Folasaga

Olenei taiala e mafai ona avea o se faamanuiaga i lou olaga, pe o e tauivi ma toatuga o le tagofia o mea ua fai ma au vaisu po o e faifai mea faatasi foi ma se tasi o faia. O Laasaga e Sefululua a le Alcoholics Anonymous ua faafetaui i totonu o se auivi o aoaoga faavae, mataupu faavae, ma talitonuga a Le Ekalesia a Iesu Keriso o le Au Paia o Aso e Gata Ai. Ua faaalia i lenei taiala ni mataupu faavae autu i amataga o vaega taitasi. O le a fesoasoani lenei taiala e te iloa ai pe faapefea ona e faaaoga nei mataupu faavae; e mafai ona suia ai lou olaga.

Ua fuafuaina lenei taiala o se tusi o galuega ma se faasinoala mo i latou e auai i se vaega e fesoasoani i le toe faaleleia o olaga o e ua tagofia mea ua fai ma vaisu, ma ua lagolagoina e le Tautua a le AAG mo Aiga. Ae ui i lea, o aoaoga ma mataupu faavae o loo aoaoina ai o le a aoga tele foi ia i latou o nonofo i mea e le mafai ona auai atu ai i se vaega fesoasoani. E mafai ona faaaoga lenei taiala e tagata o loo saili ia suia o latou olaga ae maise o i latou e naunau e galulue taitoatasi ma se epikopo po o se faufautua faapolofesa.

Ua valaaulia e le Tautua a le AAG mo Aiga ia alii ma tamaitai na mafatia i aafiaga faataumaoi o mausa eseese ma ua oo i le toe faaleleia o olaga, e faasoa mai o latou aafiaga i le faaaogaina o nei mataupu faavae i o latou olaga. O o latou manatu (le “matou” i lenei taiala) ua faaaoga e faamatala ai le tiga matuitui o mea ua fai ma vaisu ma le olioli i le faamalologa ma le toe faaleleia. O le a e maua le mafanafana, lagolagosua ma se sootaga masani ma i latou.

Na aofia foi taitai o le Ekalesia ma faufautua faapolofesa i le tusiaina ma le tapenaina o lenei taiala. O le atamai ma aafiaga tuufaatasi o le toatele o nei tusitala ua tulai mai nei o se isi molimau i le moni o le Togiola a Iesu Keriso ma le mafai ona toe faaleleia mai le tagofia o mea ua fai ma vaisu.

Ua matou iloa le faanoanoa tele, peitai ua matou vaaia le mana o le Faaola o faaliliuina o matou toilalo faataumaoi e avea ma manumalo matagofie faaleagaga. O i matou o e sa nonofo i aso uma i le popole, atuatuvale, ma le ita na toetoe a le mafai ona onosaia, ua matou maua nei le olioli ma le toafilemu. Ua matou molimauina vavega i o matou lava olaga ma olaga o isi o e sa maileia i le tagofia o mea ua fai ma vaisu.

Ua matou totogiina se tau matautia o le tiga ma mafatiaga o le faamanualia o i matou lava ona o lo matou tagofia o mea ua fai ma vaisu. Peitai ua liligi mai faamanuiaga ina ua matou uia Laasaga taitasi mo le toe faaleleia. I lo matou mauaina o se fagua faaleagaga, ua matou finafinau ai i aso taitasi e faaleleia a matou sootaga ma le Tama Faalelagi ma Lona Alo o Iesu Keriso. Ua faamaloloina i matou e ala i le Togiola a Iesu Keriso.

Matou te valaaulia outou ma o matou loto atoa ma le alofa ia tatou auai faatasi i se olaga matagofie o le saoloto ma le saogalemu, ua siomia i aao o Iesu Keriso, lo tatou Togiola. Ua matou iloa mai i o matou lava aafiaga e mafai ona outou sosola ese mai i filifili o le tagofia o mea ua fai ma vaisu. Po o le a lou le mautonu ma le lagona ua leai sou faamoemoe, o oe o se atalii/afafine o se Tama Faalelagi agaalofa. Afai sa faatauasoina oe mai i lenei mea moni, o mataupu faavae o loo faamatalaina i lenei taiala o le a fesoasoani e te toe maua ma faamausali ai i le taele o lou fatu. O le a mafai ona fesoasoani nei mataupu faavae e te sau ai ia Keriso ma tuu atu ia te Ia na te suia oe. I lou faaaogaina o nei mataupu faavae, o le a e utuvai ai mai le mana o le Togiola ma o le a faasaolotoina oe e le Alii mai le pologa.

