Laasaga 3

Faatuatua i le Atua

Mataupu Faavae Autu: Fai le faaiuga e liliu ma suia loa le loto ma le ola i le tausiga a le Atua le Tama Faavavau ma Lona Alo o Iesu Keriso.

Ole Laasaga 3 o le Laasaga o le faiga o faaiuga. O uluai Laasaga e lua, sa fagua i matou i mea e le mafai ona matou faia mo i matou lava, ma mea sa matou manaomia e fai e le Atua mo i matou. Ona oo lea i le Laasaga 3 sa faailoa atu i matou i le mea e tasi e mafai ona matou faia mo le Atua. E mafai ona matou faia se faaiuga e tatala atu i matou lava ia te Ia ma lafo atu o matou olaga atoa—o taimi ua tuanai, taimi nei ma le lumanai—ma o matou loto e uiga i o matou olaga ia te Ia. O le Laasaga 3 o se faatinoga o le faitalia. O le filifiliga aupito sili ona taua sa matou faia.

O le saunoaga lenei a Elder Neal A. Maxwell o le Korama a Aposetolo e Toasefululua e uiga i lenei faaiuga aupito taua: “O le gauai atu o le loto o se tagata, o le mea moni o le mea tulaga ese lea e tasi e tatau ona tatou tuuina i luga o le fatafaitaulaga a le Atua. O se mataupu faavae faigata ae e moni. O isi mea e tele tatou te tuuina atu i le Atua, e tusa lava pe o le a le mananaia ia i tatou, o mea moni ia ua uma ona Ia tuuina mai ia i tatou, ma ua Ia nonoina mai ia i tatou. Ae a amata ona gauai atu i tatou lava e ala i le tuu o o tatou loto ae fai le finagalo o le Atua, ua tatou tuuina atu moni se mea ia te Ia” (“Insights from My Life,” Ensign, Aok. 2000, 9).

Sa faamatala e Peresitene Boyd K. Packer o le Korama a le Toasefululua ia lana faaiuga e gauai atu lona loto i le Atua ma le saolotoga na ia maua mai lena faaiuga: “Atonu o le mea aupito sili ona maoae na maua i lo’u olaga, e le toe fesiligia o le tautinoga sili lea, na oo mai ina ua ou maua le talitonuga i le Atua e faapea, o le a ou nono atu pe gauai atu lo’u faitalia ia te ia—e aunoa ma le faia faamalosi pe tuleia, e aunoa ma soo se faamalosia, o se tagata e toatasi, na o au lava, leai se taufaasese, leai se mea na faamoemoe e toe maua mai vagana ai o le avanoa. I se isi itu, pe a faatusatusa atu i ai, o le ave o le faitalia o se tagata, o lena meaalofa taua lea ua faamanino mai i tusitusiga paia e taua i le ola lava ia, ma fai mai, ‘O le a ou faia e pei ona e aoao mai,’ ae mulimuli ane iloa ai, o le faia faapea, ua e maua uma ai” (Obedience, Brigham Young University Speeches of the Year [Tes. 7, 1971], 4).

Ina ua matou uia le Laasaga 3, sa matou fetaiai ma le mea moni e faapea, o le toe faalelei, o le aoao tetele o taunuuga o taumafaiga a le Alii nai lo o matou lava. Sa Ia faia vavega ina ua matou valaauliaina o Ia i o matou olaga. O le Laasaga 3 o se faaiuga e faataga le Atua e toe faalelei ma laveai i matou. Sa o se faaiuga e tuu atu ia te Ia e taitaia o matou olaga, ma le manatua, na Ia faamamaluina e le aunoa a matou filifiliga. O lea, na matou filifili ai e tuu o matou ola i Ona aao e ala i le faaauau ona mulimuli i lenei polokalama faaleagaga o le toe faaleleia o olaga.

O le taimi muamua lava na matou auai ai i fonotaga o le toe faaleleia, atonu sa uunaia pe faamalosia foi e isi i matou ia matou i ai iina, peitai, o le uia o le Laasaga 3, sa matou filifili ai e galulue mo i matou lava. Sa matou iloaina o le faia o se suiga tele i o matou olaga o a matou lava ia faaiuga. Sa le faatatau i mea na fai e o matou matua, i mea o loo latou faia nei, po o mea sa latou mananao i ai. Sa le faatatau foi i ni manatu, lagona, mea na fai, po o mea e lei faia e o matou taitoalua, aiga po o uo. Sa matou iloa na tatau ona matou mananao e tumau i le mama ma le faamaoni aiai e tusa po o a manatu ma filifiliga a se isi tagata. O lo matou naunautai sa o se faavae mausali sa taatia ai le fuafaatatau o le toe faaleleia. A o matou faitauina le Tusi a Mamona, sa matou maua ai se faamaoniga mamana o le Laasaga 3 i le Alema 5:13; “Na latou faamaulaloina foi i latou lava, ma faamoemoe i le Atua moni o loo soifua.”

