Laasaga 4

Upu Moni

Mataupu Faavae Autu: Faia se suesuega ma le lototele i lou lava tagata lilo.

Ina ua e faia le Laasaga 3, sa e filifili e faamoemoe i le Alii. Sa liliu atu lou loto ma lou olaga i Lana tausiga. I le Laasaga 4, ua e faaalia lou naunau e faamoemoe i le Atua. Sa e faia se suesuega tusitusia auiliili ma le le fefe o lou olaga, fuafua ma faia se aotelega o manatu, mea na tutupu, lagona ma gaoioiga o lou olaga, ua atoatoa ai lau suesuega.

O le a le faigofie le faiga o se suesuega le fefe ma le maeaea o lou olaga. O lo matou fai atu lototele e le faapea o le a leai ni ou lagona o le fefe. Atonu o le a e maua ni lagona se tele a o e suesueina lou olaga, e aofia ai le matamuli po o le ma, po o le fefe. O le uiga o le lototele o lou le faatagaina lea o lou fefe e taofia oe mai le faia o se suesuega maeaea. O le Laasaga 4, o lou tuuto atu i le faamaoni aiai a o e tulimatai atu i mea e tutupu i lou olaga e aofia ai ou lava vaivaiga ae le na o vaivaiga o se isi.

I aso ua tuanai masalo sa e tauamiotonuina amioga le lelei ma tuuaia isi tagata, nofoaga po o mea mo faafitauli sa e faatupuina. O le taimi nei o le a amata ona e taliaina le tiutetauave mo gaoioiga ua mavae ma le taimi nei, e tusa pe manaomia ai lou faailoaina atu ma le tiga ma le matamuli, po o mea faigata sa tutupu, manatu, lagona po o gaoioiga.

Afai ua e lagona le lofituina o le manatu o le faia o se suesuega auiliili ma le le fefe ia te oe lava, ia e iloa e le o tuua na o oe. Matou te alolofa ia te oe. Matou te manatua lo matou tauivi ia maua le naunautai e faamaea ai lenei Laasaga. E toatele i matou sa manatu pe mafai ona faamisi atoa le Laasaga 4 ae manumalo pea i le le tagofia o mea ua fai ma vaisu. Na iu lava ina faatalitonuina i matou i upu a i latou na muamua atu ia i matou: A aunoa ma se suesuega auiliili ma le lototele, … o le a le mafai lava ona tau atu i le faatuatua lea e aoga moni i le olaga i aso taitasi” (Twelve Steps and Twelve Traditions [1981], 43).

O le tagofia o mea ua fai ma vaisu sa faavaivaia ai lo matou mafai ona tomanatu faamaoni i o matou olaga. Na faagataina lo matou mafai ona malamalama i faaletonu ma faatamaiaga—o faafitauli—na ia faatupuina i a matou mafutaga uma. Ao lei mafai ona matou faalagolago atu ma le to’a lelei i le Faaola, sa matou manaomia se fuafuaga ina ia mafai ai ona Ia fesoasoani ia i matou e faatulaga ma le faamaoni o matou aafiaga ua tuanai. Ua aumaia e le Laasaga 4 lena fuafuaga; “o le taumafaiga malosi ma le tiga e iloa po o a ia faafitauli sa ia i matou taitoatasi, ma o loo i ai pea” (Twelve Steps and Twelve Traditions, 42).

O le suesuega o se Laasaga foi e fesoasoani ia i matou ia ogatasi o matou olaga ma le finagalo o le Atua. E ala mai i lenei suesuega, sa matou iloaina ai manatu le lelei, lagona, ma gaoioiga sa puleaina o matou olaga. O le iloaina o na elemene faataumaoi i o matou olaga, sa matou uia ai le Laasaga muamua e agai i le toe faasaosaoina o ia mea. O le faia o se suesuega sa faigata, ae o lenei Laasaga na tatalaina ai le faitotoa i le faatuatua ma le faamoemoe faateleina sa matou manaomia e faaauau ai lo matou toe faaleleia ma faatoilalo ai lo matou tagofia o mea ua fai ma vaisu.

Auala e fai ai se suesuega

O le taimi lava na matou ioeina ai le manaomia o le 4, o le fesili na sosoo ai o le, “Ae e faapefea ona ou faia se suesuega? O a ni meafaigaluega o le a ou manaomia?” O se suesuega o se faagasologa e sili ona patino, ma e leai se faiga sao se tasi e fai ai. E mafai ona outou fesufiai ma nisi ua maea ona faia se suesuega ma saili le taitaiga a le Alii i le faiga o sau lava suesuega. O le a Ia fesoasoani ia te oe ia e tautala sa’o ma alofa a o e tau faavasegaina mea e manatua ma lagona.