O nisi tagata e manatu o le tagofia o mea ua fai ma vaisu ua na o ni uiga leaga e mafai lava ona faatoilaloina toatasi i le malosi o le loto, peitai e toatele tagata ua faalagolago tele i se amioga po o se mea ua latou le iloa pe faapefea ona toe aloese mai ai. Ua leai se faamoemoega ma se lagona i isi mea e tatau ona faamuamua i o latou olaga. Ua leai se isi mea e sili atu ona taua nai lo le faamalie o o latou manaoga ua faananau i ai. A latou taumafai e tuu, e oo atu ia i latou ni faananauga malosi faaletino, faalemafaufau, ma faalelagona. I lo latou faia ma mausa le faia o filifiliga sese, latou te iloa ai le faaitiitia o lo latou atamai e filifili ai le mea sao. E pei ona aoao mai Peresitene Boyd K. Packer o le Korama a Aposetolo e Toasefululua: “O le tagofia o mea ua fai ma vaisu e i ai le malosi e vavaeese ai le naunau o le tagata ma avea ai le faia o filifiliga tatau o se mea noa. E mafai ona faoa ai mai se tagata le mana e filifili ai” (i le Conference Report, Oke. 1989, 16; po o le Ensign, Nov. 1989, 14).

O le tagofia o mea ua fai ma vaisu e mafai ona aofia ai le faaaogaina o mea e pei o tapaa, ava malosi, kofe, lauti ma fualaau (o talavai ma fualaau faasaina), ma amioga e pei o petipetiga, faatosinaga leaga, matamataina o ponokalafi, amioga faalefeusuaiga e le tatau, ma gase-gase e fesootai ma le le pulea lelei o le tausami. O nei mea ma amioga e faaitiitia ai le atamai o se tagata e lagona ai le Agaga. Latou te faatamaia le maloloina o le tino ma le mafaufau, agafesootai, lagona, ma le manuia faaleagaga. Na aoao mai Elder Dallin H. Oaks o le Korama a le Toasefululua: “Ia tatou alo ese mai soo se amioga ua fai ma mausa. Soo se mea lava e fai ma mausa na te fetuunaia o tatou loto. O le tuu atu o o tatou loto i uunaiga soonafai e aumai e soo se ituaiga o mea ua fai ma vaisu, e ausia ai manao o Satani ae faavaivaia ai le finagalo o lo tatou Tama Faalelelagi. Ua faatatau lea i le tagofia o mea ua fai ma vaisu (e pei o nakoti, ava malosi, nikotini po o le kafini), o vaisu e pei o petipetiga ma soo se isi amioga ua fai ma mausa. E mafai ona tatou alo ese mai le tagofia o ia mausa e ala i le tausia o poloaiga a le Atua” (“Free Agency and Freedom,” Brigham Young University 1987–88 Devotional and Fireside Speeches [1988], 45).

O le faamaulalo ma faamaoni ma valaau atu i le Atua ma isi mo se fesoasoani, e mafai ona e faatoilaloina ai le tagofia o ou mausa e ala i le Togiola a Iesu Keriso. E pei foi ona toe faaleleia o matou olaga, e mafai ona toe faaleleia lou olaga ma e olioli i faamanuiaga uma o le talalelei a Iesu Keriso.

Matou te valaaulia oe e faatasi ma matou i le aoaoina ma le faaaogaina o mataupu faavae o le talalelei a Iesu Keriso e pei ona aoaoina i lenei taiala, pe afai ua e masalomia ua e aafia i le tagofia o mea ua fai ma vaisu, ma pe afai o e lagona sina naunautaiga itiiti e saoloto mai ai. Matou te tautino atu afai e te mulimuli i lenei auala ma le faamaoni o le loto, o le a e maua le mana o loo e manaomia e toe faaleleia ai lou olaga mai le tagofia o mea ua fai ma vaisu. A e faaaogaina ma le faamaoni nei mataupu faavae e sefululua, o le a faamalosia oe e le Faaola ma o le a oo ina e “iloa le mea moni, ma o le a tuu saoloto foi outou e le upu moni” (Ioane 8:32).