Sa matou lagonaina le matau i mea e lei mailoa ina ua matou uia lenei Laasaga. O le a se mea o le a tupu pe a matou faamaulalo ma faamatuu atoa atu o matou ola ma loto i le tausiga a le Atua? Mo le toatele o i matou, sa matuai faigata o matou olaga ao laiti, ma sa matou matatau i le toe vaivai e faapei o tamaiti laiti. O o matou aafiaga i aso ua mavae na faatalitonuina ai i matou o le faia o se tautinoga manino sa toetoe a faigata, ona o le valea ua siomia ai i tatou i le lalolagi. Sa matou vaaia le tele o tautinoga lepetia. Sa tele foi tautinoga na matou talepeina. O le mea sili sa mafai ona faia e nisi o i matou o le taumafaia o mea sa fautuaina mai e uo ua toe faaleleia. “Aua le faaaogaina. Alu i fonotaga. Fesili mo se fesoasoani.” O e na savalia Laasaga o le toe faaleleia sa muamua atu ia i matou, na valaaulia i matou e faataitai i lenei ala fou e ola ai. Sa latou faatalitali ma le onosai ia i matou ia naunau e faaava teisi le faitotoa mo le Atua.

O loo faasafua mai foi e le Alii lea lava valaau: “Ou te tu i le puipui ma tuitui atu: ai se tasi e faalogo mai i lou leo, ma tatala mai le puipui, ou te ulufale atu ia te ia, ma te talisua foi ma ia” (Faaaliga 3:20).

I le taimi muamua, sa popole, ma motumotu a matou taumafaiga. Sa matou avatu i le Alii o matou faatuatuaga, ona matou toe aveesea mai lea. Sa matou popole ne’i toasa o Ia i lo matou femoumouai ma aveese ai Lana lagolago ma Lona alofa mai ia i matou. Peitai e le’i toasa o Ia.

Sa faifai malie ona matou tuu atu i le Alii e faaalia Lona mana faamalolo ma le saogalemu o le mulimuli i Ona ala. Sa oo ina iloa e i matou taitoatasi ua le gata i le lafoai o le tagofia o mea ua fai ma vaisu, ae na tatau foi ona liliu atoa atu o matou loto ma olaga i le Atua. I lo matou faia o lea, sa matou iloa Lona faapalepale ma le taliaina o a matou taumafaiga vaivai e gauai atu ia te Ia i mea uma.

O lo matou gafatia ona lavatia o tofotofoga ua faamausaliina i lo matou gauai atu faifaipea i le finagalo o le Alii. Ua faaali atu lo matou manaomia o le mana ua maua e ala i le Togiola a le Faaola, ma ua amata ona matou lagona lena mana i totonu ia i matou, ua puipuia ai i matou i se isi tofotofoga e sosoo mai. Na matou aoao e talia le olaga i tuutuuga a le Alii.

E pei ona ta’ua e Elder Maxwell, o lenei gauai atu i le Alii o se aoaoga faavae faigata. E manaomia ai ona tatou toe tuuto atu i Lona finagalo i le amataga o aso taitasi, ma i nisi taimi o itula taitasi pe mai lea taimi i lea taimi. A o tatou naunau e fai faapea, tatou te maua le alofa tunoa po o le mana faamalosiau e fai ai mea e le mafai ona tatou faia mo i tatou lava.

O le faaauau pea ona gauai atu i le finagalo o le Atua e faaitiitia ai feteenaiga ma aumai ai le uiga sili atu i o matou olaga. O mea laiti e pei o le poloka o le auala o taavale afi ua le o toe avea ma mafuaaga o le le fiafia. Ua matou le toe fefefe i e matou te nofo aitalafu ai. Ua matou talia tiutetauave mo a matou amioga. Ua matou talia ma faia i isi, e pei ona matou manao ia faia ia i matou, e pei ona faia e le Faaola mo i tatou uma. Ua iu ina tatalaina o matou mata, o matou mafaufau ma o matou loto i le mea moni e faapea, o le olaga nei e luitauina ma o le a i ai pea le mafai e aumaia ia i matou le faanoanoa ma le le fiafia faapea foi le fiafia.

