, ilifiá, mo e loto-mamahí. ʻOku faʻa ʻaonga ke ngāue mo ha faifaleʻi fakapalōfesinale ʻoku taukei ʻi he founga fakaakeake ko ʻení. (Vakaiʻi mo hoʻo pīsopé ke ʻilo ko e hā e ngaahi maʻuʻanga tokoni ʻa e Ngaahi Tokoni ki he Fāmilí ʻoku lava ke maʻu ʻi homou feituʻú.)

ʻI hoʻo ngāue ke fakaakeaké, ʻe malava ke ke kei manatuʻi pē ho ngaohikoviá; ka neongo iá, ko e mālohi ʻo e ngaahi ongo mo e uesia kovi ʻo e ngaahi ʻausiá ni ʻi hoʻo moʻuí, ʻe hōloa ia pea mahalo ʻe faifai pē pea ʻikai toe ʻi ai.

ʻOku tatau ai pē pe naʻe ʻi ai ha tokoni fakapalōfesinale kiate koe pe ʻikai, ka ʻe tokoni haʻo lotu, ako ki he moʻui ʻa e Fakamoʻuí mo ʻEne Fakaleleí, maʻu ha tokoni mei ha niʻihi kehe, pea fekumi ki ha tokoni fakalaumālie mei ha taki ʻo e Siasí (vakai, “Te u kumi tokoni nai ki fē?”). Mahalo ʻe lava ke tokoni atu e kau taki ʻo e Siasí ke fakamaʻamaʻa hoʻo kavengá, pea ʻe lava ke nau maʻu ha ueʻi fakalaumālie ke tokoniʻi koe ke mahino ho mahuʻinga fakalangí mo ho vā fetuʻutaki mo e Tamai Hēvaní mo e Fakamoʻuí.

Naʻe pehē ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá: “‘Oku ou fakamoʻoni ʻi he loto fakamātoato ʻoku ʻikai ke ke haʻisia pea kuo pau ke ʻoua naʻá ke ongoʻi halaia ʻi hano fakamamahiʻi lahi koe ʻo ʻikai ke ke loto ki ai ʻe ha tōʻonga fakamamahi, tōʻonga taʻetaau, pe hia fakamalaʻia ʻa ha taha kehe. ʻE lava ke uesia koe ʻe he ngaohikoviá, ka ʻoku ʻikai fie maʻu ia ke tuʻuloa. …

“Maʻu e mahino ʻoku fie maʻu ha taimi lahi ki he fakakeaké. ʻOku meimei ke hoko fakakongokonga mai ʻa e fakaakeaké. ʻOku fakavaveʻi ia ʻi he taimi ʻoku fakahaaʻi ai ʻa e houngaʻia ki he ʻEikí ʻi he tuʻunga kotoa pē ʻoku ʻi ai ha fakalakalaka” (“Healing the Tragic Scars of Abuse,” Ensign, May 1992, 32).

Ko Hono Fakamolemoleʻí

ʻI hoʻo ngāue ʻi he founga ʻo e fakaakeaké, te ke lava ʻi he tokoni ʻa e Fakamoʻuí, ʻo fakatupulaki hoʻo tuʻunga malava ʻo fakamolemoleʻi ʻa kinautolu naʻa nau fakamamahiʻi koé.

Ko e konga ia ʻo e fakaakeaké ʻa e aʻu ki ha tuʻunga te ke lava ai ʻo tukuange ʻa e tokotaha faihalá mei heʻene haʻisia ki heʻene ngaahi tōʻongá. ʻOku tatau ai pē pe naʻe haʻisia ha taha pe ʻikai ki he kau maʻu mafai fakapuleʻangá, ka kuo pau ke tuʻu e tokotaha faihala kotoa pē ʻi ha ʻaho he ʻao ʻo e ʻOtuá (Tokāteline mo e Ngaahi Fuakava 137:9).

ʻOku tatau ai pē pe ko e fē ʻa e taimi pe founga ʻe haʻisia ai ʻa e tokotaha faihalá, ka ʻe lava ke fakapapauʻi atu ʻi hono “ngāue ʻaki [ʻe ha taha pē] ha fakakouna pe puleʻi pe fakamālohiʻi ʻo e loto ʻo e fānau ʻa e tangatá, ʻi ha kihiʻi momoʻi founga taʻe-māʻoniʻoni, vakai, ʻoku mahuʻi atu leva ʻa e ngaahi langí; ʻoku mamahi mo e Laumālie ʻo e ʻEikí”(Tokāteline mo e Ngaahi Fuakava 121:37; tānaki atu e mataʻitohi fakahihifi). Vakai ki he “ ‘Oku malava nai ke fakamolemoleʻi?” ki ha tokoni ʻoku lahi angé.

Ngaahi Maʻuʻanga Tokoni ʻa e Koló mo e Siasí

(ʻOku ʻi ai ha niʻihi ʻo e ngaahi maʻuʻanga tokoni ʻi laló, ʻoku ʻikai faʻu, tauhi, pe puleʻi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Neongo ʻoku fakataumuʻa e naunau ko ʻení ke hoko ko ha toe maʻuʻanga tokoni, ka ʻoku ʻikai poupouʻi ʻe he Siasí ha kanoloto ʻoku ʻikai fenāpasi mo hono ngaahi tokāteliné mo e ngaahi akonakí.)

Ngaahi Fakamatala Fekauʻakí