O se tasi ala e fai ai se suesuega o le lisi o mea e manatua i tagata; faalapotopotoga po o vaega; mataupu faavae, manatu, po o talitonuga, ma mea na tutupu, tulaga po o aafiaga na faaosofia ai lagona lelei ma lagona le lelei (e aofia ai le faanoanoa, tautui, ita, inoino, lototiga). Atonu e vaaia soo nisi aitema o le lisi. E le afaina. Aua le taumafai e faatulaga pe faamasino, pe iloilo i le taimi lenei. Ae mo le taimi nei, o le mea aupito taua ia maeaea lelei i le mea e gata ai le mafai.

A o tapena lau suesuega, tagai i tua atu o au amioga ua tuanai ma suesue manatu, lagona ma talitonuga sa mafua ai au amioga. O ou manatu, lagona ma talitonuga o pogai moni ia o lou tagofia o mea ua fai ma mausa. O le mea sili e oo i ai lou lafoaia o mausa o le a maluelue, sei iloga lava e te iloiloina uma mafuaaga e te lolo atu ai i le fefe, faamaualuga, inoino, ita, loto malosi, ma le alofa ia te oe lava. O le a faaauau lou tagofia o lou mausa muamua pe o le a e agai atu foi i se isi mausa. O lou tagofia o mea ua fai ma vaisu o se auga o isi “mafuaaga ma tulaga” (Alcoholics Anonymous [2001], 64).

O nisi tagata e latou te faavasegaina o latou olaga e tusa ai ma tausaga, togi i aoga, nofoaga sa nonofo ai, po o mafutaga. O isi e amata lava i manatu palepalealuga. Masalo o le a le mafai ona e manatua mea uma i le taimi e tasi. Ia faaauau i le agaga tatalo ma tuu atu i le Alii e aumaia mea i lou manatua. Aua le faamutaina lenei faagasologa, ae ia faaopoopo atu pea i au suesuega po o faamaumauga a o faasolo mai mea e te manatua.

A maea loa lau lisi, saili loa le taitaiga a le Alii i le aoao mai i mea taitasi e manatua. O nisi tagata e faatulaga lenei vaega o a latou faamaumauga i se faataatiaga po o se siata ma ni koluma i lalo o autu taitasi e lima o loo lisiina i lalo. Latou te faatapulaaina a latou tusitusiga i ni faamatalaga pupuu. O isi e faia se itulau mo tusiga taitasi o a latou lisi, ona tusi lea o tali i totonu o vaega taitasi e lima.

Mea na tupu. O le a le mea na tupu? I ni nai upu, tusi se faamatalaga puupuu o le mea o loo e manatua i le mea na tupu. Mafaufau i ai o se aotelega ae le o se tala umi.

Taunuuga. O le a le taunuuga ia te oe po o isi?

Lagona. O a ou lagona i le taimi na tupu ai? O a ni ou lagona i le taimi nei e uiga i ai? Mafaufau pe na faapefea ona saofaga i ai lou fefe i le mea na tupu.

Iloiloga faaletagata lava ia. Na faapefea e ou vaivaiga po o malosiaga faaleamio ona aafia ai le mea na tupu? O e vaaia ni faamaoniga o le faamaualuga, alofa ia oe lava, olegia o oe lava, po o le faia o lou manao i ou uiga ma gaoioiga? Ia mautinoa ua faamauina foi taimi na e faia ai ni gaoioiga sao.

E fesoasoani le Agaga Paia ia faamaulaloina oe lava ma faafesagai ma le mea moni, e tusa pe tiga le mea moni. E mafai ona e iloa ou malosiaga ma vaivaiga i le fesoasoani a le Alii (tagai i le Eteru 12:27). O le a fesoasoani fesili e pei o nei:

• O le a se taunuuga na ou manao i ai i lenei tulaga ma pe aisea?

• Sa faapefea ona ou taumafai e faatoatoa lea tulaga?

• Pe o se mea sa tatau ona ou aafia ai?

• O a gaoioiga sa ou faia pe ave ese ia maua le mea sa ou manao ai?

• Pe sa ou le amanaiaina le mea moni?

• Pe sa lelei ou faamoemoega mo au lava ma mo isi?