Matou te faafouina i aso fou taitasi lo matou gauai atu i le Alii ma Lona finagalo. O le uiga lea o la matou faamatalaga pe a matou fai atu, “E tasi le aso i le taimi.” Ua matou filifili e lafoai le manao o le tagata, ma le tausili faaletagata lea sa i le taele o le tagofia o mea ua fai ma vaisu ae fiafia i le isi 24 itula o le toafimalie ma le malosi e oo mai i le faatuatuaina o le Atua ma i Lona lelei, mana ma le alofa.

Laasaga e Faatino

Auai i sauniga faamanatuga; toe iloilo ma faafou feagaiga o le papatisoga

O le uia o le Laasaga 3 ma le faatuatuaina o le Atua i mea uma e pei lava o le faaaogaina o ni matatioata fou ma le vaaia o mea uma i se vaaiga fou. O le faia o le faaiuga e liliu atu lou loto i le Atua, o le a amata ona e maua le lagolelei ma le olioli lea e oo mai i le sailia ma le faia o le finagalo o le Tama Faalelagi.

O le papatisoga ma le faamanatuga o faatusa o lou alofa mo, ma tuuina atu [lou ola] ia Iesu Keriso. Sa e osifeagaiga e tauave i ou luga Lona suafa, ia manatua pea o Ia, ia mulimuli ia te Ia ma tausi Ana poloaiga “ina ia [e] maua lona Agaga e faatasi ma [oe]” (Moronae 4:3; tagai foi i le Moronae 5:2; MFF 20:77, 79).

Talanoa i lou epikopo po o le peresitene o paranesi e uiga i lou tagofia o mea ua fai ma vaisu ma lau filifiliga ia mulimuli i le finagalo o le Atua. Ia e faia le mea sili e auai atu i sauniga faamanatuga i vaiaso taitasi. A e tapuai, faalogologo totoa i tatalo o le faamanatuga ma mafaufau i meaalofa o loo ofoina atu mo oe e le Tama Faalelagi. Ona faafou lea o lau tautinoga e talia ma mulimuli i Lona finagalo ma lou olaga i le taliaina o le faamanatuga pe afai e faataga oe e lou epikopo po o le peresitene o le paranesi.

A o agai i luma le faaleleia o lou olaga, o le a faateleina lou manao ia faatasi ma e e faamamalu i le taulaga a le Faaola. O le a amata ona e iloa le mea moni e faapea “aua e leai lava se mea e tasi e le mafaia e le Atua” (Luka 1:37).

Filifili e faalagolago ma usitai i le Atua; sui mea e mafai ona e suia; talia mea e le mafai ona e suia

O upu nei—na sii mai se tatalo a Reinhold Niebuhr ma ua ta’ua o le “Tatalo o le Lotomalie”—e mafai ona fesoasoani a o e filifili e faalagolago ma usitai i le Atua, “Le Atua e, aumai ia te au le lotomalie e talia ai mea e le mafai ona matou suia, le lototele e suia ai mea ou te mafaia, ma le atamai e iloa ai eseesega.”

E mafai ona e talia ma le lotomalie le mea moni ua i ai nei o lou tulaga pe a e faatuatua i le poto o le Atua e fesoasoani ia te oe. E mafai ona e talia ma le lotomalie, e ui ina le mafai ona e puleaina filifiliga ma gaoioiga a isi, e mafai ona e filifili pe faapefea ona e tali atu i tulaga taitasi lua te faafeagai.

E mafai ona e filifili ma le lototele e faatuatua i lou Tama oi le Lagi ma ia fai e tusa ma Lona finagalo. E mafai ona liliu atu lou loto ma lou olaga i Lana tausiga. E mafai ona e filifili ia fai pei ona Ia aoao mai ma tausia Ana poloaiga.

Atonu o le a le mafai ona e suia nisi o mea i lou olaga, peitai e mafai ona e suia lou naunautai e faatuatua i le Atua ma usitai ia te Ia. A o e aoao e faalagolago ia te Ia, o le a e iloa ai o Lana fuafuaga e mo oe ina ia e mulimuli ai i le mea na ta’ua e Alema “o le ala sili o le fiafia” (Alema 42:8). O le a e iloa foi e ui foi i puapuaga ma faigata “e galulue faatasi mea uma e lelei ai i latou e ua alofa atu i le Atua” (Roma 8:28) ma tausi i Ana poloaiga (tagai foi i le MFF 90:24; 98:3; 100:15; 105:40).

Suesue ma Malamalama

O mau o loo mulimuli mai e mafai ona fesoasoani ia te oe i le uia o le Laasaga 3. Faaaoga nei mau ma fesili mo manatunatuga loloto, suesuega ma tusitusiga. Manatua ia faamaoni ma faapatino au tusitusiga.

Ia ogatasi ma le finagalo o le Atua

“Ina faalelei ia outou ma le finagalo o le Atua, ae le o le loto o le tiapolo ma le tino, ma ia manatua pe a lelei outou ma le Atua, ua na o le alofa tunoa o le Atua e faaolaina ai outou” (2 Nifae 10:24).

• Mafaufau po o le a le uiga o le ola o lou olaga ia ogatasi ma le finagalo o le Atua. Manatua pe mafai faapefea e Lona mana faamalosiau ona oo mai i lou olaga a o e liliu atu ia te Ia. O a ni ou lagona i le faatagaina o le Atua e taitaia lou olaga?

• O le a se mea o taofia oe mai lou faatagaina o Ia e taitaia lou olaga?

Gauai atu i le finagalo o le Atua

“Ua oo ina faamamasagia avega na faaeeina ia Alema ma ona uso. loe, ua faamaloloina i latou e le Atua ina ia faigofie ona latou tauave a latou avega, ma ua latou gauai ma le loto fiafia ma le onosai i le finagalo atoa o le Atua” (Mosaea 24:15).

• Na semanu e aveese e le Alii avega a Alema ma lona nuu, nai lo lena, sa Ia faamalosia i latou “ia faigofie ona tauave” a latou avega. la matau sa lei faitio ae sa gauai atu ma le fiafia ma le faapalepale i le finagalo o le Alii. la tusi e uiga i le tele o le lotomaulalo e manaomia ia vave maua ai se mapusaga, ae sa naunau foi e faamama malie se avega.

• O le a le uiga o le gauai atu i le Atua? E faapefea ona e gauai atu?

• O le a sou lagona i le gauai atu ma le lotomalie ma le onosai i le taimi faatulagaina a le Alii mo suiga?

• E faapefea ona e maua le lototele e taumafai ai pea seia oo ina faasaolotoina oe mai au avega?

Anapogi ma le tatalo

“Ua latou anapogi ma tatalo soo, ma ua tauau ina faamaulalo atili ai i latou ma ua tauau ina mausali atili i le faatuatua ia Keriso, e oo i le faatumuina o latou loto i le olioli, ma ua faamafanafanaina, ioe, e oo i le faamamaina ma le faapaiaina o latou loto; ua oo mai lea faapaiaina ona ua latou tuuina atu o latou loto i le Atua” (Helamana 3:35).

• Ua faamatala i lenei fuaiupu se nuu na tuu atu o latou loto i le Atua. E mafai faapefea e le anapogi ona faamalosia lou gafatia ona gauai atu lou loto i le Atua ma aluese ai mai lou tagofia o mea ua fai ma vaisu?

• Mafaufau i le taua o le tatalo i taimi o tofotofoga, ma tusi e uiga i auala o le a faamalosia ai lou lotomaulalo ma lou faatuatua ia Keriso e ala i le tatalo.

• O le a le malosi o lou naunautai e gauai atu lou loto i le Atua, nai lo le gauai atu i le tagofia o mea ua fai ma vaisu i le taimi o le tofotofoga?

Faamaulaloina o oe lava i luma o le Atua

“Na ia laveai ia te i latou, ina ua faamaulaloina i latou e i latou lava i ona luma; aua foi na latou tagi malosi ia te ia, na ia laveaiina ai i latou ai le nofopologa; ma ua faapea ona galue le Atua ma lona mana i mea uma i le fanauga a tagata, o loo faaloaloa atu le aao o le alofa ia te i latou uma o e faalagolago ia te ia” (Mosaea 29:20).

• O le a se mea o taofia oe mai lou “tagi malosi” i le Atua mo le laveaiina e tusa ai ma Lona finagab?

• O le a se mea sa taofia ai oe mai lou sailia o lenei ituaiga o laveaiga i le taimi ua tuanai?