• Pe sa ou pelogia au lava ma isi?

• Pe sa ou le ano i lagona o isi ae ou mafaufau mo na o au lava?

• Sa faapefea ona ou pei o se isi ua lavea fua i le faaatoatoaina o isi, faagauai mai tagata ma faamaise mai ia te a’u, ia faapitoa, ma isi lava mea faapena?

• Pe sa ou teena le fesoasoani mai le Atua ma isi?

• Pe sa ou finau atu o au e sa’o?

• Pe sa ou lagona le le fiafia ona o le le talisapaia po o le le aloaiaina o au?

Fautuaga musuia. O le a se fautuaga mai le Alii e faatatau i lenei mea na tupu? Ia manatua e leai lava se mea e te popole ai a o e gauai atu i le Faaola. Ua e iinei e aoao le lelei mai le leaga, ma e fesoasoani mai le Faaola ia te oe e faamagalo oe lava ma isi. Ia tusi ou manatu ma lagona a o e mafaufau i fautuaga musuia mai tusitusiga paia ma taitai o le Ekalesia.

O elemene tatau e fa

E fa elemene e taua i se faamaumauga lelei ma aoga—tusitusi, faamaoni, lagolagosua ma le tatalo. O nei elemene o se faamaumauga lelei o le a fesoasoani e te iloa ma manumalo ai i agasala ma vaivaiga.

Tusitusi. O suesuega o lou olaga o le a sili atu ona aoga pe afai e te tusia. E mafai ona e uuina se lisi tusitusia, toe iloilo, ma vaai i ai pe a manaomia; o manatu e le tusiaina e galo gofie, ma e faigofie ona faalavelave atu mea faalavefau ia te oe. A o tusi lau suesuega faamaoni, o le a sili atu le manino o lou mafaufau i mea sa tutupu i lou olaga, ma o le a mafai ona e tulimataia ma le tau le faalavelaveina.

E i ai nisi tagata e taumafai e alo ese i le tusia o o latou faamaumauga tatau, e lagona le matamuli po o le fefe i o latou tomai tusitusi po o se isi foi e faitauina mea latou te tusia. Aua nei faatagaina nei popolega e taofia ai oe. O le a le taua lau sipela, kalama, tusitusi, po o le tomai faalomitusi. E mafai ona e tusia ni ata faafasilaau, pe a tatau ai lava, ae ia tusi au suesuega i le pepa. E lei maea ona e faia le Laasaga lona fa, seiloga ua e tusia i se mea faitino. A o faamaeaina le Laasaga lona fa, ia manatua o le atoatoa—o le taumafai ia atoatoa lelei lau faamaumauga ma ia faafiafia ai isi—e mafai ona polokaina ai oe mai le faamaeaina.

O lou popole i le faitau e se isi o mea ua e tusia e mafai ona avea ma se popolega moni, ae e mafai ona e faatoilaloina. O i matou ua maea ona fai se suesuega sa ao ona matou faafesagai ma lenei tau faafefe. Sa ao ona matou faia mea uma matou te mafaia e faatumauina ai le faalilolilo o a matou suesuega, ona faalagolago atu lea o taunuuga i le Atua. Sa faasili atu ona matou popole i le faamalologa nai lo o matou tulaga po o le tauleleia. O le suesuega sa manaomia ai le faaauau pea ona valaau atu i le fesoasoani mai le Atua, e ole atu ia te Ia e puipui ma taitai i matou a o matou ausiaina. E tatau ona e manatua o le Laasaga 4 o se gaoioiga o le laa ese mai ataata o le maasiasi ma ioeina lou manaomia o le salamo. Afai o le a faaauau lou agaga tatalo ia iloa pe faapefea ma o fea e teu ai au itulau o faamaumauga ia le faalauaiteleina, o le a taitaia oe e le Alii e fai le mea e sili ona lelei.

Faamaoni. O le faamaoni ia oe lava e faatatau i vaega lofituina o lou olaga i le agasala e mafai ona tau faamata’u. E tele ina aloese tagata mai le tilotilo ma le totoa ia i latou lava i le faaata o le taimi ua tuanai, e matatau ina nei faailoa mai e ataata o le mea moni ituaiga olaga ua oo i ai. A o lenei a o e uia le Laasaga lona fa, e tatau ona e faasaga lelei i mea moni e uiga i lou olaga ma ou popolega.

I lau suesuega, o le a le gata ina e iloa ai ou vaivaiga ae o le a e malamalama foi ma talisapaia lelei ou malosiaga. Ia faaaofia i lau faamaumauga ou uiga lelei ma mea lelei sa e faia. O le mea moni, o oe o le tuu faatasiga o vaivaiga ma malosiaga. A o faasolo ina e naunau e iloa le mea moni atoa e uiga i lou olaga ua tuanai—lelei ma leaga—ua e faatagaina mana o le lagi e faaalia le mea moni, ma fesoasoani ia te oe e faatulaga lou olaga ua mavae i le tulaga tatau. O le a fesoasoani le Alii ia te oe i le suia o le ala o lou olaga ma faataunuu ou tomai paia. O le a e iloa ai e pei lava oe o isi tagata uma, e i ai malosiaga ma vaivaiga. Ua amata ona outou faafesagai ma isi tagata i se tulaga tutusa.

Lagolagosua. O faamalosiauga ma le lagolagosua mai isi o e ua malamalama i le toe faaleleia e mafai ona fesoasoani ia te oe i au taumafaiga. E mafai ona taitaia ai oe i le iloaina o metotia, faatulagaga, po o le auala o le a sili ona aoga mo oe i le toe iloiloina o lou olaga ua mavae. E mafai ona latou faamalosiauina oe pe a e loto vaivai.

Tatalo. A o e mafaufau i le taua o le Laasaga 4 ma luitau e aumaia, mafaufau pe na faapefea ona fesoasoani le Alii ia te oe i Laasaga taitasi na muamua atu. A o e liliu atu i le Atua mo se faamafanafanaga, lototele ma le taitaiga, o le a e maua le fesoasoani o le a faaauau pea mo oe a o e faia se faamaumauga. Sa aoao mai e Paulo o le “Atua foi e ana le faamafanafanaga uma; o le na te faamafanafanaina mai ia te i matou i lo matou puapuaga uma lava” (2 Korinito 1:3–4). Afai e te tatalo i taimi taitasi e te nofo ai i lalo e tusi au faamaumauga, o le a fesoasoani le Atua ia te oe. O le a e iloa lenei mea moni a o e faia lenei Laasaga e foliga faigata—E mafai e le Atua ma o le a i ai pea e le aunoa iina mo oe, pe a e ole atu.

Faasaolotoina oe lava mai mea ua te’a

O nisi tagata e popole i le toe tilotilo i tua ona o le fefe i le fatu sese faafuasei o mea e manatua mai manatu nenefu pe soonafai. I le faia o lau suesuega, mafaufau i na o mea e manatua e manino lelei e faailoa ma vailiili i ai. O i foi la, o le faalagolago i le Atua o le tali lea. Afai e te faia lau suesuega ma le tatalo faamaoni, ma le manatu tonu i ai, ma faatuatua ia Keriso, e mafai ona e faamoemoe ia te Ia e aumaia na mea i lou manatua, lea o le a fesoasoani i lou toe faaleleia.

O se tasi o taunuuga fiafia o le faamaeaina o le Laasaga 4 o lou faia lea o se laasaga tele e agai i le faasaolotoina o oe mai amioga na faamatalaina ai lou olaga i aso ua mavae. O le ataata o oe lava ia o le a e vaaia a o e faamaeaina lenei Laasaga e mafai ona musuia oe e sui le tulaga o lou olaga pe a fai e te faatagaina. Ona o le alofa ma le alofa tunoa o le Faaola, e le tau avea oe ma tagata e faapei ona sa e i ai. O le a oo ina e iloa o ou aafiaga o ni avanoa e aoao ai, e ala i le ole atu i le Alii mo le taitaiga ao e toe iloiloina lou olaga. O le a e iloa o le faailoaina o ou vaivaiga sa e puapuagatia ai mo se taimi umi, o le a faatagaina ai oe e agai i luma i se olaga fou.

Laasaga e Faatino

Tusi i se api o talaaga patino; saili le taitaiga mai le Agaga Paia

Mo le toatele o i matou, o se faamaumauga o la matou uluai taumafaiga lea e tusi e uiga i o matou olaga. O se api o talaaga patino e faaauau pea ona avea ma se meafaigaluega mamana o le toe faaleleia. Sa masani ona aoao mai perofeta a le Alii i le taua o api talaaga. Mo se faataitaiga, sa fautuaina e Peresitene Spencer W Kimball, “Tusitusi … lou ulufafo ma lou ulufale, ou mafaufauga loloto, o mea ua e ausia ma ou toilalo, au fegalegaleaiga ma ou manumalo, ou lagona ma au molimau” (“The Angels May Quote from It,” New Era, Oke. 1975, 5).

A o e tusitusi ma le agaga tatalo e uiga i lou olaga, ua e tuuina atu se avanoa i le Agaga Paia e fesoasoani ia te oe e vaai ma malamalama i lesona faamoemoeina e maua mai i ou aafiaga taitasi. Afai e te le o tausia i le taimi nei se api o talaaga, matou te uunaia oe ia amata loa. Afai o loo e tausia se api o talaaga i le taimi lenei, matou te uunaia oe ia e saga maua le agaga tatalo a o e tusitusi ina ia mafai ona aoaoina oe e le Alii ma faaoaina lou malamalama e ala i Lona Agaga.

Faia o se tala o lou olaga, ua tuanai ma le taimi nei

E tele se taimi e faaalu i le faamaeaina o lau suesuega. E le manaomia ona e faanatinatia, ae e manaomia ona amata. E le taua pe o fea e te amata ai, aua ao e suesueina ou aafiaga ua tuanai, o le a faasolosolo mai lou manatuaina ma o le a taitaia oe e uunaiga a le Alii. Tau lava o le tusi pe a oo atu mea e manatua i lou mafaufau. O mea e te tusia e patino ia te oe, ma o le a e faasoa atu i na o se tagata lagolagosua faatuatuaina o le a e filifilia ma le agaga tatalo pe a e uia le Laasaga 5. O lau faamaumauga e mo oe ma lau sootaga ia te oe lava, ma le Atua, faatasi ai ma isi. A o e sailia le lototele e te vaai ai ia te oe i le tagata moni ua e i ai, o le a faapupulaina ou mata e le Atua, ma o le a amata ona e vaai ia te oe lava, e pei ona Ia silasila mai ia te oe—o se tasi o Ana fanau, ua i ai se tofi paia. Ia e faia lenei Laasaga, ma taulai atu lau vaai i lena tofi paia.

Le toe manatuaina au agasala

A uma ona faamaeaina lau suesuega tusitusia ma talafeagai le taimi, e tatau loa ona faatamaiaina mea o loo aofia ai lagona le lelei po o le ita, faamaumauga o soligatulafono patino ma soo se isi lava mataupu maaleale, e le tatau ona faasoa atu i isi, pe tuufaasolo atu i augatupulaga o lumanai. O le faatamaiaina o nei tusitusiga e fai ma faailoga o lou salamo ma o se auala mamana e lafoai ai. Sa folafola atu e le Alii ia Ieremia e faatatau i Lona nuu, “Ou te faamagalo ia latou amio leaga, ma ou le toe manatua a latou agasala” (Ieremia 31:34). E tatau ona tatou mulimuli i faataitaiga a le Alii i le faamagaloina o a tatou lava agasala ma agasala a isi.

Suesue ma Malamalama

O mau nei ma saunoaga mai taitai o le Ekalesia e mafai ona fesoasoani ia te oe i le faamaeaina o le Laasaga 4. Ia faaaoga e mafaufau loloto ai, suesuega ma tusitusiga. Manatua ia faamaoni ma faapatino au tusitusiga.

Iloiloina o lou olaga

“Ou te valaaulia outou taitoatasi ia toe iloilo o outou olaga. Ua e vavae ese oe mai tulaga faatonuina lea e te iloa e aumaia ai le fiafia? Pe o i ai se tulimanu pogisa o manaomia ona faamama? O e faia nei ni mea ua e iloa e sese? Pe e te faatumulia lou mafaufau i manatu le mama? A filemu ma e mafai ona mafaufau manino, pe ta’u atu e lou loto fuatiaifo ia te oe ia salamo?

“Mo lou toafilemu nei ma mo le fiafia le gata mai, faamolemole salamo. Tatala atu lou loto i le Alii ma ole atu ia te la e fesoasoani ia te oe. O le a e maua faamanuiaga o le faamagaloga, filemu ma le iloa ua faamamaina oe ma ua faaatoatoaina. Saili le loto tele ia ole atu i le Alii mo le malosi ia salamo nei” (Richard G. Scott, i le Conference Report, Ape. 1995, 103; po o le Ensign, Me 1995, 77).

• O le Laasaga 4 o se tasi o auala e mulimuli ai i le fautuaga a Elder Scott. Saili se taimi filemu e tatalo ai mo le taitaiga, ma le lototele ao e iloiloina lou olaga. Saili ma le agaga tatalo se taimi e toe fai ai sau iloiloga faaletagata lava ia, ma faamaumau manatu e oo mai ia te oe a o e mafaufau i fesili a Elder Scott.

Faailoaina o taimi ua mavae

“Liliu ese ia nai a outou agasala, ia lulu ese filifili o le na fusimauina outou, ina o mai ia i le Atua o le Papa o lo outou olataga” (2 Nifae 9:45).

• O le liliu ese mai agasala ma le lulu ese o filifili o le tagofia o mea ua fai ma vaisu e le mafai ona amataina seiloga e te faailoaina o loo i ai agasala ma filifili. la tusi e uiga i le tetee e te lagona pe a e mafaufau ia faamaoni atoatoa i lou olaga i aso ua mavae.

Suia o le faafitifiti i le mea moni

“Afai tatou te faapea, e leai sa tatou agasala; ua sese ai i tatou ia i tatou, e le o i totonu ia te i tatou le upu moni” (1 loane 1:8).

• O se uiga autu o le tagofia o mea ua fai ma vaisu o le faafiti po o le faaseseina e le tagata o ia lava—pe a faafitia e se tasi le i ai o se faafitauli. O a ni taunuuga faamaloloina e mafai ona oo mai i le suia o le faafiti i le mea moni?

• E faapefea ona fesoasoani le Laasaga 4 ia te oe ia ausia lea tulaga?

O le faamoemoe o le toe faaleleia

“Sa ou manatua a’u agasala uma, ma a’u amioletonu, e i ai ona tigaina a’u i puapuaga o seoli, ioe, sa ou iloa na ou fouvale i lo’u Atua, sa ou le tausia foi ana poloaiga paia” (Alema 36:13).

• O le manatuaina o au agasala atonu e tiga, ae e mafai ona uunaia oe i se olaga fou o le filemu (tagai i le Alema 36:19–21). Fesili i se tasi ua faamaeaina lenei Laasaga, pe na faapefea ona fesoasoani ia te ia. E faapefea ona fesoasoani le faamoemoe o le toe faaleleia ia te oe i le tiga o le loto nutimomoia i le olioli o le faamagaloina?

O le mea moni

“O le mana foi o le Agaga Paia tou te iloa ai le tonu i mea uma lava” (Moronae 10:5).

• O nisi tagata e faigata ona manatuaina po o le faailoaina o le tiga o le mea moni e uiga i aso ua mavae, peitai, e mafai ona fesoasoani le Agaga Paia ia te oe ia manatua, ma faamafanafana oe a o e uia le Laasaga 4. E mafai ona e maua nei faamanuiaga e tusa lava pe e te le maua le meaalofa o le Agaga Paia. Ia tusi pe faapefea ona taitaia oe e le Agaga Paia i le faagasologa o le toe faaleleia.

• Aisea e taua ai le iloa o le mea moni e uiga i le tulaga o e i ai nei?

• Aisea e taua ai le iloa o le mea moni o oe o se atalii/afafine o le Atua?

Vaivaiga ma malosiaga

“Afai e o mai tagata ia te au, ou te faailoa ia te i latou lo latou vaivai. Ou te tuuina atu i tagata le vaivai ina ia latou faamaulalo ai, ma ua lava lo’u alofa tunoa i tagata uma o e faamaulaloina i latou lava i o’u luma; aua afai latou te faamaulaloina i latou lava i ou luma, ma faatuatua ia te au, ona ou faia lea o mea vaivai ma mea malolosi ia te i latou” (Eteru 12:27).

• Ia faatatau lenei fuaiupu i lou olaga i le kopiina ma tuuina i ai lou igoa e pei o oe o loo fetalai sao i ai le Alii. Ia tusi manatu e oo atu i lou mafaufau e uiga i lenei mau ma lona faatatauga patino.

“E tuu saoloto outou e le upu moni”

“E iloa foi e outou le mea moni, e tuu saoloto foi outou e le upu moni” (loane 8:32).

• O le faamaoni ia te oe lava ma le Alii, o le ua ta’ua foi o le “Agaga o le upu moni” (MFF 93:9), o le ki lea i le saolotoga mai pepelo e taumaileia oe. A o faasolo ina e iloa o Ia, o Lona mana ma le i ai i lou olaga o le a faasaolotoina oe mai lou tagofia o mea ua fai ma vaisu. E faapefea e le iloaina o le mea moni ona faaleleia atili la oulua sootaga ma Iesu Keriso?