• O a ni ala e mafai ona e aoaoina e faalagolago atu ai i le Atua?

• O le faamaulaloina o oe o le faaiuga lea e te faia. Atonu e taumafai Satani e faatalitonu oe e faapea, e ui lava ina sa fesoasoani le Atua i isi, o le a Ia le fesoasoani ia te oe ona ua e loto vaivai ma leai sou faamoemoe. Ia e iloa lelei lea ituaiga o pepelo. O le mea moni, o oe o se atalii/afafine o le Atua. E faapefea ona fesoasoani lea malamalama ia te oe e faamaulalo ai oe lava?

O le filifiliga e amatalia le toe faaleleia

“O lou manao ia outou faamaulalo, ma ia gauai ma le agamalu ia ganagofie, ia tumau i le onosai ma le faapalepale, ia faatatau mea uma, ia filifili e le aunoa i le tausiga o poloaiga a le Atua, ia faatoga atu foi i mea uma ua matitiva ai outou i le faaleagaga atoa ma le faaletino, ma ia avatu le faafetai e le aunoa i le Atua i mea uma ua outou maua” (Alema 7:23).

• O le Laasaga 3 o se filifiliga. E tupu le toe faaleleia e ala i le mana o le Atua, ae seiloga e uma ona e filifili e sailia Lana fesoasoani. O lau faaiuga e tatalaina ai avanoa mo Lona mana e tafe atu i lou olaga. Mafaufau pe faapefea ona avea ma ni filifiliga le faamaulalo, onosai, agamalu ma isi mea faapena. O le uiga mulimuli o loo lisiina i le mau, o le loto faafetai. E faapefea ona fesoasoani le loto faafetai ia e lotomaulalo ai?

• O a isi uiga sa faaaofia e Alema i lenei lisi?

• O le fea o nei uiga e le o ia te oe?

• O le fea uiga e mafai ona e galue ai nei? O le a se mea e mafai ona e faia nei e amata ai?

Avea faapei o se tamaitiiti

“Aua o le tagata o le lalolagi o le ita i le Atua, ma ua faapea talu le pau o Atamu, e faapea foi e oo i le faavavau faavavau lava. Ae afai e gauai o ia i galuega alofa a le Agaga Paia, ma ua tuu ese le tagata o le agasala, ma ua avea o ia ma tagata amiotonu ona o le Togiola a Keriso le Alii; ma ua avea foi o ia e pei o le tamaitiiti, ua fia usiusitai, ma agamalu, ma faamaulalo, ma onosai, ma ua tumu i le alofa ma le fia gauai i mea uma ua silafia e le Atua e tatau ona faatiga ai o ia, e pei lava ona gauai le tamaitiiti i lona tama” (Mosaea 3:19).

• E toatele i tatou na i ai aafiaga i faiga faalealofa mai matua po o e sa vaaia, ma o le avea “faapei o se tamaitiiti” e luitauina, atonu foi e tau faamatau. Afai o i ai ni ou faafitauli e lei foiaina ma se matua, o le a se mea e mafai ona e faia e tuumavaevae ai ou lagona e faatatau i lou matua mai ou lagona e uiga i le Atua?

• E ui atonu o i ai ni faafitauli e faafoia ma ou matua faalelalolagi, e mafai ona e maua le toa lelei i lou Tama Faalelagi ma le Faaola, o ni tama atoatoa. Aisea e mafai ai ona e faatuatuaina le Tama Faalelagi ma le Faaola a o faamatuu atu lou olaga ia i Laua?

Talanoa ma le Atua

“Ona tootuli ai lea o [iesu] ua tatalo, ua faapea atu, Lou Tama e, a e finagalo i ai, ia e aveese lenei ipu ia te au: ae aua le faia lo’u loto, a o lou finagalo” (Luka 22:41–42).

• I lenei tatalo, sa faaalia e le Faaola Lona loto naunau e gauai atoa atu i le Tama. Sa la faaali atu Ona manaoga ona [Ia] faia lea o le finagalo o Lona Tama. Mafaufau i faamanuiaga o le mafai ona tau atu o ou lagona i le Atua. E faapefea ona fesoasoani le iloa e malamalama o Ia i lou faalotolotolua, ou tiga, ma po o a lava ou lagona, e fesoasoani e te fai atu ai “Ia faia lou finagalo,” ma lou loto atoa i